1. Cossa che el apòstolo Piero el ga fato poco vanti de morir?

 EL APÒSTOLO Piero el ga servio a Geovà par tanti ani. Lu el ga predicà insieme a Gesù, el ga scominsià a predicar a quei che no i era giudei e el ga fato parte del corpo governante. Ma, poco vanti che Piero el morisse, Geovà el ghe ga dato nantro laoro de far. Intorno dei ani 62 a 64, lu el ga scrito due carte che le ze i libri dela Bìblia de 1 e 2 Piero. Lu el volea che queste carte le giutesse i servi de Dio anca dopo che el morisse. — 2 Pie. 1:12-15.

2. Parché che le carte che Piero el ga scrito le ga giutà tanto i fradei in quela època?

² El apòstolo Piero el ga scrito le so due carte nte una època che i fradei i gavea pròpio de bisogno, parché i era drio “patir diverse provassion”. (1 Pie. 1:6) In quel tempo, ghen’era rento la congregassion òmini rugni che i insegnea busie e i fea robe sbaliade. (2 Pie. 2:1, 2, 14) E i fradei che i era de star in Gerusalen suito i ndaria veder i esèrsiti de Roma finir fora cola cità. (1 Pie. 4:7) Par quela, sicuro che le carte de Piero li ga giutadi a perseverar nele dificoltà che i era drio infrontar e a esser pareciadi par dàrghene fora coi problemi che i vegnaria pi avanti. b

3. Parché che l’è importante studiar le carte che Piero el ga scrito?

³ Noantri vivemo nte una època che tante persone le fà robe sbaliade. Par quela, pol esser fadiga servir a Geovà. Anca savemo che suito ndaremo infrontar una granda tribolassion che la sarà pedo de quela che i fradei giudei i ga infrontà. Alora,  ancora che Piero el gàpia scrito le due carte par i fradei del primo sècolo, Geovà el ga volesto che le fusse meteste nela Bìblia parché le pol giutar tanto a noantri. (Rom. 15:4) Le carte che Piero el ga scrito le ze importante parché le pol giutarne a seitar a spetar el giorno de Geovà, a dàrghene fora cola paura dei òmini e a gaver tanto amor un al altro. Quel che Piero el ga scrito anca ndarà giutar i ansiani a saver come tender ben dele piegorete de Geovà.

4. De acordo con 2 Piero 3:3, 4, cossa che pol far pi fiaca la nostra fede?

⁴ Intorno de noantri, ghen’è tanti che no i crede in quel che la Bìblia la dise sora el futuro. Arquanti i crede che el fin no’l vegnarà mai e i ne ride drio parché fà tanti ani che semo drio spetar el fin. (Ledi 2 Piero 3:3, 4. c) Alora, se scoltemo una roba cossita de qualchedun nela predicassion, nel laoro o nela fameia, pol esser che la nostra fede la reste pi fiaca. Ndemo veder come quel che Piero el ga scrito pol giutarne.

5. Cossa che ndarà giutarne a spetar con passiensa el fin de questo mondo? (2 Piero 3:8, 9)

⁵ Fursi arquanti i pense che Geovà l’è drio meter massa par finir fora questo mondo. Ma, quel che Piero el ga scrito ne giuta a spetar con passiensa. Parché? Parché ne fà ricordarse che el tempo de Geovà l’è difarente del nostro. (Ledi 2 Piero 3:8, 9. d) Mila ani par noantri l’è un giorno par lu. E Geovà anca el ga tanta passiensa parché no’l vol che nissuni sìpia finidi fora. Magari, quando riva la ora, Dio el ndarà finir fora questo mondo. Alora, sicuro che restemo tanto contenti de doperar el tempo che ghemo par predicar ale persone in tuta la Tera.

6. Come che podemo ‘gaver ben in mente el giorno de Geovà’? (2 Piero 3:11, 12)

⁶ Piero el ga dito che l’è tanto importante ‘gaver ben in mente el giorno de Geovà’. (Ledi 2 Piero 3:11, 12. e) Come che podemo far questo? Tuti i giorni, ghemo de pensarghe sora le benedission che gavaremo nel novo mondo. Alora, proa imaginar come che sarà bel tirar el fià cola ària pura, magnar robe bone sensa velen, catar nantra volta i nostri cari amighi e persone dela fameia che i ze morti e insegnar la Bìblia a persone che le ga vivesto tanto tempo indrio. Se ghe pensemo sora queste benedission, saremo sicuri che suito vien el fin e saremo boni de spetarlo con passiensa. E come savemo dele robe che le ndarà suceder nel futuro, no saremo mia imbroiadi par le busie. — 2 Pie. 3:17.

7. Cossa che pol suceder se ghemo paura de quel che le persone le pensa?

⁷ Come ghemo ben in mente el giorno de Geovà, noantri volemo parlar dele bone notìssie ai altri. Magari, dele volte, no ghemo coraio de predicar parché ghemo paura de quel che le persone le pensa. L’è stà pròpio  questo che ga sucedesto con Piero. Nela note che Gesù l’è stà giulgà, Piero el ga bio paura e el ga fin dito tre volte che no lo cognossea mia! (Mat. 26:69-75) Ma, Piero l’è stà bon de dàrghene fora cola paura, e un tempo dopo el ga scrito: “No sté gaver paura de quel che lori i ga paura, gnanca resté preocupadi.” (1 Pie. 3:14) Alora, quel che Piero el ga scrito ne giuta a esser sicuri che semo boni de dàrghene fora cola paura dele persone.

8. De acordo con 1 Piero 3:15, cossa che pol giutarne a dàrghene fora cola paura dei altri?

⁸ Cossa che pol giutarne a dàrghene fora cola paura dele persone? Piero el ga dito: “Gavé de acetar de cuor che Cristo l’è el Signor e che lu l’è santo.” (Ledi 1 Piero 3:15. f) Questo vol dir che ghemo de pensarghe sora el poder e la autorità che Gesù Cristo el ga come Rè. Alora, cossa che te pol far se te te ghè tirà indrio de parlar sora le bone notìssie parché te ghè bio paura? Ricòrdate del nostro Rè e proa imaginarlo nel cielo insieme a milioni de àngeli. Lu ‘el ga tuta la autorità nel cielo e nela Tera’ e el sarà ‘con ti tuti i giorni, fin che se finisse questo mondo’. (Mat. 28:18-20) Come Piero el ga dito, ghemo “de esser sempre pronti” par parlar sora quel che credemo. Alora, se te vol predicar nel laoro, nela  scola o in nantro posto, pensa vanti in quel che te podarissi dir. Anca l’è importante pregar a Geovà e fidarte che lu el ndarà giutarte a dàrghene fora cola paura dele persone. — Ati 4:29.

9. Quando che Piero no’l ga mostrà el vero amor? (Varda anca la ilustrassion.)

⁹ Piero el ga scoltà quando Gesù el ga dito: “Mi ve dao un novo comandamento: gavé de amarve un al altro. Cossita come mi ve go amà, anca valtri gavé de amarve un al altro.” (Gio. 13:34) Ma, pi tardi, Piero no’l ga pi volesto magnar insieme dei fradei che no i era giudei. Lu el ga bio paura de quel che i giudei i podaria pensar de lu. Par quela, el apòstolo Paolo lo ga ciamà de falso, parché no l’era mia drio mostrar amor. (Gàl. 2:11-14) Alora, Piero el ga scoltà el consìlio de Paolo e el ga imparà come mostrar el vero amor. Nele so due carte, lu el ga scrito che noantri no ghemo sol de sentir amor par i nostri fradei, ma anca mostrarlo.

10. Cossa che ndarà giutarne a mostrar el vero amor? (1 Piero 1:22)

¹⁰ Piero el ga dito che ne ocore ‘gaver el vero amor intrà de noantri’. (Ledi 1 Piero 1:22. g) Come che podemo gaver questo vero amor? Ne toca obedir a tuto quel che imparemo dela Bìblia. E la Bìblia la dise che “Dio el trata compagno tute le persone”. (Ati 10:34, 35) Alora, no saremo drio obedir al comandamento de Gesù se mostremo amor sol a un per de fradei nela congregassion. L’è vera che fursi semo pi amighi de un per de fradei, cossita come Gesù l’era. (Gio. 13:23; 20:2) Ma, Piero el ga dito che ghemo de sforsarse par mostrar el vero amor a tuti fradei e sorele, parché semo come una fameia. — 1 Pie. 2:17.

11. Cossa che vol dir mostrar amor un al altro de cuor?

¹¹ Piero el ne ga insegnà che l’è importante “amar tanto e de cuor un al altro”. Questo vol dir che ghemo de mostrar amor ai altri, anca se no l’è mia fàcile. Par esémpio, metemo dir che un fradel el te ga ofendesto o el te ga disgustà. Pol esser che la prima roba che te pensi de far l’è tratarlo dela medèsima maniera, invesse de mostrarghe amor. Ma, Piero el ga imparà che Dio no’l ghe piase mia che femo cossita. (Gio. 18:10, 11) Lu el ga scrito: “No sté pagar mal con mal, gnanca insulto con insulto. Invesse, parlé ai altri con bone parole.” (1 Pie. 3:9) Se ghemo un grando amor par i altri, saremo boni de tratarli con bontà anca quando i fà qualcossa che ne assa disgustadi.

12. (a) Cossa che saremo boni de far se ghemo un grando amor par i fradei? (b) De acordo col vìdeo No stemo assar che gnente intrighe la nostra union, cossa che te sì dessidio de far?

¹² Nela so prima carta, Piero el ga parlà che ne ocore gaver “grando amor un par el altro”. Se ghemo questo amor, saremo boni perdonar “tanti pecati” e no sol un per de sbali che i fà contra noantri. (1 Pie. 4:8) Quando Piero el ga dato questo consìlio, fursi el se ga ricordà de quel che el ga imparà de Gesù sora el perdon. Lu el pensea che l’era drio mostrar bontà quando el ga domandà a Gesù se el gavea de perdonar un fradel “fin sete volte”. Ma Gesù el ghe ga dito che el gavea de perdonar “fin 77 volte”, o sia, lu el gavea de perdonar sempre. (Mat. 18:21, 22) Pol esser che te pensi che l’è fadiga meter in pràtica questo consìlio. Ma no stà restar desanimà, parché anca altri servi de Dio i ga belche fato fadiga perdonar a qualchedun. Alora, sfòrsate de perdonar el to fradel e far la pace. h

13. Parché che pol esser fadiga par i ansiani catar fora tempo par tender dei fradei?

¹³ Sicuro che Piero no’l se ga mai desmentegà de quel che Gesù ghe ga dito dopo de esser ressussità: “Tendi dele me piegorete.” (Gio. 21:16) Se te sì un ansiano, te sè che queste parole le ze anca par ti. Ma, pol esser fadiga catar fora tempo par tender dei fradei. Parché? Savemo che i ansiani i ga de tender dela so fameia, darghe quel che ghe ocore e giutarli a esser amighi de Geovà. Lori anca i ga de esser un bel esémpio nela predicassion e pareciarse ben par far le so parte nele riunion, assemblee e congressi. Arquanti ansiani anca i laora nela Comission de Contato coi Ospedai e nei Departamenti de Costrussion. Alora, sicuro che lori i ga tanto de far!

14. Cossa che pol giutar i ansiani a tender ben dele piégore de Dio? (1 Piero 5:1-4)

¹⁴ El apòstolo Piero el ga dito ai ansiani: “Tendé dele piégore de Dio.” (Ledi 1 Piero 5:1-4.) Se te sì un ansiano, sicuro che te ghe vol ben ai to fradei e sorele e te vol tenderli. Ma pol esser che, dele volte, te te senti stufo e te ghè massa laori de far. Alora, come che te pol tender ben dei to fradei? Prega a Geovà e contaghe come che te sì drio sentirte. Varda quel che Piero el ga scrito: “Se qualchedun el serve, che el fae questo ntela forsa che Dio el ghe dà.” (1 Pie. 4:11) Fursi i fradei i ze drio tribolar con un problema che ndarà risolverse sol nel novo mondo. Alora, ricòrdate che Gesù l’è la meio persona par giutarli adesso e che el sarà bon de finir fora coi so problemi nel futuro. Geovà sol el vol che te mostri amor ai fradei, che te li tendi e che te sìpia un bel esémpio par lori. i

15. Cossa che un ansiano el fà par tender dei fradei? (Varda anca la ilustrassion.)

¹⁵ Un fradel de nome William, che l’è ansino fà tanti ani, el sa che l’è tanto importante incoraiar i fradei. Quando ga scominsià la pandemia  del COVID-19, lu e i altri ansiani i se ga sforsà de parlar con cada fradel e sorela dela congregassion tute le stimane. Lu el ga spiegà che el ga fato cossita parché tanti fradei i era lori soli casa e i podaria scominsiar a pensar massa nele robe brute che le era drio suceder. Alora, quando ghen’è un fradel che l’è drio tribolar, William el ga dito che lo scolta con atension par saver che pensieri el ga e cossa el ga de bisogno. Dopo, William el va in serca de publicassion e vìdei nel nostro site par incoraiar questo fradel. Lu el ga dito: “I ansiani i ga de incoraiar i fradei adesso de pi che mai. Noantri laoremo tanto par giutar le persone a cognosser a Geovà. Ma ghemo de far el stesso sforso par giutar i nostri fradei a seitar fedeli.”

16. Come che podemo meter in pràtica le lession che ghemo imparà dele carte de Piero?

¹⁶ Noantri ghemo imparà sol un per de lession dele carte che Piero el ga scrito, e pol esser che te ghè visto che te podarissi cambiar qualcossa. Par esémpio, sarà che te podarissi pensar de pi nele benedission che ghen sarà nel novo mondo? Pensito che te podarissi predicar de pi nel laoro, nela scola o in altri posti? Gheto visto altre maniere de mostrar amor ai fradei e sorele? Se te sì un ansiano, sito dessidio de sforsarte de pi par tender dele piegorete de Geovà? Se te ghè visto che te ocore cambiar arquante robe, no stà restar desanimà, parché ‘el Signor l’è bon’ e el te giutarà. (1 Pie. 2:3) Varda la garansia che el apòstolo Piero el ne ga dato: ‘Dio el ndarà pareciarve del tuto par servir ai altri. Lu el ve farà forti, el ndarà giutarve a mantegnerve fedeli e el ve meterà nte un posto firme.’ — 1 Pie. 5:10.

17. Cossa che te ndarè guadagnar se te perseveri e se te assi che Geovà el te insegne?

¹⁷ De scomìnsio, Piero el pensea che no’l meritea mia restar darente de Gesù. (Luc. 5:8) Ma lu el se ga sforsà tanto e l’è stà bon de seitar ndarghe drio. Cossita, Geovà el ga assà che Piero el ndesse “rento el Regno eterno del nostro Signor e Salvador Gesù Cristo”. (2 Pie. 1:11) Alora, se te perseveri compagno a Piero e te assi che Geovà el te insegne, anca ti te ‘gavarè la to salvassion’. — 1 Pie. 1:9.