Pena dopo del ano 1940, me pare e me mare i ga scominsià a studiar la Bìblia cole Testimònie de Geovà. Un tempo dopo, lori i se ga fermà de studiar, ma me mare la seitea a ricever la Sentinela e la Despertai!. In 1950, la me fameia la ze ndata nte un congresso internassional nela cità de Nova York.

Poco tempo dopo, el fradel Lawrence Jeffries el ga scominsià a visitar noantri e el ga proà giutarme a imparar sora la Bìblia. Ma no ero de acordo che le Testimònie de Geovà no le ndesse ala guera e no le se metesse nela polìtica. Mi ghe go dito che se nissuni ndesse ala guera, nantro paese el podaria vegner contra el nostro. Alora, el fradel Jeffries el me ga dito: “Cossa pénsito che Geovà el ndaria far se tuti nei Stati Unidi i lo servisse e nantro paese el vegnesse contra el nostro?” Quel che lu el me ga spiegà sora questo e sora altre robe, me ga giutà a veder che ero drio pensar de maniera sbaliada. Par quela, go volesto imparar de pi sora la Bìblia.

Me mama la gavea metesto via in cantina tante reviste La Sentinela e Despertai!, e mi go passà tante ore drio lederle. Suito go visto che quel che ero drio imparar l’era la verità. Par quela, go volesto scominsiar a studiar la Bìblia col fradel Jeffries e go tacà ndar ale riunion. Mi restea tanto contento con quel che ero drio imparar, e go scominsià a predicar. Come mi go imparà che el giorno de Geovà l’era darente, mi no volea pi far la università. (Sof. 1:14) Invesse, volea tanto giutar i altri a cognosser a Geovà.

In 13 de giugno de 1956, mi go finio la scola, e tre giorni dopo, me go batesà nte una assemblea. In quel tempo, no savea gnanca tute le benedission che riceveria de gaver scoliesto doperar la vita par imparar sora Geovà e insegnar ai altri.

Sei mesi dopo che son stà batesà, go scominsià de pioniero regolar. Nel ano de 1956, el Nosso Ministério do Reino in inglese el gavea una parte che la disea: “Te podarissi ndar giutar ndove ghen’è de pi bisogno?” Quel convite l’era anca par mi. Mi volea ndar giutar ndove ghen’era pochi predicadori. — Mat. 24:14.

Son ndato de star nte una cità de nome Edgefield, nela Carolina del Sud. Èrino sol in sinque predicadori in quela congregassion e feino le riunion nela casa de un fradel. Tuti mesi, mi guastea 100 ore nela predicassion e fea tante parte nele riunion. Cossita, mi gavea tanto de far nel laoro a Geovà, e ero drio imparar cada volta de pi sora lu.

Mi fea stùdio con una dona che la gavea una funerària nela cità de Johnston, darente de Edgefield. In quela època, mi gavea tanto de bisogno de un laoro. Ela la ze stata bona gente parché la me ga dato un laoro de mesa giornada e la ne ga assà doperar un posto suo par far le riunion.

El fradel Jolly Jeffries, che l’era fiol del fradel che me ga insegnà la Bìblia, l’è ndato via de Brooklyn, Nova York. Lu l’è vegnesto de star con mi nte un trailer che un fradel el gavea dato in préstio a noantri. Alora, ghemo scominsià a laorar insieme come pionieri.

In quela època, nel sud del paese, le persone le ciapea pochi soldi del so laoro. Par esémpio, dele volte mi e el fradel Jolly ciapeino sol due o tre dòlari nte una giornada de laoro. Una volta, mi go doperà le poche monede che gavea par comprar de magnar. Alora, un omo l’è vegnesto domandarme: “Vuto laoro? Te dao un dòlar ala ora.” Quel che me ga sucedesto, me ga assà pi sicuro che Geovà l’era drio giutarme a seitar lì. Anca se gavesse pochi soldi, son stà bon de ndar nel congresso internassional in 1958 nela cità de Nova York.

El secondo giorno de congresso l’è stà tanto bel. Go cognossesto Ruby Wadlington, che la era una pioniera regolar nela cità de Gallatin, nel Tennessee. Semo ndati insieme nela riunion par quei che i volea far la Scola de Gileade, parché tuti due voleino esser missionari. Dopo de un tempo, ghemo scominsià a scriverse carte. Quando son ndato nela so congregassion far un discorso, go domandà se la volea maridarse con mi. Alora, go scominsià ndar nela congregassion de Ruby e se ghemo maridà in 1959.

Con 23 ani, son deventà servo de congregassion, che ancoi l’è el cordinador del corpo de ansiani. Semo stati la prima congregassion che el fradel Charles Thompson el ga visità. Anca se el fusse tanto bravo, lu el me domandea sora le dificoltà che i fradei i era drio infrontar e come i altri  superintendenti i ghe gavea belche giutà. Cossita, go imparà che, vanti de voler far qualcossa, l’è tanto importante far domande par capir tuto quel che l’è drio suceder.

In maio de 1964, son stà convidà par far la Scola del Ministero del Regno. Questa scola la saria de un mese, in South Lansing, Nova York. I fradei che i era drio insegnar nela scola i me ga giutà a voler imparar de pi sora Geovà e a far pi forte la me amicìssia con lu.

In genaro de 1965, mi e Ruby ghemo scominsià a servir come superintendenti de sircuito. El primo sircuito che semo ndati l’era pròpio grando. El  scominsiea in Knoxville, nel Tennessee, e el ndea fin Richmond, nela Virgínia. Visiteino anca le congregassion dei stadi lì intorno. Ma ndeino sol in quele dei negri parché le lege dei Stati Unidi no le assea mia i negri restar insieme coi bianchi. In quela època, noantri ghemo imparà tanto a spartir quel che gaveino coi altri parché i fradei i era poareti. Una volta, un bravo superintendente el me ga insegnà una roba pròpio importante. El me ga dito: “No stà rivar nele congregassion come se te fussi el paron. Invesse, te ghè de esser come un fradel. Sol se i fradei i te vede cossita, te sarè bon de giutarli.”

Quando èrino drio visitar una congregassion, Ruby la ga scominsià un stùdio con una dona che la gavea una bambina de un ano. Se no ghen’era nissuni nela congregassion che ghe fesse el stùdio, Ruby lo fea par meso de carte. Noantri semo tornadi par visitar quela congregassion nantra volta e quela dona la ze ndata a tute le riunion. Quando due pioniere spessiai le ze ndate de star lì, la dona la ga seità a studiar con lore, e un tempo dopo la se ga batesà. Nel ano de 1995, quando èrino nel Betel de Patterson, una sorela gióvena la ze vegnesta parlar cola Ruby. Ela la era la fiola de quela dona che la gavea studià con Ruby 30 ani indrio. Ela e so omo i era drio far la turma 100 dela Scola de Gileade.

Dopo ghemo cambià par el sircuito dela Flòrida. In quela època, gaveino bisogno de un auto, e semo stati boni de comprar un che no costea tanto. Ma, nela prima stimana, una parte del motor la se ga spacà e no gaveino soldi par rangiarla. Alora, mi go domandà aiuto a un fradel e lu el ga rangià el auto par gnente. Pitosto de cobrarne, el ne ga dato un poco de soldi. Quel che ga sucedesto ne ga mostrà che Geovà sempre el tende dei so servi e che ghemo de giutar i altri.

Intanto che visiteino le congregassion, sempre resteino nela casa dei fradei. Par quela, ghemo fato boni amighi. Una volta, èrino nela casa dei fradei, e go assà nela me màchina de scriver un relatòrio che gavea scominsià a far. Quando son tornà, go visto che el fiol de 3 ani el gavea proà “giutarme” a scriver el relatòrio. Lo go tolto in giro par tanti ani, parché me ga tocà farlo tuto nantra volta.

Nel ano de 1971, son stà convidà par esser superintendente de distrito nela cità de Nova York. La ze stata una roba che no spetea mia parché gavea sol 34 ani. Mi son stà el primo superintendente de distrito negro lì, e tuti i fradei i me ga ricevesto con tanto amor.

Mi restea tanto contento de parlar sora Geovà tuti finai de stimana nele assemblee de sircuito. Lì ghen’era tanti fradei che i era drio laorar come superintendenti de sircuito a de pi tempo de mi. Par esémpio, un de lori el gavea fato el discorso del me batésimo, e nantro, el fradel Theodore Jaracz, pi tardi el ga laorà nel Corpo Governante. Arquanti fradei i era del Betel de Brooklyn. Ma tuti i superintendenti e beteliti i me tratea tanto ben. Quei fradei i se fidea nela Bìblia, i giutea la organisassion e i tendea con tanto amor dele piégore de Geovà. Lori i era òmini tanto ùmili, e so esémpio me ga giutà a far un bel laoro come superintendente de distrito.

Nel ano de 1974, el Corpo Governante el ga scoliesto altri fradei par laorar come superintendenti de distrito. Alora, son tornà ala Carolina del Sud come superintendente de sircuito. Ma no  ghen’era pi quela lege che no assea i bianchi restar insieme dei negri. Cossita, noantri podeino restar tuti insieme nele congregassion. Semo restadi pròpio contenti!

Nel ano de 1976, son ndato servir come superintendente nela Georgia, intrà le cità de Atlanta e Columbus. Mai son stà bon desmentegarme del discorso fùnebre che go fato de sinque tosatei negri che i ze morti quando so casa la ze stata brusada. So mare la se ga fato mal e ghe ga tocà ndar al ospedal. Ma lì, go visto come l’è grando el amor intrà de noantri parché ghen’era fradei bianchi e negri par consolar quela fameia. E questo amor ne giuta quando infrontemo brute dificoltà.

Nel ano de 1977, semo stati convidadi par laorar par un per de mesi nel Betel de Brooklyn. Quando l’era quasi drio finir el laoro, due fradei del Corpo Governante i ga domandà se mi e me dona, Ruby, volarìssino seitar in Betel, e noantri ghemo acetà questo convite.

Par 24 ani, go laorà nel Departamento de Servìssio, ndove i fradei i giuta le congregassion a dàrghene fora con robe che le ze tanto fadiga. El Corpo Governante el ga sempre dato ai fradei orientassion che le vien dela Bìblia che li giuta quando ghe toca risponder qualcossa ai superintendenti de sircuito, ansiani o pionieri. Cossita, i fradei i ze drio imparar a pensar cada volta de pi compagno a Geovà e la organisassion la ze drio deventar cada volta pi forte.

De 1995 a 2018, go visità tanti paesi come superintendente che visita le filiai. Mi incoraiea le Comission de Filiai, i beteliti e i missionari, e li giutea a dàrghene fora cole so dificoltà. Ma anca mi e Ruby resteino tanto incoraiadi de scoltar le so speriense. Par esémpio, nel ano 2000, semo ndati visitar la filial dela Ruanda. L’è stà de gnanca creder quel che arquanti fradei e beteliti i gavea infrontà in 1994, quando tante persone le ze state copade in quel paese. Tanti i gavea perso persone dela so fameia e amighi. Ma ancora cossita, lori no i ga mai perso la so fede, speransa e alegria.

Ancoi, mi go de pi de 80 ani, e fà 20 ani che son dela Comission de Filial dei Stati Unidi. Mi no go mai fato la università, ma Geovà el me ga insegnà par meso dela so organisassion. Questo l’è el meio stùdio che ghen’è. Cossita, son stà bon de insegnar le verità dela Bìblia a altre persone, e queste verità le ghe giutarà a viver par sempre. (2 Cor. 3:5; 2 Tim. 2:2) Go visto come la Bìblia la giutà tanti a cambiar so vita e a gaver una amicìssia con Geovà. (Tia. 4:8) Mi e Ruby sempre disemo ai fradei che imparar sora Geovà e insegnar la verità ai altri l’è tanto bon, e la meio roba che un servo de Geovà el podaria far!