1. Come che savemo che Geovà el vol che se rivemo darente de lu?

 GEOVÀ el ne convida a rivarse darente de lu. (Tia. 4:8) Lu el vol esser nostro Dio, nostro Pare e nostro Amigo. Geovà anca el risponde ale nostre orassion e el ne giuta quando tribolemo. Lu el dopera la so organisassion par insegnarne e par protegerne. Ma cossa ghemo de far par rivarse darente de Geovà?

2. Cossa che ghemo de far par rivarse pi darente de Geovà?

² Noantri podemo rivarse darente de Geovà quando preghemo e quando ledemo la Bìblia e ghe pensemo sora. Se femo questo, gavaremo cada volta de pi amor par Geovà e saremo grati a lu. Cossita, gavaremo ancora pi voia de dar a Geovà quel che lu el mèrita, che l’è la nostra obediensa e la nostra adorassion. (Apo. 4:11) De pi che cognossemo a Geovà, pi confiansa gavaremo in lu e nela organisassion che lu el dopera par giutarne.

3. (a) Come che Sàtana el fà par farne abandonar a Geovà? (b) Cossa che ne giutarà a mai abandonar a Geovà e ala so organisassion? (Salmo 31:13, 14)

³ El Diaol el proa farne abandonar a Geovà. E lu el proa farlo ancora de pi quando ghemo problemi. Come? Pin pianeto, lu el proa far pi fiaca la nostra fede in Geovà e nela so organisassion. Ma podemo esser boni de scampar dele so tràpole. Se la nostra fede e la nostra confiansa in Geovà le ze forte, no ndaremo mai abandonar a Geovà e ala so organisassion. — Ledi Salmo 31:13, 14. b

4. Cossa che ndaremo veder in questo stùdio?

 ⁴ In questo stùdio, ndaremo veder tre dificoltà che infrontemo nela vita che le pol far pi fiaca la nostra confiansa in Geovà e nela so organisassion. Come che queste robe le pol farne abandonar a Geovà, e cossa che podemo far par protegerse?

5. Parché che i problemi i pol far pi fiaca la nostra confiansa in Geovà e nela so organisassion?

⁵ Dele volte, infrontemo bruti problemi. Par esémpio, pol esser che la nostra fameia la ne vien contra o restemo sensa laoro. Parché che questi problemi i podaria far pi fiaca la nostra confiansa nela organisassion de Geovà e tirarne distante de lu? Parché se seitemo a tribolar par tanto tempo, podemo sentirse desanimadi e abandonadi. Alora, Sàtana el proa farne pensar che Geovà no’l ne ama e che lu e la so organisassion i ga la colpa de quel che semo drio infrontar. L’è stà una roba come questa che ga sucedesto con arquanti israeliti intanto che i era nel Egito. Nel scomìnsio, lori i credea che Geovà el gavea scoliesto Moisè e Aron par liberarli. (Éso. 4:29-31) Ma quando Faraò li ga fato tribolar de pi, lori i ga dato la colpa a Moisè e a Aron. Lori i ga dito: ‘Par causa de valtri, semo deventadi una roba sensa valor davanti Faraò e so servi, e ghe gavé dato una spada in man par coparne.’ (Éso. 5:19-21) Varda che bruta roba! I israeliti i ghe ga dato la colpa ai servi leai de Geovà. Alora, se te sì ancora drio infrontar un problema, cossa che te pol far par seitar fidarte in Geovà e nela so organisassion?

6. Cossa che imparemo de quel che ga sucedesto con Abacuche? (Abacuche 3:17-19)

⁶ Contaghe a Geovà tuto quel che te sì drio sentir e domàndaghe aiuto. El profeta Abacuche el ga tribolà tanto. Par quela, lu el ga scominsià a pensar che Geovà no’l se preocupea con lu. Alora, el ga pregà e el ghe ga contà a Geovà quel che l’era drio sentir. Lu el ga dito: ‘Fin quando, ò Geovà, gavarò de osar par aiuto, ma no te scoltarè e parché che te assi suceder tante brute robe?’ (Aba. 1:2, 3) Geovà el ga rispondesto la orassion del so servo fedele. (Aba. 2:2, 3) Dopo, Abacuche el ga pensà sora tuto quel che Geovà el gavea fato par giutar so pòpolo. Cossita, lu l’è restà contento e pi sicuro che Geovà el ndaria tenderlo e giutarlo. (Ledi Abacuche 3:17-19. c) Cossa che imparemo? Quando te sì drio tribolar, prega a Geovà, conteghe tuto quel che te sì drio sentir e domandeghe so aiuto. Cossita, te sarè sicuro che Geovà el va darte la forsa che te ocore. E quando te vedi che lu el te ga giutà, la to fede la restarà ancora pi forte.

7. Cossa che una persona dela fameia de Shirley la volea che la pensesse, ma cossa che la ga giutada?

⁷ Fà tuto quel che te giuta a seitar amigo de Geovà. Varda el esémpio dela sorela Shirley, che la ze dela Papua Nova Guinè. d Ela la tribolea tanto parché so fameia la era poareta, e dele volte, ghe fea fin fadiga gaver el magnar. Una persona dela so fameia la ga dito: “Ti te seiti a dir che el spìrito santo l’è drio giutarte. Ma ndove elo? Sì ancora poareti, e te perdi to tempo  con quela predicassion.” Shirley la ga contà: “Mi me go domandà: ‘Sarà che Dio el se preocupa con mi e cola me fameia?’ Alora, mi suito go pregà a Geovà e ghe go contà tuto quel che ero drio sentir. Mi go seità a leder la Bìblia e le publicassion, a predicar e a ndar ale riunion.” Suito, ela la se ga nicorta che Geovà l’era drio tender dela so fameia, parché lori no i gavea mai patio la fame e i era contenti. Shirley la ga dito: “Mi go visto che Geovà l’era drio risponder ale me orassion.” (1 Tim. 6:6-8) Se te seiti a leder la Bìblia, le publicassion, a ndar predicar e ale riunion, no te assarè che gnente rovine la to amicìssia con Geovà.

8. Cossa che pol suceder coi fradei che i tende dela organisassion de Geovà?

⁸ Par meso dela internet, television e ràdio, i nostri nemighi i dise busie sora i fradei che i tende dela organisassion de Geovà. (Sal. 31:13) Par quela, arquanti fradei i ze drio esser metesti in preson e acusadi come bandidi. Ma questa roba no la sucede sol ancoi. I dissìpoli de Cristo del primo sècolo i ga infrontà una dificoltà compagna quando el apòstolo Paolo l’è stà acusà e metesto in preson sensa colpa. Cossa che lori i ga fato?

9. Cossa che arquanti dissìpoli de Cristo i ga fato quando el apòstolo Paolo l’è stà metesto in preson?

⁹ Quando el apòstolo Paolo l’è stà metesto in preson in Roma, arquanti fradei i lo ga abandonà. (2 Tim. 1:8, 15) Parché? No savemo mia, ma fursi lori i ga bio vergogna de Paolo parché le persone le pensea che lu l’era un bandido. (2 Tim. 2:8, 9) O pol esser che i gavea paura che anca lori i fusse perseghidi. Proa pensar come che Paolo el se ga sentio. Lu el gavea infrontà tante dificoltà e el gavea fin riscià la so vita par giutar questi fradei. (Ati 20:18-21; 2 Cor. 1:8) Sicuro che no volemo mai far compagno a quei che i ga abandonà Paolo in quel bruto colpo. Alora, cossa che ghemo de ricordarse quando i fradei che i ze drio tender dela organisassion i ze perseghidi?

10. Cossa che ghemo de ricordarse quando i fradei che i tende dela organisassion i ze perseghidi?

 ¹⁰ Ricòrdate parché che semo perseghidi e chi che l’è par de drio. La Bìblia la dise in 2 Timòteo 3:12: “Tuti quei che i vol viver una vita de devossion a Dio come dissìpoli de Cristo Gesù anca i sarà perseghidi.” Alora, no l’è de maraveiarse che Sàtana el ndarà perseghir de pi questi fradei che i tende dela organisassion. Lu el vol che questi fradei i asse de esser leai a Geovà, e che noantri restemo spauradi. — 1 Pie. 5:8.

11. Cossa che imparemo de Onesìforo? (2 Timòteo 1:16-18)

¹¹ Seita a esser leal ai to fradei e a giutarli. (Ledi 2 Timòteo 1:16-18. e) Nel primo sècolo, un dissìpolo che el gavea nome Onesìforo no’l ga mia fato compagno i altri che i se ga fermà de giutar Paolo. La Bìblia la dise che lu no’l se ga invergognà. Invesse, Onesìforo l’è ndato in serca de Paolo, e quando lo ga catà, el ga proà giutarlo in tuto quel che el gavea de bisogno, anca che el gavesse de risciar la so vita. Cossa che imparemo? Ancora che te gàpie paura, no stà assar de giutar i to fradei che i ze drio esser perseghidi. Invesse, giùtali in tuto quel che i ga de bisogno, e sìpia sempre pronto par difenderli. (Pro. 17:17) Lori i ga tanto bisogno del to amor e del to aiuto.

12. Cossa che imparemo dei fradei e sorele dela Rùssia?

¹² Varda el esémpio dei fradei e sorele che i ze de star nela Rùssia. Lori i seita a giutar quei cari fradei che i ze stati metesti in preson. Quando arquanti de lori i ze menadi al tribunal, tanti fradei e sorele i va là par mostrar che i ze dela so banda. Cossa che imparemo? Quando i nemighi i dise busie, i perseghe o i mete in preson i fradei che i tende dela organisassion, no stà gaver paura. Pitosto, prega par lori, giùtali a tender dela so fameia e pensa in altre robe che te pol far par giutarli. — Ati 12:5; 2 Cor. 1:10, 11.

13. Che dubi podarìssino gaver se qualchedun el scomìnsia a torne in giro?

¹³ Arquanti dela fameia e coleghi de laoro o de scola i pol torne in giro parché predichemo e vivemo come Geovà el vol. (1 Pie. 4:4) Fursi i dise: “Mi te vui ben, ma nela to religion, no podé far gnente. Gavé de viver come tuti i vive adesso, nò come sti ani.” Altri fursi i ne parla contra parché no i ze de acordo cola maniera che tratemo le persone che le ga abandonà a Geovà e che no le ze pi so Testimònie. Pol esser che i diga: “Valtri parlé tanto de amor, ma varda come che traté queste persone.” Quando qualchedun el ne dise queste robe, pol esser che scominsiemo a gaver dubi. Par esémpio: ‘Sarà che Geovà el ne domanda de far robe massa fadiga? Sarà che la nostra organisassion no la ne assa pròpio far gnente?’ Se le persone le te tol in giro e te scominsi a gaver dubi come questi, cossa che te pol far par seitar darente de Geovà e dela so organisassion?

14. Cossa che ghemo de far quando qualchedun ne tol in giro? (Salmo 119:50-52)

¹⁴ Sìpia dessidio a far quel che Geovà el dise che l’è giusto. Giò sempre el ga obedio  a Geovà, ancora che tanti i lo tolea in giro par via de questo. Un dei so falsi amighi el ga proà farghe creder nte una busia. Lu el ghe ga dito che Dio no’l se importea mia se Giò el fea robe giuste o robe sbaliade. (Giò 4:17, 18; 22:3) Ma Giò no’l ga credesto in queste busie e el ga seità a esser leal. (Giò 27:5, 6) Lu el savea che l’era sempre bon far quel che l’è giusto, e lu l’era dessidio de viver come Geovà el volea. Cossa che imparemo? No stà mai assar de ndar drio a quel che Geovà el dise che l’è giusto sol parché qualchedun te tol in giro. Pensa in tuto quel che te ghè infrontà nela to vita. Sicuro che te ghè visto che la to vita la ze pi bona quando te obedissi a Geovà. Alora, sìpia sempre leal ala organisassion che la fà quel che Geovà el dise. Cossita, anca se tanti i te tol in giro, gnente e nissuni podarà farte abandonar a Geovà. — Ledi Salmo 119:50-52. f

15. Parché che Brizit la ga sofrio oposission?

¹⁵ Varda el esémpio de Brizit, una sorela dela Ìndia. Ela la ga sofrio oposission e le persone dela so fameia la ga tolta in giro par causa de quel che la credea. Poco tempo dopo del so batésimo nel ano de 1997, so omo, che no l’era Testimònia de Geovà, el ga perso el laoro. Alora, lu el ga dessidio che lori i ndaria de star con so pare e so mare in nantra cità. Lì, Brizit la ga infrontà brute dificoltà. Come so omo no’l gavea gnancora catà laoro, ela la gavea de laorar tuto el giorno par tender dela so fameia. El Salon del Regno pi darente dela so casa l’era intorno de 350 chilòmetri, e la fameia de so omo la era contra Brizit par causa de quel che la credea. Par quela, ghe ga tocà ndar de star in nantro posto. De colpo so omo l’è morto, e un tempo dopo, una dele so fiole la ze morta de càncaro con 12 ani. Alora, so fameia ghe ga dito che se no la fusse deventada una Testimònia de Geovà, queste desgràssie no le gavaria sucedesto. Anca cossita, Brizit la ga seità a fidarse in Geovà e  no la se ga tirà distante dela so organisassion.

16. Che benedission Brizit la ga bio de seitar leal a Geovà e ala so organisassion?

¹⁶ Brizit la era de star tanto distante dela congregassion. Par quela, un superintendente de sircuito el ga dito che la podea predicar ndove la era de star e far le riunion casa. Anca se la pensea che saria tanto fadiga, la ga dessidio farlo. Ela la predichea, la fea le riunion casa e la adorassion in fameia cole so fiole. Brizit la se ga fidà in Geovà e la ze restada leal ala so organisassion. Par quela, ela la ga bio tante benedission. Par esémpio, tante persone che la ghe fea stùdio dela Bìblia le ze state batesade. Nel ano de 2005, Brizit la ga scominsià a laorar de pioniera regolar. Le so fiole le serve a Geovà, e ancoi, ghen’è due congregassion ndove la predichea. Brizit la ze sicura che l’è stà Geovà che ghe ga dato la forsa par dàrghene fora con tute le so dificoltà e par seitar a perseverar anca con oposission dela fameia.

17. Cossa che ghemo de esser dessididi a far?

¹⁷ Sàtana el vol che credemo che Geovà no’l ndarà giutarne quando tribolemo, e che la vita la ze tanto pi fadiga parché servimo a Geovà. Sàtana anca el vol assarne spauradi. Par quela, lu el fà che i fradei che i tende dela organisassion i sìpie perseghidi e metesti in preson. Sàtana no’l vol che se fidemo in Geovà e nela so organisassion. Alora, lu el fà le persone torne in giro e parlar contra noantri. Magari, cognossemo pròpio ben le tràpole de Sàtana, e no assemo che el ne imbroie. (2 Cor. 2:11) Alora, ghemo de esser dessididi a no crederghe nele busie de Sàtana e a seitar leai a Geovà e ala so organisassion. Ricòrdate che Geovà no’l te abandonarà mai. (Sal. 28:7) Par quela, no stà assar che gnente e nissuni te fae fermarte de servir a Geovà! — Rom. 8:35-39.

18. Cossa che ndaremo veder nel pròssimo stùdio?

¹⁸ In questo stùdio, ghemo visto arquante dificoltà che fursi infrontemo nela nostra vita. Ma ghen’è problemi che sucede rento la congregassion che i pol farne perder la confiansa che ghemo in Geovà e nela so organisassion. Come che podemo dàrghene fora con questi problemi? Ndaremo studiar sora questo nel pròssimo stùdio.