STÙDIO 43
CÀNTICO 90 Incoraiarse un al altro
Come che te pol catar risposte ai dubi che te ghè?
“Gavé de esaminar tute le cose.” — 1 TES. 5:21.
COSSA CHE NDAREMO IMPARAR?
Ndaremo veder cossa che te pol far se no te sì mia sicuro che te sì importante par Geovà, se no te sè se adorarlo l’è stà pròpio la meio roba de far o se te pensi che no te fè gnente par Geovà.
1-2. (a) Cossa che arquanti servi de Geovà fursi i se domanda? (b) Cossa che ndaremo imparar in questo stùdio?
NO IMPORTA se semo gióveni o veci, dele volte ne vien dubi e podemo pensar se ghemo fato le meio dessision o se Geovà el ne dà valor. a Par esémpio, pensa nte un gióveno che no l’è mia sicuro se l’è importante par Geovà. Par quela, lu gnancora ga dessidio batesarse. Proa pensar anca nte un fradel che, de gióveno, el ga proà far el so meio nel laoro a Geovà invesse de laorar par ciapar soldi. Ma, adesso, ancora che el sìpia bon de mantegner la so fameia, lu no’l ga mai soldi par altre robe. O pensa nte una sorela che la ze vegnesta pi vècia, che no la ga pi tanta forsa e che la resta disgustada parché no la ze bona de far tuto quel che la fea una volta. Fursi, te te ghè belche fato queste domande: ‘Sarà che Geovà el vede quel che son drio far? Sarà che sforsarme de adorarlo l’è pròpio la meio roba de far? Sarà che ancora posso far qualcossa par Geovà?’
2 Se te pensi qualcossa cossita e no te vè mia in serca dele risposte, la to fede in Geovà la pol restar pi fiaca e pol esser che no te gavarè pi voia de adorarlo. Par quela, in questo stùdio, ndaremo veder testi dela Bìblia che pol giutarne a esser sicuri che: (1) Geovà l’è atento a quel che femo, (2) la dessision de servirlo la ze stata la meio roba che podarìssino far e (3) Geovà el ghe dà valor a quel che te semo boni de far.
COME DÀRGHENE FORA COI DUBI
3. Cossa che te pol far par dàrghene fora coi dubi?
3 Cossa che te pol far par dàrghene fora coi dubi che te ghè? Una roba che te pol far l’è ndar in serca dele risposte nela Parola de Dio. Se te fè cossita, la to amicìssia con Geovà la restarà pi forte e te ‘restarè firme nela fede’. — 1 Cor. 16:13.
4. Come che podemo “esaminar tute le cose”? (1 Tessalonissensi 5:21)
4 Ledi 1 Tessalonissensi 5:21. b La Bìblia la dise che ghemo de “esaminar tute le cose”. Come che podemo esaminarle? Ghemo de proar capir se quel che pensemo l’è compagno a quel che la Bìblia la dise. Par esémpio, quel gióveno che ghemo parlà prima no l’era mia sicuro se lu l’era importante par Geovà. Alora, sarà che saria bon se lu sol seitesse a viver sensa catar le risposte a questo dùbio? Nò! Pitosto, saria tanto meio se lu el capisse cossa che la Bìblia la dise. Alora, lu el ga de studiar la Bìblia par imparar come che Geovà el pensa.
5. Come che te pol “scoltar” quel che Geovà el te dise?
5 Intanto che te ledi la Bìblia, te pol “scoltar” quel che Geovà el te dise. Ma te ghè de far de pi che sol léderla se te vol capir cossa che Geovà el pensa. Alora, sfòrsate de catar fora testi che ndarà giutarte a capir le risposte ale to domande. Una roba che pol giutarte la ze doperar le publicassion che ghemo. (Pro. 2:3-6) Nantra roba che te pol far l’è pregar e domandar che Geovà el te giute a catar fora quel che te ocore. Dopo, te pol ndar in serca de prinsipi dela Bìblia che pol giutarte nele robe che te sì drio infrontar. Anca, te pol studiar sora servi de Geovà del passà che i ze stati boni dàrghene fora con dubi compagni a quei che te ghè.
6. Come che le riunion le pol giutarne a dàrghene fora coi nostri dubi?
6 Te pol scoltar a Geovà anca nele nostre riunion. Alora, se sempre te vè ale riunion, te pol scoltar le risposte ai dubi che te ghè nte un comentàrio o nte una parte. (Pro. 27:17) Adesso, ndemo veder come che podemo dàrghene fora con arquanti dubi.
SARÀ CHE GEOVÀ EL TE VOL BEN?
7. Cossa che fursi pensemo?
7 Gheto belche pensà: ‘Sarà che mi son pròpio importante par Geovà?’ Se te senti che te sì un poro gramo, fursi l’è fadiga pensar che ti te pol esser amigo de Dio, el Creador de tuto el Universo. Anca el rè Davi el ga pensà cossita. Lu l’era pròpio maraveià de capir che Geovà l’è atento a noantri, umani imperfeti. Par quela, lu el ga dito: ‘Ò Geovà, el omo no l’è gnente. Parché che te gavarissi de darghe atension a lu?’ (Sal. 144:3) Alora, ndove che te pol catar la risposta ala domanda: ‘Sarà che mi son importante par Geovà?’
8. De acordo con 1 Samuel 16:6, 7, 10-12, cossa che Geovà el vede nele persone?
8 Varda quel che ga sucedesto quando Geovà el ga mandà Samuel ndar ala casa de Gessè par scòlier quel che el saria el futuro rè de Israel. Gessè el ga ciamà sete dei so fioi, ma no’l ga mia ciamà Davi che l’era el pi gióveno. c Ma l’era stà pròpio Davi che Geovà el gavea scoliesto. (Ledi 1 Samuel 16:6, 7, d 10-12. e) Parché? Parché Geovà el cognossea a Davi e el savea che quel gióveno lo amea tanto. Cossita, capimo che Geovà el vede le robe che par i altri fursi no le ze mia importante.
9. Parché che ti te pol esser sicuro che te sì tanto importante par Geovà? (Varda anca el ritrato.)
9 Come che savemo che semo pròpio importanti par Geovà? Geovà el mostra che el te cognosse tanto ben parché el te dà i meio consili pròpio quando te ocore. (Sal. 32:8; 139:1) E quando ti te li meti in pràtica, te vedi che i ze pròpio boni e che Geovà el te vol tanto ben. (1 Cró. 28:9; Ati 17:26, 27) Lu anca l’è atento a tuto quel che te fè par obedirghe, ale to bele qualità e el vol esser to amigo. (Ger. 17:10) E Geovà el resta tanto contento de veder che anca ti te vol esser so Amigo. — 1 Gio. 4:19.
‘Se te vè in serca de Geovà, te sarè bon de catarlo.’ — 1 Cró. 28:9 (Varda el paràgrafo 9) h
COSSA FAR SE NO TE SÌ SICURO CHE TE GHÈ FATO LE MEIO DESSISION?
10. Cossa che fursi te te domandi quando te pensi nele dessision che te ghè fato nel passà?
10 Dele volte, ti te pol domandarte se le dessision che te ghè fato nel passà le ze state le meio. Fursi te volei far de pi par Geovà e te ghè assà de banda un bel laoro ndove te ciaparissi tanti soldi. Ma adesso, dopo arquanti ani, te vedi quei che no i ga fato compagno a ti, e te par che lori i ga tanti soldi e una bela vita. Par quela, pol esser che te te domandi: ‘Sarà che la dessision de far de pi par Geovà la ze stata pròpio bona? O saria stà meio se mi gavesse laorà de pi par gaver de pi soldi ancoi?’
11. Cossa che el scritor del Salmo 73 l’era drio pensar?
11 Se te sì drio domandarte una roba cossita sarà tanto bel pensarghe sora el Salmo 73. El scritor de questo salmo el ga visto che tante persone che no le servia a Geovà le gavea una bona salute, le era siore e ghe parea che le gavea una bona vita. (Sal. 73:3-5, 12) Lu el ga pensà che el sforso che l’era drio far l’era par gnente. El salmista el gavea ‘dificoltà tuto el giorno’ par causa dei so pensieri. (Sal. 73:13, 14) Ma cossa che lo ga giutà a dàrghene fora con questi bruti sentimenti?
12. De acordo con Salmo 73:16-18, cossa che el salmista el ga fato?
12 Ledi Salmo 73:16-18. f El scritor de questo salmo l’è ndato al témpio de Geovà e l’è stà bon de pensar meio nele dessision che el gavea fato. Lu el ga capio che ancora se quele persone le gavesse una bona vita, lore no le gavea mia una bona speransa par el futuro. Questo lo ga giutà a restar tranquilo e esser sicuro che servir a Geovà la ze la meio dessision che podemo far. Par quela, lu el ga bio coraio e voia de seitar servir a Geovà. — Sal. 73:23-28.
13. Cossa che pol giutarte se te ghè bruti sentimenti par causa dele dessision che te ghè fato? (Varda anca el ritrato.)
13 Cossa che pol giutarte a dàrghene fora con bruti sentimenti? La Parola de Dio. Come? Pensa nele bele robe che te ghè e in quel che le persone no le ga. Par esémpio, pol esser che le persone che no le serve mia a Geovà le gàpia una bela vita ancoi. Ma le robe che lore le ga no ndarà giutarle nel futuro. Invesse, ti te ghè una bela amicìssia con Geovà e te ghè el so aiuto ancoi. E nel futuro, lu el ndarà benedirte tanto de pi de quel che te sì bon de pensar. (Sal. 145:16) Ricòrdate che no ghen’è come saver come saria la to vita se no te gavessi fato tanto par Geovà. Ma te pol esser sicuro che quei che i fà una dessision par amor a Geovà e ai altri sempre i gavarà tanta alegria.
Proa pensar come che sarà la to vita nel Paradiso (Varda el paràgrafo 13) i
COSSA CHE POL GIUTARTE SE TE PENSI CHE NO TE SÌ DRIO FAR GNENTE PAR GEOVÀ?
14. Che dificoltà arquanti servi de Geovà i ga, e cossa che fursi i se domanda?
14 Arquanti servi de Geovà i ga dificoltà parché i ze vegnesti veci, no i ga mia una bona salute o i ze desgrassiadi. Fursi questi cari fradei e sorele no i ze mia sicuri se i ze importanti par Geovà. Par quela, pol esser che lori i se domanda: ‘Sarà che ancora posso far qualcossa par Geovà?’
15. De cossa che el scritor del Salmo 71 l’era sicuro?
15 El scritor del Salmo 71 el ga bio bruti pensieri come questi. Lu el ga dito a Geovà: ‘No stà abandonarme quando la me forsa la se finisse.’ (Sal. 71:9, 18) El salmista l’era sicuro che se el seitesse leal, Geovà el ndaria giutarlo. Lu el ga capio che Geovà el resta pròpio contento con quei che i seita a far el so meio par adorarlo anca cole so dificoltà. — Sal. 37:23-25.
16. Cossa che i pi veci i pol far? (Salmo 92:12-15)
16 Se te sì belche vècio, sfòrsate par capir cossa che Geovà el pensa sora ti. Lu el pol giutarte a seitar leal anca se te ghè qualche dificoltà. (Ledi Salmo 92:12-15. g) Alora, invesse de pensar in quel che no te sì mia bon de far, proa pensar in quel che ti te pol far. Par esémpio, te pol incoraiar i to fradei e sorele quando te ghe dè atension e anca par meso del to esémpio. Te pol spiegarghe come Geovà el te ga giutà in tuta la to vita e anca parlar sora le bele promesse che te sì premoso de veder nel Paradiso. E no stà mia desmentegarte che le to orassion le pol giutar tanto ai altri. (1 Pie. 3:12) Par quela, sìpia sicuro che no importa quel che l’è drio suceder nela to vita, sempre te pol far tanto par Geovà e par i altri.
17. Parché che no ghemo mia de far comparassion intrà noantri e i altri?
17 Se te resti disgustà parché no te sì mia drio far tuto quel che te volei par Geovà, te pol esser sicuro che lu el dà tanto valor a quel che ti te fè. Alora, sfòrsate de mai far comparassion intrà quel che ti te fè e quel che i altri i fà. Parché? Parché Geovà no’l fà mia comparassion. (Gàl. 6:4) Varda due esempi: Maria la ga dato a Gesù un òio profumà tanto caro, e una védova la ga dato sol due pìcole monede nel témpio. (Gio. 12:3-5; Luc. 21:1-4) Cossa che Gesù el ga pensà sora quel che lore le ga fato? Lu no’l ga mia fato comparassion intrà Maria e la védova. Invesse, el ga dito che quele due done le gavea mostrà la so fede. Quel che Gesù el pensa l’è compagno a quel che Geovà el pensa. Par quela, te pol esser sicuro che Geovà el resta tanto contento con tuto quel che te fè par causa del to amor e dela to fede. Lu el resta contento anca quando quel che ti te fè l’è poco.
18. Cossa che pol giutarne a dàrghene fora con qualche bruto pensamento? (Varda anca el quadro “ La Parola de Geovà la pol giutarte a dàrghene fora coi dubi te ghè.”)
18 Come ghemo visto in questo stùdio, dele volte tuti noantri se domandemo se semo pròpio importanti par Geovà, se ghemo fato le meio dessision o se podemo ancora far qualcossa par lu. Ma la Bìblia la pol giutarte a dàrghene fora con qualche bruto pensamento. Alora, sfòrsate de catar le risposte a qualche domanda che te ghè. Sìpia sicuro che Geovà el te cognosse tanto ben e el ghe dà valor a tuto quel che ti te fè. E ricòrdate sempre che Geovà el te ama tanto e che te sì pròpio importante par lu.
CÀNTICO 111 I motivi dela nostra alegria
a PAR CAPIR MEIO: Arquanti i ga dubi sora la so fede in Geovà o nele promesse dela Bìblia. Ma, in questo stùdio, ndaremo imparar sora altri dubi. Par esémpio, pol esser che no semo sicuri che semo importanti par Geovà o se ghemo fato le meio dessision.
b (1 Tessalonissensi 5:21) Gavé de esaminar tute le cose. Gavé de tegnerve in quel che l’è bon.
c Ancora che la Bìblia no la parle quanti ani Davi el gavea quando Geovà ghe ga scoliesto, credemo che lu l’era un giovenoto. — Varda la Sentinela de 1 de setembro de 2011, pàg. 29, par. 2.
d (1 Samuel 1:6,7) Quando lori i ze ndati rento e Samuel el ga visto Eliabe, el ga dito: “Sicuro che l’è lu quel che Geovà el ga scoliesto.” 7 Ma Geovà el ga dito a Samuel: “No stà vardar la so aparensa e gnanca la so altessa, parché mi lo go rigetà. Dio no’l vede le cose come le persone le vede. Le persone le vede la aparensa, ma Geovà el vede el cuor.”
e (1 Samuel 1:10-12) Cossita, Gessè el ga fato che Samuel el cognossesse i so sete fioi. Ma Samuel el ga dito a Gessè: “Geovà no’l ga scoliesto gnanca un de questi qua.” 11 Dopo, Samuel el ga domandà a Gessè: “Gheto mia altri fioi?” Lu el ghe ga dito: “Ghen’è ancora el pi gióveno, che l’è drio tender dele piégore.” Alora, Samuel el ga dito a Gessè: “Manda che qualchedun el vae ciamarlo, parché no ndaremo mia magnar fin che no’l riva.” 12 Alora, Gessè el ga mandà ciamarlo. El gióveno el gavea una bela siera, el gavea bei oci e l’era pròpio bel. Geovà el ga dito: “Eco, l’è lu che go scoliesto! Ti te ghè de untarlo.”
f (Salmo 73:16-18) Quando go proà capir tuto questo, l’è stato tanto fadiga par mi. 17 Ma dopo che son ndato rento del grandioso santuàrio de Dio, go capio el futuro de lori. 18 Sicuro che ti te li meti nte un posto che sbrìssia, cossita lori i ndarà cascar e i sarà destruti.
g (Salmo 92:12-15) Ma i giusti i fiorirà come la palmera e i vegnarà su come el cedro del Lìbano. 13 Lori i ze piantadi nela casa de Geovà. Lori i fiorisse nel cortivo del nostro Dio. 14 Anca quando i vien veci i darà tanti fruti e i seitarà bei e con tanta forsa. 15 Lori i ndarà parlar che Geovà l’è giusto. Lu l’è la me Ròcia, quel che el fà tuto con giustìssia.
