1. Cossa che Geovà el pol esser par noantri?

GESÙ, che l’è stà la prima creassion de Geovà, e tanti àngeli i fà parte dela fameia de Geovà. (Col. 1:15; Sal. 103:20) Quando Gesù l’era nela Tera, el ga insegnà ale persone che Geovà el podea esser come un Pare par lore se le fusse fedele a lu. Par esémpio, quando el ga parlà coi so dissìpoli, lu el ga dito che Geovà l’era el ‘so Pare e el Pare de lori’. (Gioani 20:17) Quando dedichemo la nostra vita a Geovà e se batesemo, scominsiemo a far parte dela fameia de servi de Geovà che i ama tanto un al altro. — Mar. 10:29, 30.

2. Cossa che ndaremo imparar in questo stùdio?

² Fursi pensemo che l’è fadiga creder che Geovà l’è un Pare che el ne ama. O fursi no savemo come mostrar che amemo nostri fradei e sorele. In questo stùdio, ndaremo imparar come Gesù el ne giuta a capir che Geovà l’è un Pare che el ne ama e che podemo esser so amighi. Ndaremo anca imparar come che podemo tratar i nostri fradei come Geovà.

3. Cossa che ne giuta a sentirse pi darente de Geovà?

³ Quando Gesù l’era qua nela Tera, lu el podea insegnar le persone a ciamar Geovà de Tuto Poderoso, Creador e Quel che l’è Dio par sempre. E saria giusto far questo parché questi tìtoli i ze nela Bìblia. (Gén. 49:25; Isa. 40:28; 1 Tim. 1:17) Ma Gesù el ne ga insegnà a ciamar a Geovà de Pare. Gesù el ga mostrà questo quando el ga insegnà ai so dissìpoli a pregar: “Pare nostro.” (Mat. 6:9) Lu el vol che vedemo a Geovà come lu el vede, o sia, come un Pare che el ne ama e come nostro amigo. Lu no’l vol mia che pensemo che Geovà no’l ga  sentimenti o che l’è rugno. Alora, la parola Pare la ne giuta a sentirse pròpio darente de Geovà.

4. Come savemo che Geovà el vol rivarse darente de noantri?

⁴ Te pensi che l’è fadiga veder a Geovà come un Pare che el te ama? Arquanti i pensa che si, parché i ze stati slevadi su sensa amor. Ma l’è tanto bon saver che Geovà el capisse quel che sentimo, e lu el vol esser nostro amigo. Par quela che la so Parola la dise: “Rivé darente de Dio e lu el rivarà darente de valtri.” (Tiago 4:8) Geovà el ne ama tanto e el vol esser el meio Pare par noantri.

5. De acordo con Luca 10:22, come Gesù el ne giuta a esser amighi de Geovà?

⁵ Gesù l’è la persona che la cognosse de pi a Geovà. Lu el ga mostrà le medèsime qualità che Dio e el ga dito: “Quel che el ga visto a mi el ga visto anca al Pare.” (Gioani 14:9) Alora Gesù el pol giutarne a esser amighi de Geovà. Lu l’è come un fradel pi vècio parché el ne insegna a rispetar e a obedir al nostro Pare. Lu anca el ne insegna a far quel che ghe piase a Geovà e a assarlo contento. Gesù anca el ne giuta a capir le bele qualità de Geovà, come par esémpio, el amor e la bontà. (Ledi Luca 10:22. *) Ndemo veder arquanti esempi che i mostra che Geovà l’è un Pare che el ne ama tanto.

6. Come savemo che Geovà el scoltea a Gesù?

⁶ Geovà el scolta i so fioi. Quando el so fiol, Gesù, l’era qua nela Tera, lu el ga pregà tante volte a Geovà e Geovà lo ga scoltà. (Luc. 5:16) Quando Gesù el gavea de dessider robe tanto importante, lu el preghea a Geovà e Geovà lo scoltea. Par esémpio, quando el ga bio de scòlier i dódese apòstoli. (Luc. 6:12, 13) Gesù el ga anca pregà quando l’era tanto preocupà, e Geovà lo ga scoltà. Poco vanti de esser tradio, el ga pregà de tuto el cuor sora quel che el ndaria infrontar. In quela ora, Geovà el ga scoltà e el ga anca mandà un àngelo par dar la forsa che el so caro Fiol el gavea de bisogno. — Luc. 22:41-44.

7. Come te te senti de saver che Geovà el scolta le to orassion?

 ⁷ Geovà el scolta i so servi anca ancoi. Lu el risponde ale so orassion nela ora giusta e dela meio maniera. (Sal. 116:1, 2) Varda el esémpio de una sorela dela Ìndia che la era drio sofrir tanto par causa dela ansietà. Ela la ga pregà a Geovà e la ga parlà tuto quel che l’era drio suceder. Ela la ga dito: “El JW Broadcasting^® de maio de 2019, che el parlea sora come dàrghene fora coi pensieri e cola ansietà, l’è stà pròpio quel che gavea de bisogno. L’è stà anca la risposta de Geovà ale me orassion.”

8. Come che Geovà el ga mostrà che el amea a Gesù?

⁸ Geovà el ghe volea tanto ben a Gesù e lo ga sempre giutà. Geovà el fà la medèsima roba anca con cada un de noantri. (Gioani 5:20) Geovà el ga giutà Gesù a seitar a gaver una forte fede, lo ga incoraià quando l’era preocupà e el ga tendesto de quel che el gavea de bisogno. Geovà el ga anca assà el so Fiol sicuro che lo amea e che l’era contento con lu. (Mat. 3:16, 17) Gesù mai el se ga sentio sol parché el so Pare l’era sempre drio giutarlo. — Gioani 8:16.

9. Che robe le ne assa sicuri che Geovà el ne ama?

⁹ Come Gesù, noantri ghemo visto tante volte che Geovà el ne ama. Par esémpio, Geovà el ne assa esser so amighi e el tende de noantri par meso dei nostri fradei. I nostri fradei i ne giuta e i ne incoraia quando semo desanimadi. (Gioani 6:44) Geovà anca el ne dà quel che ghemo de bisogno par seitar a gaver una forte fede. Lu anca el ne giuta a gaver quel che ghemo de bisogno par viver. (Mat. 6:31, 32) Quando pensemo nel amor che Geovà el ga par noantri, anca el nostro amor par lu el resta pi forte.

10. Come che podemo far compagno a Geovà?

¹⁰ Geovà el trata tuti i so servi con amor. Ma pol esser fadiga sentir e mostrar amor par i nostri fradei. Parché che questo sucede? Fursi parché semo de diverse culture e cada un l’è stà slevà su de una maniera. Questo pol anca suceder parché tuti femo sbali che i pol assar i nostri fradei desanimadi o disgustadi. Ma sicuro che podemo far qualcossa par far pi forte el amor intrà de noantri. Cossa che podemo far? Ghemo de far come Geovà e mostrar amor par tuti i so servi. (Efe. 5:1, 2; 1 Gio. 4:19) Ndemo veder cossa che imparemo del esémpio de Geovà.

11. De che maniere Gesù el ga mostrà compassion come Geovà?

¹¹ Geovà el mostra compassion. (Luc. 1:78) Una persona che la ga compassion la se preocupa quando la vede che qualchedun l’è drio sofrir, e la fà qualcossa par giutarlo e incoraiarlo. La maniera che Gesù el tratea le persone la ga mostrà che el gavea compassion compagno a so Pare. (Gioani 5:19) Quando el vedea le persone, lu el sentia compassion ‘parché le era maltratade e butade de una banda al’altra come piégore sensa pastor’. (Mat. 9:36) Ma Gesù anca el ga fato qualcossa par giutarle. Lu el ga guario maladi e el ga incoraià quei che i era strachi e stufi. — Mat. 11:28-30; 14:14.

12. Parla de un esémpio de come podemo mostrar compassion.

¹² Sol saremo boni de mostrar compassion par i nostri fradei se pensemo nele dificoltà che lori i infronta. Par esémpio, pol esser che una sorela la gàpia una bruta malatia. Fursi  la gàpia bisogno de aiuto, ma la parla poco dele so dificoltà. Alora, podemo domandarse: ‘Sarà che la ze bona de tender dela so fameia? Sarà che la ghe piaseria ricever aiuto par far de magnar o par netar la casa?’ O fursi un fradel no’l gàpia pi el so laoro. Sarà che te pol giutarlo in quel che el ga de bisogno fin che el cate nantro laoro? Fursi te pol giutarghe con un pochetin de soldi, ma lu no ghe ocore saver che te sì stà ti dàrghelo.

13-14. Come podemo esser generosi come Geovà?

¹³ Geovà l’è generoso. (Mat. 5:45) Lu el fà el sol vegner su tuti i giorni sensa che nissun lo domande. El caldo del sol el giuta le persone bone e rugne a viver. Geovà l’è tanto bondoso e generoso parché el ne dà tuto quel che ghemo de bisogno. Noantri lo amemo tanto par causa de questo. Alora, podemo far come Geovà? Ghemo de star atenti a quel che i nostri fradei i ga de bisogno e ndar giutarli.

¹⁴ Come Geovà, tanti fradei e sorele i mostra generosità de volentiera. Par esémpio, tanti fradei e sorele dele Filipine i ga perso le so case e le so robe par causa de una bruta desgràssia che la ga sucedesto nel ano de 2013. Alora, fradei de tuto el mondo suito i ga mandà donativi e i ga giutà a rangiar e a far su intorno de 750 case. Lori i ghe ga metesto manco de un ano par far tuto questo. Le Testimònie de Geovà anca le ze drio mostrar generosità nela pandemia dela COVID-19. Lore le ze drio far tanto sforso par giutar i so fradei. Alora, se suito giutemo i nostri fradei, mostremo che li amemo tanto.

15-16. De acordo con Luca 6:36, come che podemo far compagno a Geovà, el nostro Pare?

¹⁵ Geovà el mostra misericòrdia e el perdona. (Ledi Luca 6:36. *) Tuti giorni sentimo la misericòrdia del nostro Pare Geovà. (Sal. 103:10-14) Gesù el ga fato come so Pare parché el ga sempre mostrà misericòrdia e el ga perdonà i so dissìpoli, anca che i fusse  imperfeti. Gesù anca el ga dato la so vita par perdonar i so pecati. (1 Gio. 2:1, 2) Sicuro che amemo cada volta de pi a Geovà e a Gesù parché i ze misericordiosi e i perdona ai altri.

¹⁶ Quando perdonemo de volentiera, la fameia de Geovà la resta pi unida. (Efe. 4:32) Ma pol esser fadiga perdonar, par quela ghemo de sforsarse par farlo. Una roba che ga giutà una sorela la ze stata el artìcolo dela Sentinela che el parlea sora come perdonar de volentiera. * Ela la ga scrito: “Questo artìcolo el me ga giutà a pensar dela maniera giusta e a veder che perdonar l’è la meio roba de far. Go anca capio che, quando mi perdono, no vol dir che son de acordo con quel che la persona la ga fato o che no son restada disgustada. Go capio che perdonar vol dir no seitar disgustada con quel che ga sucedesto e sentir nantra volta la pace.” Cossita, quando perdonemo i nostri fradei de volentiera, mostremo che ghe volemo ben e anca che semo drio far compagno a Geovà, el nostro Pare.

17. De acordo con Mateo 5:16, come che podemo dar glòria al nostro Pare, Geovà?

¹⁷ Semo tanto contenti de far parte de una fameia che se vol tanto ben. Noantri no volemo che nissun parle mal de Geovà e del so pòpolo. Pitosto, volemo che tante altre persone anca le fae parte de questa fameia e le sirva a Geovà con noantri. Alora, volemo esser un bel esémpio e giutar le persone a acetar le bone notìssie. — Ledi Mateo 5:16. *

18. Cossa pol giutarne a no gaver paura de predicar?

¹⁸ Dele volte, le persone le ne dise su o le ne vien contra parché obedimo al nostro Pare, Geovà. Gheto paura de parlar ai altri sora quel che te credi par causa de queste robe? Alora, te pol esser sicuro che Geovà e el so Fiol i ndarà giutarte. Gesù el ga dito che i so dissìpoli no i gavea de preocuparse con cossa i gavea de parlar e come che i gavea de  parlar. Parché nò? Lu el ga dito: “Nela ora giusta ndaré saver quel che gavé de parlar. Parché no saré sol valtri che ndaré parlar, ma el spìrito santo del vostro Pare che el ndarà parlar par meso de valtri.” — Mat. 10:19, 20.

19. Parla de un esémpio de qualchedun che el ga predicà con coraio.

¹⁹ Varda el esémpio de Robert. Lu l’era drio studiar la Bìblia fea poco tempo, alora no’l gavea ancora imparà tanto. Un giorno, el ga bio de ndar davanti de un tribunal nela Àfrica del Sud. Con tanto coraio, lu el ga dito al giuis che no’l ndaria al esèrsito parché el amea ai so fradei. Lu l’era tanto grato de far parte dela fameia de Geovà. Alora, el giuis el ghe ga domandà: “Chi che i ze i to fradei?”. Robert no’l spetea quela domanda, ma el se ga ricordà del testo de quel giorno, che l’era Mateo 12:50. Questo testo el dise: “El me fradel, la me sorela e la me mare i ze quei che i fà la volontà del me Pare, che l’è nel cielo.” Anca se fea poco tempo che el studiea la Bìblia, Geovà el ghe ga dato spìrito santo par giutarghe a risponder a questa e a tante altre domande. Sicuro che Geovà l’è restà tanto contento con Robert! Geovà el resta tanto contento quando anca noantri se fidemo in lu e ghemo el coraio de parlar sora quel che credemo anca che no sìpia fàcile.

20. Cossa che te ghè de far? (Gioani 17:11, 15)

²⁰ Noantri ghemo el meio Pare che ghen’è e tanti fradei leai. Ma Sàtana e quei che i ghe va drio i ga tanta ràbia e i vol farne pensar che Geovà no’l ne ama. Lori anca i proa finir cola union che ghen’è intrà le Testimònie de Geovà. Alora, ghemo de sforsarse par seitar a far parte de questa fameia. Par quela che Gesù el ga domandà che Geovà el tendesse de tuti noantri e el giutesse la nostra fameia a seitar unida. (Ledi Gioani 17:11, * 15. *) E Geovà l’è pròpio drio far questo. Alora, sìpia sicuro che Geovà el te ama e che el ndarà sempre giutarte. Seita a esser grato de far parte de questa fameia e ama cada volta de pi i to fradei.