1. De acordo con 2 Corinti 3:1-3, parché che l’è un grando privilègio giutar un studiante a batesarse? (Vedi el ritrato dela capa.)

SICURO che ti te resti tanto contento quando te vedi un studiante dela to congregassion batesarse. (Mat. 28:19) E se te sì ti che te ghè giutà la persona a imparar sora Geovà, te resti ancora pi contento! (1 Tes. 2:19, 20) Quando un studiante el fà i cambiamenti nela vita e el se batesa, questo mostra el grando sforso che ti e tuti i fradei dela congregassion gavé fato par giutarlo. Par quela che l’è un grando privilègio giutar i studianti a batesarse. — Ledi 2 Corinti 3:1-3. *

2. (a) Che domanda ghemo de farse e parché? (b) Cossa che l’è un stùdio bìblico? (Vedi la nota.)

² L’è tanto bon saver che, nei ùltimi quatro ani, i ze stati fati intorno de 10 milioni de studi bìblichi * par mese e intorno de 280 mila persone le ze state batesade par ano. Cossa che podemo far par giutar ancora de pi persone a batesarse? Ghemo de farse questa domanda parché Geovà l’è tanto passiente e l’è ancora drio dar la oportunità par le persone deventar dissìpoli de Cristo. El tempo l’è drio finirse, par quela che ghemo de far tuto quel che podemo par giutar queste persone a batesarse suito! — 1 Cor. 7:29a; 1 Pie. 4:7.

3. Cossa che ndaremo veder in questo stùdio?

³ L’è tanto importante giutar le persone a batesarse adesso. Alora, el Corpo Governante el ga domandà a filiai de tanti paesi  cossa che se podaria far par giutar i studianti a batesarse. In questo stùdio e nel pròssimo, ndaremo veder cossa che podemo imparar con pionieri, missionari e superintendenti de sircuito che i ga tanta speriensa. * (Pro. 11:14; 15:22) Questi studi i ndarà giutarne a saver cossa che podemo far par giutar un studiante a esser dissìpolo de Cristo. In questo primo stùdio, ndaremo veder sinque robe che ghemo de far par giutar el studiante a far i cambiamenti che ghe vol e a batesarse.

4. Cossa che ghemo de pensar sora far studi bìblichi nela porta dela casa dela persona?

⁴ Tanti predicadori i ze drio far studi nele porte dele case dele persone. Sicuro che questa la ze una bona maniera de giutar la persona a gaver interesse nela verità. Ma, tante volte el stùdio l’è fato in pochi minuti e nò tute le stimane. Par quela, arquanti predicadori i domanda el nùmero de telèfono dela persona par giutarla a gaver de pi interesse nela verità. Alora intrà una vìsita e nantra, lori i fà una ligassion o i manda un messàgio par parlar qualcossa dela Bìblia. Ghemo de ricordarse che podemo far questi studi par mesi, ma fursi la persona mai la ndarà esser un dissìpolo de Cristo. Alora, se el studiante no’l fà de pi sforso che questo, sarà pròpio fadiga che el se batese.

5. De acordo con Luca 14:27-33, cossa che ghemo de far par giutar i nostri studianti?

⁵ Gesù el ga fato una ilustrassion par mostrar cossa che vol dir esser so dissìpolo. Prima, el ga parlà sora qualchedun che el vol far su una tore. Sicuro che prima el se ‘senta e el pensa quanto el va guastar par veder se el ga i soldi che basta par finir el laoro’. Dopo, Gesù el ga parlà sora un rè che el vol far guera contra nantro rè. Sicuro che vanti el se ‘senta do e el domanda consili dei altri’ par saver se lu l’è bon de vinser la guera. (Ledi Luca 14:27-33. *) Gesù el savea che una persona che la vol deventar so dissìpolo la ga de far  compagno. Cada persona la ga de pensarghe ben in quel che la ga de far par esser un dissìpolo de Cristo. Par quela che ghemo de incoraiar i nostri studianti a studiar tute le stimane. Ma come che podemo far questo?

6. Cossa che podemo far par el studiante imparar de pi e pi svelto?

⁶ La prima roba che podemo far la ze studiar de pi tempo nela porta del morador. Podemo anca leder no sol un versìcolo dela Bìblia in cada vìsita. Alora, dopo de un tempo noantri podemo domandarghe: “Gheto qualche posto par noantri sentarse e parlar de pi?” La so risposta la ndarà mostrarne se el vol imparar de pi dela Bìblia o nò. Se volemo che el studiante el impare ancora de pi e pi svelto, podemo domandarghe: “Cossa che te pensi de studiar due volte par stimana?” Ma sol questo no basta, ghe vol far ancora nantre robe.

7. Come che ghemo de pareciarse par el stùdio de cada persona?

⁷ Noantri ghemo de pareciarse ben par el stùdio de cada persona. Come che podemo far questo? Prima, ghemo de leder quel che ndaremo studiar cola persona e studiar anca i testi. Ghemo de far sforso par capir ben i punti prinsipai. Ghemo anca de pensar nei tìtoli, sototìtoli, nele domande, nei testi che ghen’è scrito “ledi”, nei ritrati, ilustrassion e nei vìdei che podemo doperar nel stùdio. Dopo, ghemo de pensar nel studiante. Ghemo de pensar come che podemo insegnar el studiante de una maniera che el capisse ben. Cossita, el studiante el sarà bon de capir e meter in pràtica quel che lu l’è drio imparar. — Nee. 8:8; Pro. 15:28a.

8. De acordo con Colossensi 1:9, 10, cossa che ghemo de domandar a Geovà?

⁸ Quando semo drio pareciar el stùdio, ghemo de pregar a Geovà e parlar sora el nostro studiante e de quel che lu el ga de bisogno. Ghemo de domandar a Geovà che el ne giute a insegnar el studiante de una maniera che la ndarà motivar el so cuor a far i cambiamenti nela vita. (Ledi Colossensi 1:9, 10. *) Ghemo de pensar in quel che pol esser fadiga par el studiante capir o acetar. Ghemo de ricordarse che volemo giutar el studiante a deventar un servo de Geovà e a batesarse.

9. Come che podemo giutar el studiante a pareciarse par el stùdio?

 ⁹ Noantri volemo che el stùdio dela Bìblia el giute el studiante a esser grato par tuto quel che Geovà e Gesù i fà par noantri e anca che el gàpia pi voia de imparar. (Mat. 5:3, 6) Par imparar tuto che el pol, el studiante el ga de esser atento al stùdio. Par quela, ghemo de mostrar che l’è tanto importante pareciarse vanti de cada stùdio. Noantri ghemo de dirghe che el ga de leder e pensar come che el pol meter in pràtica quel che lu l’è drio imparar. Ma come che podemo giutarlo a far questo? Podemo pareciar un stùdio insieme col studiante e mostrarghe come che el pol catar le risposte. * Noantri podemo spiegarghe come catar le parole prinsipai dela risposta e dopo domandar che el spieghe quel che lu el ga imparà. Cossita, ndaremo saver quel che el studiante el ga capio. Ma ghemo de incoraiarlo a far ancora nantra roba.

10. (a) Parché che el studiante el ga de leder la Bìblia tuti i giorni? (b) Come che el studiante el pol imparar tante robe intanto che el lede la Bìblia?

¹⁰ La persona la ga de studiar la Bìblia ma far anca altre robe. El studiante el ga de leder la Bìblia tuti i giorni. Parché? Parché cossita el ndarà scoltar quel che Geovà el dise. (Giosuè 1:8; Sal. 1:1-3) Noantri podemo giutarlo a far questo par mostrarghe la “Programassion par Leder la Bìblia” che ghen’è nel jw.org. * Ghemo de giutar el studiante a pensarghe sora quel che lu el lede nela Bìblia. Cossita el sarà bon de imparar tante robe. Noantri ghemo de incoraiarlo a domandarse: ‘Cossa che questo me insegna sora Geovà? Come che posso meter in pràtica questo nela me vita?’ — Ati 17:11; Tiago 1:25.

11. (a) Come che podemo giutar el studiante a pregar a Dio? (b) Parché che el studiante el ga de pregar a Dio tuti i giorni?

¹¹ Noantri ghemo de incoraiar el studiante a pregar tuti i giorni a Geovà. Come che podemo giutarlo a far questo? Vanti e dopo de cada stùdio, prega de tuto el cuor e parla sora el studiante nela orassion. Cossita, anca lu el ndarà far le so orassion de cuor a Geovà in nome de Gesù Cristo. (Mat. 6:9; Gioani 15:16) Alora, se el studiante el lede la Bìblia tuti i giorni e el prega sempre a Geovà, lu el ndarà restar cada volta pi darente de Geovà! (Tiago 4:8) Se lu el fà queste robe tuti i giorni, lu el gavarà la voia de dedicarse a Geovà e batesarse.

12. Come che podemo giutar el studiante a esser amigo de Geovà?

¹² Noantri ghemo de giutar el studiante a meter nel so cuor quel che lu l’è drio imparar. Parché? Parché el cuor, che vol dir le nostre voie, emossion e sentimenti, l’è quel che ne dà forsa par far le robe. Sicuro che Gesù el insegnea tante robe ale persone, ma lore le ghe piasea de scoltarlo parché quel che lu el parlea motivea el so cuor. (Luc. 24:15, 27, 32) El nostro studiante el ga de capir che Geovà l’è el so Pare, el so Dio e el so Amigo. (Sal. 25:4, 5) Quando te sì drio far el stùdio, giuta el studiante a veder le bele qualità de Dio in quel che lu el fà. (Éso. 34:5, 6; 1 Pie. 5:6, 7) In tuto quel che ndaremo studiar col studiante, ghemo de giutarlo a cognosser la Persona de Geovà e le so bele qualità, come el amor, la bontà, e la compassion. Gesù el ga dito che “el primo e el pi importante comandamento” l’è: “Ama a Geovà el to Dio.” (Mat. 22:37, 38) Ghemo de giutar el studiante a amar tanto a Geovà.

13. Come che podemo giutar el nostro studiante a amar a Geovà? Daghe un esémpio.

¹³ Quando parlemo col nostro studiante, ghemo de mostrar che amemo tanto a Geovà. Questo ndarà giutarlo a veder che anca lu el pol esser amigo de Dio. (Sal. 73:28) Par esémpio, fursi la publicassion che te sì drio doperar o un testo bìblico el parla de una qualità de Geovà come el amor, la sabedoria, la giustìssia o el poder. Alora, podemo parlar al studiante cossa che noantri pensemo sora questa qualità de Geovà. Podemo parlar che, par causa de queste qualità, amemo ancora de pi a Geovà. Ma el studiante el ga de far ancora nantra roba par batesarse.

14. De acordo con Ebrei 10:24, 25, parché che l’è importante el studiante ndar ale riunion?

¹⁴ Tuti noantri volemo che i nostri studianti i se batese. Ma podemo giutarli a far questo quando li incoraiemo a ndar ale riunion. Tanti fradei, che i ga belche giutà tante persone a imparar sora Geovà, i dise che i studianti i ze pi boni de far cambiamenti dopo che i scomìnsia a ndar ale riunion. (Sal. 111:1) Alora, tanti fradei i insegna ai so studianti che nele riunion i ndarà imparar tante robe che lori no i impara nel stùdio del Bìblia. Noantri podemo leder col studiante Ebrei 10:24, 25 * e  mostrarghe parché che l’è bon che el scomìnsie a ndar ale riunion. (Ledi) Podemo anca mostrarghe el vìdeo Cossa che sucede in un Salon del Regno? *. Giuta el to studiante a capir che ndar ale riunion tute le stimane l’è tanto importante.

 15. Come che podemo incoraiar el studiante a ndar a tute le riunion?

¹⁵ Cossa che podemo far se el nostro studiante no el va in tute le riunion o no l’è mai ndà? L’è importante convidar i studianti par ndar ale riunion, ma l’è meio ancora se noantri parlemo sora qualcossa tanto importante che ghemo imparà nte una riunion. Noantri anca podemo darghe la Sentinela o la Programassion che doperemo nela riunion. Alora, podemo mostrarghe quel che ndaremo studiar e domandar cossa che ghe ga piasesto. Sicuro che el ndarà maraveiarse con quel che el ndarà veder nele riunion! (1 Cor. 14:24, 25) Nele riunion, lu el ndarà cognosser fradei che i ndarà giutarlo a batesarse.

16. (a) Cossa che ghemo de far par giutar i studiante a batesarse? (b) Cossa che ndaremo veder nel pròssimo stùdio?

¹⁶ Alora, come che podemo giutar i nostri studianti a batesarse? Ghemo visto che ghemo de incoraiar i nostri studianti studiar tute le stimane e a pareciarse vanti. Ghemo anca de insegnarghe a parlar e a scoltar a Geovà e a deventar amighi de Lu. Ghemo anca de incoraiar i nostri studianti a ndar a tute le riunion. (Vedi el quadro nela pàgina 12 “ Cossa che el studiante el ga de far par batesarse?”.) Ma ancora ghen’è sinque robe che ghemo de far par giutar i studianti a batesarse. Che robe le ze queste? Ndaremo veder questo nel pròssimo stùdio.