1. Parché che belche saveino che le persone le ghe faria fadiga fidarse una nel’altra?

 ANCOI le persone le ghe fà fadiga fidarse una nel’altra. Tanti no i ze boni de fidarse nei so amighi, visigni e gnanca nela so fameia. Dele volte, lori no i se fida nei altri parché i vede che polìtichi, lìderi religiosi e altre persone le fà tante robe sbaliade. Ma noantri belche saveino che saria cossita. La Bìblia la dise che nei ùltimi giorni tanti ‘no i saria leai, i contaria busie sora i altri e i saria traditori’. Alora, le persone le ze drio far compagno el dio de questo mondo, che no l’è mia de fidarse. — 2 Tim. 3:1-4; 2 Cor. 4:4.

2. (a) In chi che podemo fidarse del tuto? (b) Cossa che arquanti i se domanda?

² Noantri semo servi de Geovà, e par quela, savemo che podemo fidarse del tuto in lu. (Ger. 17:7, 8) Semo sicuri che lu el ne ama e che no’l ndarà mai abandonarne. (Sal. 9:10) Noantri se fidemo anca in Gesù Cristo, parché lu el ga dato la so vita par noantri. (1 Pie. 3:18) E anca savemo che quel che la Bìblia la dise l’è de fidarse. (2 Tim. 3:16, 17) Alora, podemo fidarse del tuto in Geovà, in Gesù e nela Bìblia. Ma arquanti i se domanda: ‘Sarà che posso fidarme nei fradei e nele sorele dela congregassion?’ Adesso, ndaremo imparar parché sempre podemo fidarse in lori.

3. Che granda benedission ghemo? (Mar. 10:29, 30)

³ Geovà el ga scoliesto noantri par far parte dela so fameia in tuto el mondo e questa la ze una granda benedission. (Ledi Marco 10:29, 30. *) I nostri fradei e sorele de tuto el mondo i ama a Geovà e i se sforsa par viver de una maniera che lo assa contento. Anca se semo de léngue e culture difarente e no se ghemo mai cognossesto,  semo come amighi. Noantri restemo tanto contenti de adorar a Geovà tuti insieme! — Sal. 133:1.

4. Parché che ne ocore el aiuto dei nostri fradei?

⁴ Adesso, ne ocore esser ben unidi coi nostri fradei. Lori i ne giuta a dàrghene fora coi nostri problemi, a far el nostro meio a Geovà e a gaver una amicìssia pi forte con lu. (Rom. 15:1; Gàl. 6:2; 1 Tes. 5:11; Ebr. 10:23-25) Proa pensar come saria fadiga viver in questo mondo de Sàtana sensa el aiuto e la protession dela congregassion. Questa union la sarà ancora pi importante quando Sàtana e quei che i ghe va drio i ne vegnerà contra.

5. Parché che fursi ne fae fadiga fidarse nei fradei?

⁵ Ma pol esser che ne fae fadiga fidarse nei fradei parché qualchedun el ne ga belche disgustà tanto. Par esémpio, fursi un fradel no’l ga mia fato quel che el ne gavea prometesto o el ga parlà in volta una roba che no voleino che el parlesse. Se ne ga belche sucedesto una roba cossita, ne fà fadiga fidarse nei altri. Ma cossa che pol giutarne a fidarse nei fradei?

6. Parché che el amor el pol giutarne a fidarse nei nostri fradei? (1 Corinti 13:4-8)

⁶ Ghemo confiansa nei nostri fradei parché li amemo. In 1 Corinti 13, el apòstolo Paolo el spiega parché el amor el ne giuta a fidarse in tuti i fradei, anca in quei che i ne ga belche disgustà. (Ledi 1 Corinti 13:4-8. *) Par esémpio, lu el ga  dito che “el amor l’è passiente e bon”. Alora, ghemo de mostrar passiensa coi nostri fradei e tratarli ben, anca quando i fà qualcossa che ne disgusta. Volemo far compagno a Geovà che el porta passiensa con noantri, anca se femo un bruto pecato. Paolo anca el ga dito che ‘el amor no’l resta suito cativo e no’l ghe bada el dano’. (1 Cor. 13:4, 5) Questo vol dir che no ghemo de ‘ofenderse suito’. (Ecl. 7:9) La Bìblia anca la dise che, se restemo inrabiadi con qualchedun, ne toca proar far la pace in quel stesso giorno. (Efe. 4:26) “No volemo badarghe el dano”, o sia, no volemo seitar ricordarse dei sbali che i fradei i fà contra noantri.

7. Che prinsipi de Mateo 7:1-5 i ne giutarà a fidarse nei nostri fradei?

⁷ Se proemo veder i nostri fradei compagno Geovà li vede, sarà pi fàcile fidarse in lori. Geovà el ama tuti i nostri fradei e lu no’l seita a pensar nei sbali che i fà, come se li metesse par scrito. Alora, noantri ghemo de far compagno a Geovà. (Sal. 130:3) Pitosto de vardar i difeti dei altri, ghemo de vardar le so qualità. (Ledi Mateo 7:1-5. *) L’è importante anca ricordarse che “el amor el crede in tute le robe”. Alora, ne ocore creder che i fradei i ga caro de far quel che l’è bon e che, se i ne ga assà disgustà, no l’è stà aposta. (1 Cor. 13:7) Magari, questo no vol mia dir che se fidemo in tuti. Geovà el vol che noantri se fidemo in quei che i mèrita la nostra confiansa. *

8. Come che te pol fidarte de pi nei to fradei?

⁸ Sicuro che ghe vol tempo par gaver rispeto par una persona. L’è cossita anca cola confiansa. Par quela, ghe vol tempo par fidarse in qualchedun. Ma come che ti te pol fidarte de pi nei to fradei? Proa cognosserli ben. Te pol parlar con lori quando sì insieme nele riunion o nela predicassion. Fursi no te volarè parlar tuto quel che te senti o che te sucede a una persona che no te cognossi tanto ben. Ma se te ghè passiensa, te vederè che lori i ze de fidarse. Alora, te podarè contarghe tuto quel che te vol. (Luc. 16:10) Ma cossa che te ghè de far se un fradel el te disgusta? Porta passiensa e no stà suito assar de esser so amigo gnanca de fidarte nei altri. Adesso, ndemo veder esempi de arquanti servi de Geovà del passà che i ga seità a fidarse nei altri anca dopo che i ze stati disgustadi.

9. (a) Come che Ana la ga mostrà che la se fidea in Geovà? (b) Come che el esémpio de Ana pol giutarte a fidarte in Geovà? (Vedi la ilustrassion.)

⁹ Sito belche restà disgustà par via de quel che un fradel che el ga laori importanti  nela congregassion el ga fato? Alora, quel che ga sucedesto con Ana pol giutarte. In quela època, el somo sasserdote Eli e i so fioi i gavea laori tanto importanti nela adorassion a Geovà in Israel. Ma i fioi de Eli i fea imoralità e altre robe sbaliade, e lu no’l ghe dea la dissiplina che ghe ocorea. Ancora cossita, Geovà el ga assà che el seitesse a esser somo sasserdote par un tempo. Anca se Ana la savesse de quel che l’era drio suceder, la ga seità a adorar a Geovà nel tabernàcolo. Una volta, quando Eli la ga visto drio piander, el ga pensà che la era ciuca e el ghe ga dito su. (1 Sam. 1:12-16) Ancora cossita, Ana la ga prometesto che se la gavesse un fiol, lo portaria al tabernàcolo. E ela la savea che l’era Eli che ndaria tenderlo. (1 Sam. 1:11) Geovà el ga benedio Ana con un fiol, Samuel. (1 Sam. 1:17-20) E cossa ga sucedesto coi fioi de Eli? Geovà li ga dissiplinà nela ora giusta. — 1 Sam. 4:17.

10. Cossa che Davi el ga seità a far anca dopo che l’è stà tradio?

¹⁰ Sito belche restà disgustà par causa de quel che un amigo te ga fato? Alora, te pol imparar con quel che ga sucedesto col rè Davi. Absalon, so fiol de Davi, l’è ndato contra lu parché el volea esser rè nel so posto. E Aitofel, che l’era un caro amigo de Davi, lo ga tradio. Sicuro che Davi el ga sofrio tanto quando so fiol e so caro amigo i lo ga tradio. Ma ancora cossita, Davi el ga seità fidarse nei altri. Par esémpio, lu el ga seità a fidarse in Usai, che l’era un dei so cari amighi. Invesse de giutar Absalon, Usai el ga riscià so vita par giutar Davi. Par quela, Davi el savea che el podea fidarse in lu. — 2 Sam. 17:1-16.

11. Come che un servo de Nabal el se ga fidà in Abigail?

¹¹ Varda anca el esémpio de un servo de Nabal. Davi e i so òmini i gavea protegesto i servi de Nabal, un omo tanto sior. Un tempo dopo, Davi el ga domandà che Nabal el ghe desse qualcossa de magnar a lu e ai so òmini, ma Nabal no’l ghe ga dato gnente. Alora, Davi l’è restà tanto inrabià che el ga dessidio copar Nabal e i so òmini. Ma quando un servo de Nabal lo ga savesto, lu no’l ga scampà via. Invesse, el  ga contà tuto quel che l’era drio suceder a Abigail, so dona de Nabal. Quel servo el podaria esser copà, ma lu el se ga fidà in Abigail, parché ela la fea bone dessision. E questo l’è stà tanto bon. Abigail la ga mostrà coraio quando la ga parlà con Davi, e lu el ga desistio de copar quele persone. (1 Sam. 25:2-35) Anca ela la se ga fidà che Davi el faria quel che l’era giusto.

12. Come che Gesù el ga mostrà che el se fidea nei so dissìpoli?

¹² Gesù el se fidea nei so dissìpoli anca se lori i sbaliesse. (Gioani 15:15, 16) Par esémpio, Tiago e Gioani i ga domandà a Gesù una posission pi importante nel Regno de Dio. Ma Gesù no’l ga dito che lori i era drio servir a Geovà sol par guadagnar qualcossa e gnanca che no i podaria pi esser so apòstoli. (Mar. 10:35-40) Un tempo dopo, quando Gesù l’è stà metesto in preson, tuti i so dissìpoli i lo ga abandonà. (Mat. 26:56) Ancora che i so dissìpoli i fusse imperfeti, Gesù el ga seità a fidarse in lori e li ga “amadi fin el fin”. (Gioani 13:1) E dopo che l’è stà ressussità, Gesù el ga dato ai so 11 apòstoli fedeli el importante laoro de predicar e tender dele so pressiose piégore. (Mat. 28:19, 20; Gioani 21:15-17) La confiansa de Gesù in questi òmini no la ze stata par gnente. Lori i ga seità fedeli tuta la vita. Sicuro che Ana, Davi, el servo de Nabal, Abigail e Gesù i ze un bel esémpio parché i ga seità a fidarse nele persone, ancora che lore le sbaliesse.

13. Parché che pol esser fadiga fidarse nei altri?

¹³ Restemo tanto disgustadi se parlemo qualcossa dela nostra vita a una persona e ela la ghe conta ai altri. Varda quel che ga sucedesto con una sorela. Ela la se fidea nte un ansiano e la ghe ga contà una roba soa. Magari, nel giorno drio, la dona de quel ansiano la ga proà incoraiar questa sorela. Sicuro che lu el gavea contà ala so dona quel segreto. Questa sorela la ze restada tanto disgustada che no la se fidea pi nei ansiani. Ma, ela la ze ndata in serca de aiuto e la ga parlà a nantro ansiano tuto quel che gavea sucedesto. Cossita, ela la ga bio aiuto e la ze stata bona de seitar fidarse nei ansiani.

14. Cossa che ga giutà un fradel a fidarse nantra volta in due ansiani?

¹⁴ Un fradel l’è restà disgustà con due ansiani fea un tempo e lu no l’era bon de fidarse in lori. Ma el ga scoltà un bravo fradel dir che el “nostro nemigo l’è Sàtana e nò i fradei”. Lu el ga pensà tanto sora quel che el gavea scoltà e quel che el gavaria de far. Alora, el ga pregà par domandar aiuto de Geovà. Cossita, lu l’è stà bon de far la pace con quei due ansiani.

15. Parché che ghe vol tempo par fidarse nantra volta in qualchedun? Parla de un esémpio.

¹⁵ Sicuro che una persona la resta disgustada se ghe toca assar de far un laoro nela congregassion. Una sorela de nome Grete e so mare le se ga sentio pròpio cossita. Nela època del Nazismo, l’era proibio adorar a Geovà nela Alemagna. La sorela Grete la fea un laoro che ghe piasea tanto, che l’era far còpie dela Sentinela par dar ai fradei. Ma quando i fradei i ga savesto che el so pare l’era contra le Testimònie de Geovà, no i la ga pi assà far quel laoro. E pedo ancora, i fradei i se ga fermà de darghe le reviste e saludarle quando le vedea. Proa pensar come la ze restada disgustada! Sicuro che ghe ga volesto tanto tempo par perdonar e fidarse  in quei fradei nantra volta. Ma ela la ga capio, che se Geovà gavea perdonà quei fradei, ela la gavea de far la stessa roba. *

16. Parché che ghemo de far el nostro meio par seitar fidarse nei nostri fradei?

¹⁶ Anca se qualchedun el te ga disgustà, l’è importante che te te sforsi par seitar fidarte nei altri. Fursi ghe meterà tempo, ma sarà tanto bon par ti. Par esémpio, se te magnessi qualcossa che te fesse mal, no te ndarissi pensar de no magnar pi gnente. Dela medèsima maniera, no te ndarè pensar che no te pol pi fidarte nei fradei sol parché qualchedun el te ga belche disgustà. Tuti noantri sbaliemo. Ma quando se fidemo nei nostri fradei nantra volta, restemo pi felici e semo boni de giutar i fradei a fidarse un nel altro.

17. (a) Parché che ne ocore fidarse nei fradei? (b) Cossa che ndaremo imparar nel pròssimo stùdio?

¹⁷ Ancoi, l’è tanto fadiga fidarse nele persone. Ma noantri se fidemo nei nostri fradei parché li amemo. Par quela semo pi unidi, felici e ghemo el aiuto che ne ocore par infrontar le dificoltà che le vegnarà pi avanti. Ma fursi, qualchedun el te ga belche disgustà e te fà fadiga fidarte nei altri. Alora cossa che pol giutarte? Veder le robe come Geovà le vede. Mostra amor ai fradei, stùdia i esempi e i prinsipi dela Bìblia e meteli in pràtica. Cossita, te sarè bon de seitar fidarte nele persone. Questo ndarà giutarte a gaver boni amighi. (Pro. 18:24) Ma ghemo de ricordarse che anca noantri ghemo de sforsarse par esser persone de fidarse. Nel pròssimo stùdio, ndaremo veder quel che ghemo de far par gaver la confiansa dei nostri fradei.