1. Che bele robe Gesù el ga fato par noantri?

 GESÙ l’è stà el omo che ga fato de pi par giutar i altri. Quando l’era qua nela Tera, lu el ga doperà el so poder par far miràcoli e giutar tante persone. (Luc. 9:12-17) Lu el ne ga dato el presente pi grando che el podea darne, che l’è stà la so vita. (Gio. 15:13) Dopo dela so ressuression, Gesù el ga seità a giutarne. Come lu el gavea prometesto, el ga domandà a Geovà spìrito santo par giutarne e consolarne. (Gio. 14:16, 17; 16:13) E, par meso dele nostre riunion, Gesù el seita a darne quel che ghemo de bisogno par insegnar ale persone de tuto el mondo sora la Bìblia e far dissìpoli. — Mat. 28:18-20.

2. Chi che i ze intrà i ‘òmini che i ze come presenti’? (Efesi 4:7, 8?)

² Vedemo nantra bela roba che Gesù el ne ga dato. El apòstolo Paolo el ga scrito che dopo che Gesù l’è ndato al cielo, “lu el ga dato òmini come presente”. (Ledi Efesi 4:7, 8. a) Paolo el ga spiegà che Gesù el ga dato questi presenti par giutar le congregassion de tante maniere. (Efe. 1:22, 23; 4:11-13) Ancoi, questi òmini i ze i servi ministeriai, i ansiani e i superintendenti de sircuito. b L’è vera che lori no i ze mia perfeti e i fà sbali, ma Gesù li dopera par giutarne. (Tia. 3:2) Questi òmini i ze pròpio un presente par noantri.

3. Cossa che pol giutarne a capir meio el laoro dei servi ministeriai, ansiani e superintendenti?

³ Gesù el ga dato a questi òmini el laoro de far pi forte le congregassion.  (Efe. 4:12) Ma anca tuti noantri podemo giutarli. Par capir meio, proa pensar nel laoro par far su un Salon del Regno. Arquanti i giuta a far su la fondassion, le parede e el coerto. E ghen’è de quei che no i ze mia drio far questi laori, ma i giuta a farghe de magnar, portar matoni e altre robe par far su el Salon. Dela medèsima maniera, par meso de quel che disemo e femo, mostremo che giutemo i servi ministeriai, i ansiani e i superintendenti de sircuito. Adesso, ndemo veder come lori i ne giuta e come che podemo mostrar a lori e a Gesù che ghe volemo tanto ben.

I SERVI MINISTERIAI I GIUTA I ALTRI

4. De che maniera i servi ministeriai i giutea i altri nel primo sècolo?

⁴ Nel primo sècolo, arquanti fradei i era scoliesti par esser servi ministeriai. (1 Tim. 3:8) Pol esser che lori i era i fradei che Paolo el ga dito che i giutea i altri. (1 Cor. 12:28) I servi ministeriai i fea tanti laori importanti par giutar i ansiani a doperar el so tempo par insegnar e incoraiar i fradei. Par esémpio, i servi ministeriai i giutea a far le còpie dele Scriture o i comprea le robe che ghen’era bisogno par far queste còpie.

5. Che laori importanti i servi ministeriai i fà ancoi?

⁵ Ndemo veder arquante robe che i servi ministeriai i fà nele congregassion ancoi. (1 Pie. 4:10) Lori i tende dele conte e dei teritori dela congregassion. Lori i domanda le publicassion par i predicadori, i tende del àudio e vìdeo nele riunion, i ze indicadori e i giuta a rangiar Saloni del Regno. Tuto quel che lori i fà giuta i fradei a gaver bele riunion e a gaver tuto quel che ghe ocore par la predicassion. (1 Cor. 14:40) E arquanti servi ministeriai i fà parte nele riunion in meso la stimana e discorsi nel fin de stimana. Un servo ministerial el pol anca giutar un ansiano a tender de un grupo de predicassion. Dele volte, un ansiano e un servo ministerial i pol ndar insieme visitar e incoraiar i fradei.

6. Cossa che arquanti i ga dito sora el bel laoro che i servi ministeriai i fà?

⁶ Cossa che arquanti i ga dito sora el bel laoro dei servi ministeriai? Beberli, c una sorela dela Bolìvia, la ga dito: “Par causa de quel che i servi ministeriai i fà, noantri ghemo bele riunion. Mi posso cantar, far comentari, scoltar i discorsi e imparar tanto dei vìdei e dele ilustrassion. I servi ministeriai i protege quei che i ze nele riunion e i giuta quei che i ze drio vardarla par la internet. Dopo la riunion, lori i giuta a netar el Salon, i giuta nele conte e i ne dà publicassion par la predicassion quando ne ocore. Mi ghe dao tanto valor al so laoro.” Lesli, che la ze de star nela Colómbia, la ga dito: “El me omo l’è ansiano e el ga tanto bisogno del aiuto dei servi ministeriai. Sensa lori, lu el gavaria massa laori de far. Alora, mi ringràssio tanto questi òmini che i vol sempre giutarne.” L’è cossita che tuti noantri pensemo sora i servi ministeriai. — 1 Tim. 3:13.

7. Come che noantri podemo mostrar che ghe demo valor ai servi ministeriai? (Varda anca la ilustrassion.)

⁷ Anca se noantri semo contenti col laoro che i servi ministeriai i fà, la Bìblia la ne incoraia a ‘mostrar che semo grati’. (Col. 3:15) Varda come che Cristofe, un ansiano dela Finlàndia, el mostra che l’è grato: “Mi mando cartoni o messagi par ringrassiar i servi ministeriai. Me piase scriverghe un testo o dirghe come quel che i ga fato me ga incoraià.” Pascal e Jael che i ze de star in Nova Caledònia i prega sempre par i servi ministeriai. Pascal el ga dito: “Ghemo sempre el costume de pregar par i servi ministeriai. Ringrassiemo a Geovà par lori e ghe domandemo che li giute.” Semo  sicuri che Geovà el scolta queste orassion e el benedisse tuta la congregassion. — 2 Cor. 1:11.

I ANSIANI “I LAORA TANTO”

8. Parché che Paolo el ga scrito che i ansiani del primo sècolo ‘i laorea tanto’? (1 Tessalonissensi 5:12, 13)

⁸ I ansiani del primo sècolo i laorea tanto nele congregassion. (Ledi 1 Tessalonissensi 5:12, 13; d 1 Tim. 5:17) Lori i ‘liderea’ la congregassion. Come cossita? I ansiani i fea dessision insieme e anca i fea le riunion. Lori anca ghe dea ‘consili’ amorosi ai fradei e ale sorele e li giutea a far pi forte la so amicìssia con Geovà. (1 Tes. 2:11, 12; 2 Tim. 4:2) L’è sicuro che questi òmini anca i laorea tanto par mantegner la so fameia e par far la so amicìssia con Geovà sempre pi forte. — 1 Tim. 3:2, 4; Tito 1:6-9.

9. Che laori i ansiani i ga ancoi?

⁹ Ancoi, i ansiani i ga tanti laori de far. El laoro pi importante par lori l’è de esser pastori. (1 Pie. 5:1-3) Lori i parecia ben i discorsi, i se sforsa de cognosser a tuti nela congregassion e i fà vìsite par incoraiar i fradei. Lori anca i ga el laoro de predicar. (2 Tim. 4:5) I ansiani i dà un bon esémpio quando i predica con zelo, i organisa el laoro de predicassion e i ne giuta a predicar e a insegnar meio. Lori anca i ga el laoro de esser giuisi. Lori i fà questo laoro con giustìssia e bontà. Quando un fradel el fà un pecato, i ansiani i se sforsa de giutarlo a gaver nantra volta una forte amicìssia con Geovà e i resta atenti par mantegner la congregassion neta. (1 Cor. 5:12, 13; Gàl. 6:1) Arquanti ansiani anca i giuta a far su e a rangiar Saloni del Regno e a organisar congressi e assemblee. Arquanti i fà parte dela Comission de Contato coi Ospedai e altri i fà vìsite ai fradei maladi. I ansiani anca i fà tanti altri laori. Sicuro che questi bravi fradei i laora tanto par giutarne!

10. Parché che noantri ghe demo tanto valor a tuto quel che i ansiani i fà?

¹⁰ Geovà el ne gavea belche dito che pastori i tenderia de noantri e che ‘no gavarìssino paura gnanca ndarìssino restar spaventadi’. (Ger. 23:4) L’è pròpio questo che Johanna, una sorela dela Finlàndia, la ga sentio dopo che so mare la ga bio una bruta malatia. Ela la ga dito: “Par mi, no l’è mia fàcile parlar dei me sentimenti coi altri. Ma, un ansiano che mi no cognossea tanto ben el me ga scoltà con passiensa, el ga pregà insieme de mi e el me ga assà sicura che Geovà el me ama. Mi no mi ricordo pròpio giusto quel che lu el me ga dito. Ma me ricordo che me go sentio tanto pi tranquila. Son sicura che Geovà lo ga mandà par giutarme pròpio nela ora giusta.” Come che i ansiani dela to congregassion i te ga belche giutà?

11. Come che noantri podemo mostrarghe ai ansiani che ghe demo valor a tuto quel che i fà? (Varda anca la ilustrassion.)

¹¹ Geovà el vol che noantri mostremo che ghe demo valor al laoro che i ansiani i fà. (1 Tes. 5:12, 13) Henrietta, che la ze de star nela Finlàndia, la ga dito: “I ansiani i giuta i altri de volentiera. Ma questo no vol mia dir che lori i ga de pi tempo o de pi forsa che i altri. Gnanca vol dir che lori no i ga mia problemi nela so vita. Par quela, dele volte, mi ghe digo: ‘Seto una roba? Mi vui pròpio che te sàpia che ti te sì un bravo ansiano.’” Una sorela dela Turchia, de nome Sera, la ga dito: “I ansiani i ga bisogno de incoraiamento par ndar avanti e far el so laoro. Alora, podemo scriverghe  un carton, convidarli par magnar casa nostra o ndar insieme a lori nela predicassion.” Ghen’è un ansiano che l’è drio laorar tanto par giutar i fradei dela congregassion? Alora, móstraghe che te sì grato par tuto quel che lu el fà. — 1 Cor. 16:18.

I SUPERINTENDENTI DE SIRCUITO I FÀ PI FORTE LE CONGREGASSION

12. Cossa ancora Gesù el ga fato par incoraiar le congregassion nel primo sècolo? (1 Tessalonissensi 2:7, 8)

¹² Gesù anca el gavea scoliesto arquanti òmini par giutar la congregassion de nantra maniera. Lu el ga mandà Paolo, Barnabè e altri come superintendenti par visitar le congregassion. (Ati 11:22) Compagno i servi ministeriai e i ansiani, questi superintendenti i fea pi forte le congregassion. (Ati 15:40, 41) No l’era mia fàcile far questo laoro, e dele volte, fin i riscea la so vita par insegnar e incoraiar i altri. — Ledi 1 Tessalonissensi 2:7, 8. e

13. Parla de arquanti laori che i superintendenti de sircuito i fà.

¹³ Ancoi, i superintendenti de sircuito i ga de viaiar tanto. Dele volte, i va tanto distante par catar le congregassion. Tute le stimane, i superintendentI i fà arquanti discorsi, vìsite par incoraiar i fradei, la riunion par i pionieri, la riunion par i ansiani e le riunion par la predicassion. Lori anca i parecia discorsi e i organisa le assemblee de sircuito e i congressi. Altre robe che i fà le ze insegnar i fradei nele scole de pionieri e organisar le riunion spessiai coi pionieri del sircuito. Dele volte, Betel  ghe domanda de far anca altri laori importanti ben svelto.

14. Parché che noantri ghe demo tanto valor a quel che i superintendenti de sircuito i fà?

¹⁴ Come che el laoro dei superintendenti de sircuito giuta le congregassion? Un fradel dela Turchia, el ga dito: “Sempre che el superintendente el ne vìsita, mi go ancora de pi voia de doperar de pi tempo par giutar i me fradei e sorele. Mi go bio tanti superintendenti, ma gnanca un de lori el me ga fato sentir che no’l gavea tempo de scoltarme.” Johanna, che ghemo parlà vanti, la ze ndata ala predicassion col superintendente de sircuito. Anca se no i ga catà nissun casa, ela la ga dito: “Ancora cossita, mi me ricordo de quel giorno. Me sorele le gavea pena cambià par nantro posto e le me manchea tanto. Alora, el superintendente el me ga incoraià e el me ga giutà a veder che, quando femo le robe par Geovà, pol esser che restemo distanti dela nostra fameia. Ma ze par poco tempo, parché nel novo mondo, saremo tuti insieme.” Sicuro che anca noantri se ricordemo de quando un superintendente de sircuito el ne ga giutà. — Ati 20:37–21:1.

15. (a) De acordo con 3 Gioani 5-8, come che podemo mostrar che ghe demo valor ai superintendente de sircuito? (Varda anca el ritrato.) (b) Parché che ghemo de mostrar che ghe demo valor anca ale done dei òmini che i fà tanto nela congregassion, e come che podemo farlo? (Varda el quadro “ Ricordeve dele so done”.)

¹⁵ El apòstolo Gioani el ga incoraià Gaio a ricever ben i fradei che i era ndati lì par incoraiar le congregassion e che li giutesse con quel che ghe ocorea par far un bon viaio. (Ledi 3 Gioani 5-8. f) Noantri podemo far compagno quando convidemo un superintendente de sircuito par magnar insieme. Nantra roba che podemo far l’è ndar ale riunion par la predicassion nela stimana dela vìsita. Varda quel che Lesli, che ghemo parlà vanti, la fà par  mostrar che la ghe dà valor ai superintendenti: “Mi prego che Geovà el ghe dae tuto quel che lori i ga de bisogno. Mi e me omo ghemo scrito carte par dirghe che le so vìsite le ne giuta tanto.” Ghemo de ricordarse che i superintendenti de sircuito anca i ga le so dificoltà e i resta strachi. Dele volte, lori i ga ansietà e i resta maladi e desanimadi. Fursi una pìcola roba che disemo o femo pol esser una risposta ale so orassion. — Pro. 12:25.

GHEMO BISOGNO DE PI FRADEI PAR GIUTARNE

16. Cossa che tuti i fradei i gavaria de domandarse? (Proverbi 3:27)

¹⁶ In tuto el mondo, ghemo bisogno de fradei che i laore come ‘presenti de Geovà’. Alora, se te sì un fradel belche batesà, sito bon de giutar anca ti? (Ledi Proverbi 3:27. g) Sarà che te podarissi sforsarte par esser un servo ministerial? Se te sì belche un servo ministerial, sarà che te podarissi esser un ansiano e giutar ancora de pi i fradei? h O sarà che te podarissi cambiar qualcossa nela to vita par esser bon de far la Scola par Vangelisadori? Sicuro che, dopo questa scola, Geovà el ndarà doperarte ancora de pi par giutar i fradei. Ma, se te pensi che no te sì gnancora bon de farla, prega a Geovà. Col so aiuto, te sarè bon de far qualche laoro par lu. — Luc. 11:13; Ati 20:28.

17. Cossa che Gesù el mostra par meso dei bravi fradei che el ga scoliesto par tender dele congregassion?

¹⁷ I bravi fradei che Gesù el ga scoliesto “come presenti” par le congregassion i mostra che lu l’è drio tenderne in questi ùltimi giorni. (Mat. 28:20) Restemo tanto contenti de gaver un Rè che el ne ama tanto, che ne giuta con quel che ne ocore e che el dopera bravi fradei par giutarne. Alora, sfòrsate par mostrar che te ghe dè valor al laoro de questi fradei. E ricòrdate de sempre ringrassiar a Geovà, che l’è quel che ne dà “tuti i presenti boni e perfeti”. — Tia. 1:17.