1. Parché che fursi femo fadiga esser obedienti?

 EL RÈ Davi el fea fadiga obedir a Dio anca se lo amesse tanto. Par quela, lu el ga pregà che Geovà lo giutesse a gaver ‘voia de esser obediente’. (Sal. 51:12) Pol esser che noantri se sentimo compagno a lu. Ma, parché che fursi femo fadiga esser obedienti? Prima, par causa dela nostra imperfession, no ghemo rento de noantri la voia de sempre esser obedienti. Seconda, Sàtana sempre el proa farne desobedir a Geovà. (2 Cor. 11:3) Tersa, vivemo nte un mondo pien de “persone desobediente”. (Efe. 2:2) Alora, ghemo de sforsarse tanto par ndar contra Sàtana, questo mondo e la nostra voia de far quel che l’è sbalià. Cossita, saremo boni de obedir a Geovà e a quei che lu el ga dato autorità.

2. Cossa che vol dir esser ‘pronti par obedir’? (Tiago 3:17)

² Ledi Tiago 3:17. b Tiago el ga dito che le persone che le ga sabedoria le ze ‘pronte par obedir’. Questo vol dir che ghemo de esser premosi e gaver la voia de esser obedienti a quei che Geovà el ga dato autorità. Ma, Geovà no’l vol che obedimo a quei che i ne dise de desobedirlo. — Ati 4:18-20.

3. Parché che Geovà el vol che obedimo a quei che lu el ga dato autorità?

³ Geovà l’è perfeto, e lu sempre el ne dise la meio roba de far. (Sal. 19:7) Par quela che l’è tanto pi fàcile obedir a lu che a persone imperfete. Ma Geovà el ga dato autorità al pare, ala mare, ai ansiani e ale persone del governo. Alora, se semo obedienti a tuti lori, ndaremo obedir anca a lu. (Pro. 6:20; 1 Tes. 5:12; 1 Pie. 2:13, 14) In questo stùdio, ndaremo veder come che podemo esser obedienti a queste persone anca se no l’è mia fàcile.

4. Parché che tanti fioi i desobedisse a so pare e so mare?

⁴ I gióveni i ze in meso a tanta gente che ‘desobedisse ai genitori’. (2 Tim. 3:1, 2) Tanti i fà fadiga obedir a so pare e so mare parché i pensa che lori i dise una roba e i fà nantra. Altri gióveni i pensa che i consili de so genitori i ze de sti ani e che no l’è mia fàcile far quel che i ghe domanda. Par quela, tanti no i ze mia boni far quel che Geovà el ga dito e obedir a so pare e so mare come lu el vol. (Efe. 6:1) Se te sì un gióveno, pol esser che te te ghè belche sentio cossita. Alora, cossa che pol giutarte a esser obediente?

5. De acordo con Luca 2:46-52, parché che Gesù l’è el meio esémpio par i fioi?

⁵ Te pol imparar a esser obediente col bel esémpio che Gesù el ga dato. (1 Pie. 2:21-24) Lu l’era perfeto, ma so pare e so mare i sbaliea e tante volte no i era boni capirlo. Stesso cossita, Gesù l’è stà obediente a lori. (Éso. 20:12) Varda cossa che ga sucedesto quando lu el gavea 12 ani. (Ledi Luca 2:46-52. c) Gesù l’era ndato con so pare e so mare fin Gerusalen. Ma nela ora de vegner casa, lori no i se ga nicorto che lu no l’era insieme. Quando i lo ga catà, Maria la ga volesto dir che Gesù el gavea la colpa de quel problema. Ancora che ghe tochea a lori tender dei so fioi, lu el ghe ga rispondesto con rispeto. Anca se Giusepe e Maria ‘no i fusse boni capir’ tuto quel che Gesù el disea, lu “el ga seità obedirghe”.

6-7. Cossa che pol giutar i fioi a esser obedienti?

⁶ Se te sì gióveno, pol esser che anca a ti te fà fadiga obedir a to pare e to mare quando i sbàlia o quando no i te capisse. Alora, cossa che pol giutarte a esser obediente? Prima, pensa come che Geovà el se sente. La Bìblia la dise che, quando te obedissi a to pare e to mare, te fè quel che “ghe piase al Signor”. (Col. 3:20) Geovà el sa che to pare e to mare, dele volte, no i ze boni capirte e i te domanda de far robe che le ze massa fadiga. Ma ricòrdate che, se te sì obediente, te farè Geovà pròpio contento.

⁷ Seconda, pensa come che to pare e to mare i ndarà sentirse. Se te sì obediente, lori i ndarà restar contenti, i ndarà fidarse de ti e valtri ndaré deventar ancora de pi amighi. (Pro. 23:22-25) Varda cossa che un fradel de nome Alexandre, che l’è de star nela Bèlgica, el ga dito: “Dopo che go scominsià a esser pi obediente a me pare e me mare, semo deventadi pi amighi e anca pi contenti.” d Tersa, pensa parché che obedir a to pare e to mare ancoi sarà bon par ti nel futuro. Un fradel de nome Paulo, che l’è de star nel Brasil, el ga dito: “Obedir a me pare e me mare me ga giutà a esser obediente a Geovà e a altre persone che le ga autorità.” E la Bìblia la mostra che, se te sì obediente, ‘te ndarà tuto ben e te restarè par tanto tempo nela Tera’. — Efe. 6:2, 3.

8. Parché che tanti gióveni i ga scoliesto esser obedienti?

⁸ Tanti gióveni i ga visto che le robe sempre le vien fora meio quando i ze obedienti. Par esémpio, Luiza, che la ze de star nel Brasil, no  la era mia bona capir parché che ela no la podea gaver un telèfono se tuti i altri gióveni i gavea. Ma dopo, ela la ga capio che so pare e so mare i era drio protegerla. Alora, la ga dito che, invesse de sentirse come se la gavesse le man ligade, la ga visto che so pare e so mare i gavea fato quela règola par giutarla. Una gióvena de nome Elizabeth, che la ze de star nei Stati Unidi, dele volte la fà fadiga obedir so pare e so mare. Ela la ga dito: “Quando no son mia bona capir parché che me pare e me mare i ga fato una règola, proo ricordarme de tute le volte che so règole le me ga protegesto.” Nantra gióvena de nome Monica, che la ze de star nela Arménia, la ga dito che tute le volte che la ga obedio a so pare e so mare, la ze restada pi contenta de che quando li ga desobedidi.

9. Cossa che arquante persone le pensa sora obedir ale lege?

⁹ Tante persone le sa che ghemo bisogno dei governi e che le gavaria de obedir al manco arquante dele so lege. (Rom. 13:1) Magari, queste persone no le vol obedir ale lege che no ghe piase o che no ghe par mia giuste. Par esémpio, nte un paese dela Europa, tante persone le pensa che sol le gavaria de pagar i imposti che ghe par giusti. Cossita, le persone in quel paese no le paga tuti i imposti che el governo el ghe domanda.

10. Parché che ghemo de obedir anca ale lege che no ne piase mia?

¹⁰ La Bìblia la mostra che i governi i fà le persone sofrir, i ze soto el poder del Diaol e suito i sarà finidi fora. (Sal. 110:5, 6; Ecl. 8:9; Luc. 4:5, 6) Ma par intanto, Geovà el assa che ghen sìpie i governi par mantegner le robe un poco pi organisade. Alora, ghemo de obedir e rispetar ale autorità e pagar i imposti. La Bìblia la dise che quei ‘che i se mete contra la autorità i se mete contra la òrdine de Dio’. (Rom. 13:1-7) Dele volte, pol esser che pensemo che una lege la ze massa fadiga de obedir o che no la ze mia giusta. Ma, se no la va contra la lege de Dio, ghemo de obedirla. Cossita, saremo drio obedir anca a Geovà. — Ati 5:29.

11-12. (a) De acordo con Luca 2:1-6, cossa che Giusepe e Maria i ga fato par obedir a una lege? (b) Cossa ghe ga sucedesto? (Varda anca le ilustrassion.)

¹¹ Noantri podemo imparar tanto de Giusepe e Maria. Lori i ze stati obedienti ale autorità anca quando no l’è mia stà fàcile. (Ledi Luca 2:1-6. e) Par esémpio, Maria la era gràvida de nove mesi quando el governante de  Roma el ga fato una lege che tuti i gavea de ndar registrarse ndove i era nassesti. Alora, Giusepe e Maria ghe ga tocà far un viaio de 150 chilòmetri fin Belen. Questo viaio saria pròpio fadiga par Maria parché i gavea de ndar su e do par i monti. Sicuro che lori i ze restadi preocupadi parché quel tatin el saria el Messia e el podaria nasser in meso el viaio! Alora, gali pensà che i gavea una bela scusa par desobedir quela lege?

¹² Ancora che Giusepe e Maria i gavesse tante robe par preocuparse, lori i ze stati obedienti ala lege. Par quela, Geovà l’è restà contento e li ga giutadi. Lori i ga fato un bel viaio e el bambin l’è nassesto ben. E anca quel che l’era stà scrito nte una professia dela Bìblia ga sucedesto par causa dela so obediensa. — Mic. 5:2.

13. Come che giutemo i fradei se semo obedienti?

¹³ Noantri ghemo tante bone rason par esser obedienti ale autorità. Par esémpio, no ndaremo mia esser castigadi parché no ghemo obedio a una lege. (Rom. 13:4) Se semo obedienti ale autorità, podemo anca giutar i fradei. Come cossita? Le autorità le ndarà veder che le Testimònie de Geovà le ze bona gente e che le rispeta ale autorità. Varda cossa ga sucedesto tanti ani indrio nela Nigèria. Arquanti soldadi i ze ndati rento un Salon del Regno intanto che i fradei i era drio far la riunion. Quei soldadi i era in serca de persone che le era contra pagar i imposti. Ma un dei soldadi li ga mandadi via e el ga dito: “Le Testimònie de Geovà sempre le paga i imposti.” Cossita, se te obedissi ale autorità, te podarè giutar le persone a pensar ben dele Testimònie de Geovà, e pol esser che, nel futuro, lori no i ndarà farghe mal ai fradei. — Mat. 5:16.

14. Cossa ga giutà una sorela a esser “pronta par obedir” ale autorità?

¹⁴ Dele volte, pol esser che no ghemo mia voia de obedir ale autorità. Varda cossa che una sorela de nome Joanna, che la ze de star nei Stati Unidi, la ga dito: “L’è fadiga par mi  obedir ale autorità parché le ga fato le persone dela me fameia sofrir tanto.” Ma ela la ga visto che ghe tochea cambiar la so maniera de pensar. Cossa che la ga giutada? Prima, la se ga fermà de leder robe nela internet che parlea contra i governi. (Pro. 20:3) Seconda, la ga pregà che Geovà la giutesse a firdase in lu invesse de spetar che el governo el cambiesse. (Sal. 9:9, 10) Tersa, la ga ledesto tante publicassion che le parlea sora no meterse nela polìtica gnanca nele robe de questo mondo. (Gio. 17:16) Joanna la ga dito che rispetar e obedir ale autorità la ga giutada a gaver pace.

15. Parché che pol esser fadiga obedir ala organisassion de Geovà?

¹⁵ Geovà el dise che ghemo de esser obedienti a quei che i tende dela congregassion. (Ebr. 13:17) Anca se el nostro lìder, Gesù, l’è perfeto, quei che i tende dela congregassion i ze imperfeti. Alora, pol esser fadiga obedirli se i ne domanda de far una roba che no volemo mia. Ga sucedesto una roba cossita col apòstolo Piero. Una volta, un àngelo el ghe ga dito che el gavea de magnar bèstie che le era impure de acordo cola lege de Moisè. Ma Piero no le gavea mai magnà e ghe parea una roba sbaliada. Par quela, lu el ga dito tre volte che no le ndaria mia magnarle. (Ati 10:9-16) Se l’è stà fadiga par Piero esser obediente a quel che un àngelo perfeto ghe ga dito, pol esser ancora pi fadiga esser obediente a quel che òmini imperfeti i ne dise de far!

16. Come che Paolo el ga mostrà che l’era ‘pronto par obedir’? (Ati 21:23, 24, 26)

¹⁶ Varda cossa ga sucedesto col apòstolo Paolo. Arquanti giudei i gavea sentio dir che lu l’era drio parlar contra Moisè e contra la Lege de Moisè. (Ati 21:21) Alora, i ansiani de Gerusalen i ga dito a Paolo che el ciapesse quatro òmini insieme e i ndesse al témpio par purificarse. Cossita, le persone le podaria veder che lu l’era drio obedir ala Lege. Ancora che Paolo el savesse che no ghe tochea pi obedir ala Lege de Moisè e che no’l gavea fato gnente de sbalià, lu el ga obedio. Cossita, “Paolo e i òmini i ze ndati far quel che la lege la disea par deventar puri”. (Ledi Ati 21:23, 24, f 26. g) Lu el ga mostrà che l’era ‘pronto par obedir’ anca se no’l fusse de acordo. Par causa dela so obediensa, Paolo el ga giutà i fradei a restar unidi. — Rom. 14:19, 21.

17. Cossa che te ghè imparà del esémpio de Stephanie?

¹⁷ Varda cossa che ga sucedesto con una sorela de nome Stephanie. Ela e so omo i era drio giutar nte un grupo de nantra léngua. Ma la filial del paese la ga dessidio serar el grupo, e lori ghe ga tocà ndar a una congregassion nela so léngua. Anca se no i fusse de acordo con quela dessision, Stephanie e so omo i ga obedio. Ela la ga dito: “No me ga piasesto e me parea che no ghen’era bisogno de aiuto nele congregassion dela nostra léngua. Ma pi tardi, go capio che i fradei i gavea fato una bona dessision. Mi e me omo semo stati boni de giutar arquanti fradei e sorele che no i gavea nissuni dela fameia insieme che servia a Geovà. Adesso, mi ghe dao stùdio a una sorela che la se gavea fermà de predicar e go pi tempo par studiar la Bìblia. Son pròpio contenta che go fato el meio che mi podea par esser obediente.”

18. Parché che l’è importante esser obediente?

 ¹⁸ Gesù “el ga imparà a esser obediente par via de quel che el ga sofrio”. (Ebr. 5:8) Anca noantri podemo imparar a obedir. Ma compagno a Gesù, quasi sempre imparemo a esser obedienti quando semo drio infrontar una dificoltà. L’è stà questo che ga sucedesto quando ga scominsià la pandemia del COVID-19. Fursi te ga fato fadiga fermarte de ndar nele riunion nel Salon del Regno e de predicar de casa in casa. Ma te ghè visto che la obediensa la ze importante parché la te protege, la giuta la congregassion a restar unida e la fà Geovà contento. E sicuro che quel che ga sucedesto nela pandemia ne ga giutà a esser pronti par obedir ale istrussion che gavaremo nela granda tribolassion. Se semo obedienti, podaremo salvar la nostra vita. — Giò 36:11.

19. Parché che semo dessididi de esser obedienti?

¹⁹ In questo stùdio, ghemo imparà che podemo gaver tante benedission se semo obedienti. Ma semo dessididi de esser obedienti parché amemo a Geovà e volemo contentarlo. (1 Gio. 5:3) L’è vera che mai saremo boni de ringrassiar a Geovà par tuto quel che el ne ga fato de bon. (Sal. 116:12) Magari, podemo esser obedienti a lu e a quei che lu el ga dato autorità. Cossita, mostremo sabedoria e femo Geovà contento. — Pro. 27:11.