1-2. (a) Che domande ndaremo risponder in questo stùdio? (b) Come che savemo che Geovà l’è premoso par giutarne?

 GEOVÀ el pol giutarne a dàrghene fora cole nostre dificoltà e a seitar a servirlo contenti. In questo stùdio, ndaremo risponder a tre domande: ‘Sarà che Geovà el vol pròpio giutarne? De che maniere che lu el ne giuta? Come che podemo doperar ben tuto el aiuto che Geovà el ne dà?’

² Quel che el apòstolo Paolo el ga scrito nela so carta ai ebrei ne giuta a esser sicuri che Geovà el vol pròpio giutarne. Lu el ga dito: “Geovà l’è quel che me giuta, no gavarò mia paura. Cossa che pol farme i òmini?” (Ebr. 13:6) Arquanti studiosi i ga dito che, la parola “giutar” in questo testo, la ze doperada par parlar de una persona che la va suito salvar a qualchedun. Questo testo el ne giuta a capir che Geovà l’è premoso e che el fà presto par giutar quei che i ze drio sofrir. Alora, se Geovà l’è dela nostra banda, semo boni de seitar contenti anca cole dificoltà.

3. Che tre robe Geovà el fà par giutarne a infrontar le dificoltà e a seitar contenti?

³ Nel libro de Isaia, ndaremo imparar de che maniere Geovà el ne giuta a infrontar le dificoltà e a seitar contenti. Isaia el ga parlà sora Geovà de una maniera pròpio fàcile de capir, e arquante dele so professie le ze drio suceder ancoi. Par esémpio, nel capìtolo 30, Isaia el dopera bele ilustrassion par mostrar come che Geovà el giuta  el so pòpolo. Lu el ga scrito che Geovà el ne giuta (1) quando el scolta e el risponde ale nostre orassion, (2) quando el ne insegna cossa ghemo de far, e (3) cole so benedission che ricevemo adesso e che riceveremo nel futuro. Ndemo imparar de pi sora queste tre robe.

4. (a) Cossa che Geovà el ga parlà sora i giudei dei giorni de Isaia, e cossa galo assà che sucedesse con lori? (b) Che speransa Geovà el ga dato ai giudei fedeli? (Isaia 30:18, 19)

⁴ Nel scomìnsio del capìtolo 30 de Isaia, Geovà el ga dito che i giudei i era desobedienti e testardi, che lori i seitea a pecar contra lu e che no i volea mia scoltar le so lege. (Isa. 30:1, 9) Par quela, Geovà el ndaria assarli sofrir. (Isa. 30:5, 17; Ger. 25:8-11) E questo ga pròpio sucedesto quando i giudei i ze stati menadi a Babilònia. Magari, Isaia el ga dato una bela speransa par i giudei fedeli. Geovà el ga dito che lori i tornaria a Gerusalen dopo de un tempo. (Ledi Isaia 30:18, 19. b) Dopo de 70 ani, ga sucedesto quel che Geovà el ghe gavea prometesto, parché lu el ga liberà so pòpolo de Babilònia. (Isa. 10:21; Ger. 29:10) Ghe ga volesto tanto tempo fin che questo sucedesse, parché la professia la disea: “Geovà l’è drio spetar con passiensa par giutarve.” Dopo de sofrir e piander tanto in Babilònia, quei giudei i ze restadi tanto contenti quando i ze tornadi a Gerusalen.

5. De cossa che Isaia 30:19 ne assa sicuri?

⁵ Quel che dise Isaia 30:19 ne incoraia tanto: “Quando te ndarè domandar aiuto, sicuro che el ndarà giutarte.” Quel che Isaia el ga dito ne assa sicuri che Geovà el scolta le nostre orassion e che presto el ne giuta quando ghemo de bisogno. Isaia anca el ga dito: “Lu el ndarà scoltarte e el te risponderà suito.” Questo testo el ne giuta a ricordarse che Geovà el vol tanto giutar quei che i ghe domanda aiuto. Cossita, semo boni de perseverar contenti.

6. Come che quel che Isaia el ga dito mostra che Geovà el scolta le orassion de cada un de noantri?

⁶ El testo de Isaia 30:19 anca ne assa sicuri che Geovà el scolta la orassion de cada un de noantri. Come che lo savemo? Nel capìtolo 30 de Isaia, Geovà l’è drio parlar con tuto el pòpolo parché el dopera la parola “valtri”. Ma, nel versìcolo 19, Geovà el dopera la parola “ti” parché l’è drio parlar con cada un de lori. Isaia el ga scrito: “No te ndarè mai pi piander. Quando te ndarè domandar aiuto, sicuro che el ndarà giutarte.” Geovà l’è compagno a un pare che ghe vol tanto ben i so fioi. Par quela, lu mai el ndaria dir a un fiol che l’è desanimà: “Te ghè de esser forte compagno to fradel o to sorela.” Invesse, lu el se preocupa con cada un de noantri e el scolta quando preghemo a lu. — Sal. 116:1; Isa. 57:15.

7. Cossa che imparemo de quel che Isaia e Gesù i ga dito?

⁷ Quando semo drio infrontar un problema e ghe domandemo aiuto a Geovà, pol esser che suito lu el ne dae forsa. E cossa che ghemo de far se el problema no’l se finisse mia? Ghemo de far quel  che dise Isaia 62:7 e ‘no assar che lu el ripose’. Come cossita? Ghemo de pregar tante volte, come se no asséssino Geovà riposar. Anca Gesù el ga dito che ghemo de seitar a pregar e a domandar spìrito santo. (Luc. 11:8-10, 13) Ne ocore anca domandar che Geovà el ne dae la sabedoria par far bone scólie nela vita.

8. Come che ga sucedesto quel che dise Isaia 30:20, 21 nel passà?

⁸ Ledi Isaia 30:20, 21. c Quando el esèrsito de Babilònia el ga acampà intorno de Gerusalen par un ano e meso, i giudei i ga infrontà tante dificoltà. Ma i versìcoli 20 e 21 i mostra che, se lori i se ciamesse grami e i se fermesse de far quel che l’era sbalià, Geovà el ndaria giutarli. Isaia el ga dito che Geovà l’era el “Grandioso Istrutor”, e che el insegnaria el pòpolo a adorarlo dela maniera giusta. Ga sucedesto pròpio questo quando i giudei i ze stati liberadi de Babilònia. Noantri ancoi restemo tanto contenti de saver che Geovà l’è el nostro Grandioso Istrutor!

9. Quala che la ze una dele maniere che Geovà el ne insegna ancoi?

⁹ Dopo, Isaia el ga parlà che Geovà el ne insegna de due maniere. Quala che la ze la prima? Isaia el ga dito: “Ti te ndarè veder el to Grandioso Istrutor coi to oci.” Alora, l’è come se Geovà el fusse un istrutor o un maestro davanti a noantri, e noantri fùssino i so aluni. Come che Geovà el ne insegna? Par meso dela so organisassion. Par esémpio, lu el ne insegna nele riunion, nei congressi, nele publicassion e nel JW Broadcasting^®. Sicuro che ghe demo tanto valor a queste robe parché le ne giuta a seitar a servir a Geovà contenti anca se ghemo dificoltà.

10. Come che podemo scoltar la voce de Dio par de drio de noantri?

¹⁰ Adesso, vedemo la seconda maniera che Geovà el ne insegna. Isaia el ga dito che i giudei i ndaria scoltar una parola de qualchedun par de drio de lori. Qua, Isaia el ga mostrà che Geovà l’è come un istrutor che l’è par de drio dei so aluni par mostrarghe ndove che i ga de ndar.  Anca ancoi noantri scoltemo la voce de Dio par de drio de noantri. Come? Par meso dela so Parola, che la ze stata scrita tanti ani indrio. Alora, quando noantri ledemo la Bìblia, semo drio scoltar la voce de Geovà par de drio de noantri. — Isa. 51:4.

11. Cossa che ghemo de far par seitar a servir a Geovà contenti, e parché?

¹¹ El profeta Isaia anca el ga dito: “Questa la ze la strada. Ndé par ela.” (Isa. 30:21) Alora, no basta sol saver quala che “la ze la strada”, ghemo anca de ‘caminar par ela’. Par quela, quando Geovà el ne insegna par meso dela Bìblia e dela so organisassion, ghemo de saver quel che lu el vol che femo e meterlo in pràtica. Ghemo de far queste due robe par seitar a servir a Geovà contenti e par ricever le so benedission.

12. De acordo con Isaia 30:23-26, come che Geovà el ndaria benedir so pòpolo?

¹² Ledi Isaia 30:23-26. d Come che questa professia la se ga realisà quando i giudei i ze tornadi a Israel? Geovà li ga benedidi con tanto magnar e con tuto quel che ghe ocorea par esser so amighi e par adorarlo dela maniera giusta. El versìcolo 26 el mostra che Geovà el ga benedio tanto so pòpolo, e cossita, lori i ze stati boni de capir meio la so Parola. (Isa. 60:2) Geovà li ga benedidi come mai vanti. Cossita, quei giudei i podea servirlo contenti e con ancora de pi voia. — Isa. 65:14.

13. Come che la professia de Isaia la ze drio realisarse nei nostri giorni?

¹³ Sarà che la professia de Isaia 30:23-26 la ze drio suceder anca ancoi? Sicuro che si! Del ano de 1919 in qua, milioni de persone no le fà pi parte dele religion false del mondo, o sia, le ze ndate fora de Babilònia, la Granda. Lore le ze ndate a un posto tanto pi meio che la Tera Prometesta del Israel del passà. Lore le ze come che nte un posto ndove  le pol adorar a Geovà dela maniera giusta e in union. (Isa. 51:3; 66:8) Cossa che questo vol dir?

14. (a) Che bele robe tuti noantri podemo gaver ancoi? (b) Cossa che ghemo de far par gaver queste bele robe?

¹⁴ Nel ano de 1919, i untadi i ga scominsià a adorar a Geovà in union. E col tempo, anca i servi de Geovà che i ga la speransa de viver nela Tera i ga scominsià a farlo insieme. Questa la ze una roba pròpio bela. Par esémpio, semo lìberi dele busie dele religion false, ghemo tuto quel che ne ocore par gaver una forte fede in Geovà e ghemo tanta alegria de predicar le bone notìssie del Regno de Dio. Semo anca boni de gaver una bela amicìssia con Geovà, viver in pace coi nostri fradei, dàrghene fora cole dificoltà e seitar contenti. Noantri podemo gaver tute queste bele robe se adoremo a Geovà dela maniera giusta e se se sforsemo de far compagno el so esémpio. — Gioani 10:16; Isa. 25:6; 65:13.

15. Ndove che i servi de Geovà i pol adorarlo dela maniera giusta?

¹⁵ Ghen’è servi de Geovà che i lo adora dela maniera giusta in tuta la Tera. Par quela, anca ti te pol far questo no importa ndove che te sì de star. Come? Te ghè de sforsarte par adorar a Geovà dela maniera che lu el vol.

16. Cossa che ghemo de far par seitar a darghe valor ala nostra union?

¹⁶ Se volemo seitar a adorar a Geovà in union, ghemo de darghe valor ai nostri fradei in tuto el mondo. Come che podemo farlo? Ghemo de vardar le qualità dei nostri fradei e nò i so difeti. (Gioani 17:20, 21) Parché? Proa pensar che te sì nte un posto ndove ghen’è tante bele piante. Tute queste piante le ze difarente una del’altra e fursi le ga una parte che no la ze mia bela. Magari, invesse de vardar queste robe brute, noantri vardemo come che le piante le resta bele tute insieme. La medèsima roba la sucede nela congregassion, parché i fradei i ze difarenti un del altro. (Isa. 44:4; 61:3) Alora, no ghemo de star lì vardar i difeti dei fradei, parché se femo cossita, no ndaremo darghe valor ala union che ghen’è nela congregassion.

17. Cossa che cada un de noantri el ga de far par mantegner la union?

 ¹⁷ Cossa che cada un de noantri el ga de far par mantegner la congregassion unida? Ghemo de sforsarse par viver in pace con tuti. (Mat. 5:9; Rom. 12:18) Sempre che se sforsemo che ghen sìpia pace intrà tuti, femo ancora pi forte la nostra union. L’è stà Geovà che el ga fato cada un de noantri vegner ala so organisassion. (Gioani 6:44) Alora, pensa come che Geovà el resta contento de veder quando i so cari servi i se sforsa de mantegner la pace e la union. — Isa. 26:3; Ageo 2:7.

18. Sora cossa che ghemo de seitar a pensarghe sora, e parché?

¹⁸ Cossa che ghemo de far par ricever le benedission che Geovà el promete dar ai so servi? Ghemo de pensar sora quel che studiemo nela Parola de Dio e nele publicassion. Cossita, gavaremo altre qualità che ghe piase a Geovà e saremo boni de mostrar amor ai nostri cari fradei. (Rom. 12:10) Quando ghe pensemo nele benedission che ghemo belche adesso, ndaremo far pi forte la nostra amicìssia con Geovà. E quando ghe pensemo sora le benedission che Geovà el ne darà nel futuro, femo pi forte la nostra speransa. Cossita, saremo boni de servir a Geovà contenti.

19. (a) De acordo con Isaia 30:18, de cossa podemo esser sicuri? (b) Cossa che ndarà giutarne a seitar a dàrghene fora cole dificoltà e a seitar contenti?

¹⁹ Suito, Geovà el finirà fora con questo mondo rugno. (Isa. 30:18) Semo sicuri che Geovà, el ‘Dio de giustìssia’, no’l assarà che el mondo de Sàtana el dure gnanca un giorno de pi de quel che ghe ocore. (Isa. 25:9) Intanto che spetemo con passiensa, ghemo de darghe valor al presente dela orassion, studiar la Bìblia, meter in pràtica quel che imparemo e pensarghe sora le benedission che ghemo. Se femo cossita, Geovà el ne giutarà a dàrghene fora cole dificoltà e a seitar contenti intanto che lo adoremo.