1-2. Cossa che Timòteo el gavea ricevesto?

NOANTRI savemo tanto ben quel che l’è assar qualcossa de valor par nantra persona tender. Par esémpio, quasi tuti noantri assemo i soldi nel banco e noantri spetemo che i lo tenda ben, che no’l sìpia perso e che nissuni lo ciape.

² Ledi 1 Timòteo 6:20. * El apòstolo Paolo el ga ricordà Timòteo che el gavea ricevesto una roba de tanto valor. Cossa che Timòteo el gavea ricevesto de Dio? Geovà el ghe gavea dato la cognossensa de quel che el ndaria far par i umani. E Geovà anca el ghe gavea dato el privilègio de ‘predicar la parola de Dio’ e ‘seitar a predicar le bone notìssie’. (2 Tim. 4:2, 5) Cossita, Paolo el ga dito a Timòteo che no’l gavea mai de abandonar quel che el gavea ricevesto de Dio. Geovà anca el ne ga dato robe de tanto valor. Che robe le ze queste? E come che podemo mostrar che demo tanto valor a queste robe?

3-4. Parché che le verità dela Bìblia le ga tanto valor?

³ Geovà l’è tanto bon con noantri parché lu el ne ga dato la Bìblia e ela la ga verità de tanto valor. Queste verità le ze tanto valiose parché lore le ne giuta a esser amighi de Geovà e esser felici. Quando noantri imparemo queste verità e le metemo in pràtica, noantri restemo lìberi dei insegni falsi e dela imoralità. — 1 Cor. 6:9-11.

 ⁴ Noantri ghemo anca de dar tanto valor a queste verità dela Bìblia parchè Geovà sol el dà queste verità ale persone ùmile e che le ga la “giusta disposission”. (Ati 13:48) Le persone ùmile le aceta che Geovà el dopera el schiavo fedele e prudente par giutarne a capir queste verità. (Mat. 11:25; 24:45) Noantri mai sarìano boni de capir la Bìblia sensa aiuto. L’è sicuro che queste verità le ze le robe pi importante che ghen’è. — Prov. 3:13, 15.

5. Che nantro privilègio Geovà el ne ga dato?

⁵ Geovà anca el ne ga dato el privilègio de insegnar ale persone sora Lu e anca sora quel che el ndarà far. (Mat. 24:14) Quel che noantri insegnemo ale persone anca el ga tanto valor parché pol giutarle a far parte dela fameia de Geovà e a gaver vita eterna. (1 Tim. 4:16) Tuti noantri semo drio far el nostro meio nela predicassion, che l’è el laoro pi importante che ghen’è. (1 Tim. 2:3, 4) L’è sicuro che l’è un grando privilègio giutar Geovà in questo laoro! — 1 Cor. 3:9.

6. Cossa che ga sucedesto con arquanti cristiani nel tempo de Timòteo?

⁶ Arquanti cristiani nel tempo de Timòteo i ga assà de darghe valor al privilègio che i gavea de giutar a Geovà nela predicassion. Par esémpio, Demas el amea el mondo, alora el se ga fermà de laorar con Paolo. (2 Tim. 4:10) Figelo e Ermògene anca i se ga fermà de predicar parché lori i gavea paura de infrontar perseghission, cossita come Paolo el ga infrontà. (2 Tim. 1:15) Imeneo, Alessandro e Fileto i ga abandonà Geovà parché lori i ga scoltà le persone che le parlea busie sora la verità dela Bìblia. (1 Tim. 1:19, 20; 2 Tim. 2:16-18) Questi òmini i amea a Geovà, ma i ga abandonà quel che lu el ghe gavea dato.

7. Che robe che Sàtana el dopera par far noantri abandonar la verità?

⁷ Sàtana ancora el vol che abandonemo le verità che ghemo ricevesto de Dio. Come che el proa far questo? Una dele robe che lu el fà l’è doperar la diversion, la television e la internet. Sàtana el dopera queste robe par farne pensar e far le robe compagno al mondo. Alora, pin pian noantri ndaremo fermarse de amar a Geovà e de obedirlo. Nantra roba che Sàtana el dopera la ze la paura. Sàtana el dopera quel che le persone le parla sora noantri e anca la perseghission par fermar noantri de predicar. Anca, Sàtana el dopera le busie sora la Bìblia che i apòstati i dise par farne abandonar la verità. — 1 Tim. 6:20, 21.

8. Cossa che te ghè imparà del esémpio de Daniel?

⁸ Se no stemo mia atenti, noantri podemo abandonar le verità che Dio el ne ga dato. Varda el esémpio de Daniel, * che el ghe piasea tanto de giugar i giughi eletrònichi. Lu el ga  dito: “Mi gò scominsià a giugarli quando mi gavea 10 ani. Nel scomìnsio, i giughi no i gavea gnente che l’era sbalià. Ma dopo, mi go scominsià a giugar giughi che i gavea spiritismo e violensa. Mi son restà belche 15 ore drio giugar.” Lu el ga dito ancora: “Mi savea che par causa de questi giughi, mi ero drio abandonar a Geovà. Ma mi no ghe dea pi valor a questo e mi pensea che mi no gavea bisogno de obedir i prinsipi dela Bìblia.” Questo el pol anca suceder con noantri. La diversion la pol farne abandonar a Geovà sensa gnanca nicòrderse. Se noantri abandonemo la verità, noantri ndaremo perder le robe de tanto valor che Geovà el ne ga dato.

9. De acordo con 1 Timòteo 1:18, 19, Paolo el ga dito che Timòteo l’era come chi?

⁹ Ledi 1 Timòteo 1:18, 19. * Paolo el ga dito che Timòteo l’era come un soldà. Ancora che lu no’l fusse nte una guera de verità, Paolo el ghe ga dito par ‘seitar a lotar’. Paolo anca el ga dito che tuti noantri semo soldadi de Cristo. Ma, che qualità noantri ghemo de bisogno par seitar a lotar? Noantri ndaremo imparar sinque robe dela ilustrassion de Paolo che le ndarà giutarne a mai abandonar le verità dela Bìblia.

10. (a) Cossa che Paolo el ga dito che Timòteo el gavea de far? (b) Parché che l’è importante far questo?

¹⁰ Gàpia amor leal a Geovà. Un bon soldà l’è leal parché el fà tanto sforso par proteger a quei che lu el ama e le robe che le ga valor par lu. Paolo el ga dito a Timòteo che lu el gavea de amar e esser tanto leal a Geovà. (1 Tim. 4:7) Se noantri amemo e semo tanto leai a Geovà, no ndaremo mai abandonar le verità dela Bìblia. — 1 Tim. 4:8-10; 6:6.

11. Parché che ghemo de far tanto sforso?

¹¹ Te ghè de sforsarte. Un soldà el ga de far tanto sforso se el vol esser parecià par la guera. Anca Timòteo el ga bio de far tanto sforso par vinser la lota contra Sàtana. Cossa che el ga fato? Timòteo el ga metesto in pràtica i consili de Paolo de far tanto sforso par vinser le voie sbaliade, gaver bone qualità e esser insieme con i so fradei e sorele. (2 Tim. 2:22) Anca noantri ghemo de far tanto sforso par vinser le voie sbaliade. (Rom. 7:21-25) Noantri ghemo anca de far tanto sforso par fermarse de far quel che l’è sbalià e seitar far quel che l’è giusto. (Efe. 4:22, 24) E noantri anca ghemo de far tanto sforso par ndar ale riunion anca quando semo strachi. — Ebr. 10:24, 25.

12. Cossa che ghemo de far par saver doperar ben la Bìblia?

¹² Un soldà el gavarà le abilità par doperar le so arme se lu le dopera sempre. Alora, ne ocore saver doperar ben la Parola de Dio. (2 Tim. 2:15) Noantri imparemo a doperar ben la Parola de Dio quando ndemo ale riunion e quando la studiemo sempre. Quando noantri semo drio leder la Bìblia, noantri ghemo bisogno de pensarghe sora e far peschise nele nostre publicassion. Cossita, ndaremo far pi forte la nostra fede, saremo boni de capir e meter in pràtica quel che imparemo. (1 Tim. 4:13-15) Quando studiemo ben la Bìblia, noantri saremo pi pareciadi par giutar ai altri. Noantri volemo leder un versìcolo dela Bìblia ale persone, ma anca volemo giutarle a capir cossa che el vol dir e anca méterlo in pràtica. Quando femo sforso de studiar sempre la Bìblia, noantri saremo pi pareciadi par insegnar ai altri sora Geovà. — 2 Tim. 3:16, 17.

13. De acordo con Ebrei 5:14, parché che noantri ghemo bisogno de dissernimento?

 ¹³ Gàpia dissernimento. Un soldà l’è bon de veder de distante quando ghen’è un perìcolo. Alora lu l’è bon de protègerse. Anca noantri ghemo de imparar a veder che situassion che le ze un perìcolo par noantri e protègerse de lore. (Prov. 22:3; ledi Ebrei 5:14. *) Par esémpio, noantri ghemo de scòlier ben le nostre diversion parché tanti filmi e tante robe nela television i mostra imoralità. Noantri savemo che Geovà el òdia la imoralità e che la ze una roba pròpio pericolosa. Alora, noantri no volemo mai divertirse con qualcossa che la pol finir col nostro amor a Geovà. — Efe. 5:5, 6.

14. Cossa che Daniel el se ga nicorto?

¹⁴ Daniel, che ghemo parlà vanti el se ga nicorto che giugar giughi violenti e con spiritismo l’era un problema. Alora, lu el ga peschisà nela Watchtower Library cossa che el podea far par finir con questo problema. E cossa che lu el ga fato? Lu el se ga fermà de giugarli. Daniel anca el se ga fermà de guastar soldi par comprar questi giughi nela internet e el se ga fermà de parlar cole persone che le giughea insieme. Lu el ga dito: “Adesso go scominsià a far tante robe fora de casa e a esser insieme con i fradei dela me congregassion.” Ancoi, Daniel l’è pioniero e ansiano.

15. Parché che ghemo de star atenti cole busie dei apòstati?

¹⁵ Cossita come Timòteo, ghemo de esser boni de veder che l’è un perìcolo scoltar e veder quel che i apòstati i parla. (1 Tim. 4:1, 7; 2 Tim. 2:16) Par esémpio, lori i pol parlar busie sora i fradei e sora la organisassion de Geovà. Parché che ghemo de star atenti cole busie che lori i parla? Parché lori i ze òmini che no i pensa dela maniera giusta e che no i ga la verità. E lori i vol che le persone le seite discutir e barufar par causa de parole. (1 Tim. 6:4, 5) Alora, queste busie le pol imbroiarne e rovinar la nostra fede.

16. Cossa che pol intrigarne de meter el Regno in primo posto?

¹⁶ Seita meter el Regno in primo posto. Timòteo l’era un bon soldà de Cristo parché el metea la predicassion in primo posto nela so vita. Timòteo no’l assea che i soldi e gnanca  qualche altra roba lo intrighesse de meter el Regno in primo posto. (2 Tim. 2:3, 4) Cossita come Timòteo, noantri no volemo che i soldi, gnanca qualche altra roba ne intrighe de meter el Regno in primo posto. Parché? Parché quando noantri amemo i soldi, noantri ndaremo assar de amar a Geovà, la so Parola e no gavaremo pi voia de predicar ai altri. (Mat. 13:22) Par quela che ghemo de far sforsi de viver sol con quel che noantri ghemo de bisogno e doperar el nostro tempo e le nostre forse par “ndar in serca prima del Regno”. — Mat. 6:22-25, 33.

17-18. Cossa che podemo far par protègerse e seitar a esser amighi de Geovà?

¹⁷ Paréciate par protègerte suito. Un soldà el ga bisogno de pareciarse par esser bon de protègerse suito. Se noantri no volemo abandonar le verità che Geovà el ne ga dato, noantri ghemo de protègerse suito quando ghen’è qualche perìcolo. Cossa che pol giutarne a far questo? Noantri ghemo de pareciarse vanti.

¹⁸ In tanti posti, ghen’è istrussion par le persone saver come ndar fora de quei posti. Alora, se sucede qualcossa che lore le ga bisogno de scampar via, lore le sa cossa che le ga de far. Anca noantri ghemo de far questo. Come cossita? Quando noantri vedemo qualcossa imoral, apòstata o de violensa nela television o nela internet, ndaremo suito saver cossa far. Se femo cossita, noantri ndaremo protègerse e seitar a esser amighi de Geovà. — Sal. 101:3; 1 Tim. 4:12.

19. Cossa che noantri gavaremo se mai abandonemo le robe valiose che Geovà el ne ga dato?

¹⁹ Geovà el ne ga dato le verità dela Bìblia e anca el privilègio de parlar sora lore ai altri. Alora, se noantri protegemo quel che Geovà el ne ga dato, noantri saremo boni de gaver una bona cossiensa, una vita felice, e la alegria de giutar i altri a cognosser a Geovà. Alora, sìpia sicuro che, col aiuto de Geovà, te sarè bon de mai abandonar quel che Geovà el te ga dato. — 1 Tim. 6:12, 19.