1. (a) Come che le sorele le giuta nela congregassion? (b) Che dificoltà tante le infronta? (Vedi la ilustrassion dela capa.)

NOANTRI restemo contenti parché ghemo tante sorele che le dà el so meio nela congregassion! Par esémpio, lore le ze sempre nele riunion e le giuta tanto nela predicassion. Anca, tante le giuta a tender del Salon del Regno e le giuta i fradei e sorele dela congregassion. Ma sicuro che queste sorele anca le infronta dificoltà, come tender dei genitori, oposission dela fameia o le ga de laorar e slevar i fioi lore sole.

2. Parché che ghemo de mostrar rispeto e bontà par le nostre sorele?

² Parché che ghemo de giutar e mostrar rispeto e bontà par le nostre sorele? Parché quasi tute le persone del mondo no le mostra el rispeto che lore le mèrita. Ma la Bìblia la dise che ghemo de rispetarle e darghe valor. Par esémpio, el apòstolo Paolo el ga dito par i cristiani in Roma che i ricevesse ben a Febe e i ghe desse ‘tuto el aiuto che la gavea de bisogno’. (Rom. 16:1, 2) Quando Paolo l’era fariseo, lu el pensea che i òmini i era meio che le done. Ma dopo che lu l’è deventà seghidor de Cristo, lu el ga scominsià a tratar le done con rispeto e bontà. — 1 Cor. 11:1.

3. (a) Come che Gesù el tratea le done? (b) Cossa che Gesù el pensea dele done che le fea sforso par obedir a Dio?

³ Gesù el rispetea tute le done e el mostrea che lore le gavea valor. (Gioani 4:27) Lu no’l pensea compagno ai lìderi religiosi de quel tempo. Un libro de peschisa bìblica el dise: “Gesù no’l ga mai mancà de rispeto cole done par meso de quel che el parlea.” E Gesù el se preocupea tanto cole done che le fea sforso  par obedir a Dio. Quando lu el parlea de persone che le era come dela so fameia, lu el mensonea i òmini e le done. — Mat. 12:50.

4. Cossa che ndaremo imparar in questo stùdio?

⁴ Gesù sempre el volea giutar le done che le servia a Geovà. Lu el ga mostrà che lore le era importante e le protegea. Ndaremo veder come che podemo imitar a Gesù.

5. Parché che l’è fadiga par tante sorele star insieme con quei che i serve a Geovà?

⁵ A tuti noantri, ne piase de star insieme con quei che i serve a Geovà. Ma parché che l’è fadiga far questo par tante sorele? Varda cossa che Jordan * la ga dito: “Come mi no son mia maridada, me sento sensa valor, me par che mi no fao parte dela congregassion.” Kristen, una pioniera che la ze ndata de star in nantro posto par far de pi nela predicassion, la ga dito: “Quando te càmbie de congregassion, l’è fàcile sentirte sola.” Nantra sorela, che la se ciama Annette, la ga dito: “Me tochea giutar la me mama. Alora, quando i fradei i me ciamea par ndar a spasso mi no podea ndar.” Anca altre sorele le se sente sole parché la so fameia no la ze Testimònia de Geovà e lore no le pol restar tanto insieme con i fradei. E altre le se sente sole parché le ze malade o le ga de tender de qualchedun dela so fameia che l’è malà. Tanti nela nostra congregassion fursi i se sente cossita!

6. De acordo con Luca 10:38-42, come che Gesù el ga giutà Marta e Maria?

⁶ Gesù el ghe piasea tanto de star insieme cole done che lo seghia e lu l’era pròpio un amigo par lore. Par esémpio, Marta e Maria che fursi no le era maridade, le gavea una forte amicìssia con Gesù. Tuto quel che Gesù el fea e el parlea, fea lore sentirse ben. Noantri savemo de questo parché Maria no la ga bio vergogna de sentarse do ai pié de Gesù come i dissìpoli i fea. * E Marta la se sentia lìbera de parlar quel che la volea. Par esémpio, ela la ze restada inrabiada parché Maria no la era drio giutarla a far de magnar. Gesù el ga doperà quela oportunità par insegnar robe importante par Marta e Maria. (Ledi Luca 10:38-42. *) E Gesù el ghe volea tanto ben a lore e al so fradel Làsaro parché lu sempre li visitea. (Gioani 12:1-3) Quando Làsaro l’è restà tanto malà, lore le era sicure che Gesù li giutaria. — Gioani 11:3, 5.

7. Come che podemo incoraiar le sorele?

⁷ Le nostre riunion le ze bele oportunità par tante sorele esser insieme de tuti i fradei. Alora, come che podemo doperar queste oportunità par incoraiarle? Noantri podemo incoraiarle quando le ricevemo ben nele riunion, parlemo con lore e ghe disemo che lore le ze importante par noantri. Jordan, che ghemo parlà vanti, la ga dito: “Mi resto tanto contenta quando i altri i me loda par causa de un comentàrio, i me convida par ndar nela predicassion o quando i mostra che mi son importante par lori.” Una sorela che la se ciama Kia la ga dito: “Quando mi no vao a una dele  riunion, mi son sicura che qualchedun el va domandarme se mi no stao ben. Cossita, mi son sicura che i fradei dela congregassion i vol tender de mi.”

8. Come che podemo imitar a Gesù?

⁸ Come che podemo imitar a Gesù? Noantri podemo doperar el nostro tempo par esser insieme cole nostre sorele. E quando femo questo, ghemo de parlar robe par incoraiarle. (Rom. 1:11, 12) Alora, cossa che te cati de convidar le sorele par magnar qualcossa nela to casa o ndar a spasso? E se te sì ansiano, sfòrsate sempre par imitar el esémpio de Gesù. Gesù el savea che no l’era mia fàcile restar sensa maridarse par arquante persone. Ma Gesù el ga mostrà che una persona no la gavea bisogno de maridarse, gnanca gaver fioi par esser felice. (Luc. 11:27, 28) Noantri semo sicuri che una persona la sarà felice se la mete el Regno de Dio in primo posto nela vita. — Mat. 19:12.

9. Cossa che i ansiani i pol far par giutar le sorele?

⁹ I ansiani i ga de tratar le done dela congregassion come se le fusse le so sorele e le so mare. (1 Tim. 5:1, 2) Come che i ansiani i pol giutar le sorele? Lori i ga de doperar el tempo vanti e dopo dela riunion par parlar cole sorele. Kristen la ga dito: “Un ansiano el ga visto che mi gavea tante robe de far e el me ga domandà come che mi era drio doperar el me  tempo. Son restada tanto contenta de veder che lu el se preocupea con mi.” Annette, che ghemo parlà vanti, la dise parché che l’è bon parlar con i ansiani: “Cossita noantri se cognossemo meio. Quando mi go qualche dificoltà, mi me sento lìbera par parlar con lori.” Quando i ansiani sempre i ga tempo par parlar cole sorele, lori i mostra che i se importa con lore. *

10. Cossa che podemo far par giutar le sorele a restar contente?

¹⁰ Tuti noantri restemo contenti quando i altri i dà valor ale nostre abilità e a quel che femo. Ma podemo restar desanimadi quando nissuni i vede el nostro sforso e le robe bone che noantri femo. Una pioniera nò maridada che la ga nome Abigail, la ga dito: “Dele volte me par che nissuni i me bada. Arquanti i cognosse la me fameia, ma me par che a mi, no i me cognosse mia.” Ma varda el esémpio dela sorela che se ciama Pam. Ela la ga servio come missionària par tanti ani vanti de maridarse. Dopo, la ghe ga tocà tornar casa par tender dei so genitori. Ancoi ela la ga de pi de 70 ani e la seita servir come pioniera. Ela la ga dito: “Me giuta tanto quando i fradei i mostra che quel che mi fao l’è importante.”

11. Come che Gesù el ga mostrà che l’era grato ale done che lo giutea?

¹¹ Arquante done le giutea a Gesù con quel che lore le gavea e lu l’era tanto grato a lore. (Luc. 8:1-3) Come che Gesù el mostrea che l’era grato? Gesù el assea che quele done le gavesse el privilègio de giutarlo e anca el ghe spieghea verità importante sora lu. Par esémpio, el ga dito a lore che lu el ndaria morir e che dopo el saria ressussità. (Luc. 24:5-8) Gesù el ga parecià i so apòstoli par le provassion che i ndaria infrontar, ma el ga anca parecià le done che lo seghia. (Mar. 9:30-32; 10:32-34) Quando Gesù l’è stà preso, i apòstoli i ga scampà via. Ma quando lu l’era drio morir nte un pal de tortura, arquante done le era insieme de lu. — Mat. 26:56; Mar. 15:40, 41.

12. Che laori Gesù el ga dato ale done?

¹² Gesù el ga dato laori tanto importanti par le done far. Par esémpio, le prime persone che le ga visto Gesù dopo dela so ressuression le ze state le done. E Gesù el ga dito a lore par contarghe ai apòstoli che lu l’è stà ressussità. (Mat. 28:5, 9, 10) Anca podemo dir che ghen’era done nel Pentecoste de 33 D.C.. Cossita, anca lore le ga ricevesto spìrito santo e le ga scominsià a parlar in léngue difarente. Alora, queste done anca le ga giutà parlar ale persone le robe maraveiose che Dio el fà. — Ati 1:14; 2:2-4, 11.

13. (a) Come che le sorele le giuta la organisassion? (b) De che maniere ti te pol mostrar che te sì grato a tuto quel che le sorele le fà?

¹³ Le nostre sorele le mèrita esser lodade par tuto quel che lore le fà nel laoro de Geovà. Par esémpio, lore le giuta tanto a far su e mantegner i Saloni del Regno, a predicar in altre léngue e nel laoro volontàrio in Betel. Anca le giuta i fradei quando sucede desgràssie, nela tradussion de publicassion e anca le giuta tanto come pioniere e missionàrie. Cossita come i fradei, le sorele anca le fà la Scola de Servìssio de Pioniero, Scola de Vangelisadori del Regno e la Scola de Gileade. Le sorele che le ze maridade anca le giuta i so sposi nele responsabilità che lori i ga nela congregassion e nela organisassion. Questi fradei i ze boni de far questo sol par causa del aiuto dele so spose. (Efe. 4:8) Te sì bon de pensar come che te pol giutar queste sorele in quel che lore le fà?

14. Cossa che i ansiani che i ga sabedoria i fà?

 ¹⁴ Le sorele “le ze un grando esèrsito” che le fà un bel laoro nela predicassion. (Ledi Salmo 68:11. *) I ansiani che i ga sabedoria i sa de questo e i proa imparar cola speriensa dele sorele. Abigail, che ghemo parlà vanti, la resta incoraiada quando i fradei i ghe domanda come che se pol scominsiar bone ciàcole nela predicassion. Ela la dise: “Questo me giuta a ricordar che Geovà el ga un posto par mi nela so organisassion.” I ansiani anca i sa che le sorele de pi età le pol giutar quele pi gióvene a infrontar le so dificoltà. (Tito 2:3-5) Sicuro che volemo mostrar che semo grati a queste sorele e che le amemo tanto!

15. Quando che fursi le nostre sorele le ga bisogno de aiuto?

¹⁵ Dele volte, le nostre sorele le infronta dificoltà e lore le ga bisogno del aiuto dei altri. (Isa. 1:17) Par esémpio, una sorela védova o divorsiada la ga bisogno che qualchedun el difenda i so diriti e anca la ghe giute in qualche laoro che el so omo el fea nela casa. O fursi una sorela de pi età la ga bisogno de aiuto par ndar al dotor. Fursi una pioniera no la ze sempre nela predicassion parché la fà altri laori par la organisassion. Alora, la ga bisogno che un fradel la ghe difenda quando qualchedun el parla qualcossa contra ela. Cossa che ancora podemo far par giutar le nostre sorele? Ndemo veder nantra volta el esémpio de Gesù.

16. De acordo con Marco 14:3-9, come che Gesù el ga difendesto Maria?

¹⁶ Gesù suito el difendea le sorele quando qualchedun el parlea qualcossa contra lore. Par esémpio, el ga difendesto Maria quando Marta la ghe ga dito su. (Luc. 10:38-42) Gesù el ga anca difendesto Maria quando i altri i ga dito che ela la gavea fato una roba sbaliada. (Ledi Marco 14:3-9. *) Ma Gesù el ga capio quel che Maria la ga volesto far e la ga lodada. Lu el ga dito: “Ela la me ga fato una roba tanto bona. . . . Ela la ga fato quel che la podea.” Gesù el ga anca profetisà: “Quel che questa dona la ga fato el sarà ricordà par sempre in tuti i posti che sarà predicade le bone notìssie.” E noantri semo drio ricordarse de quel che ela la ga fato. Sicuro che Maria la ze stata incoraiada par quel che Gesù el ga dito. Gesù el ga doperà quel che Maria la ga fato par dir che la predicassion la saria fata in tuto el mondo.

17. Daghe un esémpio de come che te pol difender una sorela.

¹⁷ Ti te difendi le sorele quando lore le ga de bisogno? Par esémpio, imagina che nela to congregassion ghen’è una sorela che el so omo no l’è Testimònia de Geovà. Arquanti predicadori i vede che la riva dopo che la riunion la ga scominsià e la va via pena dopo che la se finisse. La sorela anca no la mena mai i so fioi ala riunion. Alora i predicadori i scomìnsia a parlar: “Parché che ela no la dise al so omo che la va menar i fioi insieme?” Ma ela no la ga el controlo sora la situassion, alora la fà el meio che la pol. Anca, no la ze ela sola che la fà le dessision sora i fioi. Cossa che te pol far par difénderla? Loda la sorela par el so sforso e parla ai altri le robe  bone che ela la fà. Cossita, te pol giutar i altri a fermarse de parlar queste robe sora ela.

18. De che nantre maniere podemo giutar le nostre sorele?

¹⁸ Come che ancora podemo giutar le nostre sorele? Par far le robe che lore le ga de bisogno. (1 Gio. 3:18) Annette, che la tendea dela so mama malada, la dise: “Arquanti fradei i vegnea nela me casa par tender dela me mama o par portarme de magnar. Cossita, mi vedea che i fradei i me amea e che mi fea parte dela congregassion.” Jordan anca la ga ricevesto aiuto de un fradel che el ga insegnà arquante robe a ela sora come rangiar el auto. Ela la dise: “Mi resto contenta de saver che i fradei i se preocupa con mi e cola me sicuressa.”

19. Cossa che i ansiani ancora i pol far par giutar le sorele?

¹⁹ Anca i ansiani i ga de tender de quel che le sorele le ga de bisogno. Lori i sa che Geovà el vol che lori i mostre amor e bontà a lore. (Tiago 1:27) Alora, i ansiani i ga de imitar a Gesù e no far règole quando no ghe ocore. (Mat. 15:22-28) Quando i ansiani i giuta le sorele, lore le sente che le ze importante par Geovà e par la organisassion. Kia, che ghemo parlà vanti, la ga cambià de casa. Quando el superintendente del so grupo el ga savesto, l’è ndà suito giutarla. Kia la dise: “Mi son restada tanto tranquila. I ansiani i me ga incoraià e i me ga giutà tanto. Questo me ga mostrà che son importante par la congregassion. Mi son sicura de che mi no son mai sola.”

20-21. Come che te pol mostrar che le sorele dela congregassion le ga tanto valor par ti?

²⁰ In cada congregassion, ghemo sorele che le ze esempi e le mèrita el nostro aiuto. Cossa che ghemo imparà del esémpio de Gesù? Noantri podemo doperar el nostro tempo par star cole nostre sorele e cognósserle meio. Ghemo de mostrar che demo valor a quel che lore le fà a Geovà e difénderle quando lore le ga de bisogno.

²¹ Nel fin dela so carta ai romani, el apòstolo Paolo el ga parlà el nome de nove done. Lu el ga saludà e lodà queste sorele. (Rom. 16:1, 3, 6, 12, 13, 15) Sicuro che lore le ze state incoraiade par quel che Paolo el ga scrito. Come Paolo, giuta tute le sorele dela to congregassion, cossita te mostri che lore le ga tanto valor!