1. Cossa che i fradei pi veci i pol far?

QUANDO vegnemo pi veci, no ghemo pi tanta forsa e fursi ghemo paura de no esser boni de far tanto come vanti nel laoro par Geovà. Ma adesso, ghemo pi sabedoria e pi speriensa. Cossita, podemo giutar i pi gióveni a doperar le so forse dela meio maniera che i pol e a far altri laori nela congregassion. Un fradel, che l’è ansiano fà tanti ani, el ga dito: “Adesso che mi son pi vècio, son contento de veder che ghen’è fradei pi gióveni pareciadi par far i laori nela congregassion.”

2. Cossa che ndaremo imparar in questo stùdio?

² Nel primo stùdio, ghemo visto come l’è bon par i gióveni esser amighi dei pi veci. In questo stùdio, ndaremo imparar che quando i fradei pi veci i ze ùmili, modesti, grati e generosi, lori i pol giutar tanto i pi gióveni. Questo sarà una benedission par la congregassion.

3. (a) De acordo con Filipensi 2:3, 4, cossa che vol dir esser ùmile? (b) Come i fradei pi veci i pol mostrar questa qualità?

³ La persona che la ze ùmile la pensa che i altri i ze pi importanti che ela. Alora, quei pi veci i ga de bisogno de umiltà par giutar quei pi gióveni. (Ledi Filipensi 2:3, 4. *) Come che lori i pol mostrar che i ze ùmili? Par esémpio,  ghen’è diverse maniere de far un laoro nela congregassion. Pol esser che tute le maniere le ze de acordo cola Bìblia e le ze bone par la congregassion. Ma i fradei pi veci no i vol che i altri i fae i laori dela medèsima maniera che lori i fea. (Ecl. 7:10) Sicuro che lori i pol insegnar tante robe ai pi gióveni, ma se lori i ze ùmili, i sa che ‘le robe che le sucede in questo mondo le ze drio cambiar’ e fursi i ghe toca imparar maniere difarente de far le robe. — 1 Cor. 7:31.

4. Come i superintendenti de sircuito i fà compagno i leviti?

⁴ I fradei pi veci che i ze ùmili i sa che no i ze boni de far tuto quel che i fea vanti. Varda el esémpio dei nostri fradei superintendenti de sircuito. Dopo che i fà 70 ani, lori i ze convidadi par far altri laori. Sicuro che no l’è fàcile cambiar, parché lori i amea tanto servir ai fradei e ancora i ama questo laoro. Ma lori i capisse che ghen’è fradei pi gióveni par farlo. Questi cari fradei i fà come i leviti nel passà. Quando i fea 50 ani, no i podea pi laorar nel tabernàcolo. Quel che li assea contenti invesse l’era far el meio che i podea e giutar i pi gióveni e nò i laori che i fea. (Nùm. 8:25, 26) Ancoi, quei che i era superintendenti de sircuito i fà la medèsima roba. Anca che lori no i va pi visitar e incoraiar i fradei de tante congregassion, lori i ze una benedission nele so congregassion.

5. Cossa che te ghè imparà col esémpio de Dan e Katie?

 ⁵ Varda el esémpio de Dan che el ga laorà come superintendente de sircuito par 23 ani. Quando el ga fato 70 ani, lu el la so dona, Katie, i ze stati convidadi par laorar come pionieri spessiai. Cossa che lori i ga fato par restar contenti col so novo laoro? Lu el dise che adesso el ga de pi laoro che vanti! Lu el tende dele so responsabilità nela congregassion, el giuta altri a deventar servi ministeriai, a predicar nele grande cità e anca nele preson. Tuti i fradei pi veci i pol giutar tanto ai altri. Come? Resté contenti col laoro che gavé adesso, proé far robe difarente e no seité a pensar in quel che no podé far.

6. (a) Parché che ghemo de esser modesti? (b) Che ilustrassion ne giuta a capir questo?

⁶ La persona che la ze modesta la sa quel che la ze bona o nò de far e la seita a dar el so meio a Geovà de maniera contenta. (Pro. 11:2) Podemo dir che una persona modesta la ze come qualchedun che l’è drio guidar un auto riva in su. Par ndar su quela riva, quel che l’è drio guidar el ga de ndar pi pian par seitar a ndar avanti. Dela medèsima maniera, la persona modesta la sa quando la ga de ndar pi pian. Quando la fà cossita, la sarà bona de seitar a far el so meio nel laoro a Geovà. — Fil. 4:5.

7. Come Barzilai el ga mostrà che l’era modesto?

⁷ Pensa sora el esémpio de Barzilai. Quando el gavea 80 ani, Davi lo ga convidà par laorar nel so palàssio. Ma come lu l’era una persona modesta, lu no’l ga mia acetà questo convite. Lu el savea che par causa dela so età no’l saria bon de tender de quel laoro. Alora Barzilai el ga dito che saria meio se Chiman, che l’era pi gióveno, el ndesse nel so posto. (2 Sam. 19:35-37) Cossita come Barzilai, i òmini che i ze pi veci i resta contenti de assar che i pi gióveni i tenda de arquanti laori.

8. Come el rè Davi el ga mostrà che l’era modesto quando el volea far su el témpio?

⁸ Anca el rè Davi l’è stà un bel esémpio de modèstia. Lu el volea tanto far su el témpio, ma Geovà el ghe ga dito che Salomon, el so fiol, el ndaria farlo. Davi el ga acetà quel che Geovà el ga dito e el ga fato tuto quel che el podea par giutar nela costrussion. (1 Cró. 17:4; 22:5) Davi no’l ga mia pensà che sol lu el saria bon de far el laoro parché l’era pi vècio e gavea de pi speriensa che el so fiol. (1 Cró. 29:1) Lu el savea che la costrussion la saria ben fata par causa dela benedission de Geovà, e nò par causa dela età o dela speriensa dei laoradori. Come Davi, i fradei de età i seita a far el so meio par Geovà anca che i so laori nela organisassion i gàpia cambià. E lori i sa che Geovà el ndarà benedir i gióveni che i ze drio tender de quel che i fea vanti.

9. Come un fradel che el laora nte una Comission de Filial el ga mostrà che l’è modesto?

⁹ Nantro esémpio de modèstia l’è el fradel Shigeo. Nel ano de 1976, quando el gavea 30 ani, el ga scominsià a laorar nela Comission de Filial. Nel ano de 2004, lu l’è deventà el cordinador dela Comission. Dopo de un tempo, el ga visto che no’l gavea pi la forsa come el gavea da gióveno e che no l’era pi bon de far i laori svelto come el fea vanti. Alora, Shigeo el ga pregà sora questo e el ga pensà che l’era meio che nantro fradel el fesse el so laoro. Ancoi, Shigeo no l’è  pi el cordinador, ma el seita a laorar nela Comission de Filial. Come ghemo visto nei esempi de Barzilai, del rè Davi e de Shigeo, una persona che la ze ùmile e modesta no la va pensar che i gióveni no i sarà boni de far arquanti laori parché no i ga tanta speriensa. Pitosto la ndarà pensar de pi nele so bele qualità e che sarà bel laorar insieme, e mai la ndarà pensar che i altri i ze so nemighi. — Pro. 20:29.

10. Cossa che i fradei pi veci i pensa sora i pi gióveni dela congregassion?

¹⁰ I fradei pi veci i vede i fradei pi gióveni come presenti de Geovà. Lori i ze tanto grati par tuto quel che i fà. Quando i pi veci no i ga pi tanta forsa, i resta contenti de saver che ghen’è fradei pi gióveni cola forsa e la voia de far i laori che ghe vol.

11. De acordo con Rute 4:13-16, parché che l’è bon esser grati par quel che i pi gióveni i fà?

¹¹ Noemi la ze un bel esémpio nela Bìblia de una persona pi vècia che la ze stata grata. Prima, Noemi la gavea dito che Rute, la so nora, la tornesse al so pòpolo. Ma quando Rute la ga dito che la volea ndar con Noemi a Belen, Noemi la ga acetà el aiuto dela so nora, che la era pi gióvena. (Rute 1:7, 8, 18) Questo l’è stà una benedission par tute due! (Ledi Rute 4:13-16. *) I fradei pi veci, che i ze ùmili, i fà come Noemi.

12. Come el apòstolo Paolo el ga mostrà che l’era grato?

 ¹² Anca el apòstolo Paolo l’era grato par el aiuto dei altri. Par esémpio, lu el ga ringrassià i fradei de Filipo parché i ghe gavea mandà presenti. (Fil. 4:16) Lu el ga ringrassià el aiuto che Timòteo el ghe gavea dato. (Fil. 2:19-22) Lu el ga anca ringrassià a Dio parché el gavea mandà fradei par incoraiarlo quando l’era drio ndar in preson a Roma. (Ati 28:15) Paolo el gavea fato tanto nel laoro a Geovà. Par esémpio, el gavea belche viaià miliari de chilómetri par predicar e par incoraiar arquante congregassion. Anca cossita, l’era ùmile e acetea el aiuto dei so fradei.

13. Geovà el ga fato tanti gióveni vegner ale congregassion. Come i fradei pi veci i pol mostrar che i ze grati?

¹³ Se te sì pi vècio, mostra che te sì grato a Geovà parché el ga fato tanti gióveni vegner ala congregassion. (Col. 3:15; Gioani 6:44; 1 Tes. 5:18.) Come che te pol far questo? Par esémpio, quando lori i vol menarte a qualche posto, far compre o giutarte a far qualcossa che te ghè de bisogno, sìpia grato e aceta el so aiuto. El aiuto de questi fradei l’è una prova che Geovà el te ama. Se te aceti el aiuto de lori, valtri podaré deventar amighi. Sempre giuta i to amighi pi gióveni a deventar ancora pi amighi de Geovà. Pàrlaghe che te sì contento de veder che i ze drio sforsarse par far de pi nela congregassion e, sempre che te pol pàrlaghe dele to speriense.

14. Come el rè Davi el ga mostrà che l’era generoso?

¹⁴ Nantra bela qualità che i fradei pi veci i ga de mostrar la ze la generosità. El rè Davi l’è stà un bel esémpio de generosità. Lu el ga dato una mùcia de soldi e robe de valor del so tesoro par giutar a far su el témpio. (1 Cró. 22:11-16; 29:3, 4) Lu el ga fato questo anca se el savesse che l’era el so fiol, Salomon, che ndaria farlo su. Fursi no ghemo pi la forsa par giutar a far su posti che se dopera nela organisassion de Geovà, ma podemo far donativi de acordo con quel che semo boni. Anca podemo giutar a quei pi gióveni quando ghe parlemo sora le robe che ghemo imparà nela nostra vita.

15. Come Paolo l’è stà generoso con Timòteo?

¹⁵ Anca el apòstolo Paolo l’è stà generoso. Par esémpio, el ga convidà el gióveno Timòteo par laorar con lu come missionàrio. Lu el ghe ga parlà come che el fea par predicar e insegnar. (Ati 16:1-3) Cossita, Timòteo l’è deventà un bon predicador e l’è stà bon de insegnar le bone notìssie ai altri. (1 Cor. 4:17) Dopo, el ga doperà quel che el ga imparà de Paolo par insegnar i altri a far questo laoro.

16. Parché che Shigeo el ga insegnà ai altri?

¹⁶ I fradei pi veci no i pensa che no i gavarà pi valor nela congregassion se i insegna i pi gióveni. Varda el esémpio del fradel Shigeo, che ghemo parlà vanti. Par tanti ani, lu el ga insegnà ai fradei pi gióveni nela Comission de Filial. Lu el savea che questo ndaria giutar tanto nel laoro de quel paese. Cossita, quando el ga bio bisogno de un fradel par far el so laoro de cordinador, ghen’era un fradel che l’era belche parecià par farlo. Ancoi, fà de pi de 45 ani che el fradel Shigeo el laora nela Comission  de Filial. Lu sempre el parla de quel che el ga imparà ai gióveni. Sicuro che fradei come Shigeo i ze una benedission par tuti i servi de Dio!

17. De acordo con Luca 6:38, cossa che i fradei pi veci i pol dar ai altri?

¹⁷ I fradei pi veci i ga una forte fede e i seita a viver leai a Geovà. El so esémpio el assa quei pi gióveni sicuri che la meio roba che ghen’è l’è imparar quel che la Bìblia la dise e meter in pràtica. Lori i ga visto che le robe le càmbia e che anca lori i ga de cambiar. Anca i fradei pi veci che i se ga batesà fà poco, i pol giutar tanto ai altri. Lori i pol parlar ai altri sora come l’è stà bel cognosser a Geovà, anca dopo veci. Quei pi gióveni i restarà tanto contenti de scoltar le so stòrie e de quel che i ga imparà. Sicuro che i fradei pi veci i sarà tanto benedidi par Geovà, parché i ze generosi e i parla ai altri sora le so bele stòrie. — Ledi Luca 6:38. *

18. Come i pi veci e i pi gióveni i pol giutarse un al altro?

¹⁸ Se i gióveni e i fradei pi veci i ze amighi, lori i pol giutarse un al altro. (Rom. 1:12) I pi veci i ga la sabedoria e la speriensa e i pi gióveni i ga la forsa e tanta voia de laorar. Quando i laora insieme come amighi, lori i loda a Geovà e i ze una benedission par la congregassion.