Par ndar rento el Santo del témpio, ghe tochea passar nte un pòrtico. La Tradução do Novo Mundo da Bíblia Sagrada tradusia prima de 2023 la dise che ‘el pòrtico l’era largo compagno el témpio’, o sia ‘20 cóvadi’, e che ‘l’era alto 120’. (2 Cró. 3:4) Anca ghen’è nantra tradussion dela Bìblia la dise che el pòrtico l’era alto ‘120 cóvadi’, o sia, 53 metri.

Ma, la Tradução do Novo Mundo de 2023 dise che el pòrtico del témpio de Salomon l’era ‘alto 20 cóvadi’, o sia, intorno de 9 metri. a Varda parché che ghemo cambià questa informassion.

In 1 Rè 6:3, no ghen’è scrito quanto alto l’era el pòrtico. In questo versìcolo, Geremia el parla quanto largo e longo l’era el pòrtico, e nò quanto alto che l’era. E nel capìtolo dopo, lu el parla sora arquante robe che ghen’era nel témpio. Par esémpio, lu el ga parlà sora el mar de metal fundio, dei diese careti e dele due colone de rame davanti el pòrtico. (1 Rè 7:15-37) Alora, se el pòrtico l’era alto de pi de 50 metri e el fusse tanto pi grando che el témpio, parché che Geremia no’l ga mia parlà sora questo? Dopo tanti ani, arquanti studiosi giudei i ga dito che el pòrtico no l’era pi alto che el témpio de Salomon.

Studiosi i ga dito che le parede del témpio no le podaria tegner un pòrtico de 120 cóvadi. Nel passà, le persone le fea costrussion pròpio grande de sassi e matoni, come par esémpio, i portoni del Egito. Come queste costrussion le era pròpio alte, lori i fea una base ben larga par tegner su le parede. Ma el témpio de Salomon no l’era mia cossita. Arquanti studiosi i ga dito che le parede del témpio no le era larghe de pi de 6 cóvadi, o sia, no le gavea gnanca 3 metri. Un studioso de nome Theodor Busink el ga dito: “Come le parede del pòrtico no le era mia tanto larghe, el pòrtico no’l podaria esser alto 120 cóvadi.”

El testo de 2 Cróniche 3:4 fursi l’e sta copià de una maniera sbaliada. In arquanti testi scriti a man del passà, ghen’è scrito “120” cóvadi. Ma, altri testi antighi i dise che el pòrtico l’era alto 20 cóvadi. Par esémpio, ghen’è scrito “20 cóvadi” nel còdisse Alessandrino che l’è stà scrito nel 5 sècolo e nel còdisse Ambrosiano che l’è stà scrito nel sesto sècolo. Ma parché che quei che i ga fato queste còpie i ga fato un sbàlio cossita? Parché nel Ebraico le parole “sento” e “cóvadi” le se someia tanto. Alora saria tanto fàcile che i scrivesse “sento e vinte” invesse de “vinte cóvadi”.

L’è vera che l’è importante capir le informassion giuste sora quanto grando l’era el témpio. Ma ghemo de ricordarse che la roba pi importante la ze che questo témpio el rapresenta el grando témpio spiritual. Sicuro che restemo tanto contenti de saver che Geovà el ne ga assà adorarlo in questo témpio! — Ebr. 9:11-14; Apo. 3:12; 7:9-17.