Parché che no ndemo ala guera compagno i israeliti i fea?
NELA Seconda Guera Mondial, ghen’era tanti soldadi nazisti cole so sciope intorno de un grupo de Testimònie de Geovà. Alora, el ofissial el ga osà: “Se qualchedun de valtri no’l vol mia ndar lotar contra la Frància o la Inglatera, ndemo coparve tuti!” Quei fradei i ga mostrà tanto coraio parché tuti i ga seità a esser leai a Geovà. Questo esémpio mostra la dessision de tute le Testimònie de Geovà. Ancora che ne toche risciar la vita, no ndemo ala guera, gnanca se metemo nei assunti de questo mondo.
Ma no i ze mia tuti che i pensa cossita. Ghen’è tante persone che le dise che le va drio a Cristo, e le pensa che le ga de lotar par el so paese. Fursi, lore no le ze mia bone de capir parché che ancoi i servi de Dio no i ga de far guere compagno i israeliti i fea nel passà. Alora, come che te podarissi spiegar a qualchedun parché che ancoi no ndemo ala guera? Vedemo sinque difarense intrà noantri e israeliti.
1. TUTI QUEI CHE I SERVIA A DIO I ERA DELA STESSA NASSION
Nel passà, Geovà el gavea scoliesto una nassion par esser el so pòpolo. Dio el ga ciamà la nassion de Israel de so “pòpolo spessial intrà tuti i pòpoli”. (Éso. 19:5) Lu anca el ga scoliesto el posto ndove i israeliti i gavaria de ndar de star. Alora, quando Dio el mandea i israeliti ala guera, no l’era mai par lotar contra altre persone che anca le adorea a lu. a
Ancoi, le persone che le adora a Geovà le ze de “tute le nassion, tribo, pòpoli e léngue”. (Apo. 7:9) Par quela, se i servi de Dio i fusse nte una guera, ghe tocaria lotar un contra l’altro e fin coparse.
2. GEOVÀ EL MANDEA I ISRAELITI NDAR ALA GUERA
Nel passà, Geovà el dessidia quando e parché che i israeliti i ndea ala guera. Par esémpio, lu li ga mandadi ndar lotar contra i cananei. Questa nassion la adorea ai demoni, la fea tanta imoralità sessual e sacrifissi de bambini e la era de star nela tera che Geovà el gavea dato al so pòpolo. Par quela, Geovà el ga mandà che i israeliti i lotesse contra lori par finirli fora de quela tera. Cossita, i israeliti no i ndaria far compagno ai cananei. (Lev. 18:24, 25) Dopo che i israeliti i ze ndati de star nela Tera Prometesta, dele volte, Geovà li ga mandadi ala guera par difender la nassion de altri nemighi. (2 Sam. 5:17-25) Magari, sempre l’è stà Geovà che el ga dessidio se i i ndaria ala guera. Quando i israeliti i lo ga desobedio e i ze ndati ala guera, ga sucedesto tante brute robe. — Nùm. 14:41-45; 2 Cró. 35:20-24.
Ancoi, Geovà no’l manda che le persone le vae ala guera. Le guere che sucede no le ze dela volontà de Dio. Invesse, le sucede sol parché i òmini i vol ciapar de pi soldi, i vol tere pi grande o par causa dela polìtica. Anca ghen’è de quei che i dise che i fà guera par far la volontà de Dio, copar i so nemighi e difender el so pòpolo. Magari, sarà nel futuro che Geovà el ndarà proteger i so adoradori e finir fora coi so nemighi nel Armagedon. (Apo. 16:14, 16) In questa guera, i àngeli i sarà el esèrsito de Dio, nò i so servi. — Apo. 19:11-15.
3. I ISRAELITI I ASSEA VIVI QUEI CHE I MOSTRESSE FEDE IN DIO
Quando Geovà el ga finio fora con Gericò, i israeliti i ga assà vivi Raabe e la so fameia parché la gavea fede in Dio. Sarà che sucede la medèsima roba nele guere ancoi?
Nel passà, i israeliti no i copea quei che i mostrea fede in Dio. Invesse, lori i copea sol le persone che Dio el gavea dito de finir fora. Par esémpio, l’è stà questo che ga sucedesto con Raabe a la so fameia. Geovà el gavea dito che i israeliti i gavea de finir fora cola cità de Gericò. Ma Raabe e la so fameia no i ze stati copadi parché la ga mostrà che la gavea fede in Geovà. (Giosuè 2:9-16; 6:16, 17) Pi tardi, i israeliti no i ga mia copà quei dela cità de Gibeon parché lori i ga mostrà fede in Dio. — Giosuè 9:3-9, 17-19.
Ancoi, i esèrsiti no i se tira mia indrio de copar le persone che le ga fede in Dio. Dele volte, lori i copa persone che no le ze gnanca nela guera e che no le ga colpa de gnente.
4. I ISRAELITI I GAVEA DE NDAR DRIO ALE ORIENTASSION DE DIO QUANDO I NDEA ALA GUERA
Nel passà, quando israeliti i ndea ala guera, lori i gavea de far come Geovà el volea, e nò come i volea lori. Par esémpio, dele volte, Dio el disea che i israeliti i gavea de darghe ai nemighi la oportunità de far la pace vanti che scominsiesse la guera. (Deu. 20:10) I soldadi israeliti anca i gavea de lavarse sempre e far tuto de acordo cole lege de Geovà. (Deu. 23:9-14) Tante volte, i soldadi dele altre nassion i violentea le done che le era dela cità dei nemighi. Ma Geovà el ga proibio i israeliti de farlo. E anca se i volesse maridarse con una dona dela cità dei nemighi, sol i podaria farlo un mese dopo dela guera. — Deu. 21:10-13.
Ancoi, quasi tuti i paesi i ze de acordo de obedir a diverse lege quando sucede una guera. Queste lege le ze state fate par proteger le persone che no le ze mia ndate ala guera. Magari, dele volte, tanti no i rispeta mia queste lege.
5. GEOVÀ EL GA LOTÀ PAR EL SO PÒPOLO
Geovà el ga giutà i israeliti a finir fora con Gericò. Sarà che el fà questo anca ancoi?
Nel passà, Geovà el ga fato tante robe de gnanca creder par giutar i israelti a vinser le guere. Quando i israeliti i ze ndati tor el poder dela cità de Gericò, Geovà el ga dito che lori osesse, e quando i lo ga fato, el muro dela cità l’è vegnesto do. Cossita, i israeliti i ze stati boni de ndar rento la cità. (Giosuè 6:20) Dopo, quando i israeliti i ze ndati lotar contra i amorei, Geovà el ga mandà una tempesta. La Bìblia la dise che ghen’è stà de pi persone che le ze morte par causa dela tempesta che nela lota contra i israeliti. — Giosuè 10:6-11.
Ancoi, Geovà no’l lota par nissuni. Parché? Parché Gesù, che l’è el Rè del Regno de Dio, el ga dito che so “Regno no’l fà parte de questo mondo”. (Gioani 18:36) Invesse, l’è Sàtana che el comanda tuti i governi dei òmini. Par quela che vedemo tante brute robe suceder nele guera de questo mondo. — Luc. 4:5, 6; 1 Gio. 5:19.
I DISSÌPOLI DE GESÙ GHE PIASE VIVER IN PACE
Ghemo visto parché che i servi de Dio de ancoi no i va ala guera compagno i israeliti. Ma noantri no ndemo ale guere anca par causa de altre robe. Par esémpio, Dio el ga dito che nei ùltimi giorni i so servi no i impararia a far la guera, manco ancora lotar. (Isa. 2:2-4) Gesù el ga dito che i so dissìpoli no i ndaria far parte de questo mondo, o sia, lori no i ndaria meterse nela polìtica o nele guera. — Gioani 15:19.
Cristo anca el ga dito che i so dissìpoli no i gavaria de far robe che le podaria scominsiar una guera. Par esémpio, lu el ghe ga insegnà che no i podea restar inrabiadi o cativi e che i gavaria de perdonar i altri. (Mat. 5:21, 22) Lu anca el ga dito che i so dissìpoli i gavaria de sforsarse par viver in pace e fin mostrar amor ai so nemighi. — Mat. 5:9, 44.
Sicuro che noantri no volemo ndar lotar nte una guera. Ma, pol esser che vedemo qualchedun nela congregassion come nostro nemigo. Alora, cossa che podemo far? Ghemo de far el meio che podemo par cavar via del nostro cuor brute sentimenti come questi. — Tia. 4:1, 11.
Invesse de meterse nele guera e nei problemi de questo mondo, noantri femo el nostro meio par far cada volta pi grando el amor e la pace intrà de noantri. (Gioani 13:34, 35) Noantri volemo seitar a far questo fin che rive el giorno che Geovà el ndarà finir con tute le guere par sempre. — Sal. 46:9.
a Geovà el restea disgustà quando le tribo de Israel le lotea intrà de lore. (1 Rè 12:24) Ma arquante volte, Geovà l’è stà de acordo che le tribo le ndesse una contra l’altra parché una de queste tribo la era stata desobediente o la gavea fato bruti pecati. — Giuisi 20:3-35; 2 Cró. 13:3-18; 25:14-22; 28:1-8.
Te piaserà de veder anca questo
DOMANDE FATE DE PI
Parché le Testimònie de Geovà no le va ala guera?
In tuto el mondo, le Testimònie de Geovà no le partissipa nele guere. Parché?.
