1. (a) Cossa che pol suceder con noantri? (b) De cossa che podemo esser sicuri?

 NOANTRI savemo che le persone le pol vegnerne contra par causa del laoro de predicassion, e fursi sarà ancora pedo nel futuro. (Dan. 11:44; 2 Tim. 3:12; Apo. 16:21) Ma, podemo esser sicuri che Geovà el ndarà giutarne quando ghemo de bisogno. Parché? Parché Geovà sempre el ga giutà i so servi a far i so laori, anca se quel che lu el ghe gavea domandà l’era tanto fadiga. Adesso, vedemo arquante robe che le ga sucedesto nela vita del profeta Ezechiel intanto che lu el predichea ai giudei che i era de star in Babilònia.

2. (a) Come che le era le persone che Ezechiel el gavaria de predicar? (Ezechiel 2:3-6) (b) Cossa che ndaremo imparar in questo stùdio?

² El profeta Ezechiel el gavaria de predicar a persone che le era pròpio triste. Geovà el ga dito che lore le era “desobediente”, “testarde” e “sensa gnanca un rispeto”. Lore le era rugne come “spini” e le era pericolose come “scorpioni”. Par quela, Geovà el ga dito a Ezechiel arquante volte: “No stà gaver paura!” (Ledi Ezechiel 2:3-6. b) Magari, Ezechiel l’è stà bon de far el laoro che Geovà el ghe gavea domandà parché (1) Geovà lo gavea mandà, (2) el spìrito santo el ghe ga dato forsa, e (3) le parole  de Dio le ga fato pi forte la so fede. In questo stùdio, ndaremo imparar come che queste tre robe le ga giutà Ezechiel e come che le pol giutar anca noantri ancoi.

3. (a) Cossa che ghe ga dato coraio a Ezechiel? (b) Come che Geovà lo ga assà sicuro che el ndaria giutarlo?

³ Ezechiel el ga bio tanto coraio dopo che Geovà el ga dito: “Mi son drio mandarte.” (Eze. 2:3, 4) Sicuro che lu el se ga ricordà che Dio el gavea dito queste parole anca a Isaia e a Moisè quando li ga scoliesti par esser profeti. (Éso. 3:10; Isa. 6:8) Come so pare de Ezechiel l’era un sasserdote, fursi lu el ghe ga insegnà che Geovà el ga sempre giutà questi profeti a dàrghene fora cole so dificoltà. Lu el savea che Dio el gavea dito a Isache, Giacò e Geremia: ‘Mi son con ti.’ (Gén. 26:24; 28:15; Ger. 1:8) Geovà anca lo ga assà sicuro che el ndaria giutarlo e che lo gavea mandà parché el ghe ga dito due volte: “Mi son drio mandarte.” Nel so libro, Ezechiel el ga scrito tante volte: ‘Geovà el ga parlà con mi, e Geovà el ga parlà con mi nantra volta.’ (Eze. 3:16; 6:1) Par quela, lu el savea che Dio el ndaria giutarlo.

4. Cossa che ancora ga dato forsa a Ezechiel?

⁴ Geovà ancora el ga dato forsa a Ezechiel quando el ga dito: “I israeliti no i volarà scoltarte parché no i vol scoltar a mi.” (Eze. 3:7) Cossita, Ezechiel el ga capio che, anca se le persone no le volesse scoltar a Geovà, questo no l’era colpa soa. Nantra roba che ga dato forsa a Ezechiel, l’è stà saver che, quel che Geovà el gavea dito ndaria suceder, e le persone le ‘savaria che ghen’era stà un profeta intrà de lore’. (Eze. 2:5; 33:33) Sicuro che, quando Ezechiel el ga savesto de queste  robe, lu el ga bio forsa par far el laoro che Geovà el ghe gavea dato.

5. De acordo con Isaia 44:8, cossa che ne dà coraio?

⁵ Geovà el ne ga scoliesto par esser so testimònie. (Isa. 43:10) Cossita come Ezechiel, anca noantri predichemo con coraio parché savemo che l’è stà Geovà mandarne e che el ndarà giutarne. Questo l’è un grando onor par noantri. Alora, parché che no ne ocore gaver paura dei nemighi? Parché compagno Geovà el ga dito a Ezechiel, el dise anca a noantri: “No sté mia restar spauradi.” — Ledi Isaia 44:8. c

6. (a) Parché che podemo esser sicuri che Geovà el ndarà giutarne? (b) Cossa che ghemo de ricordarse?

⁶ Geovà el ne assa sicuri che el ndarà giutarne. Par esémpio, vanti che el disesse che noantri semo le so testimònie, lu el ga dito: ‘Quando te camini in meso la àqua, mi sarò con ti, e quando te vè de quel’altra banda dei rii, le àque no le vegnarà mia sora ti. Quando te camini in meso el fogo, no te ndarè mia scotarte, gnanca te sarè brusà cole fiame.’ (Isa. 43:2) Dele volte, infrontemo dificoltà nela predicassion che no semo boni de dàrghene fora noantri soli. Ma, col aiuto de Geovà, seitemo a predicar. (Isa. 41:13) Compagno ga sucedesto con Ezechiel, tante persone ancoi no le vol mia scoltarne. Ma questo no vol mia dir che no semo drio far un bel laoro. Pitosto, ghemo de ricordarse che Geovà sempre el ne dà la forsa che ghemo de bisogno, e che el resta contento quando se sforsemo de predicar. El apòstolo Paolo el ga dito: “Cada un el ndarà ricever la so pròpia ricompensa, de acordo col so pròpio laoro.” (1 Cor. 3:8; 4:1, 2) Una sorela, che la ze pioniera fà tanti ani, la ga dito: “Mi resto tanto contenta de saver che Geovà el ndarà benedirme se seito a sforsarme.”

7. Come che la vision che Ezechiel el ga bio fursi lo ga fato sentirse? (Vedi la ilustrassion dela prima pàgina.)

⁷ Nte una vision che el ga bio, Ezechiel el ga visto come el spìrito santo l’è poderoso. Lu el ga visto che el spìrito santo l’era drio dar poder ai àngeli e che l’era drio mover le rode pròpio grande de un caro. (Eze. 1:20, 21) Cossa che Ezechiel el ga fato? Lu el ga contà: ‘Quando go visto questo, me go indenocià cola fàcia par tera.’ Quel che lu el ga visto, lo ga assà tanto maraveià che l’è cascà in tera. (Eze. 1:28) Dopo, sempre che el se ricordea de questa vision, fursi Ezechiel el se sentia pi forte parché el savea che, col aiuto del spìrito santo, el saria bon de far el laoro che Geovà el ghe gavea dato.

8-9. (a) Cossa che Geovà el ga mandà che Ezechiel el fesse? (b) De che nantra maniera Geovà el ga parecià Ezechiel?

⁸ Geovà el ga dito che Ezechiel el restesse in pié parché el ndaria parlar con lu. El spìrito santo e quel che Geovà el ga dito a Ezechiel ghe ga dato la forsa che el gavea de bisogno par restar in pié. Ezechiel el ga scrito che ‘el spìrito l’è ndato rento de lu e lo ga fato restar in pié’. (Eze. 2:1, 2) De lì avanti, el spìrito santo de Dio  lo ga sempre giutà. (Eze. 3:22; 8:1; 33:22; 37:1; 40:1) El spìrito de Dio el ga fato che Ezechiel restesse pi forte. Cossita, el podaria predicar ai testardi e ai desobedienti. (Eze. 3:7) Geovà el ghe ga dito: ‘Go fato che la to fàcia la fusse tanto dura come quela de lori, e la to fronte, tanto dura come quela de lori. Go fato la to fronte compagna a un diamante, pi dura de che un sasso. No stà gaver paura de quel che i te dise, gnanca dela fàcia che i te fà.’ (Eze. 3:8, 9) L’era come se Geovà el fusse drio dir a Ezechiel: “No stà assar che queste persone testarde le te desanime. Mi vao farte forte.”

⁹ Dopo de quel che ga sucedesto, el spìrito santo el ga mostrà a Ezechiel ndove el gavea de predicar. Lu el ga scrito: ‘La man de Geovà la era forte sora mi.’ Dopo de una stimana, Ezechiel el ga capio ben cossa che el gavea de parlar a quele persone. (Eze. 3:14, 15) Alora, Geovà el ghe ga dito de ndar nte un vale, ndove ‘el spìrito el ndaria rento de lu’. (Eze. 3:23, 24) Cossita, Ezechiel l’era pronto par scominsiar a predicar.

10. Cossa che ne ocore par seitar a predicar, e parché?

¹⁰ Cossa che ne ocore par seitar a predicar? Vedemo nantra volta quel che ga sucedesto con Ezechiel. Vanti de scominsiar a predicar, Ezechiel el ga ricevesto forsa par meso del spìrito santo. Anca ancoi l’è cossita. Compagno a Ezechiel, ghemo bisogno del spìrito santo de Dio par seitar a predicar. Parché? Parché Sàtana l’è drio far guera contra noantri e el vol che se fermemo de predicar. (Apo. 12:17) Tanti i pensa che Sàtana l’è tanto poderoso e che no semo mia boni de vinserlo. Ma, par meso dela predicassion, semo drio vinser questo nemigo. (Apo. 12:9-11) Come cossita? Quando predichemo, semo drio mostrar che no ghemo mia paura de  Sàtana. Noantri predichemo anca con oposission parché Geovà el ne dà el so spìrito santo e parché ghemo la so aprovassion. — Mat. 5:10-12; 1 Pie. 4:14.

11. (a) Cossa che el spìrito santo el farà par noantri? (b) Come che podemo seitar a ricever spìrito santo?

¹¹ Geovà el ga fato che la fàcia e la fronte de Ezechiel le deventesse dure come un sasso. Par quela, semo sicuri che el spìrito santo el ne darà la forsa che ghemo de bisogno par infrontar i problemi che i pol vegner fora nela predicassion. (2 Cor. 4:7-9) Come che podemo seitar a ricever spìrito santo? Ghemo de pregar sempre, sicuri che Geovà el ndarà scoltarne. Gesù el ga insegnà: ‘Seité a domandar, . . . seité a ndar in serca, . . . seité a bater nela porta.’ Se femo cossita, Geovà el “darà spìrito santo a quei che i ghe lo domanda”. — Luc. 11:9, 13; Ati 1: 14; 2:4.

12. De acordo con Ezechiel 2:9–3:3, de ndove l’è vegnesto el rolo, e cossa che ghen’era scrito?

¹² Come ghemo visto, el spìrito de Dio el ga dato a Ezechiel la forsa e el coraio che el gavea de bisogno par predicar. Nantra roba che ga fato pi forte la so fede l’è stà le parole de Dio. Nte una vision, Ezechiel el ga visto una man che la tegnea un rolo. (Ledi Ezechiel 2:9–3:3.) d De ndove che l’è vegnesto questo rolo? Cossa che l’era scrito? Come che el ga fato pi forte la fede de Ezechiel? El rolo l’è vegnesto del trono de Geovà. Fursi, Ezechiel el ga ricevesto el rolo de un dei quatro àngeli che lu el gavea belche visto. (Eze. 1:8; 10:7, 20) In questo rolo, ghen’era le parole de Dio, o sia, el giulgamento che Ezechiel el gavea de parlar ai giudei desobedienti che i era in Babilònia. (Eze. 2:7) Nel rolo, ghen’era robe scrite davanti e de drio.

13. (a) Cossa che Geovà el ga dito che Ezechiel el fesse col rolo? (b) Parché che el rolo l’era dolse?

¹³ Geovà el ga dito a Ezechiel de magnar el rolo e impienir el stómego, e lu el ga fato pròpio cossita. Questa parte dela vision la volea dir che Ezechiel el gavea de capir pròpio ben le parole che el ndaria dir. Cossita, lu el gavaria ancora pi voia de ndar predicar. Intanto che lo magnea, Ezechiel el ga visto che el rolo l’era “dolse come el miel”. (Eze. 3:3) Questo vol dir che l’era un onor, o una roba pròpio bona, parlar in nome de Geovà. (Sal. 19:8-11) Ezechiel el ghe dea tanto valor al laoro che Geovà el ghe gavea dato come profeta.

14. Cossa che ga giutà Ezechiel a far el laoro che Geovà el ghe gavea dato?

¹⁴ Dopo, Geovà el ga dito a Ezechiel: ‘Daghe valor e scolta tute le parole che mi te digo.’ (Eze. 3:10) Geovà l’era drio dir che lu el gavea de tegnerse in mente quel che l’era scrito nel rolo e pensarghe sora. Cossita, Ezechiel el gavaria una forte fede e el saria bon de parlar al pòpolo quel che l’era scrito nel rolo. (Eze. 3:11) Alora, cole parole de Dio nel cuor e nela boca, lu el saria pronto par far el laoro che Geovà el ghe gavea dato. — Vedi anca Salmo 19:14.

15. Cossa che ghemo de far par perseverar nela predicassion?

¹⁵ Par perseverar nela predicassion, ghemo de far pi forte la nostra fede par meso de quel che Geovà el dise. Ancoi, lu  el parla con noantri par meso dela Bìblia. Ghemo de pensarghe sora e darghe valor a tuto quel che Geovà el ne dise. Cossa che podemo far par esser sicuri che la Parola de Dio la seite a giutarne?

16. Cossa che Geovà el vol che femo cola so Parola, e come che podemo capirla?

¹⁶ Quando magnemo, el nostro corpo el deventa pi forte. E quando studiemo la Parola de Dio e ghe pensemo sora, la nostra fede la resta pi forte. La vision del rolo la mostra che Geovà el vol che ‘impienimo el stómego’ cola so Parola, o sia, el vol che capimo ben la Bìblia. Cossa che bisogna far par capirla ben? Ghemo de far orassion, leder la Bìblia e pensarghe sora quel che ledemo. Alora, vanti de leder la Bìblia, prega a Geovà par esser bon de capir i so pensamenti. Dopo, ledi un toco dela Bìblia e pénsaghe sora quel che te ghè ledesto. Se te fè cossita, te sarè bon de capir cada volta meio la Bìblia, e la to fede la restarà ancora pi forte.

17. Parché che l’è tanto importante pensarghe sora quel che ledemo nela Bìblia?

¹⁷ Parché che l’è tanto importante leder la Parola de Dio e pensarghe sora? Parché gavaremo forsa par predicar le bone notìssie del Regno. Questo ne giutarà anca nel futuro quando gavaremo de parlar ale persone sora el giulgamento de Geovà. E quando ghe pensemo sora le bele qualità de Geovà, la nostra amicìssia con lu la resta ancora pi forte. Se femo cossita, gavaremo una roba pròpio bela e dolsa, o sia, saremo pròpio contenti e in pace. — Sal. 119:103.

18. Cossa che le persone le gavarà de capir, e parché?

¹⁸ Noantri no semo mia profeti compagno Ezechiel l’era. Ancora cossita, semo dessididi a seitar a predicar fin che Geovà el dise che no ghe ocore pi farlo. Quando Geovà el giulgarà le persone, lore no le podarà dir che nissuni le ga avisade o che Dio el se ga desmentegà de lore. (Eze. 3:19; 18:23) Invesse, lore le gavarà de capir che quel che ghemo predicà l’era de Dio.

19. Cossa che ndarà giutarne a seitar a predicar?

¹⁹ Semo sicuri che gavaremo la forsa par seitar a predicar parché compagno a Ezechiel, (1) savemo che l’è stà Geovà che el ne ga mandà, (2) ghemo la forsa del spìrito santo e (3) ghemo la Parola de Dio. Col aiuto de Geovà, saremo boni de seitar a predicar e de perseverar “fin el fin”. — Mat. 24:13.