1-2. Parché che volemo imparar de pi sora la stòria de Sanson?

 COSSA che te vien in mente quando te scolti el nome Sanson? Pol esser che te te ricordi che lu l’era un omo pròpio forte e che el ga fato tante robe bone. Ma lu el ga fato una bruta dessision che lo ga fato sofrir tanto. Ancora cossita, Geovà no’l se ga desmentegà de tuto quel che el gavea fato de bon. Par quela, lu el ga assà el esémpio de Sanson nela Bìblia par giutarne fin ancoi.

² Geovà el ga doperà Sanson par far robe de gnanca creder e par giutar i israeliti. Par quela, tanti ani dopo che Sanson l’è morto, Geovà el ga volesto che Paolo el parlesse de lu insieme a altre persone che le ga mostrà una granda fede. (Ebr. 11:32-34) El esémpio de Sanson pol incoraiarne tanto, parché el se ga fidà in Geovà anca quando el ga bio dificoltà. Ndemo veder come el so esémpio pol giutarne e cossa podemo imparar de lu.

3. Cossa che Geovà el volea che Sanson el fesse?

³ Quando Sanson l’è nassesto, i filistei i governea el posto ndove i israeliti i era de star e li fea sofria tanto. (Giui. 13:1) Alora, Geovà el ga scoliesto Sanson par salvarli. (Giui. 13:5) Sicuro che Sanson ghe ga tocà fidarse del tuto in Geovà par esser bon de far quel grando laoro e giutar i israeliti.

4. De acordo con Giuisi 15:14-16, come che Geovà el ga giutà Sanson?

⁴ Vedemo cossa ga sucedesto quando Sanson el se ga catà con una mùcia de soldadi filistei che i volea ciaparlo in Leì.  I òmini de Giudà i ze restadi tanto spauradi che i lo ga ligà con due soghe e i lo ga dato ai so nemighi. (Giui. 15:9-13) Ma, Sanson el se fidea in Geovà e el savea che lu lo giutaria. Alora, cossa che ga sucedesto? “El spìrito de Geovà el ghe ga dato poder” e lu le stà bon de liberarse dele soghe. Dopo, Sanson “el ga catà el osso dela ganassa de un mul” e lo ga doperà par copar mila soldadi filistei. — Ledi Giuisi 15:14-16. b

5. Parché che Sanson el ga doperà el osso dela ganassa de un mul par lotar?

⁵ Nissuni mai ga pensà de doperar el osso dela ganassa de un mul par lotar. Alora, parché che Sanson lo ga fato? Parché lu el savea che el saria bon de vinser i filistei par causa del aiuto de Geovà e nò par via de quel che el doperesse. Sanson el ga doperà quel che ghen’era intorno, e l’è stà bon de far quel che Geovà el volea. Sicuro che Geovà lo ga benedio par causa dela so fede!

6. Cossa che imparemo col esémpio de Sanson?

⁶ Ancoi, Geovà el ne dà la forsa che ne ocore par far quel che lu el vol, anca se pensemo che no saremo mia boni. E lu el pol giutarne de maniere de gnanca creder! Par quela, sìpia sicuro che Geovà el ndarà darte forsa compagno el ga fato con Sanson. Lu el ndarà giutarte a far quel che el vol se te te fidi in lu e se te ghe domandi aiuto. — Pro. 16:3.

7. Che esémpio mostra che ghemo de ndar in serca dela orientassion de Geovà?

⁷ Tanti fradei e sorele che i laora par far su i nostri posti de adorassion i mostra che i se fida in Geovà. Par esémpio, una volta, i fradei i fea el progeto e anca la costrussion de tuti i Saloni del Regno e dei altri posti che doperemo. Ma, come ghen’era cada volta de pi fradei e sorele, i fradei che i tendea dei  progeti e costrussion i ga visto che i gavaria de cambiar la maniera de far el laoro. Alora, dopo che i ga pregà, lori i ga fato pròpio questo. Cossita, invesse de far su tuti i Saloni del Regno, lori i ga scominsià a comprar e a rangiar su arquante costrussion che le era belche pronte. Robert, un fradel che el ga laorà in tante costrussion in tuto el mondo, el ga dito: “De scomìnsio, no l’è stà mia fàcile cambiar la maniera de laorar. Èrino drio far su i Saloni fea tanti ani. Ma i fradei i ga acetà questa orientassion e se vede che Geovà l’è drio benedirne.” Questo l’è sol un esémpio de come Geovà l’è drio giutar el so pòpolo a far quel che lu el vol. Par quela, saria bon che te te domandessi: ‘Sarà che mi vao in serca dela orientassion de Geovà e fao de volentiera i cambiamenti che ghe vol?’

8. Cossa che Sanson el ga fato quando el ga bio sen?

⁸ Fursi te te ricordi anca de altre robe de gnanca creder che Sanson el ga fato. Par esémpio, lu el ga copà un leon, e dopo un tempo, 30 filistei sensa che el gavesse gnente in man. (Giui. 14:5, 6, 19) Sanson el savea che lu sol l’era bon de far tute queste robe par causa del aiuto de Geovà. Dopo de copar i mila soldadi filistei, lu el ga mostrà che el pensea pròpio cossita. Quela volta, quando lu el ga bio sen, Sanson el ga domandà el aiuto de Geovà invesse de ndar in serca de àqua lu sol. — Giui. 15:18.

9. De acordo con Giuisi 15:19, come che Geovà el ga rispondesto a Sanson?

⁹ Par meso de un miràcolo, Geovà el ga verto un buso e el ga fato vegner fora àqua par Sanson. Quando lu “la ga bevesta, lu el ga bio forsa e coraio nantra volta”. (Ledi Giuisi 15:19. c) Pol esser che, quando el profeta Samuel el ga scrito el libro dei Giuisi ani dopo, quela fontana de àqua la era ancora là. Cossita, sempre che i israeliti i vedesse quela fontana de àqua, lori i podaria ricordarse che Geovà el ndaria giutarli a dàrghene fora con qualche dificoltà se i se fidesse in lu.

10. Cossa ghemo de far par gaver el aiuto de Geovà? (Varda anca la ilustrassion.)

¹⁰ Anca se ghemo qualche abilità o se semo boni de far arquante robe, sempre ne ocore ndar in serca del aiuto de Geovà. Ghemo de fidarse in lu, esser ùmili e ricordarse che sol saremo boni de far qualcossa col so aiuto. Cossita come Sanson el ga bio forsa nantra volta dopo bever quela àqua, noantri gavaremo forsa e seitaremo leai se doperemo ben quel che Geovà el ne dà. — Mat. 11:28.

11. (a) Come che Aleksey el mostra che el se fida in Geovà? (b) Come che podemo mostrar che se fidemo in Geovà?

¹¹ Varda quel che ga sucedesto con Aleksey, un fradel dela Rùssia che l’è drio infrontar perseghission. Cossa ga giutà a lu e ala so dona a seitar fedeli? Aleksey el ga dito: “Mi e la me dona se sforsemo de leder e studiar la Bìblia insieme. Tuti i giorni de matina, noantri ledemo e parlemo sora el testo del giorno e dopo preghemo a Geovà.” Cossa che noantri podemo imparar del esémpio de Aleksey? Invesse de fidarse in noantri stessi, ghemo de fidarse in Geovà. Par quela, ne ocore far la nostra fede cada volta pi forte. Come? Ghemo de leder e studiar la Bìblia, pregar a Geovà e ndar ala predicassion e ale riunion. Se femo cossita, Geovà el ndarà benedirne e el ne darà forsa, compagno el ghe ga dato a Sanson.

12. (a) Che bruta dessision Sanson el ga fato? (b) Parché che smorosar Dalila l’è stà una bruta dessision?

¹² Sanson el ga fato arquante dessision che le ze state de acordo con quel che Geovà el volea. Par esémpio, una volta, Geovà el ga volesto che lu el se maridesse con una dona filistea. Cossita, Sanson el podaria ndar contra i filistei. Dopo un tempo, lu l’è ndato ala casa de una prostituta, in Gaza nela Filìstia. Savemo che questo l’era de acordo cola volontà de Geovà parché lu el ga giutà Sanson a ndar contra quei filistei e a portar via i portoni de quela cità. (Giui. 14:1-4; 16:1-3) Ma, compagno a noantri, Sanson l’era imperfeto e el ga fato brute dessision. Una dele pedo dessision che el ga fato l’è stà scominsiar a smorosar Dalila, una tosa del Vale de Soreche. (Giui. 16:4) Come fursi ela la era israelita, smorosarla no ndaria mia giutar Sanson a ndar contra i filistei. Alora, invesse de far quel che Geovà el volea, Sanson el ga fato quel che el volea lu.

13. Cossa che Dalila la ga fato contra Sanson?

¹³ I filistei i volea saver parché che Sanson el gavea tuta quela forsa e i ghe ga dato soldi a Dalila par imbroiarlo. Alora, Dalila la ga tacà a domandarghe una volta drio man parché lu el gavea tanta forsa fin che lu la ga contada. Lu ghe volea tanto ben e no l’è mia nicorto che la era drio imbroiarlo. Par causa de questo sbàlio, Sanson el ga perso la so forsa e la benedission de Geovà par un tempo. — Giui. 16:16-20.

14. Che dificoltà Sanson el ga infrontà par causa de Dalila?

¹⁴ Sanson el ga sofrio tanto parché el se ga fidà in Dalila invesse de fidarse in Geovà. I filistei i lo ga metesto nte una preson in  Gaza, la cità ndove Sanson el gavea cavà via i portoni un tempo vanti. Lori anca i lo ga assà orbo e i lo ga fato deventar un schiavo che el schissea i grani. Dopo, i filistei i ga fato una festa par el so dio Dagon e i ga menà Sanson lì. Lori i pensea che i era stati boni de vinser Sanson par causa del so falso dio. Par quela, i ga menà Sanson lì par riderghe drio e diverstirse. — Giui. 16:21-25.

15. De acordo con Giuisi 16:28-30, come che Sanson el ga mostrà che el se fidea in Geovà? (Varda la ilustrassion dela prima pàgina.)

¹⁵ L’è vera che Sanson el gavea fato un bruto sbàlio. Ancora cossita, lu no’l se ga fermà de servir a Geovà. Invesse, lu el volea el aiuto de Geovà par ndar contra i filistei. (Ledi Giuisi 16:28-30. d) Lu el ghe ga domandà a Geovà: “Assame vingarme dei filistei.” Alora, Geovà ghe ga rispondesto e ghe ga dato nantra volta una granda forsa. Cossita, lu l’è sta bon de copar de pi persone lì che in tuta la so vita.

16. Cossa che imparemo de quel che Sanson el ga fato dopo che el ga sbalià?

¹⁶ Sanson el ga bio tante dificoltà par causa del so sbàlio, ma lu no’l ga mai desistio de servir Geovà. Questo pol suceder anca con noantri. Anca se ghemo perso un laoro che feino nela congregassion, mai ndaremo assar de servir a Geovà. Invesse, ndaremo ricordarse che lu l’è sempre pronto par perdonarne. (Sal. 103:8-10) Alora, no vol mia dir el sbàlio che ghemo fato, Geovà sempre el ndarà darne forsa par far quel che el vol, compagno el ga fato con Sanson.

17-18. Cossa gheto imparà col esémpio de Michael? (Varda anca la ilustrassion.)

¹⁷ Varda quel che ga sucedesto con un fradel de nome Michael. Lu el gavea tanto de far nela congregassion come pioniero regolar e servo ministerial. Ma, lu el ga fato un sbàlio e no’l ga pi podesto far questi laori. Lu el ga dito: “Tuto ndea tanto ben e ero contento de servir a Geovà. Ma de colpo, go sentio che no podea pi far gnente par Geovà. Anca se savesse  che Geovà mai el me abandonaria, mi pensea che no saria pi bon de esser so amigo gnanca de far i laori che fea nela congregassion.”

¹⁸ Michael no’l ga mia desistio de servir a Geovà, e ancoi, lu el serve come ansiano e pioniero regolar. Lu el ga dito: “Go proà far forte la me amicìssia con Geovà nantra volta. Sforsarme de sempre pregar, leder la Bìblia e studiar me ga giutà tanto. Anca i ansiani i me ga giutà a veder che Geovà ancora el me amea. Adesso, son bon de laorar nantra volta par Geovà col cuor tranquilo. Cossita, go imparà che Geovà sempre el perdona a quei che i se ciama grami.” Cossa che noantri imparemo? Se ghemo fato un sbàlio, ne ocore ciamarse grami e cambiar quel che ghe vol. Alora, podemo esser sicuri che Geovà el ndarà benedirne e doperarne nela so organisassion se seitemo a fidarse in lu. — Sal. 86:5; Pro. 28:13.

19. Come che el esémpio de Sanson el te ga incoraià?

¹⁹ In questo stùdio, ghemo imparà tanto del esémpio de Sanson. Anca dopo che el ga fato un bruto sbàlio par causa de Dalila, lu el ga seità a servir a Geovà. Cossita, Geovà lo ga perdonà, lo ga benedio e lo ga doperà nantra volta par far la so volontà. Par quela che, in Ebrei capìtolo 11, vedemo el nome de Sanson intrà altri servi de Geovà che i ga mostrà una granda fede. Sicuro che restemo contenti de saver che Geovà l’è un Pare che el ne ama tanto e che sempre el ndarà darne forsa quando ghemo de bisogno. Alora, compagno Sanson el ga fato, domandemo a Geovà: ‘Ricòrdate de mi e dame forsa.’ — Giui. 16:28.