I fradei de Betel i ga bio de laorar par de pi de un ano par far su la stassion de ràdio WBBR in Staten Island, nela cità de Nova York. Prima lori i ga taià le piante e i ga netà el posto. Dopo i ga fato su un prèdio par quei che i ndaria laorar lì e nantro par meter via i echipamenti che i ndaria doperar. Alora, i fradei i ze ndati in serca dele robe eletròniche che ghe ocorea par far la ràdio, ma lori i gavaria tante dificoltà.

Prima de tuto, i fradei i gavea de impiantar la antena prinsipal dela stassion. Questo l’era fadiga parché la antena la era alta 91 metri, e ghe ocorea impiantar due palanchi un de cada banda alti 61 metri. I fradei no i ze mia stati boni de far quel laoro nela prima volta. Ma lori i se ga fidà in Geovà, e dopo i ze stati boni de impiantar la antena. Calvin Prosser, un fradel che l’era drio giutar far quel laoro, el ga dito: “Se fussino stati boni de piantar la antena nela prima volta che ghemo proà, fursi ndarìssino dir che l’era par causa del nostro laoro.” Invesse, i fradei i savea che l’era stà Geovà che li gavea giutà. Ma ancora ghen saria tanti problemi.

El ràdio l’era una roba pròpio nova par quela època, e no ghen’era boni echipamenti par doperar. Alora, i fradei i ga catà fora un trasmissor de 500 watts che i ga comprà de qualchedun che l’era lì darente. Invesse de doperar un micròfono, i fradei i ga doperà un telèfono comun. Alora, nte una sera de febraro, i fradei i ga metesto tuti quei echipamenti insieme e i ga proà farli laorar. Lori i gavea bisogno de scòlier quel che i ndaria parlar, e i ga dessidio cantar i càntichi del Regno. El giuis  Rutherford b l’era in Brooklyn, a 25 chilometri de lì, e el ga scoltà la trasmission. Alora, lu li ga ciamadi par telèfono, e el fradel Ernest Lowe mai el se ga desmentegà de quel che el ghe ga dito.

Quela trasmission la ga fato rider al fradel Rutherford, e lu el ga dito: “Par carità, fermeve con questo bacan. Par che valtri sì gati drio sguaelar.” I fradei i ze restadi con vergogna e presto i ga fermà la trasmission. Ma tuti i ga visto che el ràdio el laorea ben e che lori i era pronti.

In 24 de febraro de 1924, lori i ga fato la prima trasmission. El fradel Rutherford el ga dito che quela stassion de ràdio la saria doperada par far el laoro che “Cristo, el Rè, el ghe gavea dato de far”. Lu el ga spiegà che quela stassion “la ndaria giutar le persone de tute le religion a capir la Bìblia e la època che le era drio viver”.

La prima trasmission la ze stata belìssima. E el pòpolo de Geovà el ga doperà quela stassion de ràdio par 33 ani.

In lùlio de 1924, i studianti dela Bìblia i ga fato un congresso in Columbus, Ohio. Ghen’era fradei de tuto el mondo, e ghen’è stà discorsi in àrabe, inglese, francese, aleman, greco, ùngaro, italiano, lituano, polaco, russo, ucraniano e nele léngue scandinave. Le persone le ga podesto scoltar arquanti discorsi par meso del ràdio. I fradei i ga domandà che un giornal del posto (Ohio State Journal) el metesse par scrito artìcoli sora cada giorno del congresso.

Nel giorno 24 de lùlio, de pi de 5 mila fradei che i era nel congresso i ze ndati predicar in quela cità. Lori i ga assà cole persone quasi 30 mila libri e i ga scominsià miliari de studi bìblichi. La Sentinela la ga dito che quel giorno l’è stà “el pi bel del congresso”.

Nantra bela roba la ga sucedesta nel vendre, 25 de lùlio. El fradel Rutherford el ga bio coraio de leder un testo che el ndea contra i lìderi religiosi. Quel testo l’è stà scrito come se el fusse un documento de un giuis e el disea che i lìderi dela polìtica, del comèrsio e dela religion i era drio “intrigar le persone de cognosser a Dio e de ricever la vita”. Quel testo el disea anca che quei lìderi i era drio “giutar la Liga dele Nassion, e che lori i disea che Dio l’era drio doperarla par governar la Tera”.  I studianti dela Bìblia i gavaria bisogno de coraio e perseveransa par portar questo messàgio ale persone.

Dopo, un artìcolo dela Sentinela el ga dito che quel congresso in Columbus el ga fato pi forte la fede dei fradei che i era lì. Quel congresso ghe ga dato coraio de predicar anca con oposission. Leo Claus, un fradel che l’era nel congresso, el ga dito: “Quando semo ndati via, èrino pròpio premosi de portar quel messàgio ale persone.”

In otobre, i studianti dela Bìblia i ga scominsià a portar milioni de còpie dela version stampada del discorso del fradel Rutherford. Quel foieto el gavea nome Acusados os Eclesiásticos. Frank Johnson l’era ndato dar i foieti ale persone de Cleveland, una pìcola cità in Oklahoma. Lu el ga finio el so laoro 20 minuti vanti dela ora che el gavea combinà de catarse con altri fradei e sorele. Ma arquanti òmini i ze restadi tanto cativi cola predicassion del fradel Frank e i era in serca de lu. Par quela, lu l’è ndato sconderse rento una ciesa e, come no ghen’era nissuni, el ga dessidio assar un foieto in cada banco dela ciesa e anca rento la Bìblia del pastor. El fradel Frank el ga fato pròpio presto e, come ghen’era ancora tempo, l’è ndato rento altre due ciese par far la medèsima roba.

Lu el ga coresto par el posto ndove el se cataria coi fradei. El se ga sconto de drio de un posto de gasolina e l’era atento se quei òmini i vegnaria lì. Ma lori i ga passà davanti el posto e no i lo ga mia visto. Pena dopo, i fradei che i era drio predicar lì darente i ze rivadi e i ze ndati via col Frank.

Un dei fradei che i era lì el ga dito: “Quando èrino drio ndar via dela cità, ghemo passà davanti de quele tre ciese e in cada una ghen’era intorno de 50 persone. Arquanti i era drio leder el foieto e altri i era drio mostrarghelo al pastor. Semo stati boni de ndar via par poco. Ghemo ringrassià a Geovà che el ne ga protegesto e el ne ga giutà a portar quel messàgio e a scampar via dei nostri nemighi.”

Anca in altri paesi, i studianti dela Bìblia i ga mostrà coraio. Nel nort dela Frància, el fradel Józef Krett el ga predicà a arquanti òmini dela Polònia che i era drio laorar nela minerassion. I fradei i ga convidà le persone de quela cità par el discorso che el fradel Józef el ndaria far col tìtolo “Quei che i ze morti i sarà ressussitadi”. Ma un pastor de una dele ciese dela cità el ga dito ale persone che no le podea mia ndar scoltar quel discorso. Ma le persone no ghe ga badà, e de pi de 5 mila le ze ndate al discorso. Anca el pastor l’era là! El fradel Józef el ghe ga domandà se el pastor el volea doperar la Bìblia par spiegar quel che el credea, ma lu no’l ga mia volesto. El fradel Józef el ga assà tute le publicassion che el gavea e el ga visto che le persone le gavea tanta voia de imparar sora la Bìblia. — Amòs 8:11.

Nela Àfrica, Claude Brown el ga scominsià a predicar le bone notìssie nte un paese che ancoi ga nome Gana. Le publicassion che lu el ga dato ale persone e i discorsi che el ga fato ga giutà tanti a cognosser la verità. John Blankson l’è ndato a un dei so discorsi. Lu l’era drio far una università, e presto el ga capio che el gavea catà la verità. Lu el ga dito: “Imparar la verità me ga assà pròpio contento, e mi parlea a tuti quei nela università sora quel che ero drio imparar.”

John el gavea imparà nela Bìblia che no ghen’è mia la trinità. Alora, un giorno, l’è ndato nte una ciesa anglicana e el ga domandà al prete sora quel che el gavea imparà. El prete l’è ndato de carera  drio de lu e el ga osà: “Ti no te sì mia un cristian, te sì del Diaol. Va via de qua!”

Quando l’è rivà casa, John el ga scrito una carta al prete e lo ga convidà par spiegar la trinità davanti de altre persone. Alora, el prete lo ga convidà par ndar nela sala del prinsipal maestro dela università. E quel maestro el ga domandà a John se lu el gavea pròpio scrito quela carta.

John el ga dito: “Si, signor.”

Alora, el maestro el ghe ga dito che el scrivesse nantra carta par domandar scusa al prete. John el ga scrito:

“El me maestro el me ga dito de domandarte scusa, ma mi sol vao far questo se te aceti che te sì drio insegnar busie.”

El maestro l’è restà spaurà e el ghe ga domandà: “Blankson, l’è pròpio questo che te vol scriver?”

“Si, signor. Mi vao scriver pròpio questo.”

El maestro el ga dito: “Ma te sarè parà via dela università. No te podarè seitar a studiar qua se te parli contra un prete che l’è dela banda del governo.”

“Ma, signor, . . . quando te sì drio insegnarne e ghen’è robe che no semo boni de capir, noantri te femo domande, mia vera?”

“Sicuro de si.”

“Signor, l’è pròpio quel che go fato. Quel prete l’era drio insegnar sora la Bìblia, e mi ghe go fato una domanda. Alora, se lu no l’è stà bon de risponderme, parché che mi go de domandarghe scusa?”

Blankson no l’è stà parà via dela università e no’l ga bio de domandar scusa.

La Sentinela la ga dito sora el laoro che gaveino fato in quel ano: “Podemo dir compagno al salmista Davi: ‘Ti te ne darè forsa par la batàlia.’ (Salmo 18:39) Tuti i servi de Geovà i ga predicà le bone notìssie con coraio. Lori i ga predicà con tanta alegria.”

Ancora in quel ano, i fradei i ga dessidio far nantra stassion de ràdio. Alora, i ga fato su una stassion darente de Chicago. Quela stassion la ga ricevesto el nome de WORD, che in inglese la vol dir “parola”. La stassion la ga ricevesto questo nome parché la saria doperada par predicar la Parola de Dio. Quela volta, lori i ga doperà un trasmissor de 5.000 watts. Cossita, le persone de distante le saria bone de scoltar el messàgio del Regno, fin le persone nel nort del Canadà.

Nel ano de 1925, Geovà el ga giutà i so servi a capir tante robe nove sora Apocalisse capìtolo 12. Par causa de questo, arquanti no i ga seità a servir a Geovà. Invesse, altri i ze restadi tanto contenti de capir quel che l’era drio suceder nel cielo e anca nela Tera e come questo l’era importante par el pòpolo de Dio.