1-2. De acordo con Eclesiasti 11:6, cossa che Geovà el vol che femo?

IN ARQUANTI paesi, tante persone le ghe piase de scoltar le bone notìssie e anca le vol imparar de pi. Quel che noantri predichemo l’è pròpio quel che lore le ga de bisogno! Ma, in altri paesi, le persone no le vol imparar sora Dio o la Bìblia. Come che le persone le ze nel to teritòrio? Pol esser che lore no le vol imparar sora la Bìblia, ma Geovà el vol che seitemo predicar fin che el dise che no bisogna pi.

² Geovà el ga belche dessidio fin quando ghemo de predicar e quando che “vegnarà el fin”. (Mat. 24:14, 36) Ma, fin questo suceder come che podemo obedir ala òrdine: “No stà fermarte”? * — Ledi Eclesiasti 11:6. *

3. Cossa che ndaremo imparar?

³ El primo stùdio el ga parlà de quatro robe che qualchedun el ga de bisogno par esser un bon ‘pescador de òmini’. (Mat. 4:19) In questo stùdio, ndaremo veder tre robe che le ne giutarà a gaver ancora pi voia de predicar, no importa quel che infrontemo. Ndaremo imparar parché che l’è importante (1) seitar meter la predicassion in primo posto nela nostra vita, (2) esser passienti e (3) gaver una forte fede.

4. Parché che ghemo de seitar meter la predicassion in primo posto nela nostra vita?

⁴ Nela època de Noè, le persone le era preocupade sol cole so robe e par quela no le ga scoltà quel che Noè el ga parlà. (Mat. 24:37-39; 2 Pie. 2:5) Gesù el ga dito che nei ùltimi giorni, le persone seitaria preocuparse cole robe dela vita, come quele dela època de Noè. Lu el savea che queste robe le podaria intrigar i so dissìpoli de star atenti e far el laoro de predicassion. L’è par quela che lu el ghe ga dito: ‘Sté atenti.’ (Mat. 24:42) Ancoi, le persone anca le seita preocuparse cole so robe. Alora, ghemo de star atenti e seitar a meter la predicassion in primo posto.

5. De acordo con Ati 1:6-8, ndove che le bone notìssie le saria predicade?

⁵ Gesù el ga dito che dopo dela so morte, le bone notìssie le saria predicade a tante persone. (Gioani 14:12) Dopo che Gesù l’è morto, arquanti dei so dissìpoli i ga ritornà a laorar cola pesca. Dopo che lu l’è stà ressussità, i dissìpoli i ga ciapà tanti pessi par meso de un miràcolo. Alora, Gesù el ga mostrà ai so dissìpoli che pescar òmini l’era el laoro pi importante che ghen’era. (Gioani 21:15-17) Poco vanti de lu ndar al cielo, Gesù el ga dito ai so dissìpoli che la predicassion la saria fata fin la parte pi distante dela tera. (Ledi Ati 1:6-8. *) Dopo de un tempo, Gioani el ga bio una vision de quel che ndaria suceder nel “giorno del Signor”. * In questa vision, lu el ga visto un àngelo che el gavea “bone notìssie eterne” par predicar in “cada nassion, tribo, léngua e pòpolo”. (Apo. 1:10; 14:6) La predicassion del Regno l’è el  laoro pi importante par noantri. Alora, volemo sforsarse par predicar fin che questo laoro el se finisse.

6. Cossa che pol giutarne a seitar meter la predicassion in primo posto nela nostra vita?

⁶ Quando pensemo in tuto quel che Geovà l’è drio far par noantri, ghemo ancora pi voia de meter la predicassion in primo posto nela nostra vita. Par esémpio, Geovà el ne dà publicassion stampade, nel tablet, nel telèfono, nel computador e podemo anca scoltarle. Ghemo anca tanti vìdei, el programa JW Broadcasting e el nostro site in de pi de 1.000 léngue! (Mat. 24:45-47) Le persone del mondo no le ze bone de esser unide par causa dela polìtica, religion e dei soldi. Ma, i de pi de oto milioni de servi de Geovà i ze una fameia. Par esémpio, nel giorno 19 de april de 2019, le Testimònie de Geovà le era insieme par scoltar el testo del giorno. Anca in quela note, 20.919.041 persone le era insieme par selebrar la morte de Gesù. L’è un grando privilègio veder e far parte de questo! Quando noantri pensemo sora questo, ghemo ancora de pi voia de giutar nela predicassion.

7. Come che el esémpio de Gesù el pol giutarne a seitar meter la predicassion in primo posto?

⁷ El esémpio de Gesù el ne giuta a seitar meter la predicassion in primo posto. Lu no’l ga assà che gnente lo intrigasse de parlar dela verità. (Gioani 18:37) Par esémpio, quando Sàtana el ga oferessesto a Gesù ‘tuti i governi e la so glòria’, lu no’l ga cascà in questa tràpola. Anca quando arquante persone le ga proà farlo rè, lu no’l ga acetà. (Mat. 4:8, 9; Gioani 6:15) Lu no’l ga mai volesto gaver tante robe e gnanca no’l se ga fermà de predicar quando le persone le ze ndate contra lu. (Luc. 9:58; Gioani 8:59) Anca noantri podemo seitar predicar no importa quel che semo drio infrontar. Come che saremo boni de far questo? Ghemo de seghir el consìlio che el apòstolo Paolo el ga dato ai cristiani par ‘no restar stufi e gnanca desister’. — Ebr. 12:3.

8. (a) Cossa che una persona passiente la ze bona de far? (b) Parché che adesso ghemo de esser passienti?

⁸ Una persona passiente la ze bona de spetar tranquila fin che la situassion la càmbie. Nel passà, el profeta Abacuche el volea tanto veder el fin dela violensa in Giudà. (Aba. 1:2) I dissìpoli de Gesù anca i volea che el Regno ‘el vegnesse suito’ par salvarli dei romani. (Luc. 19:11) Fursi, anca noantri volemo che una roba bruta la se finisse suito o anca volemo che una roba bona la suceda. Par esémpio, semo premosi par veder el Regno de Dio finir cole robe rugne e darghe pace a tuti i umani. (2 Pie. 3:13) Ma ghemo de esser passienti e spetar la ora che Geovà el ga dessidio far queste robe. Adesso, ndemo veder come che Geovà el ne insegna a esser passienti.

9. Che esempi i mostra che Geovà l’è passiente?

⁹ Geovà l’è el meio esémpio de passiensa. Par esémpio, vanti del Dilùvio, Noè el ga bio tempo par far su la arca e parlar ale persone quel che ndaria suceder. (2 Pie. 2:5; 1 Pie. 3:20) Quando Abraon el ga fato tante domande sora la destrussion de Sodoma e Gomora, Geovà lo ga scoltà con passiensa. (Gén. 18:20-33) La nassion de Israel no la ze stata fedele e ancora cossita lu l’è stà passiente con lori par tanti ani. (Nee. 9:30, 31) E ancoi, Geovà el seita esser passiente parché lu l’è drio giutar le persone a imparar sora lu e a “ciamarse grame”. (2 Pie. 3:9; Gioani 6:44; 1 Tim. 2:3, 4) Quando pensemo nela passiensa che Geovà l’è drio dimostrar, anca noantri volemo seitar predicar e insegnar con passiensa.  Ma adesso, ndaremo veder una ilustrassion che Geovà el dopera par insegnar a noantri a esser passienti.

10. Cossa che imparemo dela ilustrassion de Tiago 5:7, 8?

¹⁰ Ledi Tiago 5:7, 8. * El esémpio del laorador el ne insegna a esser passienti. Ancora che arquante piante le fà presto vegner su, quasi tute ghe vol pi tempo par i fruti vegner mauri. In Israel, le piante le ghe metea sei mesi par vegner su. El laorador el piantea le semense dopo dele prime piove del otono, che l’era in meso de otobre e el tolea su nele ùltime piove dela primavera, che l’era in meso de april. (Mar. 4:28) La passiensa del laorador l’è un bel esémpio par noantri. Ma no l’è fàcile mostrar passiensa. Parché?

11. Parché che ghemo de esser passienti nela predicassion?

¹¹ Noantri volemo veder suito i resultadi dei nostri sforsi parché semo imperfeti. Par esémpio, el laorador el ga de pareciar la tera, semenar, cavar via le peste, darghe àqua, ma sol dopo de un tempo el ndarà tor su i fruti. Anca nel laoro de predicassion ghemo bisogno de tanta passiensa parché ghe vol tempo par giutar i studianti a no esser parsiai e mostrar amor ale persone. Se semo passienti, no ndaremo desanimar par causa dele dificoltà. Anca, ghemo de portar passiensa cole persone che le ze drio imparar sora la Bìblia parché ghe mete tempo par lore gaver fede. Anca i dissìpoli de Gesù dele volte i ghe metea tempo par imparar quel che Gesù el insegnea. (Gioani 14:9) Ghemo de ricordarse che noantri podemo piantar e darghe àqua, ma l’è Geovà che el fà vegner su. — 1 Cor. 3:6.

12. Come che mostremo passiensa quando che predichemo a quei dela nostra fameia?

 ¹² Pol esser fadiga gaver passiensa quando volemo parlar sora Geovà a quei dela nostra fameia che no i ze Testimònie de Geovà. Noantri mostremo passiensa quando metemo in pràtica el prinsìpio de Eclesiasti 3:1, 7: ‘Ghen’è un tempo par taser e un tempo par parlar.’ Noantri volemo doperar tute le oportunità par parlar a quei dela nostra fameia che no i ze Testimònie de Geovà. Ma fursi anca ghemo de taser e spetar che lori i gàpia interesse par la verità par causa del nostro bon esémpio. (1 Pie. 3:1, 2) Volemo tanto predicar e insegnar, ma ne ocore esser passienti con tuti, anca con quei dela nostra fameia.

13-14. Che esempi de passiensa volemo imitar?

¹³ Podemo imparar a esser passienti col esémpio dei servi del passà e de ancoi. Abacuche l’era premoso par veder el fin dele robe rugne, ma lu l’è stà passiente e el ga dito che el ndaria ‘restar in pié e atento’. (Aba. 2:1) El apòstolo Paolo el ga dito che el volea “finir” el so laoro qua nela tera. Ma el ga seità “predicar le bone notìssie con passiensa”. — Ati 20:24.

¹⁴ Pensa anca nte un casal che el ga fato la Scola de Gileade. Lori i ze stati designadi par un paese che ghen’era poche Testimònie de Geovà. Lori i ga catà poche persone interessade nela Bìblia parché le persone de quel paese no le crede in Cristo. Ma i fradei che i ga fato la Scola de Gileade con lori sempre i parlea dele bone speriense dela so designassion. Ma ancora cossita lori i ga seità esser passienti. Ancora che poche persone le volea servir a Geovà, lori i ga seità predicar. Dopo de oto ani, lori i ga bio la alegria de veder un dei so studianti batesarse. Cossa che i esempi dei servi del passà e de ancoi i insegna a noantri? Lori sempre i ga bio tanta voia de predicar e no i se ga mai fermà. Geovà li ga ricompensadi parché lori i ga bio passiensa. Noantri volemo ‘imitar quei che par causa dela so fede e dela so passiensa i riceve le promesse’. — Ebr. 6:10-12

15. Parché che volemo tanto predicar?

¹⁵ Noantri ghemo fede nele promesse dela Parola de Dio, par quela volemo tanto parlar sora lore par tute le persone che semo boni. (Sal. 119:42; Isa. 40:8) Semo drio veder le professie dela Bìblia realisarse ancoi. Vedemo che le persone che le mete in pràtica i consili dela Bìblia le ze tanto felice. Alora, semo ancora pi sicuri che tuti i ga bisogno de scoltar sora le bone notìssie del Regno.

16. (a) De acordo col Salmo 46:1-3, come che la fede in Geovà la giutarà noantri a seitar predicar? (b) Come che la fede in Gesù anca la ne giutarà?

¹⁶ Noantri anca ghemo fede in Geovà e predichemo quel che lu el ne ga insegnà. Anca ghemo fede in Gesù, quel che Geovà el ga scoliesto par esser el Rè del so Regno. (Gioani 14:1) Geovà sempre el sarà la nostra protession e la nostra forsa, no importa quel che suceda. (Ledi Salmo 46:1-3. *) Noantri semo sicuri che Gesù l’è drio tender del laoro de predicassion par meso del poder e autorità che lu el ga ricevesto de Geovà. — Mat. 28:18-20.

17. Parché che ghemo de seitar a predicar? Daghe un esémpio.

¹⁷ Quando ghemo una forte fede, semo ancora pi sicuri che Geovà el ndarà benedir i nostri sforsi. E tante volte, questo sucederà  de maniere che gnanca imaginemo. (Ecl. 11:6) Par esémpio, tuti i giorni miliari de persone le vede i nostri careti de publicassion. Ma sarà che questa la ze una bona maniera de predicar? Sicuro che si! El Nosso Ministério do Reino de novembre de 2014 el ga parlà de una studiante de una università che la volea far un laoro sora le Testimònie de Geovà. No la ze stata bona de catar el Salon del Regno, ma la ga catà una tola de publicassion nela università. I nostri fradei i ghe ga dato quel che la gavea de bisogno par far el so laoro. Dopo de un tempo, ela la ze deventada Testimònia de Geovà e ancoi la ze una pioniera regolar. Esempi come de questa sorela i ne incoraia a seitar predicar, parché ancora ghen’è persone che le vol scoltar le bone notìssie del Regno.

18. Parché che podemo esser sicuri che el laoro de predicassion el ndarà finirse nela ora giusta?

¹⁸ Podemo esser sicuri che el laoro de predicassion el ndarà finirse nela ora giusta. Noantri podemo esser sicuri de questo par causa de quel che ga sucedesto nei giorni de Noè. Geovà el ga scoliesto el giorno del Dilùvio 120 ani vanti. Tanti ani dopo, Geovà el ga dito par Noè far su la arca. Alora, lu el ga laorà par 40 o 50 ani par farla su. Le persone no le scoltea quando Noè el parlea, ma lu el ga seità predicar fin Geovà dir par menar le bèstie rento dela arca e nela ora giusta ‘Geovà el ga sarà la porta’. El esémpio del Dilùvio el mostra che Geovà el fà tuto nela ora giusta. — Gén. 6:3; 7:1, 2, 16.

19. Cossa che ndaremo veder se seitemo a predicar?

¹⁹ Suito Geovà el ndarà dir che no bisogna pi predicar. Lu el ndarà finir fora col mondo de Sàtana e alora ghen sarà giustìssia nela tera. Ma intanto che spetemo queste robe suceder, ghemo de seitar predicar come Noè, Abacuche e altri. Volemo anca seitar meter la predicassion in primo posto, esser passienti e gaver una forte fede in Geovà e nele so promesse.