1. Cossa che Piero el ga fato dopo ciapar tanti pessi par meso de un miràcolo?

 PIERO el ga seità a pescar tuta la note, ma no’l ga ciapà gnente. Ancora cossita, Gesù el ghe ga dito: ‘Ndé ndove l’è pi fondo e tré do la rede par ciapar i pessi.’ (Luc. 5:4) Anca se Piero el pensesse che no i saria boni de ciapar pessi, lu el ga obedio a Gesù. Cossa che ga sucedesto? Ghen’era tanti pessi nela rede che la ga scominsià a sbregarse. Cossita, Piero e i altri òmini che i era insieme i se ga nicorti che gavea sucedesto un miràcolo e i ze restadi spaventadi. Alora, Piero el ghe ga dito a Gesù: “Signor, mi no mèrito esser darente de ti parché mi fao pecati.” (Luc. 5:6-9) Pol esser che Piero el pensesse che no’l meritea mia star insieme a Gesù.

2. Parché che l’è importante noantri imparar del esémpio de Piero?

² La Bìblia la mostra che arquante volte Piero el ga dito o el ga fato qualcossa che dopo el se ga ciamà gramo. Alora, lu l’era pròpio un omo ‘che el fea pecati’. Te te senti compagno a lu? Te volarissi gaver qualche qualità o cambiar qualcossa e no te sì mia bon? Alora, imparar sora el esémpio de Piero pol incoraiarte e giutarte a no desister. Come? Lu l’era imperfeto compagno a noantri e el se ga sforsà tanto par far quel che l’è giusto. Cossita, el so esémpio ne assa sicuri che Geovà no’l speta de pi de quel che semo boni. Proa pensa: Geovà el ga volesto che anca i sbali de Piero i fusse stati scriti nela Bìblia par insegnarne. (2 Tim. 3:16, 17) Lu el vol che seitemo perseverar, anca se femo qualche sbali.

3. Parché che ghemo de perseverar?

 ³ Parché che perseverar l’è tanto importante? Parché quando seitemo a far una roba, la femo cada volta meio. Par esémpio, una persona la ga de trenar tanto tempo fin che la impare a sonar el violon. L’è vera che la ndarà far tanti sbali intanto che la impara, ma no la va mia desister. Magari, anca dopo che la impara a sonarlo ben, la ndarà far qualche sbali. Dela stessa maniera, anca se se ghemo sforsà tanto par dàrghene fora con un sbàlio che feino, pol esser che ndaremo farlo nantra volta. Ma ghemo de seitar a sforsarse par far quel che l’è giusto. Tuti noantri sbaliemo, ma Geovà el ndarà giutarne se perseveremo. (1 Pie. 5:10) Anca dopo che Piero el ga fato tanti sbali, Gesù el ghe ga mostrà tanto amor. Adesso, ndaremo imparar del esémpio de Piero.

4. (a) De acordo con Luca 5:5-10, cossa che Piero el ga dito sora lu stesso? (b) Come che Gesù el ga mostrà che el se fidea in Piero?

⁴ La Bìblia no la spiega parché che Piero el ga dito che ‘el fea pecati’ o che sbali lu l’era drio pensar. (Ledi Luca 5:5-10. b) Ma podemo creder che el gàpie fato arquanti pecati. Pol esser che lu el gavesse paura parché el pensea che no’l saria bon de far gnente. Ancora cossita, Gesù el savea che Piero el saria bon de seitar leal e el ghe ga dito con bontà: “No stà gaver paura.” La vita de Piero la ga cambià dopo che el ga visto che Gesù el se fidea in lu. Alora, un tempo dopo, lu e so fradel, Andrè, i ga assà el so laoro de pesca par ndar drio a Gesù. Par causa de questa dessision, lori due i ga ricevesto tante benedission. — Mar. 1:16-18.

5. Che benedission Piero el ga ricevesto dopo che l’è deventà dissìpolo de Gesù?

⁵ Piero el ga bio tante benedission dopo che l’è deventà dissìpolo de Gesù. Lu el ga visto Gesù curar i maladi, parar via demoni e fin ressussitar i morti. c (Mat. 8:14-17; Mar. 5:37, 41, 42) E Piero mai pi el se ga desmentegà de veder la glòria de Gesù come Rè del Regno de  Dio. (Mar. 9:1-8; 2 Pie. 1:16-18) Lu el ga visto tante robe de gnanca creder parché l’era insieme a Gesù. Sicuro che Piero l’era contento cole benedission che el ga ricevesto dopo che el se ga fermà de pensar che no l’era bon de far gnente!

6. Sarà che l’è stà fàcile par Piero sempre far quel che l’era giusto? Spiega.

⁶ Magari, anca dopo veder e scoltar tante robe insieme a Gesù, Piero ancora el ga sbalià. Par esémpio, Gesù el ga spiegà ai so apòstoli che, de acordo cola Bìblia, lu el ndaria sofrir e el saria copà. Ma Piero el ghe ga dito che questo no ndaria mia suceder. (Mar. 8:31-33) Diverse volte, lu e altri apòstoli i ga barufà par veder chi che l’era el pi importante. (Mar. 9:33, 34) Nela note vanti de Gesù esser copà, Piero el ga taià fora la récia de un omo. (Gio. 18:10) Dopo, lu l’è restà tanto disgustà parché el ga dito tre volte che no’l cognossea mia so caro amigo, Gesù. — Mat. 26:75; Mar. 14:66-72.

7. Come che Gesù el ga proà giutar Piero dopo che l’è stà ressussità?

⁷ Ancora che Piero el fusse tanto desanimà, Gesù el ga proà giutarlo. Par esémpio, dopo che Gesù l’è stà ressussità, lu el ga assà che Piero el mostresse che lo amea e el ghe ga domandà de tender dele so piégore. (Gio. 21:15-17) Podemo esser sicuri che Piero el ga fato pròpio quel che Gesù el gavea domandà parché l’era intrà i primi dissìpoli che i ze stati scoliesti par ndar al cielo.

8. Che sbàlio Piero el ga fato in Antiochia?

⁸ Nel ano 36, Dio el ga mandà che Piero el parlesse con Cornèlio, che no l’era mia un giudeo. Quela volta, Cornèlio l’è stà scoliesto par ndar al cielo. Cossita, tuti i ga visto che Dio el trata compagno tute le persone e che anca quei che no i era mia giudei i podaria star intrà i so adoradori. (Ati 10:34, 44, 45) Alora, Piero el ga scominsià a magnar insieme a quei che no i era giudei. (Gàl. 2:12) Ma, arquanti dissìpoli de Gesù che i era giudei i pensea che questo no l’era mia giusto. Alora, quando Piero l’era in Antiochia, lu el se ga fermà de magnar insieme a quei che no i era giudei parché el gavea paura dei altri. Par quela, el apòstolo Paolo ghe ga dato un consìlio davanti de tuti. (Gàl. 2:13, 14) Cossita, vedemo che Piero el ga fato sbali anca dopo che l’è stà scoliesto par ndar al cielo. Ma lu el ga seità a proar far quel che l’era giusto. Cossa che lo ga giutà?

9. Come che Gioani 6:68, 69 mostra la lealtà de Piero?

⁹ Piero l’era leal e no’l se ga mia fermà de ndar drio a Gesù. Par esémpio, lu el ga mostrà la so lealtà quando arquanti dissìpoli no i gavea capio quel che Gesù el gavea dito. (Ledi Gioani 6:68, 69. d) Invesse de proar capir quel che i gavea scoltà o domandarghe cossa che volea dir, lori i lo ga abandonà. Ma, Piero no’l ga mia desistio de ndarghe drio parché el savea che ‘sol quel che Gesù el insegnea podaria dar la vita eterna’.

10. Come che Gesù el ga mostrà che el se fidea in Piero? (Varda anca la ilustrassion.)

¹⁰ Gesù el savea che, nela so ùltima note qua nela Tera, Piero e i so altri apòstoli i ndaria abandonarlo. Ancora cossita, lu no li ga abandonadi. Invesse, lu el ga dito che Piero el saria bon de seitar leal. (Luc. 22:31, 32) Gesù el savea che, anca se i so apòstoli i volesse far quel che l’era giusto, lori i era imperfeti. (Mar. 14:38) Alora, anca quando Piero el ga dito tre volte che no lo cognossea, Gesù no’l ga desistio  de giutarlo. E dopo che Gesù l’è stà ressussità, lu el se ga fato veder a Piero quando i era lori soli. (Mar. 16:7; Luc. 24:34; 1 Cor. 15:5) Sicuro che Gesù l’è stà bon de incoraiar tanto a Piero, che l’era pròpio disgustà par causa del so sbàlio.

11. Come che Gesù el ga mostrà a Piero che Geovà el ndaria giutarlo?

¹¹ Dopo che Gesù l’è stà ressussità, lu el ga fato che Piero e i so altri apòstoli i ciapesse tanti pessi par meso de un miràcolo. (Gio. 21:4-6) Sicuro che Piero el ga capio che Geovà ghe daria tuto quel che el gavesse de bisogno. Pol esser che lu el se ga ricordà de quando Gesù el ghe ga dito de ‘meter el Regno nel primo posto’. (Mat. 6:33) Cossita, Piero no’l ga seità a pensar sol nel so laoro de pesca. Invesse, la predicassion la ze deventada la roba pi importante dela so vita. Nel Pentecoste de 33, Piero el ga parlà con coraio e el ga giutà tante persone a acetar le bone notìssie. (Ati 2:14, 37-41) Dopo, lu el ga giutà i samaritani e altri che no i era giudei a deventar dissìpoli de Gesù. (Ati 8:14-17; 10:44-48) Sicuro che Geovà el ga doperà Piero de tante maniere par giutar tuti i tipi de persone a adorarlo dela maniera giusta.

12. Come che el esémpio de Piero pol giutarne se semo drio sforsarse de no far un sbàlio?

¹² Pol esser pròpio fadiga se fà tanto tempo che semo drio sforsarse de no far una roba sbaliada. Fursi pensemo che le dificoltà che semo drio infrontar le ze pedo de quele de Piero. Ma, col aiuto de Geovà, no ndaremo mai desister. (Sal. 94:17-19) Varda el esémpio de un fradel che, vanti de imparar la verità sora la Bìblia, l’era omossessual fea tanti ani. Lu l’è stà bon de meter in pràtica quel che el ga imparà dela Bìblia e la so vita la ga cambià del tuto. Ancora cossita, dele volte, lu el ga voia de far quel che l’è sbalià. Cossa che lo giuta a no desister? Questo fradel el ga dito: “Geovà el me dà forsa. E go visto che, col so aiuto, son bon de far quel che l’è giusto. Ancora che son imperfeto, Geovà el seita a doperarme e a darme forsa.”

13. De acordo con Ati 4:13, 29, 31, cossa che ghemo de far par esser compagno a Piero? (Varda anca la ilustrassion.)

¹³ Come ghemo visto, Piero el ga sbalià arquante volte parché el gavea paura dei altri. Ancora cossita, lu el ga domandà che Geovà el ghe desse forsa e l’è stà bon de gaver coraio.  (Ledi Ati 4:13, e 29, f 31. g) Anca noantri podemo dàrghene fora cola paura dei altri. Varda quel che ga sucedesto col fradel Horst. Quando l’era gióveno, lu l’era de star nela Alemagna nela època dela Seconda Guera Mondial. Nela so scola, tuti i parlea “Heil Hitler!” par saludarse. Anca lu el ga saludà i altri cossita arquante volte parché el gavea paura dei so coleghi e dei so maestri. Ma, quando Horst el ga parlà a so pare e so mare cossa el gavea fato, lori no i ghe ga dito su. Invesse, lori i ga pregà che Geovà ghe desse el coraio che el gavea de bisogno. Horst l’è stà bon de seitar fedele parché el se ga fidà in Geovà e el ga bio el aiuto de so pare e so mare. Un tempo dopo, lu el ga dito: “Geovà mai el me ga abandonà.” h

14. Come che i ansiani i pol giutar quei che i ze desanimadi?

¹⁴ Dopo che Piero el ga dito tre volte che no’l cognossea a Gesù, lu el gavea de dessider se el ndaria desister de esser so dissìpolo o se el seitaria fedele. Gesù el gavea pregà e domandà che Geovà el giutesse Piero a gaver una forte fede. Gesù anca el ga contà a Piero cossa el gavea domandà a so Pare, e el ga dito che lu el saria bon de incoraiar i so fradei. (Luc. 22:31, 32) Sicuro che ricordarse de quel che Gesù ghe gavea dito incoraiea tanto a Piero. Dela stessa maniera, Geovà e Gesù sempre i ndarà giutarne. Anca ancoi, Geovà el dopera ansiani  che i ne ama tanto par giutarne quando ghemo de dessider cossa che ndaremo far. (Efe. 4:8, 11) Varda el esémpio de Paul che el serve come ansiano fà tanti ani. Quando el vede un fradel desanimà, Paul lo giuta a ricordarse che Geovà el ga volesto esser so amigo. Dopo, el ghe dise che Geovà sempre el ndarà amarlo e giutarlo. Paul el ga dito: “Go visto che tanti fradei che i era desanimadi i ze stati boni de perseverar col aiuto de Geovà.”

15. Come che el esémpio de Piero e de Horst el mostra che quel che dise Mateo 6:33 l’è pròpio vera?

¹⁵ Se metemo el Regno in primo posto nela nostra vita, Geovà el ndarà tender de noantri compagno el ga tendesto de Piero e dei altri apòstoli. (Mat. 6:33) Varda quel che ga sucedesto con Horst dopo del fin dela Seconda Guera Mondial. Lu el volea esser pioniero, ma l’era poareto e no’l savea se el saria bon de mantegnerse. Ancora cossita, lu l’è ndato predicar tuta la stimana nela vìsita del superintendente par veder se Geovà el ndaria pròpio giutarlo. Nel fin de quela stimana, el superintendente ghe ga dato a Horst un envelope con tanti soldi sensa dir chi che lo gavea mandà. Lì, ghen’era soldi che bastea par Horst mantegnerse come pioniero par tanti mesi. Par meso de quel presente, lu el ga visto che Geovà el ndaria giutarlo. Come el fradel Horst l’era sicuro che Geovà el ndaria tenderlo, lu l’è stà bon de meter el Regno in primo posto par tuta la so vita. — Mal. 3:10.

16. Parché che l’è importante imparar de pi sora Piero e le so due carte?

¹⁶ Gesù no’l ga mai abandonà Piero anca se quel apòstolo el pensesse che no’l meritea star insieme a lu. Invesse, par causa del aiuto de Gesù, Piero l’è stà bon de deventar un apòstolo fedele e un bel esémpio par tuti noantri. Le due carte che Piero el ga scrito ale congregassion dela so època le pol insegnarne fin ancoi. Nel pròssimo stùdio, ndaremo imparar dele so due carte e veder come che podemo meter in pràtica i so consili.