STÙDIO 38
Come che i gióveni i pol gaver una bona vita?
“El bon giudìssio el te protegerà.” — PRO. 2:11.
CÀNTICO 135 Fioi contenté el cuor de Geovà
COSSA CHE NDAREMO IMPARAR? a
1. Che dificoltà Geoàs, Uzia e Giosia i ga infrontà?
COME che te ndarissi sentirte se te fussi sol un giovenoto e te tochesse deventar rè dela nassion de Dio? Come che te ndarissi doperar el to poder e la to autorità? La Bìblia la parla de diversi gióveni che i ze deventadi rè de Giudà, come Geoàs, che el gavea 7 ani, Uzia, che el gavea 16, e Giosia, che el gavea 8 ani. Sicuro che no l’è mia stà fàcile par lori. Ma, col aiuto de Geovà e de altre persone, questi gióveni i ze stati boni de dàrghene fora e i ga fato tante robe bone.
2. Parché che l’è importante imparar del esémpio de Geoàs, Uzia e Giosia?
2 L’è vera che, ancoi, no semo mia rè gnanca regine. Magari, podemo imparar tanto de Geoàs, Uzia e Giosia. Lori i ga fato quel che l’era giusto, ma i ga fato anca brute dessision. Alora, ndemo veder parché che ghemo de scòlier ben i nostri amighi, seitar a esser ùmili e sempre ndar in serca del aiuto de Geovà.
SCOLI BONI AMIGHI
Compagno a Giosia, podemo far bone dessision se ghemo boni amighi (Varda i paràgrafi 3 e 7.) a
3. Che bone dessision el rè Geoàs el ga fato?
3 Fà compagno le bone dessision de Geoàs. Come lu no’l gavea mia un pare, el somo sasserdote Geoiada lo ga slevà come se fusse so fiol. Geoàs lo ga scoltà, el ga dessidio servir a Geovà, el ga giutà la nassion a adorar a Geovà dela maniera giusta e el ga fin mandà rangiar su el témpio. (2 Cró. 24:1, 2, 4, 13, 14) Cossita, vedemo che, de gióveno, el rè Geoàs el ga fato bone dessision.
4. De acordo con Proverbi 2:1 e 10-12, parché che l’è importante darghe valor ai comandamenti de Geovà?
4 Se to pare, to pare o nantra persona i ze drio insegnarte a amar a Geovà e obedirlo, lori i ze drio darte un bel presente. (Ledi Proverbi 2:1, b 10-12. c) Lori i pol giutarte de diverse maniere. Varda come che so pare de una sorela de nome Katya la ga giutada a far bone dessision. Tuti i giorni, quando so pare la menea nela scola, lori i discorea sora el testo del giorno. Katya la ga dito che quel che lori i parlea la giutea a far quel che l’era giusto quando la gavea una dificoltà. Ma cossa che te ghè de far se te par che l’è massa fadiga obedir i consili che to pare e to mare i te dà? Cossa che pol giutarte a acetarli? Una sorela de nome Anastasia la se ricorda che so pare e so mare i se tolea tempo par spiegarghe parché che i gavea fato una règola. Anastasia la ga dito: “Cossita, lori i me ga giutà a capir che no i volea mia controlarme, ma protegerme parché i me ama.”
5. Come mostra Proverbi 22:6 e 23:15, 24 e 25, cossa che ndarà suceder se te scolti i consili dela Bìblia che to pare e to mare i te dà?
5 Se te meti in pràtica i consili dela Bìblia che te ricevi, te assarè contento to pare e to mare. Anca Geovà el restarà contento, e la vostra amicìssia la restarà pi forte. Ricòrdate che assar Geovà contento l’è la roba pi importante che ghen’è. (Ledi Proverbi 22:6; d 23:15, e 24, 25. f) Questi i ze boni motivi par far compagno a Geoàs intanto che l’era gióveno.
6. (a) A chi che Geoàs el ga scominsià a scoltar? (b) Cossa ga sucedesto par via de questo? (2 Cróniche 24:17, 18)
6 Impara dele brute dessision de Geoàs. Dopo che Geoiada l’è morto, Geoàs el ga scoltà i prìnsipi de Giudà che no i amea a Geovà. (Ledi 2 Cróniche 24:17, 18. g) Invesse de star distante de quele brute amicìssie, lu el ga scoliesto ndarghe drio. (Pro. 1:10) Alora, quando so primo cusin, Zacaria, ghe ga dato un consìlio, Geoàs el ga mandà coparlo. (2 Cró. 24:20, 21; Mat. 23:35) Geoàs l’era stà bravo de gióveno, ma dopo, l’è deventà un rè stùpido. Lu l’è restà contra Geovà, el ga copà una persona e, par fin, i so servi i lo ga copà. (2 Cró. 24:22-25) Sicuro che la so vita la podea esser stata tanto difarente se el seitesse a scoltar a Geovà e a quei che lo amea. Cossa che podemo imparar de questo esémpio?
7. Che tipo de amighi te ghè de scòlier? (Varda anca la ilustrassion.)
7 Una roba che podemo imparar dela bruta dessision de Geoàs l’è che ghemo de scòlier boni amighi. L’è importante gaver amighi che i ama a Geovà, che i vol contentarlo e che i ndarà giutarne a seitar leai. Ricòrdate che Geoiada l’era pi vècio che Geoàs e l’è stà un bon amigo par lu. Alora, anca ti te pol scòlier amighi che i ze pi gióveni o pi veci che ti. Quando te vè scòlier i to amighi, proa domandarte: ‘Sarà che lori i me giuta a far pi forte la me fede in Geovà? Sarà che i se sforsa de obedirlo e i me giuta a far compagno? Lori i parla sora Geovà e sora quel che i ga imparà dela Bìblia? Sarà che i me amighi i me dà consili quando go de bisogno o sol i me dise quel che me piaseria scoltar?’ (Pro. 27:5, 6, 17) Ricòrdate che, se i to amighi no i ama a Geovà, ti no te ghè mia bisogno de lori. Magari, se te ghè amighi che i ama a Geovà, lori i te farà tanto ben. Alora, stà darente de lori! — Pro. 13:20.
8. Cossa che te ghè de domandarte se te doperi rede sossiai?
8 Ancoi, tante persone ghe piase de doperar le rede sossiai par parlar cola fameia e coi amighi. Ma ghen’è tanta gente che le dopera sol par farse veder e mostrar ritrati e vìdei sora cossa che i ga comprà o che i ga fato. Se anca ti te doperi rede sossiai, domandate: ‘Parché che son drio doperarle? Sarà che le dopero par farghe qualcossa de bon ai altri o par farme veder? Sonti drio scominsiar a pensar, parlar e far le robe compagno a quei che no i serve a Geovà?’ Varda cossa che el fradel Nathan Knorr, che l’era del Corpo Governante, el ga dito: “No stà proar contentar le persone parché no te farè nissuni contenti. Invesse, proa contentar a Geovà. Cossita, lu e quei che i lo ama i restarà contenti.”
SEITA A ESSER ÙMILE
9. De acordo con 2 Cróniche 26:1-5, cossa che Geovà el ga giutà Uzia a far?
9 Fà compagno le bone dessision de Uzia. Ancora de gióveno, Uzia l’era ùmile e el ga imparà a gaver tanto rispeto par el vero Dio. Lu l’è morto con 68 ani e, par quasi tuta la so vita, Geovà lo ga benedio. (Ledi 2 Cróniche 26:1-5. h) Uzia l’è stà bon de vinser tante nassion nemighe e el ga fato tante robe par proteger Gerusalen. (2 Cró. 26:6-15) Sicuro che Uzia l’era tanto contento de saver che Geovà l’era drio giutarlo. — Ecl. 3:12, 13.
10. Cossa che ga sucedesto con Uzia?
10 Impara dele brute dessision de Uzia. Come l’era rè, Uzia sempre el disea ai altri cossa i gavea de far. Cossita, pol esser che el gàpia pensà che el podaria far quel che el volesse e che no ghe tochea obedir a Geovà. Alora, un giorno, Uzia l’è ndato rento el témpio e el ga brusà insenso nel altar, che l’era una roba che i rè no i podea mia far. (2 Cró. 26:16-18) Quando el somo sasserdote Azaria el ghe ga dito che lu l’era drio far una roba sbaliada, Uzia l’è restà pròpio cativo. Par quela, lu no’l ga seità leal a Geovà e l’è stà castigà cola lepra. (2 Cró. 26:19-21) Se Uzia el gavesse seità ùmile, la so vita podaria esser stata tanto meio.
Invesse de farse veder par quel che femo, ghemo de ricordarse che sol semo boni de far qualcossa col aiuto de Geovà (Varda el paràgrafo 11.) b
11. Come che podemo mostrar che semo ùmili? (Varda anca la ilustrassion.)
11 Dopo che Uzia l’è deventà poderoso, lu el ga assà de darghe valor ale robe bone che Geovà el ghe gavea dato. Alora, imparemo che ghemo de ricordarse che tute le robe bone e le benedission dela nostra vita le vien de Geovà. Par quela, invesse de sprosiarse de quel che femo, ne ocore sempre darghe onor a Geovà e ringrassiarlo. i (1 Cor. 4:7) Ne ocore anca esser ùmili, ricordarse che semo imperfeti e che ghemo bisogno de consili. Varda cossa che un fradel de intorno de 60 ani el ga dito: “Mi go imparà a no restar tanto disgustà quando i altri i vede che go sbalià. Quando una persona la me dà un consìlio par causa de qualche sbàlio che go fato, mi proo far meio e seitar a servir a Geovà contento.” Sicuro che, se noantri obedimo a Geovà e seitemo ùmili, saremo pròpio felici. — Pro. 22:4.
SEITA A NDAR IN SERCA DEL AIUTO DE GEOVÀ
12. Come che Giosia l’è ndato in serca de Geovà quando l’era gióveno? (2 Cróniche 34:1-3)
12 Fà compagno le bone dessision de Giosia. Giosia l’era sol un giovenoto quando el ga volesto imparar sora Geovà e farlo contento. Ma, no l’è mia stà fàcile par lu parché, in quela època, quasi tute le persone le adorea falsi dèi. Ancora cossita, vanti che el gavesse 20 ani, Giosia el ga scominsià a giutar la nassion a adorar a Geovà dela maniera giusta. Sicuro che lu l’è stà pròpio coraioso! — Ledi 2 Cróniche 34:1-3. j
13. Cossa che ndarà cambiar nela to vita se te dessidi dedicarte a Geovà?
13 Anca se te sì pròpio gióveno, te pol far compagno a Giosia e proar imparar de pi sora Geovà e le so qualità. Se te fè cossita, te volarè dedicar la to vita a lu. Ma, cossa che ndarà cambiar nela to vita se te dessidi dedicarte a Geovà? Varda cossa che Luke el ga dito quando el se ga batesà con 14 ani: “De adesso avanti, servir a Geovà e contentarlo sarà la roba pi importante dela me vita.” (Mar. 12:30) Se te dessidi dedicar la to vita a Geovà, te gavarè tante benedission.
14. Parla esempi de gióveni che i ga fato compagno al rè Giosia.
14 Che dificoltà i gióveni che i serve a Geovà i pol infrontar? Un gióveno de nome Johan, che el se ga batesà con 12 ani, el ga dito che i so coleghi i volea che lu el fumesse sigri eletrònichi. Alora, par esser bon de dàrghene fora, Johan el se ga ricordà che quei sigri i ndaria rovinar la so salute e anca la so amicìssia con Geovà. Una gióvena de nome Rachel, che la se ga batesà con 14 ani, la ga spiegà cossa che la giuta a dàrghene fora cole dificoltà nela scola. Ela la ga dito: “Mi proo sempre ricordarme dela Bìblia e de Geovà. Par esémpio, quando go la aula de Stòria, me ricordo de quel che la Bìblia la dise o de una professia, e quando son drio ciacolar con qualchedun, me vien in mente un testo che mi podaria leder.” Se te sì un gióveno, pol esser che le to dificoltà no le ze compagne a quele del rè Giosia. Ma anca ti te pol mostrar sabedoria e esser leal compagno lu l’è stà. Se te impari a dàrghene fora cole dificoltà adesso, te sarè ben parecià par infrontar i problemi che te gavarè pi avanti.
15. Come mostra 2 Cróniche 34:14 e 18-21, cossa che ga giutà Giosia a seitar a servir a Geovà?
15 Quando el rè Giosia el gavea 26 ani, el ga mandà rangiar su el témpio. Alora, l’è stà “catà el libro dela Lege che Geovà el gavea dato par meso de Moisè”. Quando Giosia el ga scoltà quel che el libro el disea, lu el ga scominsià a cambiar quel che ghe ocorea. Cossita, l’è stà bon de seitar fedele a Geovà. (Ledi 2 Cróniche 34:14, k 18-21. l) Se te sì gióveno, cossa che te pol imparar del esémpio de Giosia? Fursi te sì belche drio proar leder la Bìblia tuti i di. Te piase lederla? Proa anca scriver do i testi che te pensi che ndarà giutarte. Cossita, te sarè bon de ricordarte dei testi che te ghè ledesto e de quel che te ghè imparà. Quel gióveno de nome Luke, che ghemo parlà prima, el fà pròpio cossita. Se te cognossi la Bìblia e te la ami, te gavarè ancora pi voia de seitar a servir a Geovà. E compagno Geovà el ga giutà Giosia a far quel che l’è giusto, lu el ndarà giutarte anca ti.
16. (a) Parché che Giosia el ga fato un bruto sbàlio? (b) Cossa che noantri podemo imparar?
16 Impara dele brute dessision de Giosia. Quando Giosia el gavea intorno de 39 ani, el se ga fidà de pi in lu stesso che in Geovà. Par causa de questo sbàlio, lu l’è stà copà. (2 Cró. 35:20-25) Cossa che noantri podemo imparar? No importa se semo pi veci o se fà tanto tempo che studiemo la Bìblia, ghemo de seitar a ndar in serca de Geovà. Questo vol dir che ghemo de pregar sempre, studiar la Bìblia e acetar i consili de bravi fradei. Cossita, saremo boni de far quel che l’è giusto e saremo pi felici. — Tia. 1:25.
I GIÓVENI I POL ESSER FELICI PAR SEMPRE
17. Cossa che podemo imparar dela stòria de Geoàs, Uzia e Giosia?
17 Ghen’è tante bele robe che te pol far intanto che te sì gióveno. E la stòria de Geoàs, Uzia e Giosia la mostra che anca i gióveni i pol far bone dessision e contentar a Geovà. L’è vera che, dopo, quei tre rè i ga fato sbali. Ma se te proi far compagno le bele robe che lori i ga fato e te te sforsi de no far i medèsimi sbali che lori, te podarè gaver una vita felice.
La vita de Davi la ze stata pròpio bela parché lu el ga proà contentar a Geovà ancora de gióveno (Varda el paràgrafo 18.)
18. Che esempi dela Bìblia i mostra che te pol gaver una vita felice? (Varda anca la ilustrassion.)
18 La Bìblia la mostra diversi esempi de gióveni che i ze stati amighi de Geovà, i lo ga assà contento e i ga bio una bela vita. Ti te pol studiar anca sora la stòria de gióveni come Davi, Marco e Timòteo. Par esémpio, ancora che el fusse ben gióveno, Davi el ga scoliesto adorar a Geovà e esser so amigo. L’è vera che el ga sbalià un per de volte, ma Geovà el ghe volea ben parché el se sforsea de far quel che l’era giusto. (1 Rè 3:6; 9:4, 5; 14:8) El esémpio de Davi el ndarà incoraiarte a esser leal a Geovà. Se te studi el esémpio de questi gióveni, te vedarè che lori i ga scominsià bonora a servir a Geovà e i ga seità leai. Le bone dessision che i ga fato li ga giutadi a esser felici e a assar Geovà contento.
19. Come che pol esser la to vita?
19 Se te te fidi in Geovà invesse de fidarte in ti stesso, lu el ndarà giutarte a far bone dessision. La maniera che te vivi adesso mostrarà come che sarà la to vita nel futuro. (Pro. 20:24) Ti te pol gaver una vita felice e con tante benedission. E ricòrdate che Geovà el ghe dà valor a quel che te fè par lu. Alora, sìpia sicuro che servir al to caro Pare, Geovà, l’è la meio roba che te pol far!
CÀNTICO 144 Proa imaginar quel che Dio el farà
a Valtri che sì gióveni gavé de ricordarve che Geovà el sa che no l’è mia fàcile par valtri seitar leai a lu. Alora, come che podé far bone dessision che le ndarà contentarlo? In questo stùdio, ndaremo veder cossa che podemo imparar del esémpio de tre tosi che i ze deventadi rè de Giudà.
b (Proverbi 2:1) Me fiol, se te scolti le me parole e meti via nel cuor i me comandamenti,
c (Proverbi 2:10-12) Quando la sabedoria la ndarà rento el to cuor e la cognossensa la te piaserà, 11 la capacità de pensar la te tenderà e el bon giudìssio el te protegerà. 12 Queste robe le te giutarà a no far quel che l’è sbalià, e a salvarte dei òmini che i parla robe rugne,
d (Proverbi 22:6) Insegna al toseto la strada che el ga de ndar. Anca quando el sarà vècio, lu no la abandonarà.
e (Proverbi 23:15) Fiol mio, se te deventi una persona che ga el saver, el me cuor el restarà contento.
f (Proverbi 23:24, 25) L’è sicuro che el pare de un giusto el restarà pien de alegria. Quel che l’è pare de un fiol sapiente el va contentarse par causa de lu. 25 El so pare e la so mare i restarà contenti, e quela che lo ga bio la va restar piena de alegria.
g (2 Cróniche 24:17, 18) Dopo che Geoiada l’è morto, i prinsipi de Giudà i ze vegnesti e i se ga indenocià davanti el rè, e el rè li ga scoltadi. 18 Lori i ga abandonà a Geovà, el Dio dei so antenati, e i ga scominsià a adorar i palanchi sacri e le imàgine. Par quela, Geovà l’è restà inrabià cole persone de Giudà e Gerusalen par causa del so pecato.
h (2 Cróniche 26:1-5) Alora, tute le persone de Giudà le ga scoliesto Uzia, che el gavea 16 ani, par esser rè nel posto de so pare Amazia. 2 Dopo che el rè Amazia l’è morto, Uzia el ga fato su nantra volta la cità de Elote e ghe la ga data indrio a Giudà. 3 Uzia el gavea 16 ani quando l’è deventà rè, e el ga governà par 52 ani in Gerusalen. So mare la gavea nome Gecolia e la era de Gerusalen. 4 Lu el fea quel che l’era giusto ai oci de Geovà, cossita come Amasia, so pare, el gavea fato. 5 Lu el ndea in serca de Dio ntei giorni de Zacaria, che el ghe ga insegnà a temer el vero Dio. Intanto che lu el ndea in serca de Geovà, el vero Dio lo fea ndar ben.
i Varda el quadro “Cuidado com a falsa modéstia”, nel artìcolo “Ser popular nas redes sociais é tão importante assim?”, nel site jw.org.
j (2 Cróniche 34:1-3) Giosia el gavea oto ani quando l’è deventà rè, e el ga governà par 31 ani in Gerusalen. 2 Lu el ga fato quel che l’era giusto ai oci de Geovà e el ga fato compagno el so antenato Davi. Lu no’l ga desobedio ai comandamenti dela Lege. 3 Nel so otavo ano come rè, intanto che l’era ancora un toso, lu el ga scominsià a ndar in serca del Dio del so antenato Davi. Quatro ani dopo, lu el ga scominsià purificar Giudà e Gerusalen. El ga finio fora coi posti de adorassion, coi palanchi sacri, cole imàgine e cole stàtue de metal.
k (2 Cróniche 34:14) Quando i era drio tor i soldi che i ze stati portadi ala casa de Geovà, el sasserdote Ilchia el ga catà el libro dela Lege che Geovà el gavea dato par meso de Moisè.
l (2 Cróniche 34:18-21) Safan, el secretàrio, anca el ga dito al rè: “El sasserdote Ilchia el me ga dato un libro.” E Safan el ga scominsià a lederlo al rè. 19 Intanto che el rè el scoltea le parole dela Lege, lu el ga sbregà la so roba. 20 Alora, el rè el ga ordinà a Ilchia, a Aicon, fiol de Safan, a Abdon, fiol de Mica, a Safan, el secretàrio, e a Asaia, servo del rè: 21 “Fé una roba par mi e par quei che ancora ghen’è in Israel e in Giudà. Ndé domandar a Geovà sora le parole de questo libro che l’è stà catà. Geovà l’è tanto cativo con noantri parché i nostri antenati no i ga mia obedio le parole de Geovà e parché no i ga fato tuto quel che ghen’è scrito in questo libro.”
