Mi son nassesto nela Olanda in 1948. Dopo de un ano, la me fameia la ze ndata de star in São Paulo, nel Brasil. Nel ano de 1959, semo ndati de star in Massachusetts, nei Stati Unidi. I me genitori i ndea sempre ala ciesa e noantri sempre ledeino la Bìblia dopo dela sena.

Noantri èrino in 8 persone là casa. Me pare el laorea tanto par tender dela fameia. Lu el ga laorà con arquante robe. Par esémpio, el ga laorà de vendedor, el ga giutà a far su strade e el ga anca laorà par una empresa che la vendea viai de avion. La nostra fameia la ze restada contenta con quel laoro lì parché podeino viaiar tanto.

Quando mi ndea a scola, tante volte mi pensea: “Cossa vao far quando vegno grando?”. Dopo de arquanti ani, tanti dei me amighi i ga scoliesto studiar nte una università e altri i ga scoliesto ndar al esèrsito. Mi no volea ndar al esèrsito parché no me piasea de barufar coi altri. Alora, pitosto de ndar al esèrsito, mi go scoliesto ndar ala  università. Ma mi pensea che sol podaria esser felice se fesse qualcossa par giutar i altri.

Mi sempre me domandea come la vita la ga bio scomìnsio, par quela che me piasea imparar sora quel lì nela università. I maestri i ne insegnea che le robe le ze state creade lore sole e i volea che credessino in questo. Ma l’era pròpio fadiga creder in quele robe parché no ghen’era prove.

Nela università, impareino come esser siori e persone importante, e nò la difarensa intrà quel che l’è giusto e quel che l’è sbalià. Mi restea contento quando ndea ale feste e doperea droghe, ma dopo mi me domandea: “Cossa son drio far in questo mondo?”

In quela època, son ndato de star nela cità de Boston e go scominsià a studiar nte una università lì. Quando no ero drio studiar, mi laorea par pagar la università. In questo laoro, go cognossesto un omo che l’era Testimònia de Geovà. Lu el me ga spiegà la professia de Daniel sora i “sete tempi” e che èrino drio viver nel tempo del fin. (Dan. 4:13-17) Presto son nicorto che se seitéssino a discorer, me tocaria cambiar arquante robe nela me vita. Alora, no go pi parlà con lu.

Se mi volesse, la università la podaria pareciarme par ndar giutar nela Amèrica del Sud. Mi pensea che se ndesse giutar i altri, restaria pi contento. Ma go visto che questo no’l ndaria giutarme a gaver una vita felice. Son restà tanto disgustà e me go fermà de studiar nela università.

In maio de 1970, son ndato de star in Amsterdan, nela Olanda, e go scominsià a laorar nel medèsimo posto che me pare. Par causa de questo laoro, mi viaiea tanto. Par esémpio, son ndato fin la Àfrica, la Amèrica, la Europa e la Àsia. In tuti questi posti, go visto che le persone le infrontea tante dificoltà e no le era bone de dàrghene fora con lore. Questo me ga dato voia de far qualcossa che fusse importante. Alora, son tornà ai Stati Unidi e a studiar nela università in Boston.

Gnanca cossita, son stà bon de catar le risposte ale me domande sora la vita. Come no savea cossa far, go domandà aiuto al me maestro. Alora, el me ga dito: “Parché no te te fermi de studiar?” E l’è pròpio questo che go fato, e mai son tornà a studiar lì.

Anca cossita, no ero contento. Alora, go scominsià a ndar insieme a persone che le vivea sensa preocuparse con gnente e che le parlea tanto de pace e amor. Mi e arquanti amighi ghemo viaià dei Stati Unidi fin Acapulco, nel Mèssico. Mi vivea in meso de queste persone. Ma suito go visto che no le era felice, che le fea tante robe sbaliade e no le era leai coi altri.

In quel tempo, me go ricordà de una roba che go sempre volesto far. Mi volea gaver el me barco e comandarlo nte un viaio nel mar.  Par quela me tocaria comprar un barco. Anca el me amigo, Tom, el volea far un viaio cossita. Mi volea catar una ìsola tanto bela e restar distante de tute le persone.

Prima, mi e Tom semo ndati fin Arenis del Mar, darente de Barcelona, nela Spagna. Là noantri ghemo comprà un barco che el gavea un poco de pi che 9 metri. El barco el gavea nome Llygra e ghemo scominsià a rangiarlo su. Come no gaveino prèssia par rivar ndove voleino, ghemo cavà via el motor del barco e ghemo doperà quel posto par meter àqua par bever. Par far el barco ndar ndove voleino nei porti, gaveino due remi de 5 metri cada. Quando l’era tuto parecià, ghemo scominsià el nostro viaio par Seychelles, nel Mar Ìndico. Noantri voleino viaiar par el oeste dela Àfrica fin rivar al Cabo dela Bona Speransa nela Àfrica del Sud. Par far el viaio, gaveino un mestier par giutarne a saver ndove èrino, dopereino anca le stele, mapi e arquanti libri. Mi restea maraveià de veder che èrino boni de catarse con quei mestieri.

Suito ghemo visto che no èrino boni de ndar avanti con quel barco vècio. Vegnea rento el barco 22 litri de àqua par ora. In questo viaio, ne ga sucedesto quel che go contà nel scomìnsio. Son restà tanto spaurà in quela tempesta che go pregà la prima volta dopo de tanto tempo. Mi go dito a Dio che, se no morìssino, mi ndaria proar cognosserlo. La tempesta la se ga fermà e go fato quel che go dito a Dio.

Mi go scominsià a leder la Bìblia intanto che viaieino nel mar. L’era tanto bel esser in meso el mar, in meso pessi pìcoli e grandi e esser bon de veder distante. De note, mi restea tanto maraveià de veder le stele. Mi ero cada volta pi sicuro che ghen’era un Dio che el ghe vol tanto ben ale persone.

Dopo de un tempo, semo rivadi nel porto de Alicante nela Spagna. Voleino vender el nostro barco vècio par comprar un pi novo. Ma nissun volea comprarlo parché l’era vècio, no’l gavea motor e vegnea tanta àqua rento. Intanto che speteino, mi seitea a leder la Bìblia.

Mi son restà maraveià de veder che la Bìblia la pol giutarne a gaver una vita felice e a far quel che l’è polito. Ma mi me domandea parché che quei che i disea ndar drio a Cristo no i fea quel che la Bìblia la dise.

Mi gavea dessidio scominsiar a far quel che l’è giusto anca che me tochesse cambiar tante robe nela me vita. Par esémpio, me go fermà de doperar droghe. Mi anca pensea che ghen’era altre persone che le era drio far quel che la Bìblia la dise, e mi volea tanto catarle. Par quela, go pregà a Dio nantra volta e ghe go domandà che el me giutesse a farlo.

Mi pensea che me tochea cognosser tute le religion par capir quala che la era la vera. Quando mi ero drio caminar in Alicante, go visto tante ciese. Come tante de queste ciese le gavea imàgine, l’è stà fàcile capir che gnanca una la era la vera religion.

 Nte una doménega dopo mesdì, ero davanti el porto e ero drio leder Tiago 2:1-5 che el parla che l’è sbalià tratar i siori meio che i altri. Quando ero drio tornar al barco, go passà davanti un posto che ghen’era scrito “Salon del Regno dele Testimònie de Geovà”.

Mi go pensà: “Vedemo come i va tratarme.” Alora, son ndato rento el Salon sensa gnente nei pié, cola barba e cole braghe sbregade. Un fradel el me ga mostrà el posto par sentarme. Dela me banda, ghen’era una cara sorela pi vècia che la me ga giutà a catar i testi dela Bìblia. Dopo dela riunion, son restà maraveià parché tuti i me tratea tanto ben e i vegnea saludarme. Un fradel el me ga convidà par ndar nela so casa par noantri ciacolar. Come mi no gavea ancora finio de leder la Bìblia, go dito: “De qua un tempo se parlemo.” Dopo de quel giorno, go scominsià a ndar a tute le riunion.

Dopo de arquante stimane, son ndato ala casa de quel fradel par lu risponder ale me domande. Dopo de una stimana, lu el me ga dato tante robe bele de meterghe su e el ga dito che le era de un fradel che l’era in preson. Lu l’era in preson parché el fea quel che la Bìblia la dise de amar un al altro e no ndar ala guera. (Isa. 2:4; Gioani 13:34, 35) Ero sicuro che mi gavea catà le persone che le fea quel che la Bìblia la dise. Mi no volea pi catar una ìsola tanto bela, ma studiar tanto la Bìblia. Dopo, son tornà ala Olanda.

Dopo de quatro giorni de viaio, son rivà ala cità de Groningen, nela Olanda. Mi gavea de catar un laoro. Go proà catar un laoro de marangon. Nte un posto che son ndato in serca, mi gavea de risponder a arquante domande, e una dele domande la era de che religion mi ero. Quando go rispondesto che ero Testimònia de Geovà, el paron el me ga vardà e el me ga dito che el ndaria ciamarme. Ma no’l me ga mai ciamà.

Son ndato proar catar laoro de marangon in nantro posto. Alora, el paron el me ga domandà cossa mi gavea studià e se gavea laorà in qualche altro posto. Mi ghe go dito che gavea rangià un barco de legno. Lu el me ga dito che mi podea scominsiar ancora in quel giorno. Ma el me ga dito che mi gavea de far tuto polito parché lu  l’era Testimònia de Geovà e el fea quel che la Bìblia la dise. Mi ghe go dito: “Anca mi son Testimònia de Geovà.” Ma come mi gavea i cavei longhi e la barba, lu el savea che no ero mia. Lu el me ga dito: “Alora vao studiar la Bìblia con ti.” Mi son restà tanto contento e ghe go dito de si. In quela ora, go capio parché quelaltro omo no’l me gavea mai ciamà. Geovà volea darme quel che mi ghe gavea domandà. (Sal. 37:4) Mi go scominsià a laorar par quel fradel, ghemo studià la Bìblia par un ano e me go batesà in genaro de 1974.

Un mese dopo, go scominsià a laorar come pioniero, e far questo laoro me assea tanto contento. Un mese dopo, son ndato de star in Amsterdan par giutar a predicar in spagnol nte un novo grupo che ghen’era lì. Mi restea tanto contento de far studi bìblichi in spagnol e in portoghese. Nel ano de 1975, mi go scominsià a laorar de pioniero spessial.

Un giorno, una pioniera spessial de nome Ineke la ze vegnesta ala nostra riunion par portar la so studiante dela Bolìvia. Mi e Ineke ghemo scominsià a cognosserse par meso de carte e suito ghemo visto che voleino far le medèsime robe nel laoro a Geovà. Se ghemo maridà in 1976 e ghemo laorà come pionieri spessiai fin 1982. Dopo, semo ndati far la Scola de Gileade de nùmero 73. Semo restadi contenti de esser mandadi par el oeste dela Àfrica. Ghemo laorà sinque ani in Mombassa, nel Quénia. Nel ano de 1987, semo stati mandadi ala Tanzània e l’era poco tempo che i nostri fradei lì i era lìberi par predicar. Semo restadi nela Tanzània par 26 ani e dopo semo tornadi al Quénia.

Giutar le persone a imparar sora la Bìblia ne ga fato esser tanto felici. Par esémpio, el me primo studiante dela Bìblia l’è stà un omo che lo go catà nela predicassion. Mi ghe go dato due reviste, ma el me ga dito: “Cossa gonti de far dopo che finisso de leder queste reviste?”. Alora, nela pròssima stimana, ghemo scominsià el stùdio nel libro Poderá Viver Para Sempre no Paraíso na Terra, che ghen’era a poco tempo nela léngua suaíli. Dopo de un ano, lu el se ga batesà e l’è deventà pioniero regolar. Lu e la so sposa i ga belche giutà quasi sento persone a batesarse.

Quando go capio parché Dio el ne ga creà, me go sentio come un omo che Gesù el ga parlà. Questo omo el ga catà una pèrola che la valea tanto e la ga tegnesto de conto. (Mat. 13:45, 46) Mi go dessidio doperar la me vita par giutar i altri a gaver una vita felice. Mi e la me cara dona ghemo una vita tanto felice cola benedission de Geovà!