STÙDIO 45
CÀNTICO 138 I cavei bianchi i ze bei par Geovà
Cossa che imparemo de quel che Moisè, Davi e Gioani i ga dito?
‘L’è intrà i veci che catemo la sabedoria, e quei che i ga vivesto tanto i sa dele robe, mia vera?’ — GIÒ 12:12.
COSSA CHE NDAREMO IMPARAR
Geovà el promete che se noantri semo obedienti, lu el ndarà giutarne adesso e el ndarà darne vita eterna nel futuro.
1. Parché che podemo imparar tanto coi nostri fradei pi veci?
Tuti noantri ghemo bisogno de boni consili par far le meio dessision nela vita. Podemo domandar boni consili ai ansiani e a bravi fradei dela nostra congregassion. Anca se lori i ze belche veci, no ghemo mai de pensar che so consili i ze de sti ani. Questi cari fradei i ga imparà tanto con quel che ga sucedesto nela so vita e i ga tanta sabedoria. (Giò 12:12) Par quela, Geovà el vol che noantri imparemo tanto con questi cari fradei.
2. Cossa che ndaremo imparar in questo stùdio?
2 Nel passà, Geovà el ga doperà arquanti dei so servi pi veci par incoraiar e insegnar so pòpolo, come Moisè, Davi e el apòstolo Gioani. Lori no i ga mia vivesto nela medèsima època e ga sucedesto robe tanto difarente nela so vita. Ma, prima de morir, tuti lori i ga dato bei consili ai pi gióveni. Un dei bei consili che lori i ga dato l’è stà de obedir a Geovà. Alora, tuti noantri podemo imparar dei consili de questi servi fedeli parché Geovà li ga scriti nela Bìblia. (Rom. 15:4; 2 Tim. 3:16) In questo stùdio, ndaremo imparar sora i bei consili che Moisè, Davi e el apòstolo Gioani i ga dato.
“TI TE VIVERÈ PAR TANTO TEMPO NELA TERA”
3. De che maniere Moisè el ga servio a Geovà?
3 Moisè el ga doperà la so vita par servir a Geovà. Lu l’è stà un profeta, l’è stà un giuis, el ga tendesto del pòpolo de Dio par tanto tempo e el ga scrito arquanti libri dela Bìblia. Sicuro che Moisè el gavea imparà tante robe con quel che el gavea visto nela so vita. Par esémpio, lu el ga libertà i israeliti del Egito e el ga visto tanti miràcoli de Geovà. Lu anca el ga scrito i primi sinque libri dela Bìblia e pol esser che el gàpia scrito anca el Salmo 90, 91 e el libro de Giò.
4. A chi che Moisè el ga dato consili e parché?
4 Quando Moisè el gavea 120 ani, un tempo prima de morir, lu el ga dato bei consili ai israeliti. Parché? Parché lori suito i ndaria rento la Tera Prometesta. Par quela, Moisè el ga volesto che lori i se ricordesse de arquante bele robe che i gavea visto. a Arquanti ani prima, tanti de quei israeliti i gavea visto bei miràcoli che Geovà el gavea fato e come lu el gavea castigà i egìpsi. (Éso. 7:3,4) I israeliti anca i gavea visto come Geovà el gavea spartio le àque del Mar Rosso par farli ndar de quel’altra banda del mar. Alora, Moisè anca li ga giutadi a ricordarse come Geovà el ga finio fora con Faraò e tuto el so esèrsito. (Éso. 14:29-31) Lu anca el ga parlà che Geovà el ghe ga dato tuto quel che ghe ocorea e li ga protegesti tanto ben quando i era nel deserto. — Deu. 8:3, 4.
5. De acordo con Deuteronómio 30:19, 20, Moisè el ga giutà i israeliti a ricordarse de che?
5 Cossa che Moisè el ga dito? (Ledi Deuteronómio 30:19, 20. b) Lu el ga giutà i israeliti a ricordarse dela bela speransa che i gavea. Geovà li giutaria a viver tranquili nte una tera tanto bela e con tanto magnar. Moisè el ga dito che lori i cataria cità ‘che no i gavea fato su, con case piene de tuti i tipi de robe bone, che no i gavea mia laorà par gaverle, con possi che no i gavea mia verto e con vignai e olivere che no i gavea mia impiantà’. — Deu. 6:10, 11.
6. Parché che Geovà el ga assà che nassion nemighe tolesse el poder de Israel?
6 Ma Moisè anca el ga dito ai israeliti cossa che lori i gavaria de far par seitar a viver in quela tera. Moisè el ga dito che lori i gavaria de obedir a Geovà e restar darente a lu se i volesse “seitar a viver”. Ancora cossita, lori no i ga seità leai a Geovà. Par quela, Dio el ga assà che i assiri e anca i babiloni i tolesse el poder dela nassion e i portesse via i israeliti de quela bela tera. — 2 Rè 17:6-8, 13, 14; 2 Cró. 36:15-17, 20.
7. Cossa che podemo imparar de quel che Moisè el ga dito? (Varda anca la ilustrassion.)
7 Cossa che imparemo? Podaremo viver par sempre se obedimo a Geovà. Cossita come ghe manchea poco par quei israeliti ndar rento la Tera Prometesta, ne manca poco par ndar rento el bel paradiso che Geovà el ne promete. (Isa. 35:1; Luc. 23:43) Pensa come sarà bel viver nel novo mondo. No ghen sarà pi Sàtana e i so demoni gnanca le religion false che le insegna busie sora Geovà. (Apo. 17:16; 20:2, 3) No ghen sarà governi che ne fà sofrir gnanca persone che le fà robe sbaliade. (Sal. 37:10, 11; Apo. 19:19, 20) Invesse, tuti i ndarà obedir ale lege de Geovà e i viverà in pace e union. Tuti i ndarà fidarse e amar un al altro. (Isa. 11:9) Sicuro che semo premosi de viver in Paradiso! Se noantri obedimo a Geovà, podaremo viver in questo paradiso par sempre. — Sal. 37:29; Gio. 3:16.
Se noantri obedimo a Geovà, podaremo viver nel Paradiso qua nela Tera par sempre (Varda el paràgrafo 7.)
8. Come che la promessa de Geovà ga giutà un missionàrio dela Àfrica? (Giuda 20, 21)
8 Se seitemo a pensarghe sora la promessa de Geovà de viver par sempre, gavaremo la forsa che ne ocore par dàrghene fora coi problemi e par seitar a obedirlo. (Ledi Giuda 20, 21. c) Pensarghe sora questa promessa anca ndarà giutarne a dàrghene fora cola voia de far una roba che la ze sbaliada. Varda el esémpio de un missionàrio che el ga servio par tanti ani nela Àfrica. Lu el ga bio de sforsarse tanto par dàrghene fora con una voia sbaliada che el gavea. Lu el ga dito: “Mi go proà sempre ricordarme che no podaria viver par sempre in Paradiso se no seitesse leal a Geovà. Par quela, go seità a pregar a Geovà e go bio la forsa che me ocorea par seitar leal.”
“TUTO QUEL CHE TE FÈ NDARÀ BEN”
9. Che dificoltà Davi el ga infrontà?
9 Davi l’era un bravo rè, el sonea, el fea poesie, l’era un gueriero e anca un profeta. Ma lu el ga infrontà brute dificoltà. Par esémpio, par tanti ani, ghe ga tocà scampar via parché el rè Saul el volea coparlo. Dopo che l’è deventà rè, ghe ga tocà scampar via nantra volta parché so fiol Absalon el volea coparlo par deventar rè nel so posto. Ancora che Davi el gàpia infrontà tute queste dificoltà e el gàpia fato bruti sbali, lu l’è stà leal a Geovà fin la so morte. Par quela che Geovà el ga dito che lu l’era un omo che el contentea so cuor. Alora, l’è sicuro che podemo imparar tanto dei consili de Davi. — Ati 13:22; 1 Rè 15:5.
10. Parché che Davi el ga dato consili al so fiol Salomon?
10 Adesso, ndemo imparar sora el bel consìlio che Davi el ga dato al so fiol Salomon. Geovà el gavea scoliesto Salomon par esser rè, par far su el témpio e par giutar el pòpolo a seitar adorarlo dela maniera giusta. (1 Cró. 22:5) Alora, l’è sicuro che Salomon el ndaria infrontar tante dificoltà. Ndemo imparar sora el bel consìlio che Davi ghe ga dato.
11. De acordo con 1 Rè 2:2, 3, cossa che Davi el ga dito a Salomon, e come quel che el ga dito ga pròpio sucedesto? (Varda anca la ilustrassion.)
11 Cossa che Davi el ga dito? (Ledi 1 Rè 2:2, 3. d) Davi el ga dito a Salomon che se el fusse obediente a Geovà, lu el saria un bon rè. Salomon el ga fato quel che so pare el ghe ga dito, e Geovà lo ga giutà. (1 Cró. 29:23-25) Par quela, lu l’è stà bon de far su un bel témpio e el ga scrito arquanti libri dela Bìblia. Lu anca el gavea tanta sabedoria e l’era pròpio sior. (1 Rè 4:34) Ma Davi anca el ga dito a Salomon che se no’l seitesse leal, Geovà no’l ndaria pi giutarlo. Questo ga pròpio sucedesto quando Salomon l’era belche vècio e el ga scominsià adorar falsi dèi. Alora, Geovà el se ga fermà de dar a Salomon sabedoria par tender dei israeliti e esser un bon rè. — 1 Rè 11:9, 10; 12:4.
Quel che Davi el ga dito a so fiol Salomon ne ricorda che se obedimo a Geovà lu el ne giutarà a far bone dessision (Varda i paràgrafi 11 e 12.) f
12. Cossa che imparemo de quel che Davi el ga dito?
12 Cossa che imparemo? Se obedimo a Geovà, lu el ndarà giutarne e benedirne. (Sal. 1:1-3) L’è vera che Geovà no’l promete mia darne soldi e glòria compagno el ga dato a Salomon. Ma lu el promete che se lo obedimo, lu el ndarà darne la sabedoria che ghe ocore par far bone dessision. (Pro. 2:6, 7; Tia. 1:5) I consili de Geovà i pol giutarne a far bone dessision sora laoro, stùdio, soldi e diversion. Se metemo in pràtica i so consili, gavaremo una forte amicìssia con lu e gavaremo la speransa de viver par sempre. (Pro. 2:10, 11) Noantri anca gavaremo bele amicìssie e una fameia felice.
13. Cossa che ga giutà Carmen a gaver una bela vita?
13 Carmen, che la ze una sorela de Mossambiche, la pensea che se la studiesse tanto la gavaria una vita meio. Alora, la ga scominsià a far una università. Ela la ga dito: “Mi me piasea tanto quel che ero drio imparar. Ma no gavea pi tempo e forsa par gnente. Me tochea ndar ala università ale 7:30 de matina e restar là fin le 6:00 de sera. L’era fadiga ndar ale riunion, e la me amicìssia con Geovà la era drio restar cada volta pi fiaca. Alora, mi go visto che ero drio proar servir a due paroni.” (Mat. 6:24) Dopo, Carmen la ga pregà a Geovà sora quel che la era drio sentir e la ze ndata in serca de orientassion nele publicassion. Ela la ga dito: “Mi go ricevesto boni consili de bravi fradei e dela me mare. Alora, go dessidio assar de far la università e scominsiar a far de pi par Geovà. Mi son sicura che go fato la meio dessision dela me vita e son tanto contenta.”
14. Che consìlio Moisè e Davi i ga dato?
14 Moisè e Davi i amea tanto a Geovà e i savea come l’era importante esser obediente. Tuti due i ga incoraià i altri a seitar obedir a Geovà compagno a lori. Moisè e Davi anca i ga dito che se le persone no le seitesse leal a Geovà, lu no’l ndaria pi benedirle e esser so amigo. Sicuro che i so consili i ze tanto boni anca par noantri ancoi. Adesso, ndemo imparar sora el consìlio che nantro servo fedele de Geovà el ga dato.
“NO GO ALEGRIA PI GRANDA CHE QUESTA”
15. Cossa che el apòstolo Gioani el ga visto?
15 El apòstolo Gioani l’era un caro amigo de Gesù. (Mat. 10:2; Gio. 19:26) Gioani el ga predicà insieme a Gesù par tanto tempo. Quando Gesù el ga fato bei miràcoli e quando el ga infrontà brute dificoltà, Gioani l’era insieme a lu. Gioani l’era insieme quando Gesù l’è stà copà e lo ga visto dopo che l’è stà ressussità. Lu anca el ga visto le bone notìssie scominsiar a ‘esser predicade a tante nassion’, tante persone deventar dissìpoli de Gesù e che ghen’era cada volta de pi congregassion. — Col. 1:23.
16. Chi che pol esser incoraià par meso de quel che Gioani el ga scrito?
16 Quando Gioani l’era belche vècio, Geovà lo ga doperà par scriver el libro de Apocalisse. (Apo. 1:1) Gioani anca el ga scrito el libro col so nome e le tre carte che anca le ga el so nome. Ghen’era tanti fradei e sorele che i era cari par Gioani come se i fusse so fioi. Par esémpio, lu el ga scrito la so tersa carta a un fradel de nome Gaio, che el ghe volea tanto ben come se fusse so fiol. (3 Gio. 1) Sicuro che quel che Gioani el ga scrito giuta tanto i servi de Geovà fin ancoi.
17. De acordo con 3 Gioani 4, cossa ghemo de far par esser felici?
17 Cossa che Gioani el ga dito? (Ledi 3 Gioani 4. e) Lu el ga dito che quando obedimo a Geovà semo felici. Par quela, nela so tersa carta, Gioani el ga dito che l’era pròpio contento de veder che so cari fradei e sorele i era leai a Geovà. In quela època, arquanti i era drio insegnar busie e intrigar la union dela congregassion. Ma ghen’era de quei che i seitea a obedir la verità e i comandamenti de Dio. (2 Gio. 4, 6) Sicuro che questi bravi fradei e sorele i ga assà Gioani e Geovà tanto contenti. — Pro. 27:11.
18. Cossa che imparemo de quel che Gioani el ga dito?
18 Cossa che imparemo? Quando obedimo a Geovà semo pi felici e anca assemo altri contenti. (1 Gio. 5:3) Par esémpio, quando femo quel che l’è giusto e semo boni de dàrghene fora cole voie sbaliade, noantri restemo tanto contenti. (Pro. 23:15) Anca Geovà e i àngeli i resta contenti de veder che seitemo leai. (Luc. 15:10) L’è una alegria veder che nostri fradei e sorele i seita leai a Geovà anca se i ze perseghidi o se i ga de dàrghene fora cola voia de far una roba sbaliada. (2 Tes. 1:4) Sicuro che dopo che Geovà el finisse fora col mondo de Sàtana, restaremo tanto contenti de saver che ghemo seità leai a Geovà.
19. Cossa che Rachel la ga dito? (Varda anca la ilustrassion.)
19 Noantri restemo tanto contenti de insegnarghe ai altri sora Geovà. Rachel, che la ze una sorela dela Repùblica Dominicana, la ga belche giutà tanti a deventar servi de Geovà, e la ga dito che questo l’è un grando onor. Rachel la ga dito: “No son gnanca bona de dir che contenta che resto de veder quando una persona la scomìnsia amar a Geovà, a fidarse in lu e a cambiar quel che ghe ocore. La alegria che mi go la ze tanto pi granda del sforso che go fato par insegnarghe.”
Restemo tanto contenti de insegnar altri a amar e obedir a Geovà compagno a noantri (Varda el paràgrafo 19.)
IMPARA DE QUEL CHE MOISÈ, DAVI E GIOANI I GA DITO
20. De che maniere semo compagni a Moisè, Davi e Gioani?
20 Moisè, Davi e Gioani i ga vivesto tanto tempo indrio e so vita la era pròpio difarente dela nostra. Ma cossita come lori, anca noantri adoremo a Geovà, preghemo, se fidemo in lu e ghe domandemo el so aiuto. Compagno questi tre servi fedeli, noantri semo sicuri che Geovà el benedisse e el giuta quei che i lo obedisse.
21. Cossa che ndarà suceder se ghe ndemo drio i consili de Moisè, Davi e Gioani e obedimo a Geovà?
21 Alora, ghemo de sforsarse par meter in pràtica i consili de Moisè, Davi e Gioani e seitar obedir a Geovà. Cossita, faremo bone dessision, podaremo viver par sempre e gavaremo alegria de saver che semo drio contentar a Geovà. (Deu. 30:20) Se seitemo a obedirlo, podemo esser sicuri che lu el ndarà benedirne de tante bele maniere. — Efe. 3:20.
CÀNTICO 129 Mi vao seitar a perseverar
a Quasi tuti i israeliti che i ga visto Geovà verder el Mar Rosso no i ze ndati rento la Tera Prometesta. (Nùm. 14:22, 23) Geovà el ga dito che tuti i òmini che i gavesse de pi de 20 ani i saria morti nel deserto. (Nùm. 14:29) Ma, Giosuè, Calebe e tanti òmini dela tribo de Levi, insieme ai òmini che i gavea manco de 20 ani i ga visto la promessa de Geovà realisarse quando i ze ndati de quel’altra banda del Rio Giordon e i ze ndati rento Canaan. — Deu. 1:24-40.
b (Deuteronómio 30:19, 20) Ancoi el cielo e la tera i ze testimònie che mi go metesto davanti a valtri la vita e la morte, la benedission e la maledission. Te ghè de scòlier la vita par seitar a viver, ti e i to dissendenti, 20 se te ami a Geovà, el to Dio, se te scolti la so voce e se te tien darente a lu, parché lu l’è la to vita e par meso de lu ti te viverè par tanto tempo nela tera che Geovà el ga prometesto darghe ai to antenati Abraon, Isache e Giacò.”
c (Giuda 20, 21) Ma valtri, me amadi, resté pi forti sora la vostra santìssima fede, e assé che el spìrito santo el guide le vostre orassion. 21 Cossita, seité nel amor de Dio, intanto che speté la misericòrdia del nostro Signor Gesù Cristo che la porta la vita eterna.
d (1 Rè 2:2, 3) “Vao morir suito. Sìpia um omo bravo e forte. 3 Te ghè de seitar a obedir a Geovà, el to Dio, e seitar a far quel che lu el vol. Te ghè de obedir ale so lege, comandamenti e ai so consili, cossita come i ze scriti nela Lege de Moisè. Alora, tuto quel che te fè ndarà ben, no importa el posto che te sì.
e (3 Gioani 4) No go alegria pi granda che questa: scoltar che i me fioi i continua a caminar nela verità.
f ILUSTRASSION: Sanca: Davi el ghe dà boni consili a so fiol Salomon. Drita: Fradei e sorele i impara boni consili de Geovà nela scola de pionieri.
