STÙDIO 39
Gheto to nome scrito nel “libro dela vita”?
‘E davanti de lu l’è stà scrito un libro de ricordassion par quei che i gavea temor de Geovà.’ — MAL. 3:16.
CÀNTICO 61 Avanti, Testimònie!
COSSA CHE NDAREMO IMPARAR? *
Dela època de Abel, Geovà l’è drio scriver el nome de tante persone nel “libro dela vita” (Vedi i paràgrafi 1 e 2.)
1. De acordo con Malachia 3:16, che libro Geovà l’è drio scriver, e cossa scrìvelo?
FÀ BELCHE miliari de ani che Geovà l’è drio scriver un libro. La Bìblia la dise che questo libro el ga nome “libro de ricordassion”, “libro dela vita” e “rolo dela vita”. (Ledi Malachia 3:16; * Apo. 3:5; 17:8) In questo stùdio, ndaremo ciamarlo de “libro dela vita”. Geovà el scrive in questo libro el nome dei so servi fedeli. El primo nome l’è stà de Abel, ma ghen’è belche milioni de altri nomi. * — Luc. 11:50, 51.
2. (a) El libro dela vita el ga el nome de chi? (b) Cossa che ghemo de far par gaver el nostro nome scrito in questo libro?
2 In questo libro, ghen’è el nome de tuti quei che i adora a Geovà e rispeta el so nome. Queste persone le ga la speransa de viver par sempre. Cossa che noantri ghemo de far par gaver el nostro nome scrito in questo libro? Ne ocore gaver una forte amicìssia con Geovà e fede nel sacrifìssio de Gesù Cristo. (Gioani 3:16, 36) Tuti quei che i ga la speransa de viver nel cielo o nela Tera i vol gaver el so nome scrito in questo libro!
3-4. (a) Sarà che quei che i ga el so nome scrito nel libro dela vita i pol esser sicuri che i ndarà ricever la vita eterna? Spiega. (b) Che domande ndaremo risponder in questo stùdio e nel pròssimo?
3 Sarà che quei che i ga el so nome scrito nel libro dela vita ancoi i pol esser sicuri che i ndarà ricever la vita eterna? Nò. Varda quel che Geovà el ga dito a Moisè: “Vao tirar via del me libro quel che el peca contra mi.” (Éso. 32:33) L’è come se Geovà el gavesse scrito el nome de queste persone col làpis. Questo vol dir che lu el pol tirar via questi nomi del so libro. (Apo. 3:5, nota.) Alora, ghemo de far el nostro meio se volemo che el nostro nome el sìpia scrito nel libro dela vita come che con tinta. Cossita, el restarà là par sempre.
4 Quando pensemo sora el libro dela vita, fursi se femo arquante domande. Par esémpio: ‘Cossa che la Bìblia la dise sora quei che i ga el so nome scrito in questo libro e quei che no i lo ga? Quando quei che i ga el so nome scrito nel libro dela vita i ndarà ricever la vita eterna? Sarà che quei che i ze morti sensa cognosser a Geovà i podarà gaver el so nome scrito nel libro dela vita?’ Questo stùdio e el pròssimo i ndarà risponder a queste domande.
EL LIBRO DELA VITA EL GA EL NOME DE CHI?
5-6. (a) De acordo con Filipensi 4:3, chi che ga el so nome scrito nel libro dela vita? (b) Quando che el so nome el sarà scrito par sempre in questo libro?
5 Chi che ga el so nome scrito nel libro dela vita? Ndemo parlar de sinque grupi de persone e veder chi che ga el so nome scrito nel libro dela vita.
6 Primo grupo: Quei che i ze stati scoliesti par governar con Gesù nel cielo. El so nome l’è belche scrito nel libro dela vita. Paolo el ga parlà par quei che i ga ‘laorà insieme a lu’ in Filipo che el nome dei untadi i era belche scrito nel libro dela vita. (Ledi Filipensi 4:3. *) I untadi i ga el so nome scrito in questo libro par sempre quando i riceve el selo, o una aprovassion, sìpia vanti de morir o vanti che scomìnsie la granda tribolassion. — Apo. 7:3.
7. Quando che el nome de quei che i fà parte dela mùcia de gente sarà scrito par sempre nel libro dela vita? (Apocalisse 7:16, 17)
7 Secondo grupo: La mùcia de gente. El so nome l’è scrito nel libro dela vita, e se queste persone le seita fedele, el seitarà scrito anca dopo del Armagedon. (Apo. 7:14) Gesù el ga dito che queste persone, che le ze come piégore, le ndarà ricever la “vita eterna”. (Mat. 25:46) Ma lore no le ndarà ricever la vita eterna pena dopo del Armagedon, parché el so nome el sarà ancora scrito come che col làpis nel libro dela vita. Alora, Gesù el ndarà governarle par mila ani. Le persone che le obedisse ale so orientassion e le seita fedele a Geovà nel giulgamento dopo dei mila ani le gavarà el so nome scrito par sempre nel libro dela vita. — Ledi Apocalisse 7:16, 17. *
8. Chi che no’l ga el nome scrito nel libro dela vita, e cossa che ndarà suceder con lori?
8 Terso grupo: Quei che i sarà finidi fora nel Armagedon, o sia, quei che la Bìblia la dise che i ze come cavre. Lori no i ga el so nome scrito nel libro dela vita. Gesù el ga dito che “i sarà destruti par sempre”. (Mat. 25:46) E Paolo el ga dito che lori i “sarà castigadi cola destrussion eterna”. (2 Tes. 1:9; 2 Pie. 2:9) La Bìblia anca la dise che quei che i ga fato un bruto pecato contra el spìrito santo de Dio no i ga el so nome scrito nel libro dela vita e gnanca i sarà ressussitadi. Invesse, lori i sarà destruti par sempre. (Mat. 12:32; Mar. 3:28, 29; Ebr. 6:4-6) Adesso, ndaremo imparar sora due grupi de persone che le sarà ressussitade par viver nela Tera.
CHI CHE SARÀ RESSUSSITÀ?
9. De acordo con Ati 24:15, che due grupi i sarà ressussitadi par viver nela Tera, e che difarensa ghen’è intrà de lori?
9 La Bìblia la dise che ghen’è due grupi de persone che le sarà ressussitade par viver qua nela Tera: “i giusti” e “i ingiusti”. (Ledi Ati 24:15. *) “I giusti” i ze stati fedeli a Geovà vanti de morir. E “i ingiusti” i ze quei che no i servia a Geovà e che fursi i ga fato robe che lo ga disgustà. Ma sarà che el nome dei giusti e dei ingiusti l’è nel libro dela vita? Par saverlo, ndemo studiar un grupo ala volta.
10. (a) Parché che i giusti i sarà ressussitadi? (b) Che laoro arquanti de lori i gavarà? (Par imparar de pi sora quei che i sarà ressussitadi par viver nela Tera, vedi “Domande dei Letori” in questa revista.)
10 Quarto grupo: I giusti. Vanti de morir, el nome dei giusti l’era come che scrito col làpis nel libro dela vita. Ma lori i sarà ressussitadi parché so nome el seitarà scrito nel libro dela vita. (Luc. 14:14) La Bìblia la dise che Geovà “l’è Dio dei vivi, nò dei morti, parché par lu tuti i vive”. (Luc. 20:38) Par quela, l’è come se i fusse ancora vivi nela memòria de Geovà. La Bìblia anca la dise che arquanti de lori i ndarà laorar come “prìnsipi in tuta la tera”. — Sal. 45:16.
11. Cossa che “i ingiusti” i gavarà de far par gaver el so nome scrito nel libro dela vita?
11 Quinto grupo: I ingiusti. Lori no i ga el so nome scrito nel libro dela vita. Parché? Come no i cognossea a Geovà, lori i ga fato tante robe sbaliade vanti de morir. Ma Geovà el ndarà ressussitar i ingiusti, e lori i gavarà de imparar sora lu e obedir le so lege. Se i fà cossita, lori i gavarà el so nome scrito nel libro dela vita. Par quela, el governo de Dio el ndarà organisar un grando laoro par giutar questi ressussitadi a imparar sora lu.
12. (a) Chi che ghe insegnarà ai ingiusti? (b) Cossa che ndarà suceder con quei che no i meterà in pràtica quel che i impara sora Geovà?
12 Chi che ghe insegnarà ai ingiusti? La mùcia de gente e i giusti che i sarà ressussitadi. Ma i ingiusti sol i gavarà el so nome scrito nel libro dela vita, se i deventa amighi de Geovà e i se dedica a lu. Gesù Cristo e i untadi i sarà atenti par veder se i ingiusti i meterà in pràtica quel che i impara. (Apo. 20:4) Geovà e Gesù i sa cossa le persone le ga rento el so cuor. (Gioani 2:25) Lori i ndarà finir fora con tute quele che no le volarà obedirghe, anca se le gavarà de pi de 100 ani. (Isa. 65:20) Cossita, no ghen sarà pi nissuni che fae robe brute nel novo mondo. — Isa. 11:9; 60:18; 65:25.
RESSURESSION DE VITA E RESSURESSION DE GIULGAMENTO
13-14. (a) Cossa che una volta penseino sora quel che dise Gioani 5:29? (b) Ma parché che ghemo cambià la maniera de capirlo?
13 Varda quel che Gesù el ga dito sora quei che i sarà ressussitadi par viver nela Tera: ‘Vien la ora che tuti quei che i ze nele tombe memoriai i scoltarà la so voce, e i vegnarà fora, quei che i ga fato robe bone par una ressuression de vita, e quei che i ga fato robe rugne par una ressuression de giulgamento.’ (Gioani 5:28, 29) Cossa che Gesù el volea dir?
14 Una volta, penseino che Gesù l’era drio parlar de quel che le persone le faria dopo de esser ressussitade, o sia, che arquante le ndaria far robe bone e altre le ndaria far robe rugne. Ma parché che ghemo cambià la maniera de capir questo testo? Parché Gesù no l’era drio parlar de quel che i ressussitadi i ndarà far. Invesse lu l’era drio parlar de quei che i gavea fato robe bone e de quei che i gavea fato robe rugne. E l’è pi giusto capir che le robe rugne che i ingiusti i ga fato le ze state fate vanti de morir. Parché? Parché Geovà no’l assarà che nissuni i fae robe rugne nel Paradiso. E cossa che Gesù el ga volesto dir quando el ga parlà sora una “ressuression de vita” e sora una “ressuression de giulgamento”?
15. Chi che gavarà “una ressuression de vita”, e parché?
15 I giusti, che i ze quei che i ga fato robe bone vanti de morir, i gavarà “una ressuression de vita” parché el so nome el seita ancora scrito nel libro dela vita. Romani 6:7 dise che quando qualchedun el more, i so pecati i ze perdonadi. Alora, Geovà el se ga desmentegà dei so pecati, ma no’l se ga mia desmentegà dele robe bone che i ga fato vanti de morir. (Ebr. 6:10) Questo vol dir che, quando la Bìblia la parla dela ressuression de quei che i ga fato robe bone e dela ressuression dei giusti, la ze drio parlar dela stessa ressuression. (Gioani 5:29; Ati 24:15) Ancora cossita, questi giusti i gavarà de seitar fedeli a Geovà se i vol che el so nome seite scrito nel libro dela vita.
16. Cossa che ndarà suceder nela “ressuression de giulgamento”?
16 Cossa che va suceder con quei che i ga fato robe rugne vanti de morir? Anca se i so pecati i ze stati perdonadi quando i ze morti, so nome no l’è mia scrito nel libro dela vita parché no i ga obedio a Geovà intanto che i era vivi. Par quela, lori i gavarà una “ressuression de giulgamento”. * Come cossita? Par un tempo, Gesù el sarà drio vardarli par veder se i se ferma de far le robe sbaliade che i fea vanti e se i desside servir a Geovà. (Luc. 22:30) Se lori i fà polito, i gavarà el so nome scrito nel libro dela vita. Alora, quando la Bìblia la parla dela “ressuression dei ingiusti” e dela ‘ressuression de quei che i ga fato robe rugne’, la ze drio parlar dela stessa ressuression. — Ati 24:15.
17-18. (a) Cossa che tuti i ressussitadi i gavarà de far? (b) De acordo con Apocalisse 20:12, 13, come che Gesù el ndarà giulgar i ressussitadi?
17 Dopo dela ressuression, i giusti e i ingiusti i gavarà de obedir ale lege dei novi roli che ghen sarà nei mila ani. El apòstolo Gioani el ga bio una vision sora questo. Lu el ga dito: ‘Go visto i morti, grandi e pìcoli, in pié davanti del trono, e roli i ze stati verti. E nantro rolo l’è stà verto: el rolo dela vita. De acordo con quel che l’era stà scrito nei roli, i morti i ze stati giulgadi par quel che i gavea fato.’ — Apo. 20:12, 13.
18 I pecati dei ressussitadi i ze stati perdonadi quando i ze morti. Alora, lori no i pol esser giulgadi de acordo con quel che i gavea fato vanti de morir. Come che Gesù el ndarà giulgar i ressussitadi? Gesù el ndarà giulgarli de acordo con quel che i farà dopo de imparar sora Geovà. Anca i servi de Geovà del passà come Noè, Samuel, Davi e Daniel i gavarà de imparar sora Gesù e mostrar che i ga fede nel so sacrifìssio. Sicuro che ghen sarà tanto laoro par insegnar questi servi fedeli de Geovà del passà e tuti i ingiusti che i sarà ressussitadi!
19. Cossa che va suceder con quei che no i volarà servir a Geovà?
19 Cossa che ndarà suceder con quei che no i volarà servir a Geovà? Lori i sarà finidi fora par sempre. Apocalisse 20:15 dise: ‘Quel che no’l ga el so nome scrito nel libro dela vita, l’è stà trato do nel lago de fogo.’ Alora, volemo sforsarse tanto par seitar a gaver el nostro nome scrito nel libro dela vita.
Un fradel l’è drio insegnar i ressussitadi nel Governo de Mila Ani de Cristo (Vedi i paràgrafo 20.)
20. Che bel laoro sarà fato nei mila ani? (Vedi la ilustrassion dela prima pàgina.)
20 Sarà pròpio bel viver nela Tera intanto che ghen sarà el Governo de Mila Ani de Gesù. Tante persone le sarà insegnade come mai ga sucedesto vanti e Gesù el vardarà se i giusti e i ingiusti i mete in pràtica quel che i impara sora Geovà. (Isa. 26:9; Ati 17:31) Ma come ndaremo insegnar tuti quei che i sarà ressussitadi? Nel pròssimo stùdio, ndaremo imparar de pi sora questo.
CÀNTICO 140 La vita eterna la ze rivada!
^ In Gioani 5:28, 29, Gesù el ga parlà che ghen sarà “una ressuression de vita” e “una ressuression de giulgamento”. Questo stùdio el ndarà giutarne a capir dela maniera giusta queste due ressuression e chi che sarà ressussità.
^ (Malachia 3:16) Alora quei che i gavea temor de Geovà i parlea un coi altri, cada un col so pròssimo, e Geovà el ghe dea atension e el scoltea. E davanti de lu l’è stà scrito un libro de ricordassion par quei che i gavea temor de Geovà e par quei che i pensea sora el so nome.
^ Quando che questo libro el ga scominsià a esser scrito? “Del scomìnsio del mondo”. Questo mondo vol dir le persone che le pol esser salve par meso del sacrifìssio de Gesù. (Mat. 25:34; Apo. 17:8) Alora, Abel l’è stà la prima persona giusta che la ga bio el so nome scrito nel libro dela vita.
^ (Filipensi 4:3) E parché te laori ben con mi, te domando che te seiti a giutar queste done che le ga laorà tanto insieme con mi par predicar le bone notìssie, insieme con Clemente e con altri che i ga laorà con mi, che i ga i so nomi scriti nel libro dela vita.
^ (Apocalisse 7:16, 17) No i gavarà mia pi fame gnanca sen, gnanca el sol gnanca el caldo che brusa no i ghe farà dano. 17 Parché el Piegoreto, che l’è in meso del trono, li tenderà e li guidarà ale fontane dela àqua dela vita. E Dio sugarà tute le làgrime dei soi òci.”
^ (Ati 24:15) E mi go speransa in Dio, che anca questi òmini i ga, che ghen sarà una ressuression tanto dei giusti come dei ingiusti.
^ Una volta penseino che la parola “giulgamento” sol la volea dir condanar o giulgar qualchedun par una roba sbaliada che el gavea fato. Dele volte, questa parola la vol dir pròpio questo. Ma nel testo de Gioani 5:29, Gesù el ga doperà la parola “giulgamento” par parlar de un tempo che el vardarà se le persone le ndarà meter in pràtica quel che le impara o nò. Un dissionàrio, che el spiega arquante parole greche dela Bìblia, el ga dito che l’è come vardar el comportamento de qualchedun.
