1. Che domanda fursi se femo?

NOANTRI savemo che le religion false le sarà finide fora, che Goghe de Magoghe volerà finir col pòpolo de Dio e che ghen sarà la guera del Armagedon. Quando te pensi in queste robe, te resti ansioso? Fursi te te domandi: ‘Sarò bon de seitar leal?’ Se te ghè belche pensà cossita, el testo de questo stùdio el ndarà giutarte. Gesù el ga dito ai so dissìpoli che i gavesse fede in Dio e in lu, e che no i restesse ansiosi. (Gioani 14:1) Se la nostra fede la ze forte, no restaremo ansiosi con quel che ndarà suceder nel futuro.

2. Come che podemo gaver una fede pi forte, e cossa che ndaremo studiar adesso?

² Noantri ghemo de pensar in quel che femo quando infrontemo una dificoltà. Parché? Parché saremo boni de capir cossa ne manca far par gaver una fede pi forte. Quando semo boni de infrontar le dificoltà, la nostra fede la resta pi forte. Cossita, saremo anca boni de infrontar le dificoltà nel futuro. In questo stùdio, ndaremo ricordarse de quatro robe che i dissìpoli i ga infrontà che li ga fato capir che ghe ocorea una fede pi forte. Ndaremo anca veder robe che le pol suceder con noantri, e come le pol pareciarne par quel che ndarà suceder nel futuro.

3. De acordo con Mateo 6:30, 33, cossa Gesù el ga parlà sora la fede?

³ Quei che i ze paroni de fameia i se preocupa tanto de dar ala so fameia quel che la ga de bisogno. Ma questo pol esser fadiga parché tanti fradei no i ga pi el so laoro e no i ze boni de catar nantro. Arquanti no i ga acetà un laoro parché ghe volea far qualcossa che disgustesse a Geovà. Se questo l’è drio suceder con ti, fìdate che Geovà el ndarà dar ala to fameia tuto quel che ghe ocore. Gesù el ga parlà pròpio questo  ai so dissìpoli nel discorso che el ga fato nel monte. (Ledi Mateo 6:30, * 33. *) Quando semo sicuri che Geovà el ndarà tenderne, semo boni de seitar a meter el Regno in primo posto. Quando vedemo che Geovà el ne giuta, lu el deventa ancora de pi nostro amigo e la nostra fede la resta pi forte.

4-5. Cossa ga giutà la fameia Castro a dàrghene fora cola ansietà?

⁴ Varda come Geovà el ga giutà una fameia nela Venesuela a dàrghene fora cola ansietà. La fameia Castro la guadagnea i soldi che la gavea de bisogno par causa del so laoro in colònia. Ma arquanti òmini con sciope in man li ga parà via e i ga ciavà la so tera. Questo li ga assà tanto ansiosi. Miguel, che l’è el paron dela fameia, el ga dito: “Ancoi, ghemo i soldi che ne ocore par viver parché una persona la ne ga assà piantar nela so tera. La prima roba che fao tuti i giorni l’è domandar a Geovà che el ne dae quel che ghemo de bisogno par quel giorno.” Sicuro che la vita de questa fameia no la ze fàcile, ma lori i se fida che Geovà el ndarà tenderli. La fameia Castro la ga una forte fede, par quela, lori i seita a ndar ale riunion e ala predicassion. El so laoro a Geovà l’è la roba pi importante nela so vita e Geovà el ghe dà quel che ghe ocore.

⁵ In quel tempo, Miguel e la so dona, Yurai, i era atenti in come Geovà l’era sempre drio tenderli. Par esémpio, Geovà el ga doperà fradei par darghe quel che i gavea de bisogno o par giutar Miguel a catar un laoro. Altre volte, Geovà li ga tendesto par meso del Aiuto Umanitàrio che la filial la dà. La fede dela fameia Castro la ze restada pi forte parché Geovà no li ga mai abandonà. Quando la fiola pi vècia, Yoselin, la era drio parlar sora un aiuto che Geovà li gavea dato, la ga dito: “L’è pròpio bel veder come che Geovà el ne giuta. Lu l’è el me meio amigo e mi sò che el va sempre giutarme. Le robe che ne ga sucedesto le ne ga parecià par quel che ndarà suceder pi avanti.”

6. Come che te pol far pi forte la to fede quando no te ghè i soldi che te ocore par viver?

⁶ Sicuro che restemo tanto preocupadi se no ghemo i soldi che ne ocore par viver. Questo l’è drio suceder con ti? Alora, dopera el to tempo par far pi forte la to fede. Come che te pol farlo? Prega a Geovà e pensa sora le parole de Mateo 6:25-34. Pensa anca in come Geovà l’è drio tender dei so servi fedeli ancoi. (1 Cor. 15:58) Cossita, te sarè sicuro che Geovà el sa de quel che te ghè de bisogno e che el ndarà tender anca de ti. Sentir el aiuto de Geovà ndarà giutarte a gaver una fede pi forte e a infrontar le dificoltà che vegnarà pi avanti. — Aba. 3:17, 18.

7. I dissìpoli i ga infrontà una bruta tempesta. De acordo con Mateo 8:23-26, come la era la so fede?

⁷ Gesù e i so dissìpoli i era drio far un viaio de barco, e de colpo, ga scominsià una tempesta. La tempesta la restea cada volta pi bruta e vegnea tanta àqua rento el barco, ma Gesù el seitea a dormir. I dissìpoli i ze restadi tanto spauradi e i ga desmissià Gesù par domandarghe che li giutesse. Alora, Gesù el ga doperà quel lì par mostrarghe che i gavea bisogno de pi fede. (Ledi Mateo 8:23-26. *) Con amor, Gesù el ghe ga domandà: “Parché che valtri gavé tanta paura e parché che ve manca fede?” I dissìpoli belche i gavaria de esser sicuri che Geovà el ndaria proteger a Gesù e a lori. Cossa che imparemo? Imparemo che una forte fede pol giutarne a infrontar brute tempeste e le dificoltà dela vita.

8-9. Cossa che Anel la ga infrontà, e cossa che la ga giutà?

⁸ Varda el esémpio de Anel, una sorela nò maridada de Porto Rico. Nel ano de 2017, ga sucedesto una bruta tempesta nel posto che la stea. Par causa de questa tempesta, la ga perso la so casa e el so laoro. Ma infrontar questa dificoltà ga fato pi forte la so fede. Ela la ga dito: “Mi son restada tanto ansiosa, ma go pregà a Geovà e go fato le robe che ghe volea. Cossita, go imparà che posso sempre fidarme in Geovà.”

⁹ Anel la ga parlà de nantra roba che la giutà a infrontar quela dificoltà. Ela la ga dito: “Mi go obedio a quel che la organisassion de Geovà la dise, alora, son restada pi tranquila. Mi go visto che Geovà l’era drio doperar i fradei par giutarme, parché lori i me ga incoraià e i me ga dato tuto quel che gavea de bisogno. Geovà el me ga dato tanto de pi de quel che ghe go domandà, e la me fede la ze restada pi forte.”

10. Cossa che te pol far se te sì drio infrontar una bruta dificoltà?

¹⁰ Fursi te sì ansioso parché ga sucedesto una desgràssia nel posto che te sì de star, o fursi te sì desanimà par causa de una bruta malatia. Ma seita a fidarte cada volta de pi in Geovà. Come che te pol far questo? Prega a lu e ricordarte dele volte che el te ga belche giutà. (Sal. 77:11, 12) Sìpia sempre sicuro che Geovà no’l va mai abandonarte.

11. Parché che ghemo de obedir ai fradei che Geovà e Gesù i dopera par giutarne?

¹¹ Come ghemo visto nel esémpio de Anel, anca la obediensa la ndarà giutarne a infrontar le dificoltà. Noantri ghemo de imparar a fidarse nei fradei che Geovà  e Gesù i dopera par giutarne. Pol esser che no ne par giusto qualche consili che i ne dà, ma ghemo de ricordarse che Geovà el benedisse a quei che i ze obedienti. Cossa pol giutarne a esser sempre obedienti? Studiar la Bìblia e esempi de servi fedeli de Dio che no i ze morti parché i ga obedio. (És. 14:1-4; 2 Cró. 20:17) Questo ndarà giutarne a capir che obedir l’è sempre la meio roba de far, e a esser sempre obedienti ala organisassion de Geovà. (Ebr. 13:17) Alora, noantri saremo boni de infrontar la granda tribolassion. — Pro. 3:25.

12. Ghemo bisogno de una forte fede quando qualchedun no’l ne trata con giustìssia. Come che la ilustrassion de Luca 18:1-8 la ne giuta a capir questo?

¹² Gesù el savea che i so dissìpoli i gavaria bisogno de una forte fede quando qualchedun no li tratesse con giustìssia. Par giutarli a infrontar questo, Gesù el ghe ga contà la ilustrassion de una védova. Questa védova la seitea domandar al giuis che ghe fesse giustìssia. Ela la era sicura che lu el ndaria scoltarla se la fesse questo. Dopo de un tempo, el giuis el ga fato quel che la ghe gavea domandà. Se anca quel giuis el ga scoltà, imagina Geovà! Gesù el ga dito: “Sarà che Dio no’l farà giustìssia con quei che el ga scoliesto? Lori i lo ciama di e note e lu l’è passiente con lori.” (Ledi Luca 18:1-8. *) E Gesù el ga anca dito: “Ma, quando rivarà el Fiol del Omo sarà che el catarà persone sora la tera con questa fede?” Cossa che imparemo de questo? Quando qualchedun no’l ne trata con giustìssia, ne toca gaver la medèsima fede che la védova. Noantri mostremo una fede cossita quando se fidemo che Geovà el ndarà far giustìssia e seitemo a far quel che l’è giusto. Ghemo anca de esser sicuri che Geovà sempre el ne scolta quando preghemo a lu e che el pol risponderne de maniere che gnanca no spetemo.

13. Come che pregar a Dio ga giutà una fameia?

¹³ Varda el esémpio dela sorela Vero che la ze de star nela Repùblica Democràtica del Congo. Vero, so omo e la so fiola de 15 ani i ga bio de scampar via de casa parché òmini rugni i ze ndati rento la so pìcola cità. Ma, quando i era par la strada,  arquanti de questi òmini li ga catà e i ga dito che i ndaria coparli. La sorela Vero la ga tacà piander. Alora, la so fiola la ga scominsià a pregar in alta voce e la ga parlà arquante volte el nome Geovà. Par causa de questo, un de quei òmini el ghe ga domandà: “Ciò tosa, chi che te ga insegnà a pregar cossita?” Ela la ga dito: “La me mare la me ga insegnà a pregar de acordo con quel che ghen’è in Mateo 6:9-13.” Alora, el omo el ghe ga dito: “Valtri podé ndar avanti e che Geovà, el vostro Dio, el ve dae protession!”

14. (a) Parché che ghemo bisogno de una forte fede quando preghemo? (b) Cossa che ndarà giutarte a seitar a infrontar le dificoltà?

¹⁴ Ghemo capio che pregar a Dio l’è tanto importante. Ma ghemo bisogno de una forte fede quando preghemo parché pol esser che Geovà no’l ne risponde nela ora che volemo o dela maniera che spetemo. Cossa ghemo de far se questo l’è drio suceder con noantri? Ghemo de seitar a domandarghe come la védova dela ilustrassion de Gesù. Alora, seita a domandar spìrito santo a Geovà, fìdate che no’l ndarà mai abandonarte e che el ndarà risponderte nela ora giusta. (Fil. 4:13) Ricòrdate che suito ghen sarà un mondo meio e che no te ndarè gnanca pensarte de tuto questo sofrimento. Quando te infronti le dificoltà col aiuto de Geovà, te fè pi forte la to fede e te sì pi parecià par infrontar le robe che sucederà avanti. — 1 Pie. 1:6, 7.

15. De acordo con Mateo 17:19, 20, che dificoltà i dissìpoli de Gesù i ga infrontà?

¹⁵ Gesù el ga insegnà ai so dissìpoli che la fede la ghe giutaria a dàrghene fora cole dificoltà. (Ledi Mateo 17:19, 20. *) Par esémpio, i dissìpoli i era boni de parar via demoni de una persona, ma nte colpo no i ze stati boni de farlo. Parché? Gesù el ghe ga dito che ghe ocorea gaver de pi fede e che i se gavesse una forte fede i saria boni de mover i monti. Questo vol dir che i saria boni de infrontar anca le pedo dificoltà. Anca ancoi podemo infrontar brute robe che ne fà fadiga dàrghene fora.

16. Come la fede la ga giutà Geydi a infrontar una bruta desgràssia?

¹⁶ Varda el esémpio dela sorela Geydi dela Guatemala. El so omo, Edi, l’è stà copà quando lori i era drio tornar casa dela riunion. Come la fede la ga giutà Geydi a infrontar questa bruta desgràssia? Ela la ga dito: “Quando mi preghea a Geovà, mi ghe parlea tuto quel che ero drio sentir, e questo me dea pace. Geovà el me ga tendesto par meso dela me fameia e dei fradei. Me go sempre sforsà de far tanto par Geovà e questo me ga giutà a dàrghene  fora col dolor e cola ansietà. Mi go imparà che, col aiuto de Geovà, Gesù e dela organisassion, sarò bona de infrontar tute le dificoltà.”

17. Cossa pol giutarte a infrontar le dificoltà?

¹⁷ Te sì drio sofrir parché qualchedun che te ami l’è morto? Alora, torte el tempo par studiar i esempi dela Bìblia de persone che le ze tornade a viver. Questo farà pi forte la to fede nela ressuression. Sito drio sofrir parché qualchedun dela to fameia el ga abandonà a Geovà? Alora, stùdia par esser ancora pi sicuro che la dissiplina de Geovà la ze la meio. Ma, cossa te pol far se te sì drio infrontar altre dificoltà? Sfòrsate de doperarle par far pi forte la to fede. Parla sora tuto quel che te sì drio sentir a Geovà e sìpia insieme dei to fradei. (Pro. 18:1) Sfòrsate de far robe che le ndarà giutarte, anca che le te fae ricordar de quel che l’è drio suceder con ti. (Sal. 126:5, 6) Seita a ndar ale riunion, ala predicassion, a leder la Bìblia e a pensar in quel che Geovà el promete par el futuro. Cossita, te ndarè veder che Geovà l’è drio giutarte, e la to fede la restarà pi forte.

18. Cossa te pol far se te vedi che te ocore de pi fede?

¹⁸ Se te vedi che te ocore de pi fede, no stà desanimarte. Pitosto, fàghela pi forte. Come che te pol farlo? Par esémpio, fà compagno ai apòstoli de Gesù che i ga domandà de pi fede. (Luc. 17:5) Te pol anca far compagno ai esempi che ghemo visto in questo stùdio. Come Mighel e Yurai, ricòrdate de tute le volte che Geovà el te ga belche giutà. Come Anel e la fiola de Vero, seita a pregar a Geovà, e prega ancora de pi quando te sì drio infrontar brute dificoltà. Come Geydi, aceta el aiuto che Geovà el te dà par meso dela to fameia e dei to amighi. Se te assi che Geovà el te giute a infrontar le dificoltà adesso, te sarè ancora pi sicuro che el ndarà sempre giutarte.

19. (a) De cossa Gesù l’era sicuro? (b) De cossa ti te pol esser sicuro?

¹⁹ Come ghemo visto, Gesù el ga mostrà ai so dissìpoli che lori i gavea bisogno de pi fede. Ma, lu l’era sicuro che, col aiuto de Geovà, lori i saria boni de dàrghene fora con tute le dificoltà avanti. (Gioani 14:1; 16:33) Lu l’era anca sicuro che una mùcia de servi de Geovà i saria boni de infrontar la granda tribolassion par causa dela so fede. (Apo. 7:9, 14) Anca ti te pol esser intrà de lori? Si, par causa dela bontà de Geovà e se te fè cada volta pi forte la to fede ancoi. — Ebr. 10:39.