Sicuro che Geovà el ga dato forsa par quei predicadori sforsadi. Vanti del ano de 1920, ghen’era 225 pionieri e in quel ano, altri 125 pionieri i ga scominsià a giutar nela predicassion. Par la prima volta, de pi de 8 mila predicadori i ga mandà i relatori dele so atività par la sede mondial. Sicuro che Geovà el ga benedio tanto questi fradei e el so laoro.

Joseph Rutherford el organisea el laoro in quel tempo. Nel giorno 21 de marso de 1920, el ga fato el discorso col tema: “Milioni che adesso i vive mai i morirà”. I Studianti dela Bìblia i ga fato tuto el sforso che lori i podea par convidar le persone par quel discorso. Lori i gavea afità un dei pi grandi posti nela cità de Nova York e i ga dato de pi de 320 mila conviti ale persone.

Lori no i gavea mai imaginà, ma tante persone le ga acetà el convite. Ghen’era 5 mila persone rento de quel posto, e come no ghen’era pi posto, 7 mila persone no le ze state bone de ndar rento. La revista La Tore de Vigia, la ga dito che quela riunion la ze stata “una dele meio riunion che i Studianti dela Bìblia i ga fato”.

Tanti i cognossea i Studianti dela Bìblia parché i predichea sora: “Milioni che adesso i vive mai i morirà.” In quela època, lori no i savea che quela predicassion la deventaria un laoro tanto pi grando, ancora cossita lori i ga fato tanto sforso. Ida Olmstead, che la ga scominsià a ndar ale riunion in 1902, la ga dito: “Noantri savéino che i umani i riceveria tante benedission. Alora, noantri sempre parléino sora le bone notìssie a tuti quei che èrino boni.”

I fradei de Betel i ga scominsià a stampar arquante publicassion, cossita ghen saria publicassion par tuti quei che i volesse. Lori i ga comprà quel che i gavea de bisogno par stampar queste publicassion e i ga metesto queste robe nte un posto afità nela Avenida Myrtle, 35, che l’era darente del Betel in Brooklyn.

Leo Pelle e Walter Kessler i ze ndati laorar in Betel nel mese de genaro de 1920. Walter  el ga dito: “Quando semo rivadi, el fradel che el tendea dela gràfica el ga dito: ‘Ancora ghe manca una ora e mesa par el disnar.’ Alora, el ne ga dato laoro par far. Lu el ne ga mandà ciapar le casse che le era nel poron.”

Leo el ga parlà quel che lori i ga fato nel giorno dopo: “Noantri gavéino de netar le parede de quel posto nela Avenida Myrtle, 35. Quel posto l’era tanto sporco, no gavea mai fato un laoro come quel. Ma, noantri èrino drio laorar par Geovà, alora èrino tanto contenti.”

Poco tempo dopo, quei fradei tanto sforsadi i ga scominsià a stampar la revista La Tore de Vigia. Intorno de 60 mila reviste de 1.º de febraro de 1920 le ze state stampade. I fradei anca i ga metesto una màchina de stampar nel poron. Anca la revista La età de Oro de 14 de april de 1920, la ga scominsià a esser stampada lì. Sicuro che Geovà el ga benedio el sforso de quei fradei.

El pòpolo leal de Geovà l’era pronto par scominsiar a predicar nantra volta. Ma arquanti Studianti dela Bìblia i ga abandonà la organisassion de Geovà intrà 1917 e 1919. Cossa che la organisassion de Geovà la podaria far par giutarli?

Nela revista La Tore de Vigia de 1.º de april de 1920, ghen’era el stùdio “Vivemo in pace”. Questo stùdio el ga dito: ‘Semo sicuri che tuti quei che i ga el spìrito del Signor i sarà boni de desmentegarse dele robe che le ze restade indrio, a viver in union e a esser come un sol corpo.’

Le parole de quela revista le ga fato tanti ritornar ala organisassion. Un casal el ga dito: ‘Noantri savemo che l’è stà un sbàlio restar fermi de pi de un ano, intanto che i altri i predichea. Noantri no volemo mai pi abandonar la organisassion.’ Questi fradei i gavaria tanto laoro de far!

Nel giorno 21 de giugno de 1920, i Studianti dela Bìblia i ga doperà el libro El Mistero Consumà, che l’era el sètimo volume del Estudos das Escrituras. Come i fradei i ze stati proibidi de doperar questo  libro, in 1918, lori i ga bio de meter via tanti libri.

Tuti i predicadori, no sol i pionieri, i ze stati convidadi par questo laoro. “In cada congregassion le persone batesade le pol giutar in questo laoro. Tuti noantri ghemo de esser determinadi a doperar la ZG.” Edmund Hooper el ga ricordà che in quel tempo tanti fradei i ga laorà par la prima volta nela predicassion de casa in casa. Lu el ga anca dito: “Noantri ghemo scominsià a capir che questo laoro el saria tanto pi grando de quel che ghemo imaginà.”

Par causa dela Prima Guera Mondial, l’era fadiga parlar coi Studianti dela Bìblia de altri paesi. Alora, el fradel Rutherford el ga volesto incoraiar questi fradei e organisar nantra volta el laoro de predicassion. Cossita, nel giorno de 12 de agosto de 1920, lu e altri quatro fradei i ga scominsià un viaio che el saria fato par la Europa e par el Oriente Mèdio.

Quando el fradel Rutherford el ga visità la Gran-Bretagna, i Studianti dela Bìblia i ga fato 3 congressi e 12 riunion. Intorno de 50 mila persone le ze ndate in queste riunion. La revista, La Tore de Vigia la ga dito sora la vìsita: “I fradei i ze stati tanto incoraiadi. Lori i ga de pi amor intrà de lori e par quela i ze pi unidi nel laoro. Tanti fradei che i era triste i ze restadi contenti.” Quando el fradel Rutherford l’era in Paris, el ga fato el discorso “Milioni che adesso i vive mai i morirà”. In questo discorso, no ghen’era pi posto lì e dopo del discorso, intorno de 300 persone le volea saver de pi.

Un tempo dopo, Rutherford e i fradei che i era insieme con lu, i ze ndati par Atena, Cairo e Gerusalen. Ghen’era tante persone interessade nela verità in questi posti, alora el fradel Rutherford el ga doperà un posto nela cità de Ramallah, che l’è darente de Gerusalen, par meter via le publicassion. Dopo, lu l’è tornà ala Europa e el ga verto un scritòrio par tender del laoro e el ga parecià quel che gavea de bisogno par stampar le publicassion.

In setembre de 1920, i Studianti dela Bìblia i ga fato el nùmero 27 dela revista  La Età de Oro. Questa revista la mostrea la perseghission che i Studianti dela Bìblia i gavea infrontà in 1918. La màchina de stampar la ga laorà di e note par stampar de pi de 4 milioni de questa revista.

La revista la parlea de quel che gavea sucedesto cola sorela Emma Martin. Ela la servia come pioniera in San Bernardino, nela Califòrnia. Nel giorno 17 de marso de 1918, ela e tre fradei, Edward Hamm, Edward Sonnenburg e Ernest Stevens, i ze ndati nte una riunion coi Studianti dela Bìblia.

Ma ghen’era un omo in quela riunion che no l’era lì par imparar sora la Bìblia. Pi tardi, lu el ga dito: “Mi son ndà a quela riunion . . . parché la giustìssia del governo la me ga mandà. Mi gavea de catar prove contra i Studianti dela Bìblia.” Come el libro Mistero Consumà l’era proibio in quela època, lu l’è stà bon de ciapar la “prova”. Pochi giorni dopo, la sorela Emma e i altri tre fradei i ze stati presi parché i era drio doperar un libro proibio.

Emma e i tre fradei i ga ricevesto tre ani de preson. Dopo de ndar tante volte nei tribunai, in 17 de maio de 1920, lori i ze ndati in preson. Ma pena dopo, la situassion la ndaria restar meio.

In 20 de giugno de 1920, el fradel Rutherford el ga parlà quel che gavea sucedesto con lori nte un congresso in San Francisco, Califòrnia, Stati Unidi. Le persone che le ze ndate in quel congresso le ze restade spaventade con quela ingiustìssia e i ga dessidio mandar un messàgio par el presidente dei Stati Unidi. El messàgio el disea: ‘Noantri credemo che quel che i ga fato ala sorela Martin l’è stà ingiusto. Le autorità del paese le ga doperà el so poder contra la sorela Martin e dopo le ga fato che ela la fusse in preson. Quel che lore le ga fato l’è stà tanto sbalià!’

Nel giorno dopo, el presidente Woodrow Wilson el ga mandà che la sorela Emma e i altri tre fradei i fusse lìberi dela preson. Cossita se ga finio quela ingiustìssia.

El ano de 1920 l’era drio finirse e i Studianti dela Bìblia i era tanto contenti. Ghen’era cada volta de pi laoro nela sede mondial e i veri cristiani i era drio predicar tanto, che sol el Regno de Dio el ndaria finir coi problemi dei umani. (Mat. 24:14) Nel ano de 1921, lori i ndaria predicar ancora de pi sora le verità del Regno.