STÙDIO 44
CÀNTICO 33 Buta la to carga sora Geovà
Seita leal a Geovà anca quando i altri i te trata mal
“No sté mia assarve vinser par el mal, ma seité vinser el mal col ben.” — ROM. 12:21.
COSSA CHE NDAREMO IMPARAR?
In questo stùdio, ndaremo veder come che podemo seitar a far quel che l’è giusto quando sofrimo e quando i altri i ne trata mal.
1-2. Cossa che pol farne sofrir ancoi?
GESÙ el ga contà la stòria de una védova che la era drio sofrir e la ga seità a domandar che un giuis el fesse quel che l’è giusto. Sicuro che i dissìpoli de Gesù i ga capio ben cossa la védova de quela stòria la era drio sentir parché lori i sofria tanto par le robe rugne che le persone le fea. (Luc. 18:1-5) Ancoi, anca noantri capimo ben i sentimenti de quela védova parché ancora sofrimo par le robe rugne che le persone le fà.
2 Ancoi, noantri savemo che podemo sofrir e che i altri i pol tratarne mal parché le persone no le ga mia bontà, le vol sempre de pi e le ga tanto preconceto. (Ecl. 5:8) Pol esser ancora pi bruto quando un fradel o una sorela no i ne trata con bontà. Ma ghemo de ricordarse che lori i ze imperfeti e no i ze mia compagno quei che ne vien contra e che proa farne mal. Alora, cossa che pol giutarne? Podemo imparar tanto del esémpio de Gesù che el ga infrontà brute situassion compagno a questa. Se semo boni portar passiensa con quei che i ne vien contra, anca saremo boni portar passiensa coi nostri cari fradei e sorele. Ma cossa che Geovà el sente quando semo drio sofrir? Sarà che lu el ghe bada quando qualchedun ne trata mal?
3. Sarà che Geovà el resta disgustà quando semo drio sofrir, parché?
3 La Bìblia la dise che “Geovà el ama la giustìssia”. (Sal. 37:28) E Gesù el ga dito che Geovà el ndarà far quel che l’è giusto nela ora giusta. (Luc. 18:7, 8) Alora, savemo che presto Geovà el ndarà finir fora con tuto quel che ne fà mal e che mai pi ndaremo sofrir nantra volta. (Sal. 72:1, 2) Cossita, semo sicuri che Geovà el ne vol tanto ben e che el resta disgustà quando semo drio sofrir.
4. Come che Geovà el ne giuta a saver cossa far quando semo drio sofrir?
4 Noantri ghemo de spetar fin che Geovà el finissa fora con tuto quel che ne fà mal. Ma ancora adesso Geovà el ne giuta. (2 Pie. 3:13) Come? Lu el ne insegna cossa ghemo de far quando semo drio sofrir. Par meso del bel esémpio de Gesù e par i bei consili che catemo nela Bìblia, podemo saver cossa ghemo de far quando i altri i ne trata mal.
STÀ ATENTO A QUEL CHE TE FÈ QUANDO I ALTRI I TE TRATA MAL
5. Parché che ghemo de star atenti a quel che femo quando qualchedun ne trata mal?
5 Pol esser che sofrimo tanto quando qualchedun ne trata mal. (Ecl. 7:7) Anca Giò, Abacuche e altri servi fedeli del passà i se ga sentio cossita. (Giò 6:2, 3; Aba. 1:1-3) Tuti noantri sofrimo quando qualchedun ne trata mal, ma ghemo de star atenti de mai far gnente de sbalià intanto che semo drio sofrir.
6. Cossa che imparemo con quel che ga sucedesto con Absalon? (Varda anca la ilustrassion.)
6 Vedemo quel che ga sucedesto con Absalon. Lu l’è restà pròpio cativo quando Amnon el ga violentà la so sorela, Tamar. De acordo cola lege de Moisè, Amnon el gavaria de esser copà. (Lev. 20:17) Alora, Absalon no l’era mia sbalià de restar cativo con quel che gavea sucedesto. Ma lu el ga fato un bruto sbàlio parché el ga copà Amnon. (2 Sam. 13:20-23, 28, 29) Cossita, capimo che podaremo gaver ancora de pi problemi se proemo far quel che pensemo che l’è giusto quando semo drio sofrir o quando i altri i ne trata mal.
Absalon el se ga vingà par causa de quel che gavea sucedesto cola so sorela, Tamar (Varda el paràgrafo 6.)
7. Cossa che un servo de Geovà del passà el ga dito quando el ga visto tante brute robe suceder?
7 Un servo de Geovà del passà el ga visto arquante persone rugne tratar mal i altri. Lu el ga dito che i rugni no i gavea mia problemi parché ghe parea che la vita de quele persone rugne la era tanto fàcile. (Sal. 73:12) Lu l’è restà tanto disgustà par causa dele brute robe che el ga visto e el ga fin pensà che l’era par gnente che el se sforsea de servir a Geovà. Alora, lu el ga dito: “Quando go proà capir tuto questo, l’è stato tanto fadiga par mi.” (Sal. 73:14, 16) Lu anca el ga dito che i so pié ‘i ga quasi sbrissià’, o sia, lu el se ga quasi fermà de adorar a Geovà. (Sal. 73:2) Dele volte, ne par che arquante persone che le fà robe sbaliade no le sofre mia par causa de quel che le fà. Par quela, pol esser che anca noantri pensemo che el sforso che femo par servir a Geovà l’è par gnente. Una roba cossita la ga sucedesto con un fradel de nome Alberto. a
8. Cossa che Alberto el ga fato quando l’è stà acusà?
8 Arquanti fradei i ga dito che Alberto l’era drio ciavar soldi dela congregassion, ma questo no l’era mia vero. Ancora cossita, lu no’l ga pi podesto seitar a servir come un ansiano e tanti fradei dela congregassion no i lo rispetea pi. Alberto el ga dito: “Son restà tanto disgustà e cativo.” Par causa de questi bruti sentimenti, Alberto el se ga fermà de ndar ale riunion e ala predicassion par sinque ani. Questo mostra quel che pol suceder se i altri i ne trata mal e no semo mia boni controlar i nostri sentimenti.
FÀ COMPAGNO GESÙ QUANDO I ALTRI I TE TRATA MAL
9. Cossa che Gesù el ga infrontà? (Varda anca la ilustrassion.)
9 Gesù el ga sofrio tanto quando arquanti dela so fameia e anca altre persone lo ga tratà mal. Par esémpio, arquanti dela so fameia i ga dito che lu l’era mato, lìderi religiosi i disea che lu el laorea insieme i demoni e soldadi romani i ghe ga ridesto drio, i ghe ga fato mal e i lo ga copà. (Marco 3:21, 22; 14:55; 15:16-20, 35-37) Ancora cossita, Gesù mai el ga fato qualcossa contra quele persone. Ma cossa ancora podemo imparar?
Gesù el ne ga dato un bel esémpio de cossa far quando i altri i ne trata mal (Varda i paràgrafi 9 e 10.)
10. Cossa che Gesù el fea quando l’era maltratà? (1 Piero 2:21-23)
10 Ledi 1 Piero 2:21-23. b c Gesù l’è stà un bel esémpio de cossa ghemo de far quando i altri i ne trata mal o quando semo drio sofrir. Lu el savea quando el gavea de parlar e quando el gavea de taser. (Mat. 26:62-64) E dele volte, quando i altri i disea busie sora lu, Gesù el dessidia no parlarghe gnente. (Mat. 11:19) Ma lu mai el ghe ga dito su a nissuni quando el parlea qualcossa. Parché che Gesù l’è stà bon de controlarse cossita? Parché lu “el se fidea in quel che giulga de maniera giusta”. Gesù el savea che Geovà no l’era de acordo con quel che i altri i era drio far, e el se fidea che nela ora giusta Geovà el faria quel che l’è giusto.
11. Come che podemo controlar quel che parlemo? (Varda anca la ilustrassion.)
11 Quando qualchedun ne trata mal, podemo far compagno el esémpio de Gesù e controlar quel che parlemo. Dele volte, sucede robete che l’è meio assar star, o fursi dessidimo che l’è meio no parlar gnente par no far vegner fora ancora de pi problemi. (Ecl. 3:7; Tia. 1:19, 20) Ma dele volte pol esser che gavaremo de parlar qualcossa par difender a qualchedun o par spiegar quel che credemo. (Ati 6:1, 2) In queste situassion, ghemo de sforsarse par parlar con calma e rispeto. — 1 Pie. 3:15. d
Quando qualchedun ne trata mal, ghemo de far compagno a Gesù e scòlier ben la ora de parlar qualcossa (Varda i paràgrafi 11 e 12.)
12. Come che podemo mostrar che se fidemo in “quel che giulga de maniera giusta”?
12 Anca noantri podemo far compagno a Gesù e fidarse in Geovà, “quel che giulga de maniera giusta”. Come? Quando i altri i dise busie sora noantri o i ne trata mal, se fidemo che lu el sa quel che l’è vero. Fidarse in Geovà ne giuta a seitar leai anca quando i altri ne trata mal, parché savemo che nela ora giusta lu el ndarà far quel che l’è giusto. Se restemo ansiosi o cativi, podemo far una dessision sbaliada, perder la nostra alegria o rovinar la nostra amicìssia con Geovà. (Sal. 37:8) Ma se se fidemo in Geovà, ndaremo spetar che lu el finissa fora coi nostri problemi. Cossita, no gavaremo bruti sentimenti.
13. Cossa che pol giutarne a saver cossa far quando semo maltratadi?
13 Sicuro che mai saremo boni de ndarghe drio el esémpio de Gesù de maniera perfeta. Dele volte, ndaremo dir o far qualcossa che ndaremo ciamarse grami. (Tia. 3:2) E par causa de quel che i altri i fà, pol esser che ndaremo sofrir fin el novo mondo. Se questo l’è drio suceder con ti, cossa che pol giutarte? Sìpia sicuro che Geovà el sa quel che te sì drio sentir. Ricòrdate che anca Gesù el capisse pròpio ben i to problemi, parché anca lu el ga sofrio. (Ebr. 4:15, 16) Geovà el ne giuta a saver cossa far quando semo maltratadi par meso del bel esémpio de Gesù e dei boni consili che catemo nela Bìblia. Adesso, ndemo veder due versìcoli del libro de Romani che i pol giutarne tanto.
“NO STÉ MIA VINGARVE, MA ASSÉ CHE DIO LO FAE”
14. De acordo con Romani 12:19, cossa ghemo de far?
14 Ledi Romani 12:19. e El apòstolo Paolo el ga dito che noantri ‘no ghemo mia de vingarse, ma ghemo de assar che Dio lo fae’. Alora, cossa ghemo de far? Ghemo de assar che Geovà el dessida la ora e anca come che el ndarà far giustìssia. Un fradel de nome John el ga sofrio tanto par causa dei sbali dei altri. Lu el ga dito: “No l’è stà mia fàcile parché son restà pròpio cativo e me ga tocà sforsarme tanto par no far gnente de sbalià. Ma Romani 12:19 me ga giutà a portar passiensa e fidarme in Geovà.”
15. Parché che l’è meio portar passiensa e fidarse in Geovà?
15 Parché che l’è bon par noantri portar passiensa e fidarse in Geovà? Parché no restaremo disgustadi intanto che proemo finir fora col problema. Invesse, noantri restaremo tranquili parché savemo che Geovà el ndarà finir con tuti i nostri problemi nela ora giusta. Geovà el ga prometesto che el ndarà giutarne, e el vol che se fidemo in lu. Se femo cossita, mai seitaremo disgustadi parché saremo sicuri che lu el ndarà far quel che l’è giusto. Pensar cossita ga giutà John, el fradel che ghemo pena parlà. Lu el ga dito: “Spetar che Geovà el me giute l’è tanto meio che far quel che mi cato che l’è giusto.”
“SEITÉ VINSER EL MAL COL BEN”
16-17. Come che podemo seitar vinser el mal col ben? (Romani 12:21)
16 Ledi Romani 12:21. f Paolo el ga dito che ghemo de ‘seitar vinser el mal col ben’. Anca Gesù el ga dito che ghemo de ‘seitar amar i nostri nemighi e far orassion par quei che i ne perseghe’. (Mat. 5:44) Lu sempre el ga fato pròpio cossita, anca quando soldadi romani i ghe ga fato tanto mal, i lo ga fato sofrir e i lo ga picà su nte un pal de tortura.
17 Ancora che fusse in quela bruta situassion, Gesù l’è stà bon de vinser el mal col ben. Invesse de voler castigar quei soldadi, lu el ga domandà che ‘Geovà li perdonesse, parché lori no i savea quel che i era drio far’. (Luc. 23:34) Anca noantri podemo far compagno a Gesù e pregar par quei che i ne trata mal. Se femo cossita, seitaremo pi calmi e pol esser che fin ndaremo cambiar quel che sentimo sora quei che i ga fato qualcossa contra noantri.
18. Come che pregar a Geovà ga giutà Alberto e John?
18 Pregar e domandar aiuto a Geovà ga giutà i due fradei che ghemo parlà in questo stùdio. Alberto el ga dito: “Go domandà che Geovà giutesse quei fradei che i gavea dito busie sora mi. Go domandà tante volte che Geovà el me giutesse a dàrghene fora cola ràbia de quel che gavea sucedesto.” Ancoi, Alberto l’è drio servir a Geovà contento nantra volta. John el ga dito: “Go domandà tante volte che Geovà el giutesse quel fradel che el me gavea fato sofrir e che anca el me giutesse a perdonarlo. Geovà el me ga giutà a dàrghene fora cola me ràbia e me go fermà de pensar mal de quel fradel. Par quela, go bio tanta pace.”
19. Cossa che ghemo de far fin che rive el novo mondo? (1 Piero 3:8, 9)
19 Fin che rive el novo mondo, pol esser che ancora ndaremo sofrir parché i altri i ne trata mal. Ma, se semo maltratadi, ghemo de seitar a far compagno a Gesù, seitar a meter in pràtica i boni consili che Geovà el ne dà e mai fermarse de pregar e domandar el so aiuto. Cossita, saremo sicuri che Geovà sempre el ndarà giutarne. — Ledi 1 Piero 3:8, 9. g
CÀNTICO 38 Geovà el te farà forte
a Arquanti nomi i ze stati cambiadi.
b (1 Piero 2:21-23) Par quela valtri sì stati ciamadi, parché fin Cristo el ga sofrio par valtri, e el ve ga assà el esémpio par valtri ndarghe drio dei so passi con atension. 22 Noʼl ga mia fato pecato, gnanca se ga catà ingano nela so boca. 23 Quando i ghe disea su, lu no’l ghe disea su indrio. Quando i lo fea sofrir, noʼl minassea, ma el se fidea in quel che giulga de maniera giusta.
c Nei capìtoli 2 e 3 dela prima carta de Piero, lu el ga parla de arquante dificoltà che arquanti fradei e sorele i infrontea par causa de persone rugne o che no i era dissìpoli de Gesù. — 1 Pie. 2:18-20; 3:1-6, 8, 9.
d Varda el vìdeo Come el amor ne fà gaver vera pace nel jw.org.
e (Romani 12:19) Cari, no sté mia vingarve, ma assé che Dio lo fae, parché l’è scrito: “‘La vingansa la ze mia. Mi ndarò darghe quel che i mèrita’, el dise Geovà.”
f (Romani 12:21) No sté mia assarve vinser par el mal, ma seité vinser el mal col ben.
g (1 Piero 3:8, 9) Alora, che tuti valtri gàpie la medèsima maniera de pensar. Gavé anca de meterve nel posto dei altri e de gaver amor come de fradei, compassion e umiltà. 9 No sté pagar mal col mal, gnanca insulto con insulto. Invesse, parlé ai altri con bone parole, parché Dio el ve ga scoliesto par questo, cossita Dio el ndarà benedirve.
