1. Cossa che noantri ghemo de far quando sucede qualcossa che ne assa disgustadi? (2 Timòteo 4:5)

 QUANDO sucede qualcossa che ne assa disgustadi, pol esser che ne fà fadiga seitar leai a Geovà e ala so organisassion. Alora, cossa che ghemo de far se una roba cossita la sucede? Ghemo de seitar atenti in tute le robe. (Ledi 2 Timòteo 4:5. b) Come? Ne ocore restar calmi, pensar dela maniera giusta e veder le robe come Geovà le vede. Se femo cossita, no ndaremo assar che i nostri sentimenti i controle le nostre dessision e saremo boni de restar firmi nela fede.

2. Cossa che ndaremo veder in questo stùdio?

² In questo stùdio, ndaremo veder tre dificoltà che le pol suceder rento la organisassion. Pol esser fadiga seitar leai a Geovà (1) quando ne par che un fradel el ne ga tratà mal, (2) quando semo dissiplinadi, e (3) quando la organisassion la ne domanda de cambiar qualcossa. Alora, come che podemo restar calmi e pensar dela maniera giusta par seitar leai a Geovà e ala so organisassion?

3. Cossa che pol suceder se restemo ofendesti con un fradel?

³ Sito belche restà ofendesto con quel che un fradel o un ansiano el ga fato? Anca che te credi che lu no’l ga fato aposta, pol esser che te sì restà tanto disgustà. (Rom. 3:23; Tia. 3:2) Fursi te ghè seità a pensar in quel che gavea sucedesto e te te ghè domandà: ‘Se un fradel el fà queste robe,  sarà che questa la ze pròpio la organisassion de Dio?’ Ma ghemo de ricordarse che l’è pròpio questo che Sàtana el vol che pensemo. (2 Cor. 2:11) Se pensemo cossita, fursi ndaremo fermarse de servir a Geovà e assar la so organisassion. Alora, cossa che ghemo de far se semo restadi ofendesti con qualchedun?

4. (a) Cossa che Giusepe el ga fato quando el ga infrontà dificoltà? (Génesi 50:19-21) (b) Cossa che podemo imparar col bel esémpio de Giusepe?

⁴ No stà seitar disgustà coi altri. Quando Giusepe l’era gióveno, i so fradei i lo ga tratà tanto mal, e arquanti de lori i ga volesto fin coparlo. (Gén. 37:4, 18-22) Dopo, lori i ga vendesto Giusepe come schiavo, e lu el ga infrontà tante dificoltà par 13 ani. Lu el podaria gaver pensà: ‘Sarà che Geovà el me ga abandonà pròpio adesso che gavea bisogno de aiuto?’ Invesse, lu l’è restà calmo, el ga seità a pensar dela maniera giusta e no l’è deventà una persona trista. Quando Giusepe el ga bio la oportunità de vingarse dei so fradei, lu el ga mostrà amor e li ga perdonadi. (Gén. 45:4, 5) Lu no’l ga pensà sol nei so problemi, ma el ga sempre pensà in quel che Geovà el volea. (Ledi Génesi 50:19-21. c) Cossa che noantri imparemo? Se un fradel el ne ga tratà mal, no ghemo de darghe la colpa a Geovà e gnanca pensar che lu el ne ga abandonà. Invesse, ghemo de pensar sora come che Geovà l’è drio giutarne a infrontar questa dificoltà. E quando i altri i ne trata mal, ghemo de perdonarli con amor. — 1 Pie. 4:8.

5. Cossa che ga giutà Michea quando lu l’è restà disgustà?

⁵ Varda quel che ga sucedesto col fradel Michea, d che l’è un ansiano nela Amèrica del Sud. Arquanti ansiani i lo ga disgustà tanto. Lu el ga dito: “Mi ero drio sentirme tanto ansioso, no ero gnanca bon de dormir de note e go fin piandesto parché no savea cossa che gavea de far. L’è stà la prima volta che me go sentio cossita.” Ma, Michea l’è stà bon de restar calmo e el se ga sforsà tanto par pensar dela maniera giusta. Come che lu l’è stà bon de farlo? Lu el ga sempre domandà a Geovà che el ghe desse spìrito santo par ndar avanti. Lu anca el ga studià le nostre publicassion. Cossa che imparemo? Se semo restadi disgustadi o desanimadi con quel che un fradel el ga fato o el ga dito, ghemo de restar calmi e sforsarse par pensar dela maniera giusta. Ne ocore anca pregar a Geovà e domandarghe che el ne giute a capir quel che el fradel l’è drio sentir. Ghemo de ricordarse che, fursi, no savemo quel che el fradel l’è drio infrontar. Se pensemo come Geovà, no ndaremo pensar che el fradel el ne ga disgustà aposta, e sarà pi fàcile perdonarlo. (Pro. 19:11) Geovà el vede quel che semo drio infrontar e el ndarà darne la forsa che ne ocore. — 2 Cró. 16:9; Ecl. 5:8.

6. Parché che l’è importante ricordarse che Geovà el ne dissiplina par amor? (Ebrei 12:5, 6, 11)

⁶ Quando Geovà el ne dissiplina, fursi restemo tanto desanimadi. Ma se pensemo sol in quel che noantri semo drio sentir, ndaremo pensar che la dissiplina no la ze stata giusta, o che no la va mia ben par noantri. Invesse, ghemo de ricordarse  che Geovà el ne dissiplina parché el ne ama. (Ledi Ebrei 12:5, 6, e 11. f) Se seitemo a pensar che no ne ga piasesto la dissiplina, faremo pròpio come Sàtana el vol. Lu el vol che no acetemo la dissiplina, e che pin pian, abandonemo a Geovà e ala so organisassion. Alora, se te sì stà dissiplinà, come che ti te pol seitar a pensar dela maniera giusta?

7. (a) De acordo cola ilustrassion, che laori Piero el ga ricevesto dopo che el ga acetà la dissiplina? (b) Cossa che imparemo col bel esémpio de Piero?

⁷ Aceta la dissiplina e càmbia quel che te ocore. Gesù el ga dissiplinà Piero davanti i altri apòstoli de pi de una volta. (Mar. 8:33; Luc. 22:31-34) Anca se Piero el se gàpia sentio in vergogna, lu el ga seità a esser leal a Gesù. Lu el ga acetà la dissiplina e el ga imparà coi so sbali. L’è par quela che Geovà el ga dato a Piero tanti laori importanti nela congregassion. (Gioani 21:15-17; Ati 10:24-33; 1 Pie. 1:1) Cossa che imparemo col bel esémpio de Piero? Invesse de seitar a pensar nela vergogna che ghemo sentio, l’è meio acetar la dissiplina e cambiar quel che ne ocore. Quando femo cossita, Geovà el ne doperarà ancora de pi, e saremo boni de giutar i nostri fradei.

8-9. (a) Come che Bernardo el se ga sentio quando l’è stà dissiplinà? (b) Cossa che lo ga giutà a cambiar la so maniera de pensar?

⁸ Varda quel che ga sucedesto con Bernardo, che l’è un fradel de Mossambiche. Lu l’era ansiano, ma l’è stà dessidio che no’l podea pi far questo laoro. Come che Bernardo el se ga sentio con questa dessision? De scomìnsio, lu l’è restà preocupà con quel che i fradei dela so congregassion i ndaria pensar. Lu el ga dito: “Mi ero disgustà e no me ga piasesto quela dessision. Sol dopo de arquanti mesi, son stà bon de capir parché i me gavea dissiplinà, e cossita, me go fidà nantra volta in Geovà e nela so organisassion.” Cossa che ga giutà Bernardo a pensar cossita?

 ⁹ Bernardo l’è stà bon de cambiar la so maniera de pensar. Lu el ga dito: “Intanto che ero ansiano, mi doperea Ebrei 12:17 par giutar i altri a pensar dela maniera giusta sora la dissiplina de Geovà. Ma quando no go pi podesto esser ansiano, go visto che questo testo l’era anca par mi.” Bernardo el ga scominsià a far anca altre robe che lo ga giutà a fidarse nantra volta in Geovà e nela so organisassion. Par esémpio, lu el ga scominsià a leder ancora de pi la Bìblia e a pensarghe sora quel che el ledea. Ancora che el fusse preocupà con quel che i fradei i pensea, lu el ndea ala predicassion e el fea comentari nele riunion. Dopo de un tempo, Bernardo l’è deventà ansiano nantra volta. Cossa che podemo imparar? Se semo stati dissiplinadi, no ghemo de pensar massa nela vergogna che semo drio sentir, ma acetar el consìlio e cambiar tuto quel che ne ocore. g (Pro. 8:33; 22:4) Se te seiti a esser leal a Geovà e ala so organisassion, l’è sicuro che lu el ndarà benedirte.

10. Parché che fursi ghe ga fato fadiga a arquanti israeliti seitar leai a Geovà?

¹⁰ Pol esser fadiga seitar leal a Geovà quando la so organisassion la ne domanda de cambiar qualcossa. Se no stemo atenti, podemo fin abandonar a Geovà. Varda quel che ga sucedesto coi israeliti. Vanti dela Lege de Moisè, i paroni de fameia i podea far arquante robe, come far su altari e far sacrifissi de bèstie par el perdon dei pecati. (Gén. 8:20, 21; 12:7; 26:25; 35:1, 6, 7; Giò 1:5) Ma quando i ga ricevesto la Lege, lori no i ga pi podesto far queste robe, parché Geovà el ga dito che sol i sasserdoti dela fameia de Aron i podaria far sacrifissi. Alora, se un paron de fameia che no’l fusse dela fameia de Aron el fesse un sacrifìssio, lu el podaria esser copà. h (Lev. 17:3-6, 8, 9) Fursi l’è stà par via de questo cambiamento che Datan, Corà, Abiron e 250 paroni dele tribo i ze ndati contra Moisè e Aron. (Nùm. 16:1-3) Ma anca se no savemo quel che ga pròpio sucedesto, Corà e i so òmini no i ze restadi leai a Geovà. Alora, cossa che te pol far se la organisassion la te domanda de cambiar qualcossa?

11. Cossa che imparemo del esémpio dei coatiti?

¹¹ Obedissi quando la organisassion la te domanda de cambiar qualcossa. Intanto che i era nel deserto, i coatiti i gavea un laoro tanto importante de far. Quando i israeliti i cambiea de acampamento, arquanti de lori i portea la Arca del Acordo. (Nùm. 3:29, 31; 10:33; Giosuè 3:2-4) Ma quando i israeliti i ze ndati rento la Tera Prometesta, i coatiti no i ga pi fato questo laoro tanto importante, parché la Arca del Acordo no la gavea pi de esser cambiada de un posto al altro. Alora, el rè Salomon el ghe ga dato ai coatiti altri laori de far. Par esémpio, arquanti i ga scominsià a laorar come cantori, altri i tendea del posto ndove i metea via el magnar o i laorea come porteri. (1 Cró. 6:31-33; 26:1, 24) La Bìblia no la dise che i coatiti i ga sbrontolà o i ga domandà de far laori pi  importanti sol parché vanti i gavea portà la Arca del Acordo. Cossa che imparemo del so esémpio? Quando la organisassion de Geovà la te domanda de cambiar qualcossa, te ghè de obedir anca se te ocore fermarte de far una roba che te piasea tanto. Resta contento con qualche laoro che te fè par Geovà. Ricòrdate che no ghe ocore che te fae un laoro importante par contentarlo. Invesse, Geovà el te dà valor se te lo obedissi, no importa el laoro che te fè nela so organisassion. — 1 Sam. 15:22.

12. Come che Zaina la se ga sentio quando la ze stata mandada via de Betel?

¹² Varda el esémpio dela sorela Zaina che la ga laorà de pi de 23 ani in Betel. Ela la ghe piasea tanto el so laoro, ma la ze stata mandada servir come pioniera spessial. Par quela, Zaina la ga dito: “Mi son restada spaventada e me sentia sensa valor. Mi me domandea: ‘Cossa gonti fato de sbalià?’.” Ela la ze restada ancora pi desanimada parché arquanti fradei dela so congregassion i ghe disea: “Se te fussi stata brava, no i te gavaria mandà via.” Zaina la ze restada tanto desanimada che la piandea tute le note. Ma la ga dito: “Mi me go sforsà tanto par mai pensar mal dela organisassion e a seitar a esser sicura che Geovà ancora el me amea.” Come che Zaina la ze stata bona de far questo?

13. Cossa che ga giutà Zaina a cambiar la so maniera de pensar?

¹³ Zaina la ga cambià la so maniera de pensar. Cossa gala fato? Ela la ga ledesto arquanti artìcoli dele nostre publicassion che i parlea dele medèsime dificoltà che la era drio infrontar. Un artìcolo che ghe ga giutà tanto l’è stà “Você pode vencer o desânimo!”, nela Sentinela de 1 de febraro de 2001. Lì, ela la ga imparà sora el esémpio de Marco, che l’è stà un dei scritori dela Bìblia. Compagno a Zaina, fursi lu el ga bio de dàrghene fora col desànimo quando el ga cambià el laoro che el fea par Geovà. Ela la ga dito: “El esémpio de Marco el me ga incoraià tanto.” Nantra roba che la ga giutada l’è stà restar darente dei fradei. Invesse de restar ela sola o farse pecà, ela la ga capio che el spìrito santo el orienta la organisassion e che i fradei i la ghe vol ben. Zaina anca la ga capio che la roba pi importante l’è che el  laoro de Geovà el sìpia fato dela meio maniera.

14. (a) Cossa che ga sucedesto con Vlado? (b) Cossa che lo ga giutà?

¹⁴ Varda anca el esémpio de Vlado, che l’è un ansiano de 73 ani dela Slovénia. L’è stà pròpio fadiga par lu quando el Salon del Regno ndove lu el ndea no l’è pi stà doperà e ghe ga tocà riunirse con nantra congregassion. Vlado el ga dito: “No me parea mia giusto fermarse de doperar un posto bel cossita. Mi son restà disgustà parché gaveino pena finio de rangiarlo. Come mi son marangon, gavea fato arquante robe par el Salon, e par mi e par altri fradei pi veci, l’è stà ancora pi fadiga ndar a nantra congregassion.” Cossa che ga giutà Vlado a ndar drio ale orientassion? Lu el ga dito: “Go proà ricordarme che Geovà sempre el ne benedisse quando obedimo ala so organisassion. Se acetemo questi cambiamenti, saremo boni de obedir a qualche orientassion nel futuro.” Anca ti te ghè bio de cambiar el laoro che te fei nela organisassion o cambiar de congregassion? L’è vera che no l’è mia fàcile farlo, ma ricòrdate che Geovà el capisse quel che te sì drio sentir. Se te obedissi de cuor quando la organisassion la te domanda de far qualcossa, e se te seiti leal, sicuro che te sarè benedio. — Sal. 18:25.

15. Come che podemo seitar atenti quando infrontemo dificoltà rento la congregassion?

¹⁵ In questi ùltimi giorni, ndaremo infrontar cada volta de pi dificoltà rento la congregassion, e sarà cada volta pi fadiga seitar leai a Geovà. Par quela, ghemo de seitar atenti in tute le robe. Sarà che qualchedun nela congregassion el te ga ofendesto? No stà seitar disgustà. Gheto ricevesto dissiplina? Invesse de pensar sol nela vergogna che te sì drio sentir, aceta el consìlio e càmbia quel che te ocore. La organisassion la te ga domandà de cambiar qualcossa che te piasea tanto de far? Aceta con tuto el cuor e obedissi.

16. Come che podemo seitar a fidarse in Geovà e nela so organisassion?

¹⁶ No stà mai assar de fidarte in Geovà e nela so organisassion. Par farlo, te ghè de seitar atento in tute le robe, o sia, resta calmo, pensa dela maniera giusta e vedi le robe come Geovà le vede. Sfòrsate par studiar la Bìblia e imparar sora servi de Geovà del passà che i ze stati boni de infrontar le medèsime dificoltà che ti. Dopo, pénsaghe sora questi esempi. Domanda el aiuto de Geovà e no stà mai tirarte distante dei fradei. Cossita, Sàtana mai el sarà bon de farne abandonar a Geovà e ala so organisassion. — Tia. 4:7.