1. Che domande fursi qualchedun el ne fae nel laoro o nela scola?

 POL ESSER che qualchedun nela scola o nel laoro el ne fae domande sora quel che credemo. L’è vera che restemo ansiosi se una roba cossita sucede. Magari, queste domande le pol giutarne a saver quel che la persona la pensa e podemo parlarghe qualcossa dela Bìblia. Ma ghemo de ricordarse che semo drio viver “nei ùltimi giorni” e che le persone no ‘le saria disposte a far acordi e le saria crudele’. (2 Tim. 3:1-3) Par quela, tante persone le crede in busie sora noantri, e fursi lore le ne fà domande sol par vegnerne contra o dirne su. — Ati 28:22

2. Cossa che vol dir mostrar brandura?

² Alora, fursi te te domandi: ‘Cossa che pol giutarme a restar calmo quando qualchedun el parla robe brute sora quel che mi credo?’ La brandura la pol giutarte tanto. Ma, cossa che vol dir mostrar brandura? Una persona che la ga questa qualità la ze calma, la ze bona de controlarse e no la resta suito cativa quando qualchedun ghe dise su o no la sa cossa risponder. (Pro. 16:32) Magari, dele volte, no l’è mia fàcile esser cossita. Alora, cossa che pol giutarne a gaver brandura? Come che podemo restar calmi quando qualchedun el ne fà domande sora quel che credemo? Se te sì pare o mare, come che te pol giutar i to fioi a spiegar ai altri cossa che i crede? Questo stùdio el ndarà giutarne a risponder a queste domande.

3. Parché che podemo dir che una persona branda anca la ze forte? (2 Timòteo 2:24, 25)

³ Noantri podemo dir che una persona branda o calma la ga tanta forsa. Come cossita? Questa persona la ga de far tanto sforso par seitar calma quando la ga una dificoltà. La parola greca par “brandura” la ze doperada par parlar de un caval cativo che l’è stà mansà. Ancora che el sìpia manso, lu el seita tanto forte. Anca noantri ghemo de esser cossita. Magari, ghemo de far de pi che sol sforsarse. Come la brandura la fà parte del “fruto del spìrito”, ne ocore pregar a Geovà e domandarghe aiuto par gaver questa qualità. (Gàl. 5:22, 23) El esémpio de tanti fradei mostra che noantri podemo esser mansi. Lori i ze stati boni de seitar calmi anca quando i altri i ghe ga dito su. Par causa del so bel esémpio, tante persone le ga cambià quel che le pensea sora Geovà. (Ledi 2 Timòteo 2:24, 25. b) Cossa che ancora pol giutarne a esser sempre calmi?

4. Cossa che podemo imparar de Isache?

⁴ Nela Bìblia, ghen’è arquanti esempi che mostra che l’è tanto importante esser mansi. Varda quel che ga sucedesto con Isache intanto che el vivea in Gerar, nela tera dei filistei. Lori i gavea tanta invìdia de Isache e i ga mandà impienir de tera tuti i possi de àqua che i servi de Abraon i gavea verto. Ma cossa che Isache el ga fato? Invesse de lotar contra i filistei par causa de quei possi de àqua, lu l’è ndato de star in nantro posto. (Gén. 26:12-18) Magari, quando lu el ga verto altri possi, i filistei i ga dito che quela àqua la era soa. Ancora cossita, Isache l’è stà bon de seitar calmo. (Gén. 26:19-25) Sicuro che el bel esémpio de so pare e so mare lo ga giutà tanto. La Bìblia la mostra che Abraon el se sforsea de esser sempre in pace con tuti e che Sara la gavea “calma e brandura”. — 1 Pie. 3:4-6; Gén. 21:22-34.

5. Che esémpio el mostra che i genitori i pol giutar i so fioi a esser mansi?

⁵ Se te sì pare o mare, sfòrsate de giutar i to fioi a esser persone manse. Varda el esémpio de Maxence, che el ga 17 ani. Dele volte, lu el catea persone cative nela predicassion e nela scola. Alora, so pare e so mare i se ga sforsà de giutarlo a seitar calmo. Lori i ga dito: “Maxence el ga capio che l’è fàcile dirghe su ai altri o restar cativo, ma che toca esser forte par seitar calmo.” Cossita, Maxence el ga imparà a esser una persona mansa.

6. Come che pregar a Geovà ne giuta a seitar calmi?

⁶ Come che te pol seitar calmo quando una persona la parla robe rugne sora Geovà o sora la Bìblia? Prega a Geovà par domandarghe forsa e sabedoria par risponderghe con calma. Magari, se no te sì stà bon de risponderghe dela maniera giusta, prega ancora e pensa cossa che te podarissi parlar la pròssima volta che sucede una roba cossita. Se te te sforsi, te pol esser sicuro che Geovà el te darà spìrito santo e che el te giutarà a controlarse e a seitar calmo.

7. Come che i testi dela Bìblia i pol giutarne a seitar calmi e a parlar cole bone? (Proverbi 15:1, 18)

⁷ Tanti versìcoli dela Bìblia i pol giutarne a parlar cole bone. Par esémpio, el libro de Proverbi el ga tanti prinsipi che i pol giutarne a esser calmi e el mostra parché che  ghemo de esser cossita. (Ledi Proverbi 15:1, c 18; d Pro. 10:19; 17:27; 21:23; 25:15) E el spìrito santo el ndarà giutarne a ricordarse de questi testi quando ghe vol. — Gio. 14:26

8. Parché che ghemo de pensar ben prima de risponderghe a qualchedun che ne ga fato una domanda?

⁸ Quando qualchedun el ne fà una domanda sora quel che credemo, ghemo de proar capir parché che la ne ga fata. (Pro. 19:11) Se pensemo cossita, saremo boni de controlar quel che parlemo e quel che femo. Quasi sempre la persona no la spiega parché che la ga quel dùbio. Par quela, prima de risponderghe, ghemo de ricordarse che no savemo mia cossa che la ze drio pensar. — Pro. 16:23.

9. Cossa che Gideon el ga fato quando i òmini de Efrain i ze restadi cativi?

⁹ Varda quel che ga sucedesto con Gideon. I òmini de Efrain i ze restadi cativi e i ghe ga domandà parché lu no li gavea ciamadi par lotar contra i nemighi de Israel. Pol esser  che i se ga ofendesto parché i pensea che ghe tochea esser insieme. Cossa che Gideon el ga fato? Lu el ga proà capir quel che i era drio sentir e el ghe ga rispondesto con calma. Cossita, ‘i òmini de Efrain i se ga calmà’. — Giui. 8:1-3.

10. Cossa che ndarà giutarne a sempre risponder ai altri con rispeto? (1 Piero 3:15)

¹⁰ Pol esser che qualchedun nela scola o nel laoro el ne domande parché che obedimo a quel che la Bìblia la dise. Se ne sucede una roba cossita, ndaremo sforsarse de spiegarghe quel che credemo con rispeto. (Ledi 1 Piero 3:15. e) Cossa che pol giutarne? Invesse de pensar che la persona la vol dirne su, ghemo de pensar parché che la ga fato quela domanda. Magari, anca se la persona la ze pròpio drio dirne su o riderne drio, volemo risponderghe con bontà e calma. (Rom. 12:17) Cossita, pol esser che la càmbie quel che la pensa sora noantri.

11-12. Cossa ghemo de far vanti de risponder a qualchedun che el ne fà una domanda? Parla de un esémpio de come che podemo parlar cole bone. (Varda anca la ilustrassion.)

¹¹ Varda un esémpio. Se un colega nel laoro el vol saver parché che no ndemo a feste de aniversàrio, podemo domandarse: ‘Sarà che lu l’è drio pensar che no se divertimo mia o che son drio rovinar la amicìssia che ghen’è intrà i coleghi?’ Podemo dirghe che l’è tanto bel che el se preocupe coi coleghi e che anca noantri volemo che tuti i laore ben e contenti. Se femo cossita, sarà pi fàcile de spiegarghe quel che la Bìblia la dise sora feste de aniversàrio.

¹² Podemo far una roba cossita quando vien fora un assunto che l’è fadiga spiegar. Metemo dir che un colega de scola el te dise che le Testimònie de Geovà le gavaria de pensar difarente sora el omossessualismo. Alora, proa ricordarte che fursi questo colega no’l capisse ben quel che credemo o el ga un amigo o un parente che l’è omossessual. O pol esser che el pense che noantri odiemo i omossessuai. Par quela, ne ocore giutar questo colega a capir che amemo le persone e che rispetemo el dirito che le ga de far le so dessision. f (1 Pie. 2:17) Se femo cossita, pol esser che dopo saremo boni de spiegarghe come la Bìblia la ne giuta a esser pi contenti.

13. Cossa che te podarissi parlar a qualchedun che no’l crede in Dio?

¹³ Metemo dir che te parli con qualchedun che l’è pròpio sicuro de quel che el crede. Alora, no stà proar indovinar tuto quel che lu el crede. (Tito 3:2) Par esémpio, se un colega de scola el te dise che Dio no’l esiste mia, no stà pensar che lu el crede nela evolussion e che el sa tanto sora questo assunto. Pol esser che lu sol el te ga dito quel che el scolta in volta. Cossita, invesse de proar mostrarghe che la evolussion no la ga mia sucedesto, proa darghe qualcossa par leder dopo o pàrlaghe sora el site jw.org. Pol esser che dopo te sarè bon de parlar con lu sora un artìcolo o un vìdeo che el ga vardà nel site. Quando mostremo rispeto ai altri, podemo giutarli a voler imparar de pi sora la Bìblia.

14. Come che Niall el ga doperà ben el site?

¹⁴ Un gióveno de nome Niall el ga doperà el site par mostrar che quel che arquanti i disea sora le Testimònie de Geovà no l’è mia  vero. Lu el ga dito: “Un colega dela scola sempre el me disea che, invesse de creder nela siensa, mi credea nte un libro che i òmini i ga scrito.” Niall el ga proà spiegarghe quel che la Bìblia la dise, ma quel colega no’l ga volesto scoltarlo. Alora, lu el ga parlà del site jw.org e dela session “La siensa e la Bìblia”. Un tempo dopo, Niall el ga visto che el so colega el gavea vardà el site e che fursi el podaria spiegarghe come la vita la ga scominsià. Una bela roba cossita la pol suceder anca con ti.

15. Come che i genitori i pol giutar i so fioi a spiegar quel che i crede?

¹⁵ I genitori i ga de insegnarghe ai so fioi come risponder con calma quando i altri i ghe fà una domanda. (Tia. 3:13) Arquanti genitori i dopera la adorassion in fameia par pareciar i fioi. Lori i stùdia coi fioi diverse robe che so coleghi o so maestri fursi i parle. Dopo, lori i mostra come risponderghe con calma e giutar la persona a voler imparar de pi. — Varda el quadro “ Insegna ai to fioi”.

16-17. Cossa che sucede quando i genitori i giuta i so fioi a saver come risponder ai altri?

¹⁶ Se te giuti i to fioi a spiegar quel che i crede, lori i sarà pi bravi de discorer coi altri sora la Bìblia e ancora pi sicuri che quel che la dise l’è vera. Valtri podé doperar le session “I gióveni i domanda” e Tabelas para os jovens che ghen’è nel site jw.org. Queste atività le giutarà i gióveni a saver come risponder ai altri e a esser pi sicuri de quel che la Bìblia la dise. Se valtri studié queste robe tuti insieme, saré boni de risponder con calma ale persone e giutarle a gaver voia de imparar de pi sora la Bìblia.

 ¹⁷ Varda el esémpio de un gióveno de nome Matthew. I so genitori sempre i dopera la adorassion in fameia par giutarlo a risponderghe quando i altri ghe fà domande. Lu el ga dito: “Noantri pensemo sora le domande che i me maestri e i me coleghi i pol farme, e studiemo insieme par saver come risponderghe. Dopo che capisso ben cossa la Bìblia la dise, go de pi coraio par parlar ai altri sora quel che mi credo e son bon de spiegarghe con calma.”

18. De acordo con Colossensi 4:6, cossa che ghemo de far?

¹⁸ Anca se spieghemo tanto ben quel che la Bìblia la dise, pol esser che le persone no le ndarà acetar. Ma se ghe spieghemo cole bone, sarà pi fàcile de giutarle. (Ledi Colossensi 4:6. g) Podemo dir che spiegar quel che credemo a qualchedun l’è compagno a giugar la bola. Se se sforsemo de trarla pin pian, sarà pi fàcile che la persona la ciape la bola e la seite a giugar con noantri. Dela medèsima maniera, se rispondemo una domanda con calma e bontà, sarà pi fàcile che la persona la ne scolte e la seite a discorer. Magari, se vedemo che la vol sol riderne drio o dirne su, no ne ocore mia risponderghe. (Pro. 26:4) Ancora cossita, ghemo de ricordarse che quasi tute le persone le volarà scoltarne.

19. Parché che volemo esser sempre calmi?

¹⁹ Sicuro che volemo sforsarse par esser sempre calmi e mansi. Alora, prega che Geovà el te giute a seitar calmo quando qualchedun el te fà una domanda o el parla contra quel che te credi. Se te ghe rispondi con calma, sarà pi fadiga che el reste cativo o che el te diga su. Pol esser che lu el volarà scoltarte o el cambiarà quel che el pensa sora noantri e sora la Bìblia. Cossita, ‘sìpia sempre pronto par risponder con calma e tanto rispeto’. (1 Pie. 3:15) Alora, te sarè sempre manso e te ndarè mostrar che te sì una persona forte!