1-2. (a) Cossa che arquanti governi i ze drio far contra i servi de Geovà, e cossa che i fradei i fà? (b) Come che podemo seitar contenti anca che infrontemo dificoltà? (Vedi i ritrati dela prima pàgina.)

 ANCOI, in de pi de 30 paesi, le Testimònie de Geovà no le ze lìbere par adorar a Geovà. E in arquanti de questi posti, i governi i ga metesto in preson tanti dei nostri fradei e sorele. Geovà el sa che no i ga fato gnente de sbalià. Lori i ga sol ledesto e studià la Bìblia, predicà, i ze ndati ale riunion e no i ga volesto meterse nela polìtica. Ma ancora cossita, lori i seita a esser contenti e leai a Geovà.

² Fursi te ghè belche visto ritrati de fradei e sorele che i ze drio infrontar queste dificoltà. Gheto visto come lori i ze contenti del bon? Questi fradei i ga alegria parché i sa che Geovà l’è contento cola so lealtà. (1 Cró. 29:17a) E Gesù el ga dito: ‘Felici sì valtri quando le persone le ve perseghe par causa dela giustìssia. Resté contenti e pieni de alegria parché la vostra ricompensa la ze granda.’ — Mat. 5:10-12.

3. De acordo con Ati 4:19, 20, cossa i apòstoli i ga fato quando i ghe ga dito de fermarse de predicar, e parché che i ga fato cossita?

³ Quel che i nostri fradei e sorele i ze drio infrontar ancoi l’è compagno a quel che i apòstoli de Gesù i ga infrontà nel passà. Lori i ze stati perseghidi parché i era drio predicar sora Gesù. Tante volte, i giuisi dei giudei i ghe ga dito de fermarse de insegnar sora el nome de Gesù. (Ati 4:18; 5:27, 28, 40) Cossa gali fato i apòstoli? (Ledi Ati 4:19, 20. b) Piero e Gioani i ga dito quel che tuti i apòstoli i pensea. Lori i ga spiegà che i gavea de obedir prima a Dio invesse che ai òmini e che no i ndaria mai fermarse de parlar sora Gesù. L’è come se i gavesse dito a quei giuisi: ‘Valtri pensé che gavé de pi autorità che Dio?’ I apòstoli i savea che i gavea de ndar predicar parché una autorità ancora pi granda ghe gavea dito de insegnar sora Gesù a tuti. — Ati 10:42.

4. De acordo con Ati 5:27-29, parché che i apòstoli i ze un bel esémpio par noantri?

⁴ I apòstoli i ne ga dato un bel esémpio parché lori i ga obedio a Dio come governanti e nò ai òmini. (Ledi Ati 5:27-29. c) Anca se i apòstoli i gavea ciapà bote, lori i ze restadi contenti parché i savea che l’era un onor sofrir par causa del nome de Gesù. Par quela, lori i ga seità a predicar. — Ati 5:40-42.

5. Che domande fursi se femo?

⁵ Ma fursi noantri se domandemo: ‘Come che i apòstoli i ze stati boni de obedir a Geovà e anca al comandamento dela Bìblia de rispetar le autorità dei governi?’ (Rom. 13:1) Come che podemo esser obedienti ai governi e ale autorità del mondo e seitar a esser leai a Geovà, che l’è la nostra pi granda autorità? — Tito 3:1.

6. (a) Chi che le ze le autorità superior, e cossa che tuti noantri ghemo de far? (b) Cossa che capimo sora la autorità che i governi i ga?

⁶ Ledi Romani 13:1. d In questo testo, le “autorità superior” le ze i governanti che ghen’è in questo mondo. E noantri ghemo de obedir a queste autorità. La Bìblia la dise che ghemo de pagar i imposti e mostrarghe rispeto. (Rom. 13:7) Parché? Parché lore le fà lege che le giuta le persone, e dele volte, anca le protege i servi de Geovà. (Apo. 12:16) Varda cossa che imparemo de quel che Gesù el ga dito al governador Pónsio Pilato. Quando Pilato el ga dito che el gavea la autorità par mandar copar Gesù o molarlo, Gesù el ghe ga dito: ‘Ti no te gavarissi gnanca una autorità sora mi se no te la gavessi ricevesto del cielo.’ (Gioani 19:11) Cossita, capimo che l’è stà Geovà che el ga dato la autorità ai governi e che lori no i ga pròpio autorità sora tuto.

7. Quando che no ghemo de obedir ai governanti, e cossa che l’è importante ricordarse?

⁷ Ma no ghemo de obedir ai governanti se lori i ne domanda de far una roba che Geovà no’l vol, come doperar arme e ndar ala guera. e Noantri gnanca no ndaremo obedirli se i ne domanda de fermarse de far qualcossa che Geovà el vol che femo. Par esémpio, doperar la nostra Bìblia, le nostre publicassion, ndar predicar e ndar ale riunion. Cossita capimo che ghemo de obedir ale lege dei governi sol se no le va contra le lege de Dio. E l’è importante ricordarse che Geovà l’è drio veder tuto quel che sucede. (Ecl. 5:8) Alora, quando i governanti i fà de pi de quel che i podaria e i va contra i servi de Geovà, lori i gavarà de renderghe conto a lu!

8. Cossa che vol dir superior e supremo, e parché che l’è importante capirlo?

⁸ La parola “superior” la vol dir “meio o pi grando”, ma no la vol dir “el pi grando che ghen’è, o supremo”. Alora, anca se la Bìblia la dise che i governi del mondo i ze “autorità superior”, lori no i ze la pi granda autorità che ghen’è. Magari, la Bìblia la dise quatro volte che Geovà l’è el “Supremo”, o sia, lu l’è la autorità pi granda che ghen’è. — Dan. 7:18, 22, 25, 27.

9. Cossa che Daniel el ga visto?

⁹ Le vision de Daniel le ga mostrà che Geovà el ga de pi autorità che qualche altra persona. Cossa che Daniel el ga visto? Primo, lu el ga visto quatro grande bèstie che le ze i governi pi poderosi del passà e de ancoi: Babilònia, Medo-Persa, Grècia, Roma e la Potensa Anglo-Americana. (Dan. 7:1-3, 17) Dopo, Daniel el ga visto Geovà sentà do nel so trono nel tribunal del cielo. (Dan. 7:9, 10) Questa vision de Daniel la mostra quel che ndarà suceder coi governi de ancoi.

10. (a) De acordo con Daniel 7:13, 14, 27, a chi che Geovà el ndarà dar autorità par governar la Tera? (b) Cossa che questo ne giuta a capir sora Geovà?

¹⁰ Ledi Daniel 7:13, 14, f 27 g. Dopo, Daniel el ga visto che Geovà el ga dato a Gesù e ai 144 mila la autorità par governar la Tera. Geovà el ghe ga dato questa autorità parché lori i mèrita e parché i ga de pi poder che i governi dei òmini. Lori i ndarà governar par sempre. (Dan. 7:18) Cossita, capimo che Geovà l’è el Supremo,  parché sol lu pol cavar via la autorità e darla a chi che el vol.

11. Cossa che ancora mostra che Geovà l’è el Supremo?

¹¹ Quel che Daniel el ga scrito anca mostra che Geovà l’è el Supremo. Lu el ga dito che Geovà l’è ‘el Dio del cielo’ e che ‘el cava via rè e scòlie altri’. Daniel anca el ga dito che ‘Geovà el governa sora tuta la Tera e che el ghe dà autorità a chi che lu el vol’. (Dan. 2:19-21; 4:17) Ma sarà che Geovà el ga belche cavà via la autorità de un governo e la ga dato a nantro? Sicuro de si!

12. Parla de un esémpio che el mostra che Geovà el ga cavà via la autorità dei governi. (Varda la ilustrassion.)

¹² Geovà el ga belche mostrà che el ga de pi autorità che i governi del mondo. Varda tre esempi. El primo esémpio l’è stà de quel che ga sucedesto col Faraò. Quando i israeliti i era schiavi nel Egito e Faraò no’l ga volesto assarli ndar via, Geovà li ga liberadi e lo ga copà nel Mar Rosso. (Éso. 14:26-28; Sal. 136:15) El secondo esémpio l’è de quel che ga sucedesto col rè Belsazar de Babilònia. Lu el ga fato una festa par farse pi grando che el Signor del cielo e lu el ga ‘dato onor ai so dèi de argento e oro’, invesse de a Geovà. (Dan. 5:22, 23) Alora, in quela note, Geovà el ga fato che quel omo orgolioso el fusse copà e el ga dato el so governo a quei dela Mèdia e dela Pèrsia. (Dan. 5:28, 30, 31) El terso esémpio l’è de Erode, che l’era el rè dela Palestina. Lu gavea copà el apòstolo Tiago e el ga metesto el apòstolo Piero in preson parché el volea coparlo anca lu. Ma Geovà el ga mandà che so àngelo el copesse Erode. — Ati 12:1-5, 21-23.

13. Parla de un esémpio che el mostra che Geovà l’è bon de finir fora con grupi de nassion.

¹³ Geovà el ga anca mostrà che el ga la pi granda autorità parché el ga finio con grupi de nassion. Par esémpio, Geovà el ga giutà i israeliti a finir fora con un grupo de 31 rè cananei e a ciapar una parte dela Tera Prometesta. (Giosuè 11:4-6, 20; 12:1, 7, 24) Geovà el ga anca giutà i israeliti a finir fora col rè Ben-Adade e 32 governanti dela Sìria. — 1 Rè 20:1, 26-29.

14-15. (a) Cossa che el rè Nabucodonosor e el rè Dario i ga dito sora Geovà? (b) Cossa che el salmista el ga dito sora Geovà e sora le persone che lo serve?

¹⁴ Varda anca altri esempi che mostra che Geovà l’è el Supremo, o sia, che el ga de pi autorità che tuti. Quando el rè Nabucodonosor de Babilònia el ga parlà dela forsa, poder e glòria che el gavea invesse dar onor a Dio, Geovà lo ga fato deventar mato par un tempo. Dopo, Nabucodonosor ‘el ga dato lode e glòria a quel che el vive par sempre’ e el ga dito che el governo de Dio el sarà par sempre e che nissuni i pol fermarlo. (Dan. 4:30, 33-35) Dopo che Daniel l’è stà trato do rento del buso dei leoni e Geovà lo ga salvà, el rè Dario el ga fato la lege: ‘Gàpie tanto rispeto par el Dio de Daniel, parché lu l’è el Dio che el vive par sempre e el so regno mai el sarà finio fora parché el so poder el sarà par sempre.’ — Dan. 6:7-10, 19-22, 26, 27.

¹⁵ El salmista el ga dito che Geovà no’l ga assà che le nassion le fesse quel che le volea, ma che ‘felice la ze la nassion che el so Dio l’è Geovà’. (Sal. 33:10, 12) Sicuro che l’è tanto bon servir a Geovà de tuto el cuor!

16. (a) Cossa che Geovà el ndarà far nela granda tribolassion? (b) Parché che podemo esser sicuri che el farà pròpio cossita?

¹⁶ Savemo quel che Geovà el ga belche fato, ma cossa che ancora lu el ndarà far? Podemo esser sicuri che nela granda tribolassion Geovà el ndarà salvar i so servi leai. (Mat. 24:21; Dan. 12:1) La Bìblia la dise che un grupo de nassion, che el ga nome Goghe de Magoghe, el ndarà contra el pòpolo de Dio in tuto el mondo. Anca se tuti i 193 paesi che i fà parte dele Nassion Unide i ne vegna contra, Geovà e el so esèrsito del cielo i ga tanto  de pi poder che lori. E Geovà el ga prometesto: “Mi mostrarò la me glòria tanto granda, mostrarò che son un Dio santo e farò con che tante nassion le me cognossa. E le saverà che mi son Geovà.” — Eze. 38:14-16, 23; Sal. 46:10.

17. Cossa che ndarà suceder coi rè dela Tera e con quei che i ze fedeli?

¹⁷ Quando Goghe, o sia, questo grupo de nassion el ndarà contra i servi de Dio, Geovà el finirà fora coi “rè de tuta la Tera”. (Apo. 16:14, 16; 19:19-21) Ma ‘quei che i ze giusti i viverà nela Tera, e quei che i ze fedeli i seitarà viver nela’. — Pro. 2:21.

18. Cossa che tanti dissìpoli de Gesù i ga fato, e parché? (Daniel 3:28)

¹⁸ In tuta la stòria, sempre ghen’è stà dissìpoli de Gesù che i ga riscià la so libertà o fin la so vita par causa del so amor a Geovà, la Pi Granda Autorità. Questi servi de Dio i ga seità leai compagno ai tre ebrei. Quando lori tre i ze stati metesti nte un forno che brusea, Geovà li ga salvadi parché i ga seità leai a lu. — Ledi Daniel 3:28. h

19. Cossa che Geovà el ndarà vardar par giulgar le persone, e cossa che ghemo de far adesso?

¹⁹ Quel che Davi el ga scrito ne fà ricordar che l’è importante esser fedeli a Geovà. Lu el ga dito che ‘Geovà el ndarà giulgar tute le persone’ e el ga domandà che ‘Geovà lo giulghesse de acordo con quel che l’è giusto e cola so lealtà’. Lu anca el ga scrito che se ‘el fesse quel che l’è giusto e el fusse leal, el gavaria protession’. (Sal. 25:21) Alora, la meio roba che podemo far nela nostra vita l’è seitar fedeli a Geovà, anca se infrontemo dificoltà. Se femo cossita, podemo dir compagno el salmista che el ga scrito: “Felici i ze quei che i seita leai e che i obedisse ale lege de Geovà.” — Sal. 119:1.