1-2. (a) De acordo con Proverbi 16:31, cossa ghemo de pensar sora i fradei pi veci? (b) Che domande ndaremo risponder in questo stùdio?

NTE UN POSTO de Arkansas, nei Stati Unidi, l’è fàcile catar sassi de tanto valor par tera. Ma come i ze sassi che nissun ancora el ga laorà par assarli bei, le persone le passa ma no le se nicorde che i ze sassi de tanto valor.

² Podemo dir che i fradei pi veci i ze come questi sassi pressiosi, parché lori i ga tanto valor. La Bìblia la dise che i cavei bianchi i ze come una bela corona. (Ledi Proverbi 16:31; * 20:29) Ma l’è fàcile no darghe el valor che i mèrita. Quando i pi gióveni i se nicorde che i pi veci i ga tanto valor, lori i pol guadagnar una roba che la ga de pi valor che tanti soldi e tante robe. In questo stùdio, ndaremo veder le risposte a tre domande: ‘Parché che Geovà el dà tanto valor ai fradei pi veci? Parché che lori i ze tanto importanti par la organisassion de Geovà? Come podemo imparar tanto coi so esempi?’

3. De acordo con Salmo 92:12-15, parché che i fradei pi veci i ze tanto pressiosi par Geovà?

³ I fradei pi veci, che i ze leai, i ze tanto pressiosi par Geovà. Geovà el capisse quel che lori i sente, li cognosse tanto ben e el dà tanto valor ale so bele qualità. I fradei pi veci i ga tanta sabedoria par causa del so laoro fedele a Geovà. Geovà el resta tanto contento quando lori i parla  quel che i sa ai pi gióveni. (Giò 12:12; Pro. 1:1-4) Geovà anca el dà tanto valor ala so perseveransa. (Mal. 3:16) Lori i ga infrontà arquante dificoltà nela vita, ma anca cossita, sempre i ga bio fede in Geovà. E adesso, la so speransa nel futuro la ze pi forte de quando i ga imparà la verità. Geovà el ghe vol tanto ben a questi fradei pi veci parché lori i seita a parlar sora el so nome. — Ledi Salmo 92:12-15. *

4. Cossa che pol incoraiar ai fradei pi veci?

⁴ Se te ghè belche una bela età, te pol esser sicuro che Geovà el se ricorda de quel che te ghè belche fato a lu. (Ebr. 6:10) Par esémpio, Geovà el resta tanto contento de ricordarse che te ghè sempre laorà nela predicassion. Lu anca el se ricorda che te ghè infrontà brute dificoltà, ma te ghè sempre obedio a quel che la Bìblia la dise. Lu anca el resta contento de saver che te ghè fato el to meio nela organisassion e che te ghè insegnà ai altri a far i so laori. Quando ga cambià qualche roba nela organisassion, te ghè fato el to meio par meterla in pràtica. Te ghè anca giutà e incoraià a quei che i laora de pi nela predicassion. El amor che Geovà el ga par ti el resta cada volta pi forte par causa de tuto quel che te fè. Lu el promete che no’l ndarà mai abandonar a quei che i ze leai. (Sal. 37:28) Te pol esser sicuro che lu el seitarà a tenderte. (Isa. 46:4) Alora, anca se te ghè una bela età, no stà pensar che no te ghè pi valor par la organisassion de Geovà. Te pol esser sicuro che te sì tanto pressioso!

5. De cossa i fradei pi veci i ga de ricordarse sempre?

⁵ I fradei pi veci no i ga pi la forsa che i gavea quando i era gióveni. Ma lori i ga tanta sabedoria parché i ga infrontà tante robe nela vita. E lori ancora i ze boni de far tanti laori nela organisassion de Geovà. Cossa podemo imparar dei fradei pi veci del passà e de ancoi?

6-7. Che altri esempi de servi fedeli pi veci ghen’è nela Bìblia?

 ⁶ La Bìblia la parla de arquanti servi fedeli de Geovà che i ga seità a laorar par lu anca quando i era pi veci. Par esémpio, Moisè el gavea intorno de 80 ani quando el ga scominsià a laorar come profeta de Geovà e come lìder dela nassion de Israel. Geovà el ga seità a doperar Daniel come profeta anca che el gavesse intorno de 90 ani. E pol esser che el apòstolo Gioani el gavea de pi de 90 ani quando Geovà lo ga doperà par scriver el libro de Apocalisse.

⁷ Nela Bìblia ghen’è arquanti esempi de servi fedeli che le persone no le parla tanto. Ma Geovà el ga vardà la so lealtà e el ghe ga benedio. Par esémpio, la Bìblia la parla poco de un omo che el gavea nome Simeon. Lu l’era giusto e el rispetea a Dio, e Geovà lo cognossea tanto ben. Alora, Geovà el ghe ga dato la benedission de veder el bambin Gesù e de far arquante professie sora Gesù e la so mare. (Luc. 2:22, 25-35) La Bìblia anca la parla dela profetisa Ana. Anca che la gavesse 84 ani, sempre la ndea al témpio. Par causa de questo, la ga bio la benedission de veder el bambin Gesù. Alora, semo sicuri che Geovà el ghe dea tanto valor a Simeon e a Ana. — Luc. 2:36-38.

8-9. Che esémpio mostra che le sorele védove le ze tanto pressiose par la organisassion de Geovà?

⁸ Anca ancoi ghen’è tanti fradei pi veci che i ze un bel esémpio par i gióveni. Varda el esémpio dela sorela Lois Didur. Ela la ze deventada pioniera spessial nel Canadà quando la gavea 21 ani. Dopo, ela e el so sposo John i ga laorà come superintendenti viaianti par tanti ani e dopo i ga anca laorà 20 ani nel Betel del Canadà. Quando la gavea 58 ani, ela e so sposo i ze stati convidadi par servir nela Ucrània. Sarà che lori i ga pensà: ‘Semo massa veci par ndar de star in nantro paese’? Nò! Invesse, lori i ga acetà el convite e el fradel John el ga laorà nela Comission de Filial dela Ucrània. Sete ani dopo, el fradel John l’è morto e la sorela Lois la ga seità a laorar nel Betel dela Ucrània. Adesso, la sorela Lois la ga 81 ani, la ze ancora nel Betel dela Ucrània e tuti la ghe vol tanto ben.

⁹ Le sorele che le ze védove come Lois, fursi no le gàpie la atension che le gavea quando i so sposi i era vivi. Ma queste brave sorele le ze tanto pressiose par Geovà, parché le ga sempre giutà i so sposi e le seita a servir a lu de maniera fedele. (1 Tim. 5:3) Lore anca le incoraia tanto ai pi gióveni.

10. Cossa che imparemo del esémpio del fradel Tony?

¹⁰ Tanti fradei pi veci i ze de star in posti par tenderli. Sicuro che lori i ze tanto pressiosi. Varda el esémpio del fradel Tony, che l’è de star nte un posto che tende dei pi veci.  Lu el se ga batesà quando el gavea 20 ani, in agosto de 1942, nela Pensilvánia, nei Stati Unidi. Pena dopo, l’è restà due ani e meso in preson parché el ga scoliesto no ndar al esèrsito. Lu e la so dona Hilda i ga bio due fioi e lori i ghe ga sempre insegnà sora Geovà. Tony l’è stà el superintendente presidente (ancoi l’è el cordinador del corpo de ansiani) in tre congregassion e el ga anca laorà come superintendente de assemblee de sircuito. Lu anca el ga fato riunion e studi bìblichi nte una preson. Ancoi, Tony el ga 98 ani e gnanca el pensa de fermarse de far el so meio a Geovà. Pitosto, el seita far el so meio insieme coi fradei dela so congregassion.

11. Come podemo mostrar che i fradei pi veci i ze tanto pressiosi?

¹¹ Come che podemo mostrar che i fradei pi veci i ze tanto pressiosi par noantri? I ansiani i pol domandar che lori i giute in qualche laoro nela congregassion. Noantri podemo visitarli o parlar con lori par meso del telèfono o par meso de vìdeo. Ghemo anca de dar atension ai fradei pi veci che i ze de star in posti par tenderli. Questi fradei i ga ancora de pi bisogno de atension e se no stemo atenti, podemo desmentegarse de far questo. Fursi arquanti i pensa che l’è fadiga parlar de lori o no i ghe piase de far questo. Alora podemo farghe domande e scoltarli con atension. Saremo tanto incoraiadi de scoltar le bele speriense che lori i ga nela organisassion de Geovà.

12. Cossa che fursi ghen’è nela nostra congregassion?

¹² Podemo restar maraveiadi col bel esémpio dei fradei pi veci nela congregassion. Varda el esémpio dela sorela Harriette. Ela la ga servio a Geovà par tanti ani nela so congregassion nela cità de Nova Jersey, Stati Unidi. Dopo, la ga bio de ndar de star cola so fiola. I fradei dela so nova congregassion i ga tolto tempo par cognosserla meio e i ga visto che la ze tanto pressiosa. La sorela Harriette la ghe ga contà a lori come che l’era el laoro de predicassion quando la ga imparà la verità intorno del ano de 1925. In quel tempo, la portea una scova de dente quando la ndea ala predicassion parché la volea gaverla se la fusse metesta in preson. E ga pròpio sucedesto questo due volte nel ano de 1933. E la ze restada in preson una stimana tute due volte. El so omo, che no’l servia a Geovà el ga tendesto dei tre fioi pìcoli che lori i gavea. Sicuro che ghe volemo tanto ben a sorele e fradei come Harriette.

13. Parché che i fradei pi veci i ze importanti par la organisassion de Geovà?

¹³ I fradei pi veci i ga tanto valor nela organisassion de Geovà. Lori i ga sentio le benedission de Geovà nela so vita e i ga anca visto come lu el ga benedio la so organisassion. Lori i ga anca imparà robe importante coi so sbali. Noantri ghemo de sempre ricordarse che questi fradei i ga tanta sabedoria e ghemo de proar imparar tuto quel che semo boni con lori. (Pro. 18:4) Alora, se te fè sforso par cognosserli meio, te gavarè la fede pi forte e te podarè imparar arquante robe con lori.

14. Cossa che Deuteronómio 32:7 ne incoraia a far?

¹⁴ Proa parlar coi fradei pi veci. (Ledi Deuteronómio 32:7. *) Fursi lori no i ghe vede pi tanto e no i ga tanta forsa par parlar  e caminar. Ma i vol ancora laorar par Geovà e i ze tanto bravi de far questo. (Ecl. 7:1) Ricòrdate sempre parché che lori i ze tanto pressiosi par Geovà, e seita a mostrarghe rispeto. Fà come Eliseo el ga fato con Elia. Lu el ga volesto restar dela banda de Elia fin el ùltimo giorno dela so vita. Lu el ga dito tre volte par Elia: ‘No vao mia assarte.’ — 2 Rè 2:2, 4, 6.

15. Che domande podemo far ai fradei pi veci?

¹⁵ Noantri mostremo che ghe volemo ben ai nostri fradei pi veci quando ghe femo domande con bontà. (Pro. 1:5; 20:5; 1 Tim. 5:1, 2) Te pol far queste domande: ‘Cossa te ga assà sicuro che le Testimònie de Geovà le parlea la verità? Come quel che te ghè infrontà te ga fato gaver una amicìssia pi forte con Geovà? Cossa che te ga giutà a seitar a servirlo contento? (1 Tim. 6:6-8) Quando lori i ze drio parlar, ghemo de scoltar le so stòrie con tanta atension.

16. Cossa che pol suceder quando i pi veci e i pi gióveni i discore?

¹⁶ Sicuro che i nostri fradei pi veci i resta tanto contenti de parlar dele benedission che i ga bio de laorar par Geovà. Quando i fradei pi veci e i pi gióveni i discore, tuti i due i ze incoraiadi. (Rom. 1:12) I pi gióveni i resta pi sicuri che Geovà el tende de quei che i ze fedeli, e quei pi veci i se sente amadi par i altri.

17. Parché che podemo dir che i nostri fradei pi veci i resta cada volta pi bei?

¹⁷ Quando ghemo una bela età, fursi pensemo che no semo pi bei come una volta. Ma par Geovà, quei che i ze leai i resta cada volta pi bei. (1 Tes. 1:2, 3) Parché? Parché lori i ga assà che Geovà li giutesse a gaver bele qualità. Alora, se se sforsemo par cognosser e imparar coi fradei pi veci, ndaremo veder cada volta de pi che i ze tanto pressiosi!

18. Cossa che ndaremo imparar nel pròssimo stùdio?

¹⁸ Nela congregassion, ghen’è pi union quando i fradei pi gióveni i dà valor ai pi veci, ma anca quando i pi veci i dà valor ai pi gióveni. Nel pròssimo stùdio, ndaremo veder come che i fradei pi veci i pol far questo.