POL ESSER che, dele volte, te fà fadiga studiar la Bìblia tute le stimane, o fursi no te ghè mia tanta voia de studiar. Questo sucede con tuti noantri. Ma podemo pensar che leder la Bìblia l’è compagno a lavarse. L’è vera che ghe vol tempo e sforso par lavarse, ma dopo se sentimo tanto meio. Dela medèsima maniera, studiar la Bìblia ghe vol tempo e sforso, ma dopo studiarla se sentimo tanto meio. (Efe. 5:26) Adesso, ndemo veder arquante robe che pol giutarte a voler studiar:

• Scoli la ora e el giorno par studiar. Ricòrdate che studiar la Bìblia la ze una dele “robe pi importante” che un servo de Geovà el ga de far. (Fil. 1:10) Alora, proa scriver do la ora e el giorno che te ndaré studiar e assa la foia nte un posto che te podarè sempre vardar. Te pol anca meter sonar el to telèfono quando riva la ora giusta de studiar.

• Proa pensar par quanto tempo e come che te pol studiar. Pol esser che l’è pi fàcile par ti restar atento a quel che te sì drio studiar par una ora o fursi te va meio studiar manco tempo e de pi volte. Alora, proa pensar in quel che l’è meio par ti. Dopo, scoli la ora e quanto tempo che te ndarè studiar. Ma e se riva la ora de studiar e no te ghè mia tanta voia? Proa studiar sol 10 minuti. Anca se te studi poco tempo cossita, te sarè bon de imparar tante robe, e pol esser che dopo te volarè studiar par de pi tempo. — Fil. 2:13.

• Scoli quel che te ndarè studiar. Se te speti la ora de sentarte do par dessider cossa che te ndarè studiar, no te sarè bon de ‘doperar el to tempo dela meio maniera’. (Efe. 5:16) Alora, scrivi do arquante robe che te vol imparar o arquante domande che ti te ghè. E nel fin del stùdio, te pol scriver do anca altre robe che te vol studiar pi avanti.

• Fà cambiamenti se te ocore. Ancora che sìpia tanto importante gaver una programassion par studiar, te ghè de esser pronto par cambiar cossa che te ndarè studiar e anca par quanto tempo. Ma ricòrdate che la roba pi importante no la ze quando, par quanto tempo e cossa che te ndarè studiar. Invesse, el pi importante l’è studiar tute le stimane.

Se noantri studiemo tute le stimane, gavaremo una bela amicìssia con Geovà, faremo bone dessision e gavaremo pi forsa. — Gios. 1:8.