1. (a) Cossa che un àngelo l’è drio dir? (b) Come che noantri se sentimo de adorar a Geovà ancoi?

 SE UN àngelo el vegnesse parlar con ti, ndarìssito scoltarlo? Varda ti se nò! Podemo dir che ancoi ghen’è un àngelo che l’è drio parlar “a cada nassion, tribo, léngua e pòpolo”. Apocalisse 14:6, 7 mostra che questo àngelo l’è drio dir: “Temé a Dio e deghe glòria, gavé de adorar quel che el ga fato el cielo e la tera.” Alora, tuti i gavaria de adorar sol al vero Dio, Geovà. E come che se sentimo de saver che Geovà el ne assa adorarlo? Sicuro che restemo pròpio contenti de adorarlo nel so grando témpio spiritual.

2. Cossa elo el grando témpio spiritual de Geovà? (Varda anca el quadro “ El témpio spiritual no l’è mia . . . ”)

² Ma cossa elo el témpio spiritual, e cossa che pol giutarne a capir quel che el vol dir? El témpio spiritual no l’è mia un posto fato su de matoni. Invesse, l’è quel che Geovà l’è drio far par meso del sacrifìssio del so fiol Gesù, par giutarne a adorarlo dela maniera giusta. El apòstolo Paolo el ga spiegà sora questo témpio quando el ga scrito una carta ai fradei ebrei che i era de star nela Giudea. b

3-4. (a) Cossa che Paolo fursi el gavea in mente quando el ga scrito ai fradei ebrei? (b) Come che Paolo el ga giutà i fradei ebrei?

³ Parché che Paolo el ga scrito quela carta ai fradei ebrei? Pol esser che el gavesse due robe in mente. Prima, fursi lu el  volea incoraiarli. Tanti de lori i era stati slevadi nela religion dei giudei e dopo che i ze deventadi dissìpoli de Gesù, i lìderi religiosi giudei i ghe ridea drio. Parché? Parché i fradei no i gavea mia un témpio par adorar a Dio, un altar par far sacrifissi gnanca sasserdoti. Par quela, quei fradei i podaria restar desanimadi, la so fede la restaria fiaca e i podaria fin pensar de tornar ala religion dei giudei. — Ebr. 2:1; 3:12, 14

⁴ Seconda, Paolo el ga giutà quei fradei a veder che ghe tochea studiar anca le verità che le era pi fadiga de capir. (Ebr. 5:11-14) Arquanti de lori ancora i ghe ndea drio ala Lege de Moisè. Ma Paolo el ga spiegà che, come i sacrifissi no ghe bastea par pagar i so pecati, no ghe tochea pi obedir a quela Lege. Lu anca li ga giutadi a ricordarse che, par causa del sacrifìssio de Gesù, lori i gavea una speransa ancora meio e i podea deventar amighi de Dio. — Ebr. 7:18, 19.

5. Cossa che ne ocore capir sora el libro de Ebrei, e parché?

⁵ Paolo el ga spiegà a quei fradei parché che la maniera che i era drio adorar a Dio la era tanto meio de quela che i giudei i fea nel passà de acordo cola Lege de Moisè. Lu el ga dito che la religion dei giudei la era sol una ombria de quel che vegnaria dopo de Cristo. (Col. 2:17) Come cossita? Una ombria sol la mostra come che l’è un mestier, ma no l’è mia pròpio el mestier. Alora, la maniera che i giudei i adorea a Geovà la era sol una ombria de come i so servi i gavaria de adorarlo nel so grando témpio spiritual. Par quela, ghemo de capir quel che Paolo el ga dito ai ebrei sora el grando témpio spiritual. Sol cossita saremo boni de saver come che Geovà el vol che lo adoremo e come che podemo gaver el perdon dei nostri pecati. Adesso, ndemo veder come che i giudei i adorea a Dio nel passà e come che lo adoremo ancoi. Cossita, saremo boni de capir meio cossa che vol dir el grando témpio spiritual.

6. Come che i israeliti i doperea el tabernàcolo?

⁶ La adorassion a Dio nel passà. Quando Paolo el ga scrito ai ebrei, lu el gavea in mente el tabernàcolo che Moisè el ga fato nel ano 1512 vanti de Cristo. (Varda el quadro “La adorassion a Dio nel passà — La adorassion a Dio ancoi.”) El tabernàcolo l’era anca ciamà “tenda de riunion”, e l’era el posto  ndove i israeliti i adorea a Dio e i fea i sacrifissi. I israeliti i lo portea insieme sempre che i se cambiea de un posto al altro nel deserto. (Éso. 25:8, 9; Nùm. 9:22) El tabernàcolo l’è stà doperà par intorno de 500 ani, fin che el témpio l’è stà fato su in Gerusalen. (Éso. 29:43-46) Magari, el tabernàcolo anca el mostrea una roba tanto meio che ghen saria par i dissìpoli de Gesù.

7. Quando che el grando témpio spiritual el ga scominsià a esister?

⁷ La adorassion a Dio ancoi. El tabernàcolo del passà l’era sol una ombria de quel che ghen’è nel cielo e el mostrea come che saria el grando témpio spiritual de Geovà. Questo témpio el ga scominsià a esister nel ano 29, quando Gesù l’è stà batesà, untà col spìrito santo e l’è deventà Somo Sasserdote del grando témpio spiritual. c (Ati 10:37, 38; Ebr. 4:14) Alora, quando Paolo el ga scrito ai ebrei, belche ghen’era questo grando témpio spiritual. Lu el ga dito: “Questa tenda la ze un sìmbolo par i nostri giorni.” — Ebr. 8:5; 9:9

8-9. De acordo con Ebrei 7:23-27, che difarensa ghen’è intrà i somo sasserdoti del passà e Gesù Cristo?

⁸ La adorassion a Dio nel passà. Quando el tabernàcolo l’è stà fato su, el primo sasserdote che Geovà el ga scoliesto l’è stà Aron. El laoro del somo sasserdote l’era portar a Dio i sacrifissi che le persone le volea far. Ma, ghen’è una bela difarensa intrà i somo sasserdoti del passà e Gesù Cristo, el Somo Sasserdote de ancoi. Come cossita? Come lori i era imperfeti, ghe tochea far sacrifissi anca par i so pecati. Paolo anca el ga spiegà che, come i moria, i sasserdoti no i podea seitar a far el so laoro. Par quela, ghen’era bisogno de un sasserdote drio man l’altro. d — Ledi Ebrei 7:23-27. e

⁹ La adorassion a Dio ancoi. Paolo el ga dito che Gesù Cristo, el nostro Somo Sasserdote, el ‘laora nela vera tenda che Geovà el ga fato su’. (Ebr. 8:1, 2) E come Gesù l’è perfeto, no ghe ocore mia far sacrifissi par i so pecati gnanca ghen sarà bisogno de un sasserdote dopo de lu parché el viverà par sempre. Adesso, ndemo veder parché che el altar e i sacrifissi che i israeliti i fea i era difarenti de quei che ghen’è nel témpio spiritual.

10. Parché che i israeliti i fea sacrifissi nel altar de rame?

¹⁰ La adorassion a Dio nel passà. Banda de fora del tabernàcolo, ghen’era un altar de rame ndove i sacrifissi de bèstie i era fati par Geovà. (Éso. 27:1, 2; 40:29) Ma, quei sacrifissi de bèstie no i paghea del bon i pecati dele persone. (Ebr. 10:1-4) Alora, parché che i israeliti i seitea a farli? Parché quei sacrifissi li giutea a ricordarse che, nel futuro, ghen saria un sacrifìssio che bastaria par pagar i pecati de tuti.

11. In che altar Gesù el ga dato la so vita come sacrifìssio? (Ebrei 10:5-7, 10)

¹¹ La adorassion a Dio ancoi. Gesù el savea che Geovà lo gavea mandà nela Tera par dar la so vita come sacrifìssio par salvar le persone.  (Mat. 20:28) Alora, quando Gesù el se ga batesà, l’è come se el fusse stà dato in sacrifìssio nte un altar, o sia, lu el ga mostrà a Dio che l’era pronto par far la so volontà. (Gio. 6:38; Gàl. 1:4) Par quela, podemo dir che el altar l’è la volontà de Dio, e nò un posto che i òmini i ga fato su. E la volontà de Geovà la era che Gesù el desse la so vita “una volta par sempre” par pagar del tuto i pecati de quei che i ga fede in lu. (Ledi Ebrei 10:5-7, f 10. g) Adesso, ndemo veder cossa che vol dir i mestieri che i era doperadi rento el tabernàcolo.

12. (a) Chi che podea ndar rento el Santo? (b) Chi che podea ndar rento el Santìssimo nel tabernàcolo?

¹² La adorassion a Dio nel passà. El tabernàcolo e el témpio, che dopo l’è stà fato su in Gerusalen, i se someiea tanto. In tuti i due, ghen’era el Santo e el Santìssimo, e intrà questi due, ghen’era una coltrina par spartirli. (Ebr. 9:2-5; Éso. 26:31-33) Rento el Santo, ghen’era un candelabro de oro, un altar par brusar insenso e una tola coi pan de presentassion. Sol i sasserdoti i podea ndar rento el Santo par far i so laori santi. (Nùm. 3:3, 7, 10) Nel Santìssimo, ghen’era la arca del acordo, e quando el somo sasserdote el ndea rento quela parte del tabernàcolo, l’era come se el fusse davanti el pròpio Geovà. El somo sasserdote el podea ndar là sol una volta al ano, nel Giorno de Domandar Perdon dei Pecati.  (Éso. 25:21, 22; Lev. 16:2, 17) Alora, tuti i ani, lu el portea rento el Santìssimo el sangue dele bèstie par domandar perdon dei so pecati e de quei dele persone. Pi tardi, Geovà el ga doperà el so spìrito santo par giutar le persone a saver cossa pròpio volea dir queste due parte del tabernàcolo. — Ebr. 9:6-8. h

13. Cossa che vol dir el Santo e el Santìssimo nel témpio spiritual?

¹³ La adorassion a Dio ancoi. Par meso del so spìrito santo, Geovà el ga scoliesto 144 mila persone che le ndarà servir come sasserdoti nel cielo insieme a Gesù. (Apo. 1:6; 14:1) Intanto che lore le ze qua nela Tera, Geovà le ga scolieste par esser so fioi. Alora, el Santo del tabernàcolo vol dir che questi 144 mila i ga una relassion spessial con Geovà. (Rom. 8:15-17) El Santìssimo del tabernàcolo vol dir el cielo ndove Geovà l’è de star. “La coltrina”, che la spartia el Santo del Santìssimo, vol dir el corpo de Gesù quando l’era qua nela Tera. Quando el ga dato la so vita come sacrifìssio, lu el ga perso quel corpo de carne e l’è stà bon de tornar al cielo come Somo Sasserdote del témpio spiritual. Quando Gesù l’è stà ressussità, lu l’è ndato rento el Santìssimo. Cossita, anca i 144 mila i ndarà al cielo dopo che se finisse la so vita qua nela Tera. — Ebr. 10:19, 20; 1 Cor. 15:50.

14. De acordo con Ebrei 9:12, 24-26, parché che la maniera che adoremo a Geovà ancoi la ze tanto meio de quela del passà?

¹⁴ Cossita, capimo che la maniera de adorar a Geovà par meso del sacrifìssio de Gesù la ze tanto meio de quela del passà. Parché? El somo sasserdote del passà el portea el sangue dele bèstie rento el Santìssimo, che l’era un posto fato su par òmini. Ma Gesù l’è ndato su al cielo, che l’è el posto pi santo che ghen’è, par star davanti a Geovà. Cossita, par meso del so sacrifìssio, lu el ga cavà via el pecato. (Ledi Ebrei 9:12, i 24-26. j) Alora, le persone no le ga pi de far sacrifissi de bèstie par gaver el perdon dei so pecati. Adesso, noantri ndaremo veder come che tuti quei che i ga la speransa de viver nel cielo e nela Tera i pol adorar a Geovà nel so grando témpio spiritual.

15. Chi che laorea nel cortivo del tabernàcolo?

¹⁵ La adorassion a Dio nel passà. El tabernàcolo el gavea un cortivo che l’era ndove i sasserdoti i fea el so laoro. Nel cortivo, ghen’era el altar de rame, ndove se fea i sacrifissi de bèstie e un cadin de rame che i sasserdoti i doperea par lavarse e deventar puri. (Éso. 30:17-20; 40:6-8) I altri tempi che i ze stati fati dopo i gavea questo cortivo e nantro, nela parte de fora, ndove le persone che no le era mia sasserdoti le podea adorar a Geovà.

16. Chi che serve nel cortivo del grando témpio spiritual?

¹⁶ La adorassion a Dio ancoi. I untadi che no i ze gnancora ndati al cielo i serve nel cortivo del grando témpio spiritual qua nela Tera. El cadin de rame che ghen’era nel cortivo del tabernàcolo el giuta i untadi a ricordarse che ghe toca esser puri in quel che i pensa e in  quel che i fà. Ma ndove che i altri servi de Dio i ze drio adorarlo? Quel che el apòstolo Gioani el ga dito ne giuta a capir che lori i ze drio adorar a Geovà nel cortivo dela parte de fora del témpio. Gioani anca el ga dito che lori i ze drio servir a Geovà “giorno e note nel so témpio”. (Apo. 7:9, 13-15) Sicuro che tuti noantri restemo pròpio contenti adorar a Geovà nel so grando témpio spiritual.

17. Come che femo sacrifissi a Geovà ancoi?

¹⁷ Tuti i servi de Geovà ancoi i pol far sacrifissi a lu. Come? Lori i pol doperar del so tempo, dela so forsa e de quel che i ga par servirlo. El apòstolo Paolo el ga dito che noantri podemo ‘darghe sempre a Dio un sacrifìssio de lode, o sia, proclamar el so nome come fusse fruti dei nostri lavri’. (Ebr. 13:15) Restemo tanto contenti de doperar tuto quel che ghemo par adorar a Geovà ancoi.

18. (a) De acordo con Ebrei 10:22-25, cossa che ghemo de far par adorar a Geovà? (b) Cossa che sempre ghemo de ricordar?

¹⁸ Ledi Ebrei 10:22-25. k Quando Paolo l’era drio finir de scriver la so carta ai ebrei, lu el ga dito che ne ocore far arquante robe par adorar a Geovà. Par esémpio, noantri ghemo de seitar a pregar a lu, parlar dele bone notìssie ai altri, ndar sempre ale riunion e ‘incoraiarse un al altro ancora de pi quando vedemo rivar el giorno de Geovà’. E nel libro de Apocalisse, un àngelo el ga dito due volte che ghemo de adorar a Geovà. (Apo. 19:10; 22:9) Alora, volemo sempre ricordarse de quel che ghemo imparà sora el grando témpio spiritual e seitar a adorar a Geovà!