1-2. Cossa che ga sucedesto con due dei dissìpoli dei Gesù intanto che i ndea a Emaùs?

 PENSA sora quel che i dissìpoli de Gesù i era drio sentir in 16 de nisan del ano 33. Prima, lori i pensea che Gesù l’era el Messia e che el ndaria far tante bele robe ai giudei, ma dopo lu l’è morto. Sicuro che quei dissìpoli i era drio sofrir e i gavea tanta paura. Alora, in quel giorno, due de quei dissìpoli i ze ndati de Gerusalen fin Emaùs, che l’era una cità ben pìcola 11 chilòmetri distanti de lì. In quel viaio, ga sucedesto una roba tanto bela che lori no i spetea mia.

² In quel viaio a Emaùs, un omo che i dissìpoli no i cognossea mia el ga scominsià a far el viaio insieme de lori. I dissìpoli ghe ga contà quel che i era drio sentir e le brute robe che gavea sucedesto a Gesù. Alora, quel omo el ga doperà le Scriture de “Moisè fin tuti i Profeti” par spiegarghe parché che Gesù gavea de sofrir e morir. Quando lori tre i ze rivadi a Emaùs, quel omo el ga contà che lu l’era Gesù. Proa pensar come i dissìpoli i ze restadi contenti de saver che Gesù l’era stà ressussità. — Luc. 24:13-35.

3-4. (a) Cossa che ga sucedesto coi dissìpoli dopo che Gesù li ga incoraiadi? (Ati 1:3) (b) Cossa che ndaremo imparar in questo stùdio?

³ Dopo che Gesù l’è stà ressussità, lu l’è restà ancora 40 giorni qua nela Tera. (Ledi Ati 1:3. a) In questi 40 giorni, lu el se ga fato veder arquante volte ai so dissìpoli che i era tanto desanimadi e spauradi. Ma par causa de quel che Gesù el ga fato par incoraiarli, quei dissìpoli i ga bio el coraio, la alegria e la forsa che ghe ocorea  par seitar a predicar e insegnarghe le bone notìssie del Regno. b

⁴ Noantri podemo imparar tanto de quel che Gesù el ga fato in quei 40 giorni dopo esser ressussità. In questo stùdio, ndaremo veder come lu el ga doperà questo tempo (1) par incoraiar i so dissìpoli, (2) par giutarli a capir meio le Scriture, e (3) par pareciarli par el grando laoro che i gavaria pi avanti. Noantri anca ndaremo veder come che podemo far compagno el esémpio de Gesù.

INCORAIA I ALTRI

5. Parché che i dissìpoli de Gesù i era desanimadi e i gavea bisogno de aiuto?

⁵ I dissìpoli de Gesù i era tanto desanimadi e i gavea bisogno de aiuto. Parché? Parché tanti de lori i gavea assà indrio la so casa, la so fameia e el so laoro par ndar drio a Gesù. (Mat. 19:27) Altri i era drio sofrir tanto dopo che i ze deventadi dissìpoli de Gesù parché le persone li tratea mal par causa dela so dessision. (Gio. 9:22) Lori i gavea fato tuti questi cambiamenti nela so vita parché i credea che Gesù l’era el Messia. (Mat. 16:16) Ma, quando Gesù l’è morto, lori i ga perso la so speransa e i ze restadi tanto desanimadi.

6. Cossa che Gesù el ga fato quando l’è stà ressussità?

⁶ Gesù el capia che i so dissìpoli i era drio sofrir par causa dela so morte e che no i era disgustadi parché ghe manchea fede. Alora, nel medèsimo giorno che l’è stà ressussità, lu el ga scominsià a incoraiar i so cari amighi. Par esémpio, lu el se ga fato veder a Maria Madalena intanto che la piandea nela so tomba. (Gio. 20:11, 16) Lu anca el se ga fato veder a quei due dissìpoli che ghemo imparà nel scomìnsio de questo stùdio e dopo al apòstolo Piero. (Luc. 24:34) Cossa che podemo imparar de quel che Gesù el ga fato? Prima, ndemo imparar sora quel che ga sucedesto quando Gesù el se ga fato veder a Maria Madalena.

7. (a) De acordo con Gioani 20:11-16, cossa che Maria Madalena la ga fato nel giorno 16 de nisan? (b) Cossa che Gesù el ga fato par consolar Maria Madalena? (Varda anca la ilustrassion.)

⁷ Ledi Gioani 20:11-16. c Nela matina del giorno 16 de nisan, arquante done fedele le ze ndate fin la tomba de Gesù. (Luc. 24:1, 10) Ndemo veder quel che ga sucedesto con una de queste done de nome Maria Madalena. Quando la ga visto che la tomba la era voda, ela la ze ndata  svelta contarghelo a Piero e Gioani. Alora, tuti lori i ze ndati de carera fin la tomba de Gesù. Ma quando i ga visto che la era voda, Piero e Gioani i ze ndati via. Invesse, Maria la ze restada lì e la ga tacà piander. Ela no la savea mia, ma Gesù l’era drio vardarla e el ga volesto consolarla. Par quela, lu el se ga fato veder a Maria par incoraiarla e el ghe ga domandà de contarghe ai altri che lu l’era stà ressussità. — Gio. 20:17, 18.

8. Come che podemo far compagno a Gesù?

⁸ Come che podemo far compagno a Gesù? Compagno a lu, ghemo de star atenti a quel che i nostri fradei i ze drio infrontar, scoltarli con atension, capir i so sentimenti e incoraiarli a seitar a servir a Geovà. Varda cossa che ga giutà una sorela de nome Jocelyn, dopo che so sorela la ze morta de colpo. Ela la ga dito: “Mi son restada pròpio desanimada e sensa forsa par ndar avanti par mesi.” Ma un fradel e la so dona la ga convidada par ndar ala so casa. Lori la ga scoltada con atension, i ze stati boni de capir come la se sentia e la ga assada sicura che Geovà el ghe vol tanto ben. Dopo, Jocelyn la ga dito: “Mi ero tanto desanimada che me parea de esser nel mar in meso un bruto temporal. Ma sento che Geovà el ga doperà quei fradei par salvarme. Lori i me ga giutà a gaver forsa de seitar servir a Geovà.” Se scoltemo con atension i nostri cari fradei e se proemo capir quel che i sente, anca noantri saremo boni de darghe consolo e giutarli a seitar a servir a Geovà. — Rom. 12:15.

GIUTA I ALTRI A CAPIR LA BÌBLIA

9. Cossa che i dissìpoli de Gesù no i era boni de capir, e come che Gesù li ga giutadi?

⁹ I dissìpoli de Gesù i credea in quel che le Scriture le disea e i se sforsea de obedir a Geovà. (Gio. 17:6) Ma lori no i era boni de capir parché che Gesù l’era stà morto come un criminoso. Gesù el savea che so dissìpoli i amea a Geovà e i gavea una forte fede, ma lu anca el ga visto che ghe ocorea aiuto par capir le Scriture. (Luc. 9:44, 45; Gio. 20:9) Alora, lu li ga giutadi a capir meio quel che i ledea nela Parola de Dio. Vedemo adesso come che lu el ga giutà quei due dissìpoli che i era drio ndar a Emaùs.

10. Come che Gesù el ga giutà i so dissìpoli a capir che lu l’era el Messia? (Luca 24:18-27)

¹⁰ Ledi Luca 24:18-27. d Invesse de suito dirghe a quei due dissìpoli chi che lu l’era, Gesù el ghe ga fato domande. Parché? Parché lu el volea saver cossa che lori i era drio pensar e sentir. Dopo de scoltarli, Gesù el ga capio che lori i spetea che el Messia el deventesse rè de Israel e che li liberesse del governo de Roma. Alora, lu el ga doperà le Scriture par spiegarghe a quei due dissìpoli che gavea sucedesto tante  professie. e Pi tardi, in quel giorno, Gesù el ga giutà anca altri dissìpoli a capir meio queste professie. (Luc. 24:33-48) Cossa che podemo imparar de quel che Gesù el ga fato?

11-12. (a) Cossa che imparemo dela maniera che Gesù el insegnea la verità dela Bìblia ai altri? (Varda anca la ilustrassion.) (b) Come che un fradel el ga giutà Nortey a far le meio dessision?

¹¹ Come che podemo far compagno a Gesù? Quando semo drio insegnarghe la Bìblia ai nostri studianti, podemo farghe domande par capir quel che lori i ze drio pensar e sentir. (Pro. 20:5) Dopo che ghemo capio quel che i sente podemo mostrarghe come catar testi che i ndarà giutarli in quel che ghe ocore. Invesse de dirghe cossa i ga de far, ghemo de giutarli a pensarghe sora i testi che i ze drio leder e come che i pol meterli in pràtica nela so vita. Varda quel che ga sucedesto con un fradel de Gana de nome Nortey.

¹² Nortey el ga scominsià a studiar la Bìblia quando el gavea 16 ani. Ma, poco tempo dopo, la so fameia la ga scominsià a vegnerghe contra. Cossa che lo ga giutà a seitar a studiar la Bìblia? El fradel che ghe insegnea la Bìblia el ga mostrà Mateo capìtolo 10 e el ghe ga spiegà che i servi de Geovà i saria perseghidi. Nortey el ga dito: “Alora, quando go scominsià a infrontar perseghission, mi son restà sicuro che gavea catà la verità.” Quel fradel anca el ghe ga mostrà Mateo 10:16 che dise che ghemo de star atenti. Lu el ga giutà Nortey a saver spiegar quel che lu el credea dela Bìblia ala so fameia con rispeto. Dopo che Nortey el se ga batesà, lu volea esser un pioniero, ma so pare el volea che lu el fesse la università. El fradel che ghe ga insegnà la Bìblia no’l ga mai dito cossa che lu el gavea de far. Invesse, lu el ghe ga mostrà testi dela Bìblia che ndaria giutarlo a far la dessision giusta. Alora, Nortey el ga dessidio deventar un pioniero. Par quela, so pare lo ga parà via de casa. Anca cossita, Nortey el ga dito: “Mi son sicuro che go fato la meio dessision.” Cossita, imparemo che quando giutemo i altri a pensarghe sora i testi dela Bìblia prima de far una dessision, li giutemo a far pi forte la so fede e a seitar servir a Geovà. — Efe. 3:16-19.

PARECIA I FRADEI PAR TENDER DELE RESPONSABILITÀ NELA CONGREGASSION

13. Come che Gesù el ga giutà i so dissìpoli vanti de ndar al cielo? (Efesi 4:8)

¹³ Quando Gesù l’era qua nela Tera, lu el ga fato de maniera perfeta el laoro che Geovà el  ghe gavea dato. (Gio. 17:4) Ma podemo esser sicuri che lu no’l ga mai pensà: ‘Se te vol una roba ben fata toca farla ti’. Parché che podemo dir questo? Parché nei tre ani e meso che Gesù el ga predicà, lu el ga parecià altri par far questo laoro. E prima de ndar al cielo, lu el ga dato ai so dissìpoli el laoro de predicar e insegnar. Pol esser che arquanti de lori no i gavea gnanca 30 ani. (Ledi Efesi 4:8. f) Sicuro che questi fradei i gavea belche giutà tanto a Gesù e i era leai a lu. Ma in quei 40 giorni, Gesù ghe ga insegnà robe che li ga giutadi a deventar come che ‘presente de Dio’. Come che Gesù el ga parecià questi òmini? — Efesi 4:8.

14. Come che Gesù el ga giutà i so dissìpoli a far ancora pi forte la so fede? (Varda anca la ilustrassion.)

¹⁴ Quando i dissìpoli i gavea bisogno de cambiar qualcossa, Gesù sempre el ghe dea consili con amor. Par esémpio, quando arquanti dei so dissìpoli no i era pròpio sicuri che lu l’era stà ressussità, lu el ghe ga dato boni consili par esser sicuri che questo gavea pròpio sucedesto. (Luc. 24:25-27; Gio. 20:27) Lu el ghe ga dito che i gavaria de doperar de pi tempo par tender de altri fradei invesse de laorar par imuciar su soldi. (Gio. 21:15) Lu anca el ga dito che i so dissìpoli i gavea de star atenti de mai far comparassion in quel che cada un l’era drio far a Geovà. (Gio. 21:20-22) E Gesù li ga giutadi a capir meio la verità del Regno e a sforsarse de pi nela predicassion dele bone notìssie. (Ati 1:6-8) Come che i ansiani i pol far compagno a Gesù?

15-16. (a) Come che i ansiani i pol far compagno a Gesù? Spiega. (b) Come che boni consili i ga giutà Patrick?

¹⁵ Come che i ansiani i pol far compagno a Gesù? Lori i ga de insegnarghe e pareciar altri fradei par far de pi nela congregassion, anca quei pi gióveni. g I ansiani no i ga de spetar che i fradei che i ze drio insegnarghe i sìpia perfeti. Se lori i ghe dà consili con amor, questi gióveni i podarà imparar a esser ùmili, persone de fidarse e i sarà sempre pronti par giutar i altri. — 1 Tim. 3:1; 2 Tim. 2:2; 1 Pie. 5:5.

 ¹⁶ Varda come boni consili ga giutà un fradel de nome Patrick. Quando lu l’era pi gióveno, dele volte lu l’era meso rugno coi fradei e anca cole sorele. Alora, un ansiano el ga dito a Patrick quel che el gavea de cambiar e el ghe ga dato boni consili. Patrick el ga dito: “Mi resto tanto contento che quel ansiano el ga dito quel che mi gavea de cambiar. Mi restea disgustà quando vedea che qualchedun el gavea ricevesto un laoro che mi volea. Ma quel consìlio el me ga giutà a veder che me tochea esser pi ùmili e servir ai me fradei invesse de preocuparme de gaver altre responsabilità.” Patrick el ga cambià quel che ghe ocorea e l’è deventà ansiano quando el gavea 23 ani. — Pro. 27:9.

17. Come che Gesù el ga mostrà che el se fidea nei so dissìpoli?

¹⁷ Gesù el ga dato ai so dissìpoli el laoro de predicar le bone notìssie e de spiegarghe le Scriture ale persone. (Mateo 28:20) h Pol esser che i dissìpoli i pensea che no i saria boni de far tuto quel che Gesù ghe gavea domandà. Ma Gesù l’era sicuro che lori i saria boni! Lu el ga mostrà che el se fidea nei so dissìpoli quando el ga dito: ‘Cossita come el pare el me ga mandà, mi son drio mandarve.’ — Gio. 20:21.

18. Come che i ansiani i pol far compagno a Gesù?

¹⁸ Come che i ansiani i pol far compagno a Gesù? Quando i ansiani i ze drio insegnarghe un fradel, lori i pol darghe laori de far. (Fil. 2:19-22) Par esémpio, i ansiani i pol domandar che un fradel gióveno el giute a netar e a rangiar su el Salon del Regno. E quando un ansiano el ghe dà a un gióveno un laoro de far, lu el ga de insegnarghe e mostrar che el se fida che el gióveno el sarà bon de farlo. Un ansiano de nome Matthew el resta tanto contento parché i ansiani i ghe ga insegnà a far arquanti laori e i se ga fidà che lu el saria bon de farli. Lu el ga dito: “Quando mi fea sbali, i ansiani i me giutea a veder quel che gavea de cambiar e come che podaria far meio quel laoro.” i

19. Cossa che ghemo de sforsarse de far?

¹⁹ Prima de ndar al cielo, Gesù el ga doperà i so ùltimi 40 giorni qua nela Tera par incoraiar e insegnar i altri. Alora, noantri ghemo de sforsarse del tuto par far compagno a lu. (1 Pie. 2:21) E podemo esser sicuri che Gesù el ndarà giutarne parché el ga dito: ‘Mi sarò con valtri tuti i giorni fin che se finisse questo sistema de robe.’ — Mat. 28:20.