1-2. Parché che volemo mostrar amor leal ai altri?

NOANTRI volemo mostrar amor leal par causa de arquante robe. Par esémpio, el libro de Proverbi el dise che quel che el seita a mostrar amor leal l’è pressioso par Dio e par le persone. Questo libro anca el dise che quel che l’è leal l’è drio far el ben a lu stesso e che el pol viver par sempre. — Pro. 3:3, 4; 11:17; 21:21.

² Questi proverbi i ne giuta a capir parché che l’è tanto importante mostrar amor leal. Primo, parché deventemo pressiosi par Dio. Secondo, parché l’è el meio par noantri stessi. Par esémpio, se semo leai, ghemo veri amighi. Terso, podemo ricever tante benedission, come la vita eterna. Par quela che volemo obedir a Geovà e ‘tratar i altri con amor leal e misericòrdia’. — Zac. 7:9.

3. Che domande ndaremo risponder in questo stùdio?

³ In questo stùdio, ndaremo risponder a quatro domande: ‘A chi che ghemo de mostrar amor leal? Cossa che imparemo sora amor leal con Rute, Noemi e Boaz? Come che podemo mostrar amor leal? Che robe bone sucede a quei che i mostra questa qualità?’

4. Come che podemo far compagno a Geovà? (Marco 10:29, 30)

⁴ Come ghemo imparà in quelaltro stùdio, Geovà el  ndarà amar par sempre, o sia, mostrar el so amor leal sol a quei che i lo ama e i lo serve. (Dan. 9:4) E noantri volemo mostrar amor leal compagno al nostro Pare, Geovà. (Efe. 5:1) Come che femo questo? Ghemo de mostrar amor leal a tuti i nostri fradei. — Ledi Marco 10:29, 30. *

5-6. Cossa che arquante persone le pensa che la ze la lealtà?

⁵ Se capimo cossa che l’è el amor leal, sarà pi fàcile mostrarlo ai altri. Alora, par giutarne a capirlo meio, ndaremo veder cossa le persone le pensa che la ze la lealtà e cossa la vol dir. Vedemo un esémpio.

 ⁶ Tanti i pensa che una persona che la laora tanti ani nte un medèsimo posto la ze leal. Ma, pol esser che questa persona no la ga mai cognossesto i so paroni, o che no la sìpia de acordo cola maniera che le robe le ze fate lì. Questa persona no la ama questo laoro, ma lo fà parché la ciapa i soldi che la ga de bisogno. Alora, se la ga voia de catar nantro laoro o se la vol ndar via, la va.

7-8. (a) Parché che una persona la mostra amor leal? (b) Cossa che ndaremo imparar sora amor leal nel libro de Rute?

⁷ La lealtà che parla nel  paràgrafo 6 e el amor leal i ze difarenti parché el amor leal l’è una qualità che la persona la mostra de cuor. Parché che i servi de Dio del passà i ga mostrà amor leal un al altro? Parché i volea, e nò parché ghe tochea farlo. Varda el esémpio de Davi. Lu el savea che Saul, el pare de Gionatan, el volea coparlo. Ma Davi el ga volesto mostrar amor leal al so amigo, Gionatan. Anca dopo dela morte de Gionatan, Davi el ga seità a mostrar questo amor al fiol de Gionatan, che l’era Mefibosete. — 1 Sam. 20:9, 14, 15; 2 Sam. 4:4; 8:15; 9:1, 6, 7.

⁸ Podemo imparar tanto sora amor leal nel libro de Rute. Cossa che podemo imparar sora el amor leal che le persone de questo libro le ga mostrà? Come che podemo mostrar questo amor leal ai nostri fradei? *

9. Parché Noemi la ga pensà che Geovà l’era contra ela?

⁹ El libro de Rute el conta la stòria de Noemi, dela so nora Rute e de Boaz. Boaz l’era dela fameia del omo de Noemi e el amea tanto a Geovà. El libro el conta che le persone de Israel le era drio patir de fame e che, par causa de questo, Noemi, so omo e i so due fioi i ze ndati de star a Moabe. In Moabe, el so omo l’è morto e i so due fioi i se ga maridà. Ma dopo de un tempo, anca lori i ze morti. (Rute 1:3-5; 2:1) Noemi la ze restada tanto desanimada par causa de tute queste robe brute che ghe ga sucedesto. La era tanto desanimada che la ga dito che l’era Geovà che l’era drio farla sofrir. La ga anca dito che el Tuto Poderoso el gavea fato la so vita deventar tanto amara, che lu l’era contra ela e che l’era drio farla tribolar tanto. — Rute 1:13, 20, 21.

10. Cossa che Geovà el ga fato dopo che el ga scoltà Noemi?

 ¹⁰ Cossa che Geovà el ga fato dopo che el ga scoltà Noemi? Lu el ga capio come la se sentia e no la ga abandonà. Geovà el sa che una persona che la ga sabedoria la pol deventar mata quando la sofre. (Ecl. 7:7) Noemi la gavea bisogno de aiuto par capir che Geovà l’era drio giutarla. (1 Sam. 2:8) Cossa che Geovà el ga fato? Geovà el ga doperà Rute par mostrar amor leal a Noemi. Con amor, Rute la ga giutà Noemi a dàrghene fora col desànimo e la ga assà sicura che Geovà la amea. Cossa che imparemo del esémpio de Rute?

11. Parché fradei e sorele i se sforsa par giutar a quei che i ze desanimadi?

¹¹ Par causa del amor leal, giutemo a quei che i ze desanimadi. Ancoi, fradei e sorele anca i mostra amor compagno a Rute quando i se sforsa par giutar a quei che i ze desanimadi. Lori i ama i so fradei e i vol tanto far qualcossa par giutarli. (Pro. 12:25; 24:10) Lori i ze drio far quel che el apòstolo Paolo el ga dito: ‘Gavé de consolar quei che i ze desanimadi, de giutar i fiachi e de gaver passiensa con tuti.’ — 1 Tes. 5:14.

12. Come podemo giutar una persona che la ze desanimada?

¹² Podemo giutar una persona che la ze desanimada quando la scoltemo e la assemo sicura che la amemo. Geovà el resta tanto contento quando mostremo amor e ghe demo atension ai so cari servi. (Sal. 41:1) L’è tanto bel quel che dise Proverbi 19:17: ‘Quei che i giuta i poareti i ghe dà in prèstio a Geovà, e lu el ndarà ricompensarli par quel che i ga fato.’

13. (a) Cossa che Rute e Orpa le ga dessidio far? (b) Parché quel che Rute la ga fato ga mostrà el so amor leal par Noemi? (Vedi la ilustrassion dela prima pàgina.)

¹³ Quando studiemo quel che ga sucedesto dopo che el omo e i due fioi de Noemi i ze morti, podemo capir meio cossa l’è el amor leal. Quando Noemi la ga savesto che Geovà l’era drio benedir el so pòpolo con magnar, la ga dessidio tornar a Israel. (Rute 1:6) Le due nore de Noemi le ga dessidio tornar insieme. Nel viaio, Noemi la ga dito tre volte che lore le tornesse ale so case. Alora, Orpa la ga basà la so sòcera e la ze tornada casa. Ma, Rute la ga volesto seitar a ndar insieme con Noemi. (Rute 1:7-14) Orpa la ga fato quel che Noemi la ghe gavea dito, ma Rute la ga fato de pi de quel che Noemi la spetea. Anca Rute la podea tornar casa, ma par causa del amor leal, la ze restada con Noemi par giutarla. (Rute 1:16, 17) La ga fato questo parché la ga volesto, e nò parché ghe tochea. Cossita, Rute la ga mostrà  un grando amor leal. Cossa che imparemo?

14. (a) Come che tanti fradei e sorele i fà come Rute? (b) De acordo con Ebrei 13:16, come che podemo assar Geovà contento?

¹⁴ Par causa del amor leal, se sforsemo ancora de pi par giutar i fradei. Come i servi de Dio del passà, mostremo amor leal par i nostri fradei, anca se no li cognossemo. Par esémpio, quando sucede una desgràssia, suito proemo saver come giutarli. Quando ghe manca soldi a qualchedun dela nostra congregassion, suito femo qualcossa par giutarlo. Proemo far come i fradei de Massedónia del passà. Lori i ga fato tuto quel che i podea par giutar i fradei anca se i gavesse poco. (2 Cor. 8:3) Sicuro che Geovà el resta tanto contento quando mostremo amor leal ai fradei! — Ledi Ebrei 13:16. *

15-16. Come Rute la ga mostrà che no la ndaria desister de Noemi?

¹⁵ Podemo imparar tanto cola stòria de Rute e Noemi. Vedemo arquante robe.

¹⁶ No stà mia desister. Quando Rute la ga dito che la ndaria con Noemi, Noemi no la ga volesto. Ma Rute no la ga mia desistio. Cossa che ga sucedesto? Quando Noemi la ga visto che Rute la seitea a ndar insieme, la se ga fermà de dirghe che no la ndesse. — Rute 1:15-18.

17. Cossa che ndarà giutarne a seitar a darghe aiuto ai nostri fradei?

¹⁷ Cossa che imparemo? Ghemo de portar passiensa par giutar i nostri fradei che i ze desanimadi. Ma no ghemo de desister de giutarli par causa de questo. Par esémpio, fursi cognossemo una sorela che la ga bisogno de aiuto. * Fursi no la vol el nostro aiuto, ma el amor leal ne giutarà a no desister. (Gàl. 6:2) Noantri volemo che questa sorela la capissa che no ndaremo desister de proar giutarla.

18. Cossa che fursi ga assà Rute disgustada?

¹⁸ No stà pensar che la persona la ga volesto disgustarte a posta. Quando Noemi e Rute le ze rivade a Belen, Noemi la se ga catà con persone che la cognossea. Ela la ghe ga dito che, quando la ze ndata via de Belen, la gavea tuto, ma che Geovà ghe gavea fato tornar indrio sensa gnente. (Rute 1:21) Proa imaginar come Rute la se ga sentio de scoltar quel che Noemi la ga dito. Ela la gavea fato tuto quel che la podea par giutar a Noemi. Par esémpio, la ga piandesto insieme, la ghe ga dato consolo e la ga viaià arquanti giorni. Quando Noemi la ga dito che Geovà el ghe gavea fato tornar casa sensa gnente, parea che no la ghe dea valor a quel che Rute la gavea fato. Fursi, Rute la ze restada tanto disgustada, ma la ga seità a giutar Noemi.

19. Come saremo boni de seitar a giutar a quei che i ze desanimadi?

¹⁹ Cossa che imparemo? Imaginemo che semo drio far tanto sforso par giutar una sorela che la ze desanimada, e la parla qualcossa che ne assa disgustadi. Se questo sucede, no ghemo de pensar che la ga fato a posta. Ghemo de seitar a giutarla e ghemo de domandar che Geovà el ne giute a saver come consolarla. — Pro. 17:17.

20. Come Rute la ze stata bona de seitar a giutar Noemi?

 ²⁰ Ghemo de incoraiar i altri. Rute la ga mostrà amor leal par Noemi, ma anca ela la gavea bisogno de esser incoraiada. Par quela che Geovà el ga doperà Boaz par incoraiarla. Boaz el ga dito a Rute: ‘Che Geovà, el Dio che te sì vegnesta in serca de protession, el te benedissa tanto par tuto quel che te sì drio far.’ Queste parole le ga giutà tanto a Rute. Ela la ga dito a Boaz: ‘Te me ghè consolà e te ghè assà la to serva tanto pi tranquila.’ (Rute 2:12, 13) Boaz el ga parlà quel che Rute la gavea bisogno de scoltar. Cossita, la ze stata bona de seitar a giutar Noemi.

21. De acordo con Isaia 32:1, 2, cossa che i ansiani i fà?

²¹ Cossa che imparemo? Imparemo che anca quei che i mostra amor leal ai altri i ga bisogno de esser incoraiadi. Boaz el ga dito a Rute che lu el gavea visto quel che la era drio far par Noemi. Ancoi, i ansiani i mostra che i ze grati quando i loda i cari fradei che i giuta i altri. Cossita, questi fradei i ze boni de seitar a giutar i altri. — Ledi Isaia 32:1, 2. *

22-23. (a) Come savemo che Noemi la ga cambià la so maniera de pensar? (Salmo 136:23, 26) (b) Cossa ga giutà Noemi a cambiar?

²² Dopo de un tempo, Boaz el ga dato tanto de magnar a Rute e a Noemi. (Rute 2:14-18) Cossa che Noemi la ga fato? Ela la ga dito: ‘Che lu el sìpia benedio par Geovà, che no’l ga assà de mostrar amor leal par i vivi e par i morti.’ (Rute 2:20a) Noemi la ga cambià la so  maniera de pensar. Prima la gavea dito: ‘Geovà l’è contra mi.’ Ma, dopo, la ga dito tanto contenta: ‘Geovà no’l ga assà de mostrar amor leal.’ Cossa che la ga fato cambiar?

²³ Adesso sì Noemi la ze stata bona de veder che Geovà l’era drio giutarla. Pol esser che la gàpia pensà: “Adesso vedo che Geovà no’l me ga abandonà. Lu l’è restà insieme de mi tuto questo tempo.” (Ledi Salmi 136:23, * 26. *) Cossa che ga giutà Noemi a capir questo? L’è stà el aiuto de Rute nel viaio e el aiuto che Boaz el ga dato a lore due. (Rute 1:16; 2:19, 20b) Sicuro che Noemi la ze restada tanto grata, parché Rute e Boaz no i ga desistio de giutarla. Cossita, lori tre i ze restadi tanto contenti!

24. Parché volemo seitar a mostrar amor leal ai nostri fradei?

²⁴ Cossa ghemo imparà sora el amor leal nel libro de Rute? Ghemo imparà che ghemo de seitar a giutar i nostri fradei che i infronta dificoltà. El amor leal el ne giuta a far sforsi par giutarli. Ghemo imparà che anca quei che i mostra amor leal ai altri i ga bisogno de esser incoraiadi par i ansiani. Quando vedemo che i nostri fradei i ga alegria de seitar a servir a Geovà, anca noantri restemo contenti. (Ati 20:35) Ma parché che volemo pròpio mostrar amor leal? Parché volemo far come Geovà, che el ga tanto amor leal, e parché volemo contentarlo. — Éso. 34:6; Sal. 33:22.