1. Come che arquanti i se sente quando qualchedun che i ama el se ferma de servir a Geovà?

SICURO che restemo tanto disgustadi se un amigo o qualchedun dela nostra fameia el se ferma de servir a Geovà. La sorela Hilda * la ga dito: “Fea 41 ani che èrino maridadi quando el me omo l’è morto. Mi pensea che questo l’era stà el pedo colpo dela me vita. Ma l’è stà tanto pi bruto quando el me fiol el ga assà la so dona e i so fioi, e el se ga fermà de servir a Geovà.”

2-3. De acordo con Salmo 78:40, 41, come Geovà el se sente quando i so servi i lo abandona?

² Proa imaginar come Geovà l’è restà disgustà quando arquanti àngeli i lo ga abandonà. (Giuda 6) Proa anca imaginar come el restea disgustà quando i israeliti, che lu el amea tanto, i lo abandonea una volta drio man. (Ledi Salmo 78:40, 41. *) Alora, te pol esser sicuro che Geovà el resta disgustà quando un amigo o qualchedun dela to fameia lo abandona. Geovà el capisse quel che te senti e el ndarà darte el coraio e el aiuto che te ghè de bisogno.

³ In questo stùdio, ndaremo veder cossa che no ghemo de pensar se qualchedun che amemo el se ga fermà de servir a Geovà. Ndaremo anca imparar come Geovà el ne giuta a infrontar una roba cossita. Dopo, ndaremo anca imparar come che podemo giutar la fameia de qualchedun che el ga abandonà a Geovà.

4. Come che tanti genitori i se sente quando un fiol el abandona a Geovà?

⁴ Quando un fiol el abandona a Geovà, pol esser che el pare o  la mare i se domande se i podaria gaver fato altre robe par giutarlo a seitar servir a Geovà. El fradel Luke el ga dito dopo che el so fiol el ga abandonà a Geovà: “Mi pensea che gavea la colpa. Gavea anca bruti insogni sora questo, piandea e me sentia tanto mal.” Anca la sorela Elizabeth la ga infrontà una roba cossita. Tante volte la gavea bruti pensieri e la pensea: “Cossa che go fato de sbalià? Penso che no go fato el meio che podea par insegnar el me fiol sora Geovà.”

5. Chi che ga la colpa quando una persona abandona a Geovà?

⁵ Ghemo de ricordarse che Geovà el ga dato a tute le persone la libertà de scòlier. Questo vol dir che tute le pol scòlier se le va obedir a Geovà o nò. Par esémpio, arquanti gióveni no i ga bio bravi genitori, e anca cossita, i ga scoliesto servir e esser fedeli a Geovà. Tanti gióveni i ga bio bravi genitori, che i ga fato el meio che i podea par insegnarghe i prinsipi dela Bìblia. Ma dopo grandi, questi gióveni ga dessidio abandonar a Geovà. Alora, se te sì disgustà parché el to fiol el ga abandonà a Geovà, ricòrdate che lu el ga fato la so scólia. (Gio. 24:15) No stà pensar che questo ga sucedesto par colpa toa.

6. Come un fiol el pol sentirse quando un dei so genitori el abandona a Geovà?

⁶ Pol esser che una mare o un pare el se ferme de servir a Geovà e anca abandone la fameia. (Sal. 27:10) Sicuro che questo l’è tanto bruto par i fioi parché lori i rispeta i so genitori e li vede come un esémpio. El pare de Esther el ga abandonà a Geovà. Ela ga dito: “Tante volte, mi piandea parché me pare no l’era drio assar Geovà sol par un tempo. Lu el gavea scoliesto no servirlo pi. Mi me preocupea tanto col me pare parché mi lo amo tanto. Arquanti giorni mi infrontea bruti colpi de ansietà.”

7. Cossa che Geovà el pensa de un gióveno che so pare o so mare el se ga fermà de servir a Geovà?

⁷ Se te sì gióveno e to pare o to mare el se ga fermà de servir a Geovà, te pol esser sicuro che tuti noantri restemo disgustadi e che Geovà el capisse ben quel che te sì drio sentir. Geovà el te ama tanto e el resta tanto contento de veder che te sì leal. E anca i fradei i resta contenti con questo. Ricòrdate che anca i to genitori i ga la libertà de scòlier e che no te ghè la colpa se lori i fà una bruta dessision. Tuti quei che i ze dedicadi e batesadi i ga de dessider cossa i ndarà far. — Gàl. 6:5.

8. Cossa podarìssino far se semo drio spetar che qualchedun el torne a servir a Geovà? (Vedi anca el quadro “ Torna a Geovà!”.)

⁸ Sicuro che quando qualchedun che amemo el assa de servir a Geovà, noantri spetemo che lu el torne. Cossa che podarìssino far se semo drio spetar che questo suceda? L’è tanto importante seitar a gaver una forte fede. Cossita, te sarè un bon esémpio par la fameia e par quel che el se ga fermà de servir a Geovà. Questo ndarà anca giutarte a dàrghene fora con bruti sentimenti. Ma come che te pol far pi forte la to fede?

9. Cossa che te pol far par seitar a gaver una forte fede? (Vedi anca el quadro “ Testi che i pol darte consolo”.)

⁹ Fà tuto quel che te pol par seitar a gaver una forte fede. Te ghè anca de giutar la to fameia a seitar a gaver una forte fede. Come che te pol  far questo? Ledi sempre la Bìblia, pensa sora quel che te ledi, e va sempre ale riunion. Varda cossa che Joanna, che so pare e so sorela i ga assà de servir a Geovà, la ga dito: “Dopo che mi ledo nela Bìblia sora Abigail, Ester, Giò, Giusepe e Gesù, me sento pi tranquila. I so esempi i me giuta a gaver bele robe in mente e a dàrghene fora col sofrimento. Anca le mùsiche del site le me incoraia tanto.”

10. Come che el Salmo 32:6-8 pol giutarte quando te sì disgustà?

¹⁰ Parla a Geovà come che te te senti. Quando te sì disgustà, no stà mai assar de pregar a lu. Domàndaghe el aiuto par veder le robe dela maniera giusta, che el te dae sabedoria e che el te insegne cossa te ghè de far. (Ledi Salmo 32:6-8. *) Pol esser che sìpia tanto difìcile parlar a Geovà pròpio quel che te senti. Ma te pol esser sicuro che el te capisse. Lu el te ama tanto e el vol che te parli a lu sora tuto quel che te senti. — Éso. 34:6; Sal. 62:7, 8.

11. De acordo con Ebrei 12:11, parché che ghemo de fidarse nela maniera che Geovà el dissiplina? (Varda anca el quadro “ La dissiplina la ze una prova del amor de Geovà”.)

¹¹ Se una persona la fà un pecato, fursi no la podarà pi esser Testimònia de Geovà par un tempo. Questa la ze una dissiplina de Geovà e una prova che el ama a tuti, anca la persona che la ga sbalià. (Ledi Ebrei 12:11. *) Fursi qualchedun el ga parlà mal dei ansiani parché i ga dessidio che una persona no la ze pi Testimònia de Geovà. Ma pol esser che lu no’l parle  dei sbali che questa persona la ga fato. E ghemo de ricordarse che nissun el sa pròpio de quel che ga sucedesto. Alora mostra che te sì de acordo con quel che i ansiani i ga dessidio. Sìpia anca sicuro che lori i ga dessidio far questo de acordo coi prinsipi dela Bìblia e che l’è stà Geovà che el ghe ga dato questo laoro. — 2 Cró. 19:6.

12. Che robe bone le ga sucedesto con quei che i ga obedio a Geovà?

¹² Se semo de acordo con quel che i ansiani i ga dessidio, podemo giutar la persona che la ga abandonà a Geovà a tornar a servirlo. Varda nantra volta el esémpio de Elizabeth, che el so fiol el ga abandonà a Geovà dopo grando. Ela ga dito: “L’è stà tanto fadiga no parlar pi col nostro fiol. Ma quando lu l’è tornà a Geovà, el ga dito che el gavea pròpio de esser dissiplinà. El ga anca dito che el ga imparà tante robe. Questo me ga giutà a capir che la dissiplina de Geovà la ze sempre la meio.” Mark, el so omo de Elizabeth, el ga dito: “Un tempo dopo, el nostro fiol el me ga dito che una dele robe che lo ga giutà a tornar a Geovà l’è stà che ghemo obedio a Geovà. Mi ringràssio tanto a Geovà, parché el ne ga giutà a far questo.”

13. Cossa che pol giutarte se te sì drio sofrir par causa de bruti sentimenti?

¹³ Parla con amighi che i capisse quel che te sì drio sentir. Parla con bravi fradei e sorele che i te giute a no perder la speransa. (Pro. 12:25; 17:17) Joanna, che ghemo parlà prima, la ga dito: “Mi me sentia tanto sola, ma quando parlea con amighi che me fidea, me sentia tanto meio.” Ma cossa te ghè de far se qualchedun el te dise una roba che te fà restar ancora pi disgustà?

14. Parché che ghemo de portar passiensa e perdonar i nostri fradei?

¹⁴ Fursi i fradei i ndarà parlar qualcossa che no te piase mia o gnanca i saverà cossa parlarte. (Tiago 3:2) Alora, gàpia passiensa con lori parché tuti noantri sbaliemo. Ricòrdate de quel che el apòstolo Paolo el ga dito: “Seité a soportarve un al altro e a perdonarve del tuto un al altro, anca se qualchedun el ga rason par brontolar contra nantra persona.” (Col. 3:13) Varda el esémpio de una sorela che el so fiol el ga abandonà a Geovà. Ela la ga dito: “Arquanti fradei i ga proà giutarme, ma i me ga disgustà. E Geovà el me ga giutà a perdonarli.” Cossa la congregassion la pol far par giutar la fameia de una persona che no la ze pi Testimònia de Geovà?

15. Cossa podemo far par giutar la fameia de qualchedun che el se ga fermà de servir a Geovà?

¹⁵ Mostra che te ami la fameia de quel che el se ga fermà de servir a Geovà. La sorela Miriam, che el so fradel el ga abandondà a Geovà, la era preocupada con cossa ndaria suceder quando la fusse ale riunion. Ela la ga dito: “Mi gavea paura de quel che i altri i ndaria parlar. Ma i fradei i ze stati pròpio bravi con mi. Anca lori i era disgustadi con quel che gavea sucedesto e no i me ga dito gnente de bruto sora el me fradel. Par causa del aiuto de lori, no me go mai sentio sola.” Nantra sorela la ga dito:  “Quando el nostro fiol el se ga fermà de servir a Geovà, tanti cari fradei i ze vegnesti darne consolo. Arquanti fin i ga dito che no i savea cossa dir, ma tanti i ga piandesto con mi e i me ga scrito carte che le me ga dato coraio. Tuto questo che lori i ga fato me ga giutà tanto.”

16. Come i fradei i pol seitar a giutar la fameia de quel che el ga abandonà a Geovà?

¹⁶ Seita a giutar la fameia dela persona che la se ga fermà de servir a Geovà. Adesso, lori i ga ancora de pi bisogno che te li ami e che te li incoraie. (Ebr. 10:24, 25) Dele volte, arquanti fradei i se ferma de parlar cola fameia de quel che el ga abandonà a Geovà. Par causa de questo, la fameia la pol sentirse come se anca ela la gavesse abandonà a Geovà. Ma no podemo assar che questo suceda. I gióveni, che i so genitori i se ga fermà de servir a Geovà, i ga ancora de pi bisogno che i fradei i ghe lode e i ghe dae coraio. Varda el esémpio de Maria, che el so omo el ga abandonà a Geovà e la fameia. Maria la ga dito: “Arquanti dei me amighi i ze vegnesti qua casa, i ne ga fato de magnar e i ne ga giutà a far el stùdio in fameia. Anca lori i era disgustadi con questo e i ga piandesto con mi. E quando altri i ga scominsià a parlar sbeteghe sora mi, i me amighi i ze restadi dela me banda. Questo me ga dato tanto coraio!” — Rom. 12:13, 15.

17. Cossa che i ansiani i pol far par consolar la fameia de qualchedun che el ga abandonà a Geovà?

¹⁷ Se te sì un ansiano, giuta la fameia de quel che el ga abandonà a Geovà. Te ghè de giutarli a far pi forte la so fede e te ghè anca la responsabilità de consolarli. (1 Tes. 5:14) Par esémpio, te pol parlar con lori vanti e dopo dele riunion, ndar ale so case e pregar con lori. Podé anca laorar con lori nela predicassion. E se te pol, proa convidarli par la to adorassion in fameia. I ansiani i sa che i ga de mostrar amor, darghe atension e tender dele piegorete de Geovà che le ze drio patir. — 1 Tes. 2:7, 8.

18. De acordo con 2 Piero 3:9, cossa che Geovà el speta de quei che i se ga fermà de servirlo?

¹⁸ Sicuro che Geovà no’l vol che nissun el sìpia destruto. Invesse, lu el vol che tuti i se ciame  grami. (Ledi 2 Piero 3:9. *) Anca se una persona la ga fato un bruto pecato, la so vita ancora la ze tanto pressiosa par Dio. Semo sicuri de questo parché lu el ga dato la vita del so Fiol, che el ama tanto, par salvar a tuti i pecadori. Con tanto amor, Geovà el proa giutar quei che i se ga fermà de servirlo a tornar a lu. E el ga la speransa che i acete el so aiuto compagno al fiol dela ilustrassion de Gesù che el se ga ciamà gramo e l’è tornà casa. (Luc. 15:11-32) Tanti che i ga abandonà a Geovà i ze tornadi ala organisassion e i fradei li ga ricevesto tanto ben. La sorela Elizabeth, che ghemo parlà vanti, la ze restada tanto contenta quando el so fiol l’è tornà ala congregassion. Ela la ga dito: “Mi son tanto grata a tuti quei che i me ga incoraià a nò perder la speransa.”

19. Parché podemo sempre fidarse in Geovà?

¹⁹ Fìdate sempre in Geovà. Lu l’è un Pare tanto generoso e che el ama tanto tuti quei che i lo ama e i lo adora. Alora, semo sicuri che tuto quel che lu el ne insegna l’è el meio par noantri. Podemo anca esser sicuri che Geovà mai el va abandonarne, anca quando semo drio passar par una bruta dificoltà. (Ebr. 13:5, 6) Mark, che ghemo parlà vanti, el ga dito: “Geovà mai el ne ga abandonà. Sempre che passemo par dificoltà, lu el resta dela nostra banda.” Geovà el seitarà a dar el poder che te ghè de bisogno. (2 Cor. 4:7) Par quela, anca se qualchedun che te ami el ga assà de servir a Geovà, te pol esser sicuro che te sì bon de seitar fedele e mai perder la speransa.