Vanti de contarve quel che ga sucedesto, me piaseria parlar come go scominsià el me laoro par Geovà.

Mi son nassesto nel ano de 1942, in Curassao, una bela ìsola del Caribe. Me pare l’è nassesto nel Suriname, ma l’è ndato de star in Curassao par laorar, e l’è deventà una dele prime Testimònie de Geovà lì arquanti ani vanti che mi nassesse. a Tute le stimane, lu el studiea la Bìblia coi so sinque fioi, ancora che dele volte noantri no voleino studiar. Quando mi gavea 14 ani, semo ndati de star nel Suriname parché me pare el gavea de tender de so mare, che la era vècia.

In Suriname, mi go scominsià a far amicìssia coi gióveni che i fea tanto par Geovà. Lori i era un pochetin pi veci de mi e i era pionieri regolari. Quando i contea le speriense che i gavea nela predicassion, se vedea pròpio che i era contenti. Dopo dele riunion, noantri seiteino a parlar sora la Bìblia. Dele volte, lo feino intanto che vardeino el cielo pien de stele. Lori i me ga giutà a dessider quel che ndaria far dela me vita: Mi volea laorar par Geovà! Alora, son stà batesà quando gavea 16 ani. E dopo, quando che gavea 18 ani, go scominsià laorar de pioniero regolar.

Go imparà tante robe intanto che go laorà come pioniero. Queste robe le me ga giutà in tuta la me vita. Par esémpio, una dele prime robe che go imparà, l’è stà che l’è importante trenar i altri. Quando go scominsià come pioniero, un missionàrio de nome Willem van Seijl el se interessea tanto par mi. b Lu el me ga insegnà tanto sora come  tender de tuti i laori dela congregassion. In quel tempo, mi no savea che gavaria tanto de bisogno de quel che lu l’era drio insegnarme. Nel ano dopo, son deventà pioniero spessial. Go scominsià a giutar pìcoli grupi in posti distanti in meso el mato del Suriname. Mi ringràssio tuto quel che altri fradei i me ga insegnà. De là in qua, proo sempre far compagno al so esémpio, e insegnarghe ai altri.

La seconda roba che go imparà, l’è stà viver con poco e pensar ben come doperar i soldi. Nel scomìnsio de cada mese, mi e el fradel che laorea come pioniero insieme de mi feino una lista de tuto quel che gavarìssino de bisogno par le pròssime stimane. Alora, un de noantri el gavea de far un viaio fin ala capital par comprar tuto quel che gaveino de bisogno. Gaveino de star atenti a come che gasteino i soldi parché i gavea de durar tuto el mese. Se manchesse qualcossa, èrino in meso el mato e fursi nissuni i podaria giutarne. Mi credo che, viver con poco e imparar a doperar ben i soldi, ancora de gióveno, me ga giutà a far un bel laoro par Geovà in tuta la me vita.

La tersa roba che go imparà l’è stà che l’è tanto importante insegnar le persone nela so léngua del cuor. Mi go sempre parlà olandese, inglese, papiamento e sranantongo (la ze anca cognossesta come sranan), che la ze una léngua che se parla tanto nel Suriname. Ma go visto che l’era tanto meio quando mi parlea dele bone notìssie ale persone nela so léngua. Par mi, l’era tanto fadiga parlar arquante de queste léngue, par esémpio, el saramacano. Ma son restà pròpio contento de insegnarghe ale persone nela so léngua parché go giutà tanti a imparar la verità.

Dele volte, mi anca passea vergogna. Par esémpio, una volta volea domandar a una studiante dela Bìblia, che la parlea saramacano, come che la stea parché ghe fea mal el stómego. Magari, ghe go domandà se ela la era gràvida! No ghe ocore gnanca dir che no ghe ga mia piasesto la me domanda. Anca se mi fea sbali, me go sempre sforsà de parlar la léngua del cuor dele persone.

Nel ano 1970, son deventà superintendente de sircuito. In quel ano, mi go fato una presentassion par tanti grupi de persone che i stea in meso el mato. Quela presentassion de ritrati la gavea nome “Vìsita ala Sede Mondial dele Testimònie de Geovà”. Mi e altri fradei viaieino rento una barca de legno par esser boni de rivar fin questi posti distanti in meso el mato. Noantri porteino un gerador, gasolina, ciareti e tuto quel che ghe volea par mostrarghe la presentassion. Quando riveino, ne tochea portar tuti questi mestieri fin el posto ndove ndeino mostrar la presentassion. Le persone che le era de star in quei posti ghe piasea pròpio tanto de veder queste presentassion, e questa la ze la roba che mi ricordo de pi. Mi son restà tanto contento de  insegnar quele persone sora Geovà e sora la so organisassion. Ancora che fusse fadiga far quel laoro, l’è stà pròpio bel veder le persone rivarse darente de Geovà.

Mi savea che l’era pi fàcile far el me laoro se fusse soltero. Ancora cossita, volea tanto catar una persona spessial. Alora, go pregà a Geovà che el me giutesse a catar una dona che la laoresse insieme de mi, e che la fusse contenta de far questo laoro che no l’era mia fàcile. Dopo de un ano, go scominsià a smorosar Ethel, una pioniera spessial che la laorea de tuto el cuor. De picinina, ela la ghe piasea tanto el esémpio del apòstolo Paolo e la volea far el so meio come lu. Noantri se ghemo maridadi in setembre de 1971 e ghemo scominsià a servir insieme nel sircuito.

Par Ethel, no l’è mia stà tanto fadiga viver nel mato parché, de picinina, la gavea imparà a viver con poco. Par esémpio, quando se parecieino par visitar le congregassion, no porteino drio tante robe. Noantri ndeino fin i rii par lavarse e par lavar le robe de vestir. Anca se ghemo costumadi a magnar tuto quel che le persone le ne dea, e magneino de tuto, fin bestiolete strànie. Quando no ghen’era mia piati, magneino nele foie de bananera, e quando no ghen’era mia pironi o cuciari, magneino cole man. Ma mi e Ethel ghemo visto che sforsarse insieme par far de pi par Geovà ga fato el nostro matrimònio ancora pi forte. (Ecl. 4:12) Se ne tochesse tornar indrio, farìssino tuto nantra volta!

Adesso, vao finir de contarve quela stòria del scomìnsio. Èrino drio tornar de una vìsita nte un caico. De colpo, la parte de vanti la ze ndata soto la àqua e suito la ze tornada. Manco mal che èrino col colete salva-vita e no semo mia cascadi rento el rio. Ma ancora cossita, l’è vegnesto tanta àqua  rento el caico. Alora, ne ga tocà butar via el magnar e doperar le scudelete par tirar fora tuta la àqua che la era vegnesta rento el caico.

Come ghemo bio de butar via tuto el magnar, ne ga tocà pescar. Ma, no semo stati boni de ciapar gnente. Alora, ghemo pregà a Geovà par domandar che el ne desse el magnar par quel giorno. Pena dopo dela orassion, un dei fradei el ga molà el lambo e el ga ciapà un pesse grando. Èrino in sinque persone e ga dato par magnar fin che bastea.

Dopo sinque ani che èrino drio laorar come superintendenti de sircuito, mi e la me dona ghemo ricevesto una benedission: Ethel la era drio spetar un fiol! Son restà pròpio contento, ma no savea cossa ndaria suceder de lì avanti. Mi e la me dona voleino tanto seitar a servir come superintendenti. Nel ano 1976, l’è nassesto el nostro primo fiol, Ethniël. E dopo de due ani e meso, l’è nassesto anca el nostro secondo fiol, Giovanni.

El Betel del Suriname el me ga domandà che seitesse a visitar le congregassion parché ghen’era tanto de bisogno. Intanto che i nostri fioi i era pìcoli, go visità sircuiti con poche congregassion. Cossita, mi podea visitar le congregassion arquante stimane del mese, e dopo servir come pioniero nela congregassion ndove èrino de star. Quando le congregassion le era darente casa, Ethel e i nostri fioi i vegnea insieme. Ma quando gavea de far le vìsite e le assemblee nel mato, mi ndea mi sol.

Mi gavea de pensar ben in tuto quel che gavea de far par doperar ben el me tempo. Mi me sforsea tanto par far el stùdio in fameia tute le stimane, ma quando ero drio visitar le congregassion, Ethel lo fea. Sempre che podeino, feino robe in fameia, come giugar coi nostri fioi o ndar a spasso. Tante volte, mi stea desmissià fin tardi de note par pareciarme par le vìsite che ndea far e par tender dela me congregassion. Ethel la ze sempre stata come la brava dona che dise Proverbi 31:15. Ela la levea su de matina bonora par pareciar la colassion. Cossita, èrino boni de magnar e leder el testo del giorno insieme vanti che i toseti i ndesse a scola. Mi ringràssio tanto a Geovà,  parché el me ga dato una brava dona che la me giuta a far i me laori par lu!

Noantri se ghemo sforsà tanto par giutar i nostri fioi a amar a Geovà e a voler servirlo. Ma voleino che lori i dessidisse far questo de cuor. Par quela, sempre ghemo parlà de come Geovà el ne ga benedio, e che ancora che ghemo bio dificoltà, lu sempre el ga tendesto dela nostra fameia. Cossita, nostri fioi i podea esser sicuri che anca lori i saria felici se i doperesse la vita par servir a Geovà. Noantri anca li giuteino a gaver amighi che i metea el laoro de Geovà in primo posto nela vita.

Anca che Geovà el ne ga sempre dato quel che gaveino de bisogno, mi me go sforsà tanto par tender dela me fameia. Intanto che go laorà come pioniero spessial, go imparà a sparagnar soldi. Ancora cossita, quando ne manchea qualcossa, Geovà sempre el ne giutea. Par esémpio, nei ani de 1986 a 1992, ghemo infrontà una guera nel Suriname e l’è stà tanto fadiga gaver quel che ne ocorea. Ma Geovà sempre el ne ga tendesto. — Mat. 6:32.

Geovà sempre el ga tendesto de noantri e el ne ga dato tante benedission. I nostri fioi i ze un presente de Geovà, e restemo tanto contenti de veder che lori i ga dessidio doperar la so vita par servirlo. Ethniël e Giovanni i ga fato la Scola par Vangelisadori del Regno, e adesso, i ze drio laorar nel Betel del Suriname insieme le so done.

Mi e Ethel semo belche veci, ma ancora semo drio laorar par Geovà come pionieri spessiai. Ghemo tanto de far che gnancora son stà bon de imparar a nadar! No me ciamo mia gramo de quel che go fato. Dessider doperar la me vita par servir a Geovà ancora de gióveno l’è stà la meio dessision che podaria gaver fato!