STÙDIO 46
CÀNTICO 49 Come far contento el cuor de Geovà
Sito drio sforsarte par esser un servo ministerial?
“Ghen’è de pi felicità in dar che in ricever.” — ATI 20:35.
COSSA CHE NDAREMO IMPARAR?
Questo stùdio el ndarà giutar i fradei batesadi a gaver voia de esser un servo ministerial e anca el ndarà spiegar cossa i ga de far.
1. Cossa che el apòstolo Paolo el pensea sora i servi ministeriai?
I SERVI ministeriai i fà laori pròpio importanti in tute le congregassion. El apòstolo Paolo el ghe dea tanto valor a quel che questi bravi fradei i fea. Par quela, quando el ga scrito la carta ai Filipensi, lu el ga saludà i servi ministeriai e i ansiani. — Fil. 1:1.
2. Cossa che Luis el ga dito sora esser un servo ministerial?
2 Tanti fradei gióveni e veci i ga tanta alegria de laorar come servi ministeriai. Par esémpio, Devan el ga ricevesto questa responsabilità quando el gavea 18 ani. E anca se Luis el gavesse de pi de 50 ani quando l’è deventà servo ministerial, lu el ga dito: “Mi son tanto contento de giutar la congregassion come un servo ministerial. I me fradei e sorele i ga mostrà che i me ama tanto, e adesso anca mi posso mostrar che li amo.” Tanti servi ministeriai i se sente cossita.
3. Che domande ndaremo risponder in questo stùdio?
3 Se te sì un fradel batesà, sarà che te podarissi esser un servo ministerial? Par giutarte, in questo stùdio, ndaremo risponder ale domande: parché che te vol esser un servo ministerial? Cossa che la Bìblia la dise che te ocore far par esser un servo ministerial? Ma prima, ndemo veder come che i servi ministeriai i pol giutar la congregassion.
CHE LAORI UN SERVO MINISTERIAL EL FÀ?
4. Che laori un servo ministerial el fà? (Varda anca la ilustrassion.)
4 Un servo ministerial l’è un fradel batesà scoliesto col aiuto del spìrito santo, par giutar i ansiani a tender dela congregassion. E che laori lori i fà? Arquanti servi ministeriai i organisa el teritòrio ndove fradei e sorele i ndarà predicar, e anca li giuta a gaver le publicassion che ghe ocore. Altri i pol giutar a netar e rangiar su i Saloni del Regno. I servi ministeriai i pol giutar nele riunion come indicadori e anca a tender del àudio e vìdeo. Ancora che i so laori no sìpia mia de insegnar, lori i giuta tanto nele nostre riunion. Ma el pi importante l’è che i servi ministeriai i ama tanto a Geovà e i mete in pràtica le so orientassion. Lori anca i ama tanto so fradei. (Mat. 22:37-39) Alora, cossa che un fradel el ga de far par deventar un servo ministerial?
I servi ministeriai i pol far compagno a Gesù quando i fà el so meio par giutar i altri (Varda el paràgrafo 4.)
5. Cossa che pol giutar un fradel a deventar un servo ministerial?
5 La Bìblia la dise cossa che te ghè de far par esser un servo ministerial. (1 Tim. 3:8-10, 12, 13) Alora, se te vol giutar de pi i altri, te pol studiar la Bìblia par capir cossa che te ghè de far e sforsarte de meter in pràtica quel che te ghè imparà. Ma, prima de tuto, te ghè de domandarte: ‘Parché che mi vui esser un servo ministerial?’
PARCHÉ CHE TE VOL ESSER UN SERVO MINISTERIAL?
6. Cossa che te ocore par esser un servo ministerial? (Mateo 20:28) (Varda anca la ilustrassion.)
6 Noantri podemo imparar tanto col esémpio de Gesù. Lu el gavea un grando amor par Geovà e par tute le persone. L’è par quela che lu el se sforsea tanto de giutar i altri e fin el fea laori che no i era mia importanti. (Ledi Mateo 20:28; a Gio. 13:5, 14, 15) Se anca ti te ghè un grando amor compagno a Gesù, Geovà el ndarà benedirte e giutarte a deventar un servo ministerial. — 1 Cor. 16:14; 1 Pie. 5:5.
Gesù el ga insegnà i so apòstoli a esser ùmili e a mai voler esser pi importante che i altri. (Varda el paràgrafo 6.)
7. Parché che un fradel no’l ga mia de voler esser un servo ministerial par farse veder ai altri?
7 Tante persone ancoi le ghe dà valor a quei che i vol esser pi importante dei altri. Ma noantri no semo mia cossita. Invesse, volemo sforsarse par giutar nostri fradei parché li amemo, compagno a Gesù. No ghemo mia de far qualcossa parché volemo farse veder o parché volemo comandar nostri fradei. Se un fradel che el ga responsabilità rento la congregassion el pensa che l’è pi importante dei altri, lu no’l volarà mia far arquanti laori pi sémplisse che ghe vol par tender dei servi de Geovà. (Gio. 10:12) Sicuro che Geovà mai el ndarà benedir una persona che la laora sol par esser pi importante che i altri. — 1 Cor. 10:24, 33; 13:4, 5.
8. Che consìlio Gesù el ga dato ai so apòstoli?
8 Fin arquanti amighi de Gesù i ga volesto laorar par farse veder ai altri. Par esémpio, Tiago e Gioani, che i era apòstoli de Gesù, i ghe ga domandà un posto importante rento el so Regno. Ma Gesù no li ga lodadi par quel che i gavea domandà, e dopo el ga dito ai so 12 apòstoli: “Quel che vol esser el pi importante intrà de valtri, ga de esser so servo. E quel che el vol esser el primo intrà de valtri, ga de esser el so schiavo.” (Mar. 10:35-37, 43, 44) Sicuro che se un fradel el vol esser un servo ministerial par giutar i altri, el ndarà far pi forte la congregassion. — 1 Tes. 2:8.
COSSA CHE POL GIUTARTE A VOLER ESSER UN SERVO MINISTERIAL?
9. Cossa che pol giutarte a voler esser un servo ministerial?
9 Sicuro che te ami tanto a Geovà e te vol giutar i altri. Ma pol esser che no te vol mia esser un servo ministerial. Alora, cossa che pol giutarte? Te pol pensar sora la alegria che te gavarè de giutar i to fradei e sorele. Gesù el ga dito: “Ghen’è de pi felicità in dar, che in ricever.” (Ati 20:35) Gesù sempre el ga giutà i altri e el ga bio tanta alegria. Se te fè compagno a lu, anca ti te gavarè tanta alegria.
10. Come che savemo che Gesù el gavea caro de giutar le persone? (Marco 6:31-34)
10 Gesù el gavea pròpio caro de giutar i altri. (Ledi Marco 6:31-34. b) Varda quel che ga sucedesto una volta quando lu e so apòstoli i era strachi. Lori i era ndati nte un posto tranquilo par fermarse un pochetin. Ma una mùcia de gente volea imparar de Gesù, e la ze rivada là prima de lu. Gesù el podaria dir che no ndaria insegnarghe gnente parché lu e so apòstoli no i gavea tempo gnanca par magnar qualcossa. O lu el podaria insegnarghe un per de robe e mandarli via. Ma Gesù el amea tanto le persone, cossita, ‘el ga scominsià insegnarghe tante robe’, e el ga seità insegnarghe fin che ‘l’era tardi’. (Mar. 6:35) Lu no’l ga insegnà quele persone parché ghe tochea. Invesse, lore ‘ghe ga fato pecà a Gesù’, e lu el ga volesto insegnarghe parché le amea. Sicuro che lu el gavea caro de giutar le persone e questo lo assea contento.
11. Cossa che Gesù el ga fato par giutar le persone? (Varda anca la ilustrassion.)
11 Gesù el ga insegnà le persone sora Geovà, ma anca le ga giutade de altre maniere. Par esémpio, una volta, lu el ga fato un miràcolo par darghe de magnar a una mùcia de persone, e el ga domandà che so dissìpoli ghe desse quel magnar. (Mar. 6:41) Cossita, Gesù el ga insegnà i so dissìpoli come che i podaria giutar i altri. Lori i ga fato un laoro sémplisse, ma tanto importante, compagno al laoro che i servi ministeriai i fà ancoi. Alora, proa pensa come quei apòstoli i ze restadi contenti de giutarlo a darghe de magnar a tute le persone che le ga “magnà fin che ghe bastesse”. (Mar. 6:42) Ma Gesù no’l ga giutà le persone sol quela volta. Invesse, lu el ga laorà tuta la so vita par giutar i altri. (Mat. 4:23; 8:16) Gesù el gavea pròpio caro de insegnar le persone e giutarghe con quel che ghe ocorea. Sicuro che anca ti te gavarè tanta alegria se te te sforsi par esser un servo ministerial.
Se te ami a Geovà e te ghè voia de giutar i altri, te farè tuto quel che te pol par giutar i to fradei (Varda el paràgrafo 11.) f
12. Parché che no ghemo mia de pensar che no podemo far gnente par giutar nela congregassion?
12 Arquante persone fursi le pensa che no le sà far gnente par giutar la congregassion. Se ti te pensi cossita, no stà restar desanimà. Te pol esser sicuro che tuti i pol giutar tanto la congregassion. Una roba che te pol far l’è leder quel che Paolo el ga scrito in 1 Corinti 12:12-30 e domandar che Geovà el te giute a capir quel che l’è scrito. Paolo el ga dito che tuti nela congregassion i ze importanti e i pol laorar par giutar i altri. Alora, anca ti e quel che te fè l’è tanto importante. Se ancoi te manca qualcossa par esser un servo ministerial, no stà mia desister. Invesse, fà tuto quel che te pol par laorar par Geovà e giutar i to fradei e sorele. Te pol esser sicuro che i ansiani i ndarà veder el to sforso e i te darà laori che te sì bon de far. — Rom. 12:4-8.
13. Cossa che ghemo de capir sora le qualità che ghe vol par deventar un servo ministerial?
13 Tuti noantri, servi de Geovà, ghemo de far pi forte la nostra amicìssia con lu, gaver la alegria de giutar i altri e sforsarse par viver de acordo con quel che Geovà el vol. Cossa che imparemo? Quel che un fradel ga de far par deventar un servo ministerial l’è compagno a quel che tuti noantri ghemo de far par adorar a Geovà. Ma ghen’è anca altre robe che un fradel el ga de far par deventar un servo ministerial. Cossa?
COME CHE TE POL DEVENTAR UN SERVO MINISTERIAL?
14. Cossa che vol dir ‘esser una persona de fidarse’? (1 Timòteo 3:8-10, 12)
14 Adesso, ndemo veder in 1 Timòteo 3:8-10, c 12 d arquante qualità che un fradel el ghe ocore par esser un servo ministerial. (Ledi.) La Bìblia la dise che i servi ministeriai i ga de “esser òmini de fidarse”. Questo anca pol esser tradusio come “qualchedun che ga responsabilità” o “che ga el rispeto dei altri”. Ma no vol mia dir che un fradel cossita no’l pol rider o divertirse. (Ecl. 3:1, 4) Invesse, lu el ga de esser una persona che se sforsa par tender de tute le so responsabilità. Alora, se te te sforsi de far ben tuti i laori che i te dà, te pol esser sicuro che i fradei e sorele dela congregassion i ndarà fidarse in ti e rispetarte tanto.
15. Cossa che vol dir ‘parlar sempre la verità’ e “no voler ciapar soldi de maniera sbaliada”?
15 Un servo ministerial el “parla sempre la verità”, o sia, lu mai el ga de parlar busie, proar imbroiar i altri o far finta de esser una roba che no l’è mia. (Pro. 3:32) Gnanca el ga de “voler ciapar soldi de maniera sbaliada”. Questo vol dir che lu sempre el fà polito i so negossi, e che mai el ndarà doperar i so fradei dela congregassion par ciapar de pi soldi.
16. (a) Cossa che vol dir ‘no bever massa vin’? (b) Cossa che vol dir “viver cola cossiensa neta”?
16 Un servo ministerial ‘no’l ga de bever massa vin’, o sia, lu el ga de controlar quanto che el beve, e no esser cognossesto come un ciucheton. Lu anca el ga de “viver cola cossiensa neta”, o sia, viver de acordo con quel che Geovà el vol. Ancora che el servo ministerial no’l sìpia perfeto, lu el pol gaver una forte amicìssia con Geovà e pace.
17. Come che i ansiani i pol ‘veder se un fradel el ga le abilità che ghe vol’? (1 Timòteo 3:10, varda anca el ritrato.)
17 Prima de scòlier un fradel par esser un servo ministerial, i ansiani i ga de ‘veder se lu el ga le abilità che ghe vol’. Come cossita? Lori i ga de esser sicuri che te sè tender dele to responsabilità e che i pol fidarse in ti. Alora, se i ansiani i te domanda de far qualcossa, va in serca de capir come che la organisassion la dise de far quel laoro. Proa anca saver quando te ghè de finir quel laoro e domanda tuto quel che te ocore par farlo ben fato. Dopo, sfòrsate de far tuto quel che i ansiani i te ga domandà. Se te fè cossita, i fradei e sorele dela congregassion i ndarà veder el to sforso e i restarà contenti de veder che te sì pròpio bravo. Ma anca i ansiani i ga de sforsarse par giutar i fradei a far de pi par Geovà. (Ledi 1 Timòteo 3:10. e) Alora, se te sì un ansiano, proa domandarte: “Ghen’è toseti e gióveni belche batesadi nela me congregassion? Lori i stùdia la Bìblia, parécia le riunion, fà comentari e se sforsa de ndar ala predicassion?” Se ghen’è bravi gióveni cossita nela to congregassion, proa darghe laori pi pìcoli, de acordo con quel che lori i ze boni de far. Cossita, te savarè se “lori i ga le abilità che ghe vol”, e quando i ga intorno de 17 o 18 ani, fursi lori i sarà pronti par esser servi ministeriai.
Quando i ansiani i dà laori par fradei batesadi, lori i pol veder che i ze bravi de far anca altre robe (Varda el paràgrafo 17.)
18. Cossa che vol dir ‘no gaver gnente de rugno contra noantri’?
18 Un fradel che el vol esser un servo ministerial el ga de esser sicuro che ‘no ghen’è gnente de rugno contra lu’. Questo vol dir che lu el vive de una maniera giusta, e cossita, nissuni podarà acusarlo de gaver fato un bruto pecato. Savemo che nel passà, i ga parlà anca contra Gesù, e lu el ga dito che i ndaria far compagno con noantri. (Gio. 15:20) Alora, savemo che le persone le pol parlar busie contra noantri. Ma, se te te sforsi de far tuto de acordo con quel che Geovà el vol, te gavarè el rispeto dei to fradei e dele to sorele. — Mat. 11:19.
19. Cossa che vol dir ‘esser maridà con una sol dona’?
19 Un servo ministerial el ga de ‘esser maridà con una sol dona’. Come cossita? Quando Geovà el ga maridà Adon e Eva, lu el ga dito che el matrimònio el ga de esser sol intrà un omo e una dona. (Mat. 19:3-9) Par quela, un servo de Geovà mai el ga de far imoralità sessual. (Ebr. 13:4) E se un servo ministerial l’è maridà, lu el ga de esser leal ala so dona e mai el ga de tratar altre done come se el volesse smorosarle. — Giò 31:1.
20. Come che un omo el pol “tender ben dei so fioi e dela so fameia”?
20 Un fradel el ga de “tender ben dei so fioi e dela so fameia” se el vol esser un servo ministerial. Alora, se te sì maridà o te ghè fioi, te toca sforsarte par esser un bravo paron de fameia. Te ocore far sempre la adorassion in fameia e proar ndar ala predicassion cola to dona e to fioi. Sfòrsate par giutar i to fioi a gaver una forte amicìssia con Geovà. (Efe. 6:4) Sicuro che un omo che el tende ben dela so fameia el ndarà tender ben anca dela congregassion. — Varda anca 1 Timòteo 3:5.
21. Cossa che te pol far se no te sì gnancora un servo ministerial?
21 Se gnancora te sì un servo ministerial, prega a Geovà e pensa in tuto quel che te ghè imparà in questo stùdio. Proa anca studiar sora le qualità che la Bìblia la dise che te ocore par deventar un servo ministerial. Pensa nel to grando amor par Geovà e par i to fradei e sorele. Cossita, te gavarè pi voia de laorar par giutarli. (1 Pie. 4:8, 10) Alora, se te deventi un servo ministerial, te gavarè tanta alegria de laorar par giutar la congregassion, e te pol esser sicuro che Geovà el gavarà caro de giutarte a gaver le qualità che te ocore par esser un servo ministerial! — Fil. 2:13.
CÀNTICO 17 Mi vui farlo!
a (Mateo 20:28) cossita come el Fiol del omo l’è vegnesto, nò par esser servio, ma par servir e dar la so vita par salvar tante persone.”
b (Marco 6:31-34) E lu el ghe ga dito: “Vegné insieme, ndemo nte un posto par restar noantri soli e riposar un pochetin.” Parché ghen’era tante persone che le vegnea e le ndea, e lori no i gavea gnanca tempo par magnar qualcossa. 32 Par quela, i ze ndati de barco nte un posto par restar lori soli. 33 Ma le persone li ga visti ndar via, e tanti i ga savesto ndove lori i ndea. Alora, persone de tute le cità le ze ndate fin là a pié e le ze rivade prima de lori. 34 Ben, dopo che i ze ndati do del barco, lu el ga visto tante persone e ghe ga fato pecà de lore, parché le era come piégore sensa pastor. E el ga scominsià a insegnarghe tante cose.
c (1 Timòteo 3:8-10) Dela medèsima maniera, i servi ministeriai i ga de esser òmini de fidarse e che i parla sempre la verità. Lori no i ga de bever massa vin, gnanca voler ciapar soldi de maniera sbaliada. 9 Ma i ga de viver cola cossiensa neta de acordo col sacro segreto dela fede. 10 Anca, prima se ga de veder se lori i ga le abilità che ghe vol. Dopo, se no ghen’è gnente de rugno contra lori, i pol servir come ministri.
d (1 Timòteo 3:12) I servi ministeriai i ga de esser maridadi con una sol dona, e tender ben dei so fioi e dela so fameia.
e (1 Timòteo 3:10) Anca, prima se ga de veder se lori i ga le abilità che ghe vol. Dopo, se no ghen’è gnente de rugno contra lori, i pol servir come ministri.
f ILUSTRASSION : Ala sanca, Gesù l’è drio mostrar umiltà intanto che el giuta i so dissìpoli. Ala drita, un servo ministerial l’è drio giutar un fradel pi vècio dela congregassion.
