1. Cossa che arquanti i pensa dela sabedoria dela Bìblia? (Proverbi 1:20, 21)

 IN TANTI paesi, le persone sempre le vede i predicadori cole publicassion nele strade ndove passa tanta gente. Se anca ti te ghè predicà cossita, fursi te te ghè ricordà del Provèrbio che dise che la sabedoria la ze drio osar nele strade. (Ledi Proverbi 1:20, 21. b) Podemo catar la vera sabedoria, che la ze la sabedoria de Geovà, nela Bìblia e nele publicassion. Alora, noantri restemo tanto contenti quando le persone le vol leder le nostre publicassion, parché cossita, le pol gaver vita eterna. Magari, arquanti no i vol imparar de pi sora la Bìblia e altri i ne ride drio parché i dise che la Bìblia la ze un libro massa vècio. Tanti i ze contra i insegnamenti dela Bìblia e dise che quei che i ghe va drio i pensa che i ze meio che i altri. Ma Geovà el volaria che tuti i gavesse la so sabedoria parché el ghe vol ben a tuti.

2. Come che podemo gaver la sabedoria de Geovà, ma cossa che quasi tute le persone le fà?

² Come che Geovà el ne dà la vera sabedoria ancoi? Par meso dela Bìblia e dele nostre publicassion. Quasi tuti i ga una Bìblia casa e le nostre publicassion le ze fate in de pi de mila léngue. Le persone che le lede e le mete in pràtica quel che le impara nela Bìblia e nele nostre publicassion le vive tanto meio. Magari, quasi tuti no i vol gaver la vera sabedoria. Par quela, quando i ga dessision de far i se fida  in lori stessi o in quel che i altri i dise. Arquanti fin i dise che semo stùpidi de ndar drio a quel che la Bìblia la dise. In questo stùdio, ndaremo imparar come che podemo gaver la sabedoria de Geovà e parché che arquante persone no le vol gaverla.

3. Come che mostremo che ghemo la vera sabedoria?

³ Una persona che la ga sabedoria la dopera quel che la sa par far bone dessision. Ma gaver sabedoria no l’è mia sol questo. Proverbi 9:10 mostra che ne ocore ‘gaver tanto rispeto par Geovà’ e ‘cognosserlo’ par gaver la vera sabedoria. Par esémpio, vanti de far una dessision, ne ocore proar pensar come Geovà el pensa. Podemo capir la maniera che lu el pensa quando ledemo la Bìblia e le nostre publicassion. Cossita, mostremo che ghemo la vera sabedoria. — Pro. 2:5-7.

4. Parché che la vera sabedoria la vien sol de Geovà?

⁴ La vera sabedoria la vien sol de Geovà. (Rom. 16:27) Come che lo savemo? Primo, parché lu el ga creà tute le robe e el cognosse ben tuto quel che el ga creà. (Sal. 104:24) Secondo, Geovà el fà tuto con sabedoria. (Rom. 11:33) Terso, le persone che le mete in pràtica quel che lu el dise le vive meio. (Pro. 2:10-12) Noantri podemo gaver la vera sabedoria se credemo in queste tre robe e se se ricordemo de questo quando ndemo far le nostre dessision.

5. Cossa che sucede cole persone che no le va drio la sabedoria de Geovà?

⁵ Tante persone che catemo nela predicassion le vede che le robe nela naturesa le ze tanto bele, ma no le crede che l’è stà Dio che le ga creade. Arquante anca le dise che le crede in Dio, ma le pensa che la Bìblia la ze massa vècia e le vive come che le vol. Ma cossa che l’è drio suceder con queste persone par via de questo? Lore no le ze felice e no le ga una speransa par el futuro e el mondo l’è drio deventar cada volta pedo. Proverbi 21:30 mostra che la sabedoria de Geovà la ga tanto de pi valor che la sabedoria dele persone. Sicuro che volemo seitar a ndar in serca dela sabedoria de Geovà! Magari, quasi tute le persone no le fà questo.

6. De acordo con Proverbi 1:22-25, chi che no vol gaver la vera sabedoria?

⁶ Arquanti no i vol gaver la vera sabedoria. Par esémpio, la Bìblia la dise che ghen’è tre grupi de persone cossita: Quele che ‘no le sa de gnente’, quele che le ‘tol in giro i altri’ e le ‘stùpide’. (Ledi Proverbi 1:22-25. c) Adesso, ndemo veder parché queste persone no le vol gaver la sabedoria de Dio e cossa che ghemo de far par no esser come lore.

7. Parché che arquanti no i vol cognosser la verità dela Bìblia?

⁷ El primo grupo l’è de ‘quei che no i sa gnente’, o sia, quei che i crede in tuto quel che i scolta e l’è ben fàcile imbroiarli. (Pro. 14:15, nota.) Noantri catemo tante persone cossita nela predicassion.  Par esémpio, milioni i ze imbroiadi par lìderi religiosi e polìtichi. Arquanti i resta spaventadi de veder che i ze stati imbroiadi. Magari, quei che no i sa gnente, come dise Proverbi 1:22, no i vol cognosser la verità parché ghe piase far quel che i vol e no i ga mia voia de imparar quel che la Bìblia la dise o obedirla. (Ger. 5:31) Tanti i pensa compagno a una dona de Quebec, nel Canadà. Ela la ga dito a una Testimònia de Geovà: “Se el prete el ne ga imbroià, l’è colpa soa.” Sicuro che no volemo esser come lori che i pensa che l’è meio no saverghene de gnente! — Pro. 1:32; 27:12.

8. Cossa che pol giutarne a esser bravi servi de Geovà?

⁸ La Bìblia la dise che ghemo de sforsarse par esser boni de capir quel che l’è giusto e quel che l’è sbalià. (1 Cor. 14:20) Ma noantri sol saremo ancora pi bravi servi de Geovà se metemo in pràtica i prinsipi dela Bìblia nela nostra vita. Se femo cossita, gavaremo manco problemi e ndaremo far bone dessision. Alora, pensa nele dessision che te sì drio far. Par esémpio, se te sì drio studiar la Bìblia fà un tempo ma no te sì gnancora batesà, cossa te manca far par dedicarte a Geovà? E se ti te sì belche batesà, sito drio sforsarte par predicar e insegnar cada volta meio? Le to dessision le mostra che te sì drio meter in pràtica i prinsipi dela Bìblia? Sito drio tratar i altri come Gesù li trataria? Se vedemo che podarìssino far qualcossa meio ghemo de moverse fora e pensar ancora de pi in quel che Geovà el ne insegna. — Sal. 19:7.

9. Come che “quei che i tol in giro i altri” i mostra che no i vol gaver la sabedoria de Dio?

⁹ El secondo grupo de persone che no le vol gaver sabedoria de Dio le ze “quei che i tol in giro i altri”. Dele volte, nela predicassion parlemo con persone che ghe piase riderghe drio i altri. (Sal. 123:4) La Bìblia la gavea belche dito che nei ùltimi giorni ghen saria tante persone cossita. (2 Pie. 3:3, 4) Compagno a quei òmini che i era maridadi cole fiole de Lò, tanti ancoi no i ghe bada quel che Dio el dise. (Gén. 19:14) E cossa che lori i fà? Tanti i ride de quei che i obedisse la Bìblia. Lori i tol in giro i altri parché i fà sol quel che i vol lori, invesse de ndarghe drio ala sabedoria de Dio. (Giuda 7, 17, 18) La Bìblia la dise che queste persone le ze compagne ai apòstati e a quei che i ga assà Geovà de banda!

10. De acordo con Salmo 1:1, cossa che ghemo de far par no esser compagno a quei che i tol in giro i altri?

¹⁰ Ghemo de star distanti dele persone che le ze sempre drio sbrontolar e parlar mal dei altri. (Ledi Salmo 1:1. d) Parché? Parché se restemo insieme a lore anca noantri ndaremo scominsiar a sbrontolar sora tuto, compagno a quei che i tol in giro i altri. Cossita, ghemo de star atenti par no sbrontolar e gnanca gaver dubi de quel che Geovà el fà e dele orientassion che ricevemo par meso dela so organisassion. Par quela, no ndaremo mai scoltar e gnanca leder gnente che vien dei apòstati. Alora, podemo domandarse: ‘Gonti sempre qualcossa bruta de dir quando vien fora qualche nova orientassion o se una publicassion spiega meio qualcossa? Sonti sempre drio catar fora i sbali de quei che i tende dela congregassion?’  Se femo cossita, ne toca far presto cambiar quel che ne ocore par contentar a Geovà. — Pro. 3:34, 35.

11. Cossa che i “stùpidi” i fà?

¹¹ El terso grupo de quei che no i vol gaver sabedoria de Dio i ze i “stùpidi”. Lori i ze stùpidi parché no i vol far quel che Dio el dise. Invesse, i fà sol quel che i pensa che l’è giusto. (Pro. 12:15) Cossita, lori no i ghe bada mia a Geovà, quel che el ga la vera sabedoria. (Sal. 53:1) Nela predicassion, arquante de queste persone le ne dise su e le ne vien contra parché vivemo de acordo con quel che la Bìblia la dise. Magari, questi stùpidi no i pol giutarne a viver meio e gnanca darne boni consili. (Pro. 24:7) Par quela che Geovà el ne dise de ‘star distanti de quei che i ze stùpidi’. — Pro. 14:7.

12. Cossa che ne giutarà a no esser compagno ai stùpidi?

¹² Noantri no semo compagno ai stùpidi che i ga òdio par le orientassion de Dio. Invesse, ne piase tanto ndarghe drio ale so lege e a quel che lu el dise che l’è giusto. E restemo ancora pi contenti de obedir a Dio quando vedemo la difarensa dela vita de quei che i lo obedisse e de quei che no i lo obedisse mia. Proa varda i problemi che i ga quei che i va contra la sabedoria de Dio e pensa come la to vita la ze bona parché te sì drio obedir a Geovà. — Sal. 32:8, 10.

13. Sarà che semo obrigadi a obedir i consili de Geovà?

¹³ Tuti i pol gaver la sabedoria de Geovà, ma lu no’l obriga nissuni a far quel che el dise. Magari, la Bìblia la dise cossa ndarà suceder con quei che i va contra la sabedoria de Dio. (Pro. 1:29-32) Lori i ndarà tor su quel che i ga semenà, o sia, i gavarà tanti problemi, i ndarà sofrir e dopo Geovà ndarà finirli fora. Invesse, quei che i va in serca dela sabedoria de Geovà e i obedisse ale so orientassion, i sarà boni de viver in pace, sensa problemi e gnanca paura. — Pro. 1:33.

14-15. Cossa che imparemo de Proverbi 4:23?

¹⁴ Come ghemo visto, l’è fàcile catar la sabedoria de Geovà, e meterla in pràtica l’è tanto bon par noantri. Par esémpio, nel libro de Proverbi, catemo tanti boni consili che i ne giuta tanto. Vedemo quatro de questi consili.

¹⁵ Stà atento col to cuor. La Bìblia la dise: ‘De pi che qualche altra roba, protege el to cuor parché l’è la fonte dela vita.’ (Pro. 4:23) Alora, pensa in quel che ghemo de far par proteger, o tender, dela nostra salute. Par esémpio, ne ocore magnar ben, far esersissi e star distante de robe che rovina la nostra salute. Dele  volte, la Bìblia la dopera la parola “cuor” par parlar dela persona che semo par rento, o sia, quel che pensemo, quel che sentimo e quel che femo. E come che podemo proteger questo cuor? Ghemo de leder la Bìblia tuti i giorni, sempre ndar ala predicassion, pareciarse par le riunion e far comentari. L’è anca importante star distante de quel che pol farne pensar in robe sbaliade, come brute compagnie e diversion sbaliade.

16. Come che Proverbi 23:4, 5 pol giutarne ancoi?

¹⁶ Stà contento con quel che te ghè. Proverbi 23:4, 5 mostra che ‘no ghemo de doperar tute le nostre forse par guadagnar richesse’ parché i soldi i pol zolar via compagno un osel. L’è fàcile perder i soldi e quel che ghemo. Ancora cossita, tanti de quei che i ze siori e poareti i seita ndarghe drio i soldi par ciaparghene cada volta de pi. Una persona che la fà cossita, la pol rovinar la so amicìssia coi altri, la vita in fameia, la so salute e quel che i altri i pensa sora ela. (Pro. 28:20; 1 Tim. 6:9, 10) Invesse, la sabedoria la ne giuta a no pensar massa nei soldi. Cossita, no ndaremo voler sempre de pi e saremo contenti con quel che ghemo. — Ecl. 7:12.

17. Cossa che ghemo de far par gaver la “léngua dei sabi”?

¹⁷ Pensa vanti de parlar. Se no stemo atenti a quel che parlemo, podemo disgustar i altri. La Bìblia la dise che quando parlemo ‘sensa pensar, ghe femo mal come colpi de una spada, ma la léngua dei sabi la ze una cura’. (Pro. 12:18) Quando no parlemo sora i sbali un del altro, giutemo che ghen sìpia pace intrà de noantri. (Pro. 20:19) Se seitemo a studiar la Bìblia, saremo boni de consolar i altri con quel che parlemo invesse de farghe mal. (Luc. 6:45) E quando pensemo sora quel che la Bìblia la dise, le nostre parole le pol incoraiar e dar consolo a tuti. — Pro. 18:4.

18. Come che Proverbi 24:6 pol giutarne a esser bravi de predicar e insegnar ai altri?

 ¹⁸ Va drio ale orientassion che ricevemo nela organisassion. La Bìblia la insegna che, quando ricevemo consili de quei che i ga sabedoria, le robe le va pi ben nela nostra vita. (Pro. 24:6) Come che questo versìcolo pol giutarte a esser pi bravo de predicar e insegnar ai altri? Invesse de far la predicassion come che te vol, fà quel che te impari nei discorsi e dimostrassion nele nostre riunion. L’è importante anca cognosser e saver doperar ben quel che la organisassion de Geovà la ne dà par giutar a insegnar i altri, come le nostre publicassion e vìdei. Sito drio imparar a doperar ben queste robe?

19. Come che te te senti de imparar sora la sabedoria che Geovà el dà? (Proverbi 3:13-18)

¹⁹ Ledi Proverbi 3:13-18. e Semo sicuri che sensa i consili de Dio no semo boni de esser felici. Par quela, ghe demo tanto valor a quel che la Bìblia la dise. In questo stùdio, ghemo visto tanti boni consili del libro de Proverbi, ma catemo boni consili in tuta la Bìblia. Alora, volemo sforsarse tanto par meter in pràtica tuto quel che imparemo. Tante persone no le vol gaver la sabedoria de Dio, ma noantri savemo che “quei che i la tien i ze felici”.