1. Parché che giutar le persone a esser dissìpoli de Gesù pol salvar la so vita?

GIUTAR le persone a esser dissìpoli de Gesù pol salvar la so vita. Come cossita? Parché in Mateo 28:⁠19, 20, Gesù el ga dito: “Gavé de ndar e insegnar le persone a esser i me dissìpoli e batesarli.” L’è stà par quela che el apòstolo Piero el ga dito ai cristiani: ‘El batésimo, che el salva anca a valtri adesso par meso dela ressuression de Gesù Cristo.’ (1 Pie. 3:⁠21) Parché? Parché quando la persona la se batesa, la mostra che la crede che la pol salvarse par meso del sacrifìssio e ressuression de Gesù. Questo vol dir che la persona che la vol salvarse la ghe toca batesarse.

2. De acordo con 2 Timòteo 4:⁠1, 2, come che saremo boni de giutar una persona a seghir a Gesù?

² Gesù el ne ga dato la òrdine: “Gavé de ndar e insegnar le persone a esser me dissìpoli.” Parché? El apòstolo Paolo el ga dito che noantri gavarìano de seitar a far questo parché cossita ndarìano salvar a noantri e a quei che i ne scolta. L’è stà par quela che el apòstolo Paolo el ga dito: ‘Seita a far el to meio par insegnar ben ai altri.’ (1 Tim. 4:⁠16) Noantri saremo boni de giutar una persona a seghir a Gesù se noantri ghemo le bele qualità de un “bon maestro”. — Ledi 2 Timòteo 4:⁠1, 2. *

3. Cossa che ndaremo imparar in questo stùdio?

 ³ Le Testimònie de Geovà le ze drio far studi con milioni de persone. Ma come ghemo visto nel primo stùdio, noantri volemo che queste persone le sìpia batesade. In questo stùdio, ndaremo imparar sinque robe che ghemo de far par giutar el nostro studiante a batesarse.

4. Parché che ghemo bisogno de autocontrolo quando ndemo studiar con una persona? (Vedi anca la nota.)

⁴ Noantri amemo tanto quel che la Bìblia la dise, alora, ne piase tanto parlar sora ela. Ma quei che i fà el stùdio dela Sentinela, el stùdio bìblico cola congregassion o un stùdio bìblico con una persona no i ga de parlar massa. Alora, quando ndemo far un stùdio bìblico, ghemo bisogno de autocontrolo par no parlar tuto quel che savemo sora un assunto o sora un testo bìblico. * (Gioani 16:⁠12) Una roba che pol giutarne l’è ricordarse de quando noantri ghemo scominsià a studiar la Bìblia. Quante robe savéino quando se ghemo batesà? Fursi noantri cognosséino sol i assunti pi importanti. (Ebr. 6:⁠1) Sicuro che ancoi savemo de pi, ma ghemo metesto tempo par saver de tuto questo. Par quela che quando noantri ndemo giutar le persone a capir sora la Bìblia, no volemo parlar tuto de un colpo.

5. (a) De acordo con 1 Tessalonissensi 2:⁠13, cossa che volemo che el studiante el capissa? (b) Come che podemo giutar el studiante a parlar sora quel che lu l’è drio imparar?

⁵ Noantri volemo che el studiante el capissa che quel che lu l’è drio imparar l’è dela Bìblia. (Ledi 1 Tessalonissensi 2:⁠13. *) Come che podemo far questo? Podemo incoraiar el studiante a parlar sora quel che lu l’è drio imparar. Par esémpio, invesse de spiegarghe tuti i testi dela Bìblia, podemo domandar che lu el spieghe cossa che el ga capio. Noantri anca ghemo de giutarlo a capir come che el pol meter in pràtica quel che lu l’è drio imparar. Podemo anca far domande par capir cossa che lu el pensa e el sente sora questi versìcoli. (Luc. 10:⁠25-28) Noantri podemo domandarghe: “Che qualità de Geovà sito bon de veder in questo versìcolo?” “Come che questa verità dela Bìblia la pol giutarte?” “Cossa che te pensi sora quel che te ghè imparà adesso?” (Pro. 20:⁠5) Alora, l’è importante el studiante imparar tanto sora la Bìblia, ma ancora pi importante l’è se el ama e el mete in pràtica quel che lu el impara.

6. Quando ndemo far i nostri studi, parché che l’è bon menar insieme fradei che i ze stati boni de giutar altri a imparar la verità?

⁶  Quando ndemo far i nostri studi, l’è tanto bon menar insieme fradei che i ze stati boni de giutar altri a imparar la verità. Parché? Parché podemo domandarghe se semo drio far el stùdio dela meio maniera e se semo drio doperar la Bìblia par insegnar. Podemo anca domandarghe se el pensa che el studiante l’è drio capir quel che lu l’è drio imparar. Se volemo gaver le bele qualità de un bon maestro, ghemo de esser ùmili. (Vedi anca Ati 18:⁠24-26.) Alora, se no podemo mia far el stùdio, par una o due stimane, questo fradel el pol farlo nel nostro posto. Cossita, no gavaremo de fermar el stùdio e el studiante anca el ndarà capir che l’è tanto importante studiar tute le stimane. Mai ghemo de pensar che el studiante l’è “nostro” e che nantra persona no la pol far el stùdio. Noantri volemo quel che l’è meio par el studiante e che lu el seite a studiar.

7. Cossa che podemo far par el studiante gaver ancora de pi voia de imparar sora la Bìblia?

⁷ El nostro studiante el gavarà ancora de pi voia de imparar dela Bìblia se noantri mostremo che amemo e credemo tanto in quel che insegnemo. (1 Tes. 1:⁠5) Noantri podemo parlar a lu sora arquanti prinsipi bìblichi che i ne ga giutà. Cossita, lu el sarà bon de ­capir che i consili dela Bìblia i pol giutar ­anca a lu.

8. (a) Cossa che pol giutar el studiante se lu l’è drio infrontar problemi? (b) Parché che l’è bon far questo?

⁸ Cossa che pol giutar el nostro studiante se lu l’è drio infrontar problemi? Noantri podemo doperar i esempi de altre persone che le ze state bone de dàrghene fora coi problemi. Par esémpio, podemo doperar esempi che ghen’è nela sèrie “La verità la càmbia la vita.” * Anca podemo convidar un fradel dela congregassion che el sìpia un bel esémpio par el studiante. Par meso de questi esempi, el studiante el ndarà capir che far quel che la Bìblia la dise la ze la meio roba de far.

9. Come che podemo incoraiar el nostro studiante a parlar ai altri quel che lu l’è drio imparar?

⁹ Noantri ghemo de incoraiar el nostro studiante a parlar sora quel che lu l’è drio imparar coi so amighi e coi so parenti. (Gioani 1:⁠40-45) Come che podemo giutarli a far questo? Noantri podemo domandarghe:  “Come che te pol spiegar questo ala to fameia?” o “Che testo te pol doperar par spiegar questo a un amigo?” Se el studiante l’è maridà, noantri podemo convidar el so omo o la so dona par veder come che l’è fato el stùdio. Noantri anca podemo domandar al studiante se el cognosse qualchedun che ghe piaseria studiar la Bìblia. Se lu el cognosse qualche persona, noantri podemo parlar con ela, mostrarghe come che l’è un stùdio e mostrarghe el vìdeo Come che l’è un stùdio bìblico? *. Cossita, el nostro studiante el ndarà capir come che lu el pol insegnar la verità ai altri e el sarà parecià par esser un predicador.

10. De acordo con 1 Tessalonissensi 2:⁠7, 8, come che noantri podemo imitar el esémpio de Paolo?

¹⁰ Noantri ghemo de mostrar che ghemo interesse par i nostri studianti e anca véderli come servi de Geovà. (Ledi 1 Tessalonissensi 2:⁠7, 8. *) Noantri savemo che no l’è fàcile par el studiante assar indrio i so amighi e far i cambiamenti che el ga de bisogno par servir a Geovà. Par quela, ghemo de ­giutarlo a gaver amighi intrà el pòpolo de Geovà. Noantri ghemo de esser so amigo e passar tempo con lu, nò sol nela ora del stùdio. Par esémpio, noantri podemo parlar con lu par telèfono, mandarghe un messàgio o anca farghe una vìsita. Se femo cossita, el studiante el ndarà capir che noantri ghe volemo ben.

11. Parché che l’è importante el studiante cognosser ai fradei dela congregassion?

¹¹ Arquante persone le dise: “Con un sasso sol no se pol far su una muràlia.” Noantri ­podarìano dir cossita: “Un predicador lu sol no’l fà un dissìpolo.” Par quela che l’è ­tanto importante giutar i nostri studianti a cognosser i fradei nela congregassion. Cossita, i fradei i ndarà giutarlo a gaver de pi forsa par far quel che Geovà el vol e dàrghene fora coi problemi. Noantri volemo che ghe piasa ai studianti star insieme coi fradei e che la congregassion la sìpia la so fameia. Cossita, sarà pi fàcile par lori assar indrio le amicìssie cole persone che no le ama a Geovà. (Pro. 13:⁠20) E se i so amighi no i vol pi parlar con lori, lori i saverà che i ga veri amighi nela congregassion. — Mar. 10:⁠29, 30; 1 Pie. 4:⁠4.

12. Parché che ghemo de parlar col nostro studiante sora la dedicassion e el batésimo?

¹² L’è tanto bon che noantri sempre parlemo sora la dedicassion e el batésimo par el studiante. Parché? Parché el studiante el ga de capir che el stùdio dela Bìblia l’è fato par la persona imparar a servir a Geovà e a batesarse. Dopo de un tempo che la persona la ze drio studiar e ndar ale riunion, ela la ga de capir che el stùdio l’è fato par giutarla a deventar una Testimònia de Geovà.

13. Che robe un studiante el ga de far prima de batesarse?

¹³ El studiante el ga de far arquante robe prima de batesarse. Prima, el ga de cognosser a Geovà, imparar a amarlo e a gaver fede. (Gioani 3:⁠16; 17:⁠3) Alora, lu el deventa amigo de Geovà e dei fradei. (Ebr. 10:⁠24, 25; Tiago 4:⁠8) Dopo el se ciama gramo dele robe sbaliade che lu el ga belche fato e el se ferma de farle. (Ati 3:⁠19) Par causa dela so fede, lu el scomìnsia a parlar ale altre persone sora quel che lu el crede. (2 Cor. 4:⁠13) Alora, el fà la so dedicassion e el se batesa. (1 Pie. 3:⁠21; 4:⁠2) Sfòrsate par lodar e parlar al to studiante che te ghè caro che el seite a far quel che l’è giusto. Sicuro che tuti nela congregassion i resta tanto contenti quando un studiante el se batesa.

14. Che domande le pol giutarne a capir se el nostro studiante el vol servir a Geovà?

¹⁴ Noantri ghemo bisogno de passiensa par giutar un studiante a dedicarse e a batesarse. Ghemo de farse queste domande par capir se el studiante el vol esser una Testimònia de Geovà: ‘El me studiante l’è drio far sforso par meter in pràtica quel che lu l’è drio imparar? O sarà che lu el vol sol imparar robe interessante dela Bìblia?’

15. Se noantri ghemo un studiante, che domande ghemo de farse?

¹⁵ Dopo de un tempo che semo drio far un stùdio, ghemo de domandarse: El me studiante el parla cossa che lu el sente par Geovà? Lu el prega a Geovà? (Sal. 116:⁠1, 2) Lu el ghe piase de leder la Bìblia? (Sal. 119:⁠97) Lu el va ale riunion? (Sal. 22:⁠22) Lu l’è drio far quel che el impara nel stùdio dela Bìblia? (Sal. 119:⁠112) Lu l’è belche drio parlar ai altri quel che lu el impara? (Sal. 9:⁠1) E el pi importante, lu el vol esser una Testimònia de Geovà? (Sal. 40:⁠8) Se el nostro studiante no l’è drio far queste robe, ghemo de capir parché che nò. Dopo, ghemo de parlar con lu de maniera sinsiera, ma con amor. *

 16. Che domande le pol giutarne a capir se ghemo de seitar a far un stùdio?

¹⁶  Se noantri ghemo un stùdio, ghemo sempre de farse queste domande: ‘El me studiante el se parécia vanti del stùdio? Lu no’l ga mia voia de ndar ale riunion? El seita a far le robe sbaliade? Ancora el fà parte dela religion falsa?’ Se noantri se femo queste domande e ghemo capio che el nostro studiante no’l ama quel che l’è drio imparar, ghemo de pensar se saria meio fermar el stùdio. Seitar a far questo stùdio, saria come proar insegnar una persona a nadar se no la vol gnanca ndar rento del’aqua.

17. Come che mostremo che volemo giutar i nostri studianti a batesarse?

¹⁷ Noantri volemo tanto giutar i nostri studianti a seghir a Gesù e a batesarse. Alora, sempre dopera la Bìblia par insegnar. E quando te parli mostra che te ami e che te sì sicuro de quel che te sì drio parlar. Giuta i to studianti a gaver amighi nela congregassion. Anca giùtali a capir parché che i ga de dedicarse e batesarse. E sempre domàndate se i to studianti i ze drio mostrar che i vol esser una Testimònia de Geovà. (Vedi el quadro nela pàgina 13, “ Cossa che ghemo de far par giutar i nostri studianti a batesarse?”) Sicuro che ti te resti tanto contento de giutar le persone a cognosser a Geovà e a viver par sempre! Alora, fà el meio che te pol par giutar i to studianti a batesarse.