STÙDIO 40
‘Tanti i sarà giutadi a far quel che l’è giusto’
“Quei che i giuta tanti a far quel che l’è giusto i slusarà come le stele, par sempre.” — DAN. 12:3.
CÀNTICO 151 Geovà el ciamarà
COSSA CHE NDAREMO IMPARAR? *
1. Che bela roba ndarà suceder nel Governo de Mila Ani de Cristo?
PROA pensar che bel che sarà veder la ressuression qua nela Tera nel Governo de Mila Ani de Cristo. Geovà e tuti noantri semo tanti premosi de veder la ressuression. (Giò 14:15) Ma chi che sarà ressussità? Nel ùltimo stùdio, ghemo imparà che “i giusti”, che i ze quei che i ga el so nome scrito nel libro dela vita, i gavarà una “ressuression de vita”. (Ati 24:15; Gioani 5:29) Fursi tante persone che amemo le sarà ressussitade pena dopo del Armagedon. * Noantri ghemo anca imparà che “i ingiusti”, che i ze quei che no i ga podesto imparar sora Geovà e servirlo, i gavarà una “ressuression de giulgamento”.
2-3. (a) Cossa che Isaia 11:9, 10 dise che sucederà nel Paradiso? (b) Cossa che ndaremo imparar in questo stùdio?
2 Ghen sarà un laoro tanto grando come mai prima par insegnar tuti i ressussitadi. (Isa. 26:9; 61:11; ledi Isaia 11:9, 10. *) Parché? I ingiusti che i sarà ressussitadi i gavarà de imparar sora Gesù, el so sacrifìssio, el Regno de Dio, el nome de Geovà e parché che sol lu el ga el dirito de governar. Anca i giusti i gavarà de imparar arquante robe. Tanti de lori i ze morti prima che la Bìblia la fusse tuta scrita e altri i ze morti prima che Geovà el giutesse i so servi a capir cossa che el ndarà far. Par quela, i giusti e i ingiusti i gavarà tanto de imparar nel novo mondo.
3 Questo stùdio el ndarà giutarne a capir la professia de Daniel 12:1, 2 e el risponderà ale domande: ‘Come che sarà fato el laoro par insegnar tuti i ressussitadi? Cossa che ndarà suceder con quei che i volarà servir a Geovà e con quei che no i volarà farlo?’ Le risposte a queste domande le ze importante par tuti noantri. Par meso dele professie de Daniel e Apocalisse, saremo boni de capir meio quel che ndarà suceder dopo dela ressuression.
‘QUEI CHE I DORME I SE DESMISSIARÀ’
4-5. Cossa che Daniel 12:1 dise che sucederà nel tempo del fin?
4 Ledi Daniel 12:1. * El libro de Daniel el mostra quando che cada roba la ndarà suceder nel tempo del fin. Par esémpio, Daniel 12:1 dise che Mighel, che l’è Gesù Cristo, l’è drio laorar ‘in favor del pòpolo de Dio’. Questa professia la se ga realisà in 1914 quando Gesù l’è deventà Rè del Regno de Dio.
5 Ma Daniel anca el ga dito che Gesù “el se meteria in pié” nte un tempo de aflission. Questo tempo de aflission l’è la “granda tribolassion”. Gesù el se meterà in pié parché el ndarà proteger i servi de Dio nel fin de questo tempo de aflission, o sia, nel Armagedon. (Mat. 24:21) Questi servi de Dio i ze la “mùcia de gente” che la vien fora dela granda tribolassion. — Apo. 7:9, 14.
6. Cossa che ndarà suceder dopo del Armagedon? Spiega. (Par imparar de pi sora la ressuression nela Tera, vedi “Domande dei Letori” in questa revista.)
6 Dopo del Armagedon, ghen sarà una ressuression. (Ledi Daniel 12:2. *) Una volta, penseino che questa ressuression la era el grando laoro de predicassion che ga scominsià esser fato dopo de 1918. * Alora, che ressuression la ze questa che Daniel el ga dito? La ze una ressuression de carne e osso che va suceder nel novo mondo. Savemo de questo parché la parola che la ze tradusida “soto tera” in Daniel la ze la medèsima che ghen’è in Giò 17:16 par parlar del ‘Sepolcro’. Alora, questo vol dir che Daniel 12:2 l’è drio parlar dela medèsima ressuression de carne e osso che la ndarà suceder dopo del Armagedon.
7. (a) Parché che arquanti i sarà ressussitadi par la “vita eterna”? (b) Parché che questa ressuression la ze meio?
7 Parché che Daniel 12:2 el dise che arquanti i sarà ressussitadi par la “vita eterna”? Parché se questi ressussitadi i seita a imparar sora Geovà e Gesù nei mila ani e i ghe obedisse, lori i gavarà la vita eterna. (Gioani 17:3) Questa la sarà una ressuression meio de quele che ga sucedesto nel passà parché le persone che le sarà ressussitade mai pi le ndarà morir. — Ebr. 11:35.
8. Cossa che ndarà suceder con quei che i sarà ressussitadi par “esser invergognadi e assadi de banda par sempre”?
8 Ma gnanca tuti che i sarà ressussitadi i volarà imparar sora Geovà e obedirghe. Par via de questo, lori no i gavarà el so nome scrito nel libro dela vita e gnanca i gavarà la vita eterna. Invesse, i sarà ressussitadi par esser “invergognadi e assadi de banda par sempre”, o sia, i sarà finidi fora. Alora, Daniel 12:2 parla de quel che ndarà suceder coi ressussitadi dopo dela ressuression. * (Apo. 20:12) Cossita, arquanti de lori i podarà viver par sempre e altri i sarà finidi fora.
‘TANTI I SARÀ GIUTADI A FAR QUEL CHE L’È GIUSTO’
9-10. (a) De acordo con Daniel 12:3, cossa che ndarà suceder dopo dela granda tribolassion? (b) Chi che “slusarà tanto come i cieli”?
9 Ledi Daniel 12:3. * Questo testo el parla de ancora nantra roba che la ndarà suceder dopo del “tempo de aflission”, o sia, la granda tribolassion.
10 Daniel 12:3 dise che dopo dela granda tribolassion, arquanti “slusarà tanto come i cieli”. Chi che i ze questi? El testo de Mateo 13:43 el ne giuta a saverlo. Questo testo el dise che “i giusti i slusarà tanto come el sol nel Regno del so Pare”. Qua Gesù l’era drio parlar sora “i fioi del Regno”, o sia, so fradei untadi che i ndarà governar insieme a lu nel cielo. (Mat. 13:38) Alora, capimo che Daniel 12:3 l’è drio parlar dei untadi nel laoro che i ndarà far nel Governo de Mila Ani de Cristo.
I 144 mila i ndarà laorar insieme a Gesù par insegnar le persone nei mila ani (Vedi el paràgrafo 11.)
11-12. Cossa che i untadi i ndarà far nei mila ani?
11 Come che i untadi i giutarà tanti a “far quel che l’è giusto”? Prima, lori i ndarà laorar insieme a Gesù par insegnar le persone nela Tera nei mila ani. Secondo, i 144 mila anca i ndarà laorar come sasserdoti. (Apo. 1:6; 5:10; 20:6) Cossita, pin pian lori i giutarà le persone a deventar perfete. (Apo. 22:1, 2; Eze. 47:12) Sicuro che i untadi i gavarà caro de far questo laoro!
12 Ma chi che i ze quei che i sarà giutadi a “far quel che l’è giusto”? Quei che i vegnarà fora del Armagedon, i ressussitadi e quei che i ndarà nasser in Paradiso. Nel fin dei mila ani, tute le persone le sarà perfete. Ma quando che el nome de queste persone el sarà scrito par sempre nel libro dela vita?
SÌPIA SEMPRE LEAL
13-14. Cossa che tute le persone le gavarà de mostrar vanti de ricever la vita eterna?
13 No riceveremo la vita eterna sol parché saremo perfeti. Ricòrdate de quel che ga sucedesto con Adon e Eva. Anca se i era perfeti, lori i gavea de mostrar che i era obedienti a Geovà par viver par sempre. Ma lori i ga desobedio a Dio. — Rom. 5:12.
14 Nel fin dei mila ani, tuti sarà perfeti nela Tera e i gavarà de seitar a mostrar che i vol pròpio esser governadi par el Regno de Dio. Ma arquanti i farà compagno a Adon e Eva, che i ze stati desobedienti ancora che i fusse perfeti. Ma come che le persone le farà par mostrar che le ze obediente?
15-16. (a) Quando che tute le persone nela Tera le podarà mostrar che le ze obediente a Geovà? (b) Cossa che ndarà suceder cole persone dopo de questo?
15 Par mila ani, Sàtana no’l ndarà intrigar a nissuni parché el sarà incadenà. Ma dopo i mila ani, lu el sarà molà e el proarà imbroiar le persone par farle desobedir a Geovà. Cossita, tuti i podarà mostrar che i rispeta el nome de Geovà e che i vol esser governadi par lu. (Apo. 20:7-10) Sol quei che i seitarà leai dopo che Sàtana el sarà molà i gavarà el so nome scrito nel libro dela vita par sempre.
16 La Bìblia la dise che arquanti i sarà desobedienti, e compagno a Adon e Eva, no i volarà esser governadi par Geovà. Cossa che ndarà suceder con queste persone? Apocalisse 20:15 dise che ‘quei che no i ga el so nome scrito nel libro dela vita i sarà trati do nel lago de fogo’. Alora, quei che no i volarà obedir a Geovà i sarà finidi fora. Ma tanti i sarà obedienti e el so nome el sarà scrito nel libro dela vita par sempre.
COSSA CHE SUCEDERIA “NEL TEMPO DEL FIN”?
17. Cossa che el àngelo el ga dito a Daniel che ndaria suceder nei nostri giorni? (Daniel 12:4, 8-10)
17 Noantri restemo tanto contenti de saver quel che ndarà suceder nel futuro. Ma l’è anca bel pensar in quel che l’è drio suceder ancoi. Par esémpio, un àngelo el ga dito a Daniel che ‘nel tempo del fin ghen saria tanto saver dela verità’. (Ledi Daniel 12:4, * 8-10; * 2 Tim. 3:1-5) Questo volea dir che i servi de Dio i ndaria capir meio le professie del libro de Daniel. Ma, el àngelo anca el ga dito che ‘i rugni i faria brute robe e no i saria boni de capir gnente’.
18. Cossa che ndarà suceder coi rugni?
18 Ancoi a tanti ghe par che le persone le fà robe brute e ancora cossita le va ben. (Mal. 3:14, 15) Ma de qua un poco, Gesù el ndarà giulgar quei che i ze come cavre e ndarà spartirli de quei che i ze come piégore. (Mat. 25:31-33) El nome de questi rugni no’l sarà nel “libro de ricordassion”. (Mal. 3:16) Alora, lori i ndarà morir nela granda tribolassion e no i sarà ressussitadi nel Paradiso.
19. Cossa che ghemo de far adesso, e parché? (Malachia 3:16-18)
19 Adesso l’è la ora de mostrar che no semo come i rugni. (Ledi Malachia 3:16-18. *) Geovà l’è drio scòlier quei che i ga tanto valor par lu. E noantri volemo esser intrà de questi.
Semo tanto premosi de veder la ressuression de quei dela nostra fameia, amighi e fin de Daniel! (Vedi el paràgrafo 20.)
20. (a) Cossa che Geovà el ga prometesto a Daniel? (b) Parché sito premoso par veder le promesse de Geovà realisarse?
20 Semo drio veder tante bele robe suceder. Ma suito vedaremo robe de maraveiarse. Par esémpio, Geovà el ndarà finir fora con tute le robe rugne che ghen’è e el farà quel che el ga prometesto a Daniel: ‘Nel fin dei giorni te ndarè levar su par ricever la to parte.’ (Dan. 12:13) Sicuro che semo tanto premosi de veder la ressuression de quei dela nostra fameia, amighi e fin de Daniel. Alora, sfòrsate par gaver el to nome scrito nel libro dela vita par sempre!
CÀNTICO 82 ‘Assemo la luce slusar’
^ La professia de Daniel 12:2, 3 la mostra che ghen sarà un grando laoro par insegnar le persone nel novo mondo. Questo stùdio el ndarà giutarne a capir dela maniera giusta questa professia de Daniel e a saver chi che sarà insegnà. Vederemo anca quando questo ndarà suceder e chi che giutarà a insegnar ale persone. Cossita, ndaremo anca capir come questo laoro podarà giutar tuti a seitar leai quando Sàtana el sarà molà nel fin dei mila ani.
^ Pol esser che la ressuression la suceda una generassion ala volta. I servi de Geovà che i ze morti nei ùltimi giorni fursi i sarà ressussitadi prima. Dopo la ressuression la ndarà suceder dela ùltima generassion che la ze morta fin la prima. Se l’è pròpio cossita, cada persona la podarà ricever quei che la gavea perso. Anca se no savemo ancora ben come sarà la ressuression, podemo esser sicuri che la sarà fata de maniera organisada compagna a quela che la ze drio suceder nel cielo. — 1 Cor. 14:33; 15:23.
^ (Isaia 11:9, 10) No i farà mal gnanca i farà dano in tuto el me santo monte, parché sicuro che la cognossensa sora Geovà la impienirà la tera, cossita come la àqua la impienisse el mar. 10 In quel giorno, la radisa de Gessè la vegnarà fora come un segnal par tute le persone. Le nassion le ndarà in serca de lu par saver cossa far, e ghen sarà tanta glòria nel posto ndove lu l’è de star.
^ (Daniel 12:1) “In quel tempo Mighel el se meterà in pié. Lu l’è el grando prìnsipe che laora in favor del to pòpolo. E ghen sarà un tempo de aflission come mai vanti, de quando ga scominsià a esserghe nassion fin a quel tempo. In quel tempo, el to pòpolo el se salvarà, tuti quei che i ga el so nome scrito nel libro.
^ (Daniel 12:2) E tanti de quei che i dorme soto tera i se desmissiarà. Arquanti i ndarà ricever la vita eterna, ma altri i sarà invergognadi e assadi de banda par sempre.
^ Questa la ze la maniera giusta de capir questo versìcolo, e la càmbia quel che ghen’è nel libro Profecia de Daniel! capìtolo 17, e nela Sentinela de 1 de lùlio de 1987, pàgine 21 a 25.
^ Ma quando la Bìblia la parla dei “giusti” e “ingiusti” in Ati 24:15 e de ‘quei che i ga fato robe bone’ e ‘quei che i ga fato robe rugne’ in Gioani 5:29, la ze drio parlar de quel che i ressussitadi i ga fato vanti de morir.
^ (Daniel 12:3) E tanti de quei che i dorme soto tera i se desmissiarà. Arquanti i ndarà ricever la vita eterna, ma altri i sarà invergognadi e assadi de banda par sempre.
^ (Daniel 12:4) “Ma ti, Daniel, tien in segreto queste parole e sara el libro fin el tempo del fin. Tanti i ndarà in serca, e ghen sarà tanto saver dela verità.”
^ (Daniel 12:8-10) E mi go scoltà ma no go capio. Alora go domandà: “Ò me signor, cossa vegnarà fora de queste robe?” 9 Alora lu el ga dito: “Va, Daniel, parché queste parole le ga de restar come un segreto e serade con selo fin el tempo del fin. 10 Tanti i ndarà purificarse, i ndarà far quel che l’è giusto e i viverà de maniera pròpio neta. Ma i rugni i farà brute robe e no i sarà boni de capir gnente. Sol quei che i ghe vede rento i ndarà capir.
^ (Malachia 3:16-18) Alora quei che i gavea temor de Geovà i parlea un coi altri, cada un col so pròssimo, e Geovà el ghe dea atension e el scoltea. E davanti de lu l’è stà scrito un libro de ricordassion par quei che i gavea temor de Geovà e par quei che i pensea sora el so nome. 17 Geovà dei esèrsiti el dise: “Farò che lori i sìpie el me pòpolo nel giorno che vao farli deventar una propietà spessial par mi. Vao mostrarghe compassion, cossita come un omo el mostra compassion al so fiol che ghe obedisse. 18 E valtri ndaré veder nantra volta la difarensa intrà la persona giusta e la persone rugna, intrà quel che el serve a Dio e quel che no lo serve mia.”
