STÙDIO 37
CÀNTICO 118 Geovà, dane de pi fede
La carta ai ebrei ne giuta a seitar fedeli
‘Noantri seitemo fedeli ala confiansa che gaveino nel scomìnsio.’ — EBR. 3:14.
COSSA CHE NDAREMO IMPARAR?
In questo stùdio, vederemo come la carta ai ebrei ne giuta a seitar fedeli fin che Geovà el finissa col mondo de Sàtana.
1-2. (a) Come che l’era la vita dei fradei quando Paolo el ga scrito la carta ai ebrei? (b) Parché che podemo dir che Paolo el ga scrito questa carta nela ora giusta?
I FRADEI ebrei che i vivea in Gerusalen e nela Giudea i ga infrontà tante dificoltà dopo dela morte de Gesù. Poco tempo dopo che ga scominsià la prima congregassion, lori i ga infrontà una bruta perseghission. (Ati 8:1) Intorno de 20 ani dopo, l’era drio mancarghe soldi e i era fin drio patir la fame. (Ati 11:27-30) Ma, intorno del ano 61, lori i ga bio un poco de pace. In quela època, el apòstolo Paolo el ghe ga scrito una carta. Quel che Paolo el ga scrito l’era pròpio quel che i gavea de bisogno par dàrghene fora cole dificoltà che i infrontaria pi avanti.
2 I fradei ebrei i ga ricevesto la carta del apòstolo Paolo nela ora giusta parché suito lori no i gavaria pi pace. Alora, i consili de Paolo li giutaria a dàrghene fora con tuto quel che i ndaria infrontar quando Gerusalen la fusse finida fora, cossita come Gesù el gavea dito. (Luc. 21:20) L’è vera che gnanca Paolo gnanca i fradei nela Giudea i savea quando questo sucederia. Ancora cossita, lori i podaria doperar el tempo che i gavea par far pi forte la so fede e la so perseveransa. — Ebr. 10:25; 12:1, 2.
3. Parché che la carta ai ebrei pol giutarne tanto ancoi?
3 Noantri ndaremo infrontar dificoltà tanto pi brute de quele che i fradei ebrei i ga infrontà. (Mat. 24:21; Apo. 16:14, 16) Par quela, i consili che Geovà el ga dato a quei fradei pol giutarne tanto. In questo stùdio, ndemo veder un per de questi consili.
SFÒRSATE PAR ESSER UN BRAVO SERVO DE GEOVÀ
4. Che dificoltà arquanti dei giudei i ga infrontà? (Varda anca la ilustrassion.)
4 Nel passà, i giudei i era el pòpolo che Geovà el gavea scoliesto par adorarlo. Par tanti ani, Gerusalen la era un posto pròpio importante parché i rè che Geovà el scoliea i governea de questa cità, e i giudei i gavea de ndar al témpio in Gerusalen par adorar a Dio. In quela època, tuti i giudei i gavea de obedir ala Lege de Moisè e ai lìderi religiosi. Le lege che lori i gavea le disea come i gavea de tratar quei che no i era mia giudei, che i gavea de esser sircunsidadi e fin cossa che i podea magnar. Ma dopo che Gesù l’è morto, Geovà no’l ga pi acetà i sacrifissi che i fea, e lori no i gavea pi de obedir ala Lege de Moisè. (Ebr. 10:1, 4, 10) Sicuro che no l’è stà mia fàcile par quei giudei che i era deventadi dissìpoli de Gesù cambiar tute queste robe. Anca bravi fradei, come el apòstolo Piero, i ga fato fadiga cambiar quel che ghe ocorea. (Ati 10:9-14; Gàl. 2:11-14) E par causa de questi cambiamenti, i lìderi religiosi giudei i ga scominsià a perseghir quei fradei.
I dissìpoli de Gesù i gavea de seitar a creder nele verità dela Parola de Dio e mai creder nele busie o idee false che le vegnea dei giudei che i era contra la verità (Varda i paràgrafi 4 e 5.)
5. Che altra dificoltà i fradei ebrei i era drio infrontar?
5 Quei fradei ebrei i era drio infrontar tanta perseghission. Par esémpio, i lìderi religiosi giudei i disea che lori i ndea contra Dio. E arquanti nela congregassion i disea che i dissìpoli de Gesù i gavea de seitar obedir ala Lege de Moisè. Pol esser che i disea questo parché no i volea mia esser perseghidi. (Gàl. 6:12) Alora, cossa che podaria giutar quei fradei a seitar fedeli?
6. Cossa che Paolo el ga dito che i fradei ebrei i gavea de far? (Ebrei 5:14–6:1)
6 Nela carta che Paolo el ga scrito ai ebrei, lu li ga incoraiadi a studiar la Parola de Dio e a pensarghe sora. (Ledi Ebrei 5:14–6:1. a) Paolo el ga doperà le Scriture Ebraiche par spiegarghe che la maniera che i dissìpoli de Gesù i adorea a Geovà l’era tanto meio dela maniera che i giudei i lo adorea. b Paolo el savea che se i fradei i fusse boni capir la verità dela Parola de Dio, lori i saria boni capir quel che l’è vero e mai i crederia nte una busia.
7. Che dificoltà infrontemo ancoi?
7 Compagno a quei fradei ebrei, anca noantri infrontemo tante dificoltà. Ancoi le persone le parla che tante robe che Geovà el dise le ze sbaliade e fin le conta busie sora noantri. Par esémpio, arquanti i dise che semo sbaliadi parché obedimo ale lege de Geovà sora el sesso. La maniera de pensar dele persone la ze cada volta pi sbaliada. (Pro. 17:15) Par quela, ne ocore esser boni de capir quel che l’è sbalià e mai creder in busie. No podemo mai assar che i nostri nemighi i fae pi fiaco el nostro coraio e la nostra voia de servir a Geovà. — Ebr. 13:9.
8. Cossa che pol giutarne a deventar bravi servi de Geovà?
8 Paolo el ga incoraià i fradei ebrei a deventar ancora pi bravi servi de Geovà. E anca noantri ghemo de sforsarse par meter in pràtica questo consìlio. Cossa che pol giutarne? Noantri ghemo de studiar la Bìblia e imparar a pensar come Geovà el pensa. Ghemo de seitar a studiar la Bìblia anca dopo del batèsimo e, ancora se semo batesadi fà tanto tempo, ghemo de leder e studiar la Parola de Dio tuti i giorni. (Sal. 1:2) Cossita come el apòstolo Paolo el ga parlà coi fradei ebrei, se sempre studiemo la Bìblia, saremo boni de gaver una forte fede. — Ebr. 11:1, 6.
“SEMO DE QUEI CHE I GA FEDE PAR SALVAR LA VITA”
9. Parché che i fradei ebrei i gavea bisogno de una forte fede?
9 I fradei ebrei i ndaria infrontar brute dificoltà nela Giudea. Par quela, lori i gavea bisogno de una forte fede par seitar vivi. (Ebr. 10:37-39) Gesù el gavea belche dito che quando i vedesse un esèrsito intorno la cità de Gerusalen, lori i gavea de scampar via par le montagne. Alora, i fradei ebrei rento la cità de Gerusalen e anca quei che i stea in colònia i gavea de scampar via. (Luc. 21:20-24) Lori i gavea bisogno de una forte fede par obedir. Parché? Parché in quela època, quando un esèrsito el acampea darente una cità, le persone che le stea in colònia le ndea protegerse rento le muràlie dela cità. Alora, pol esser che no ghe parea mia giusto scampar via par le montagne invesse de ndar rento la cità de Gerusalen. Sicuro che i giudei i gavea bisogno de una forte fede par far quel che Gesù el ghe gavea dito.
10. De acordo con Ebrei 13:17, cossa che Paolo el ga dito che i fradei ebrei i gavaria de far?
10 I fradei ebrei anca i gavaria de fidarse in quei che Gesù l’era drio doperar par tender dele congregassion. Pol esser che quei fradei che tendea dele congregassion i ghe ga dito quel che i gavaria de far e quando i gavaria de scampar via. (Ledi Ebrei 13:17. c) Nela carta ai Ebrei, Paolo el ga dito che i gavea de obedir a quei che i liderea intrà de lori. Le parole greche “gavé de obedir” in questo testo le ze doperade par parlar de una persona che la obedisse parché la se fida e nò parché ghe toca obedir. Alora, quei fradei ebrei i gavea de imparar a fidarse nei ansiani prima che vegnesse le brute dificoltà. E se lori i fusse boni de obedirghe in quela època de pace, saria pi fàcile obedirghe quando i infrontesse le dificoltà pi avanti.
11. Parché che ne ocore gaver una forte fede ancoi?
11 Noantri ghemo bisogno de una forte fede compagno ai fradei ebrei. Parché? Parché ancoi quasi tute le persone no le crede che suito Geovà el ndarà finir fora con questo mondo e fin le ne ride drio. (2 Pie. 3:3, 4) E anca se la Bìblia la dise tante robe che sucederà nel futuro, ghen’è arquante robe che gnancora no savemo mia. Par quela, ghemo de esser sicuri che Geovà el finirà fora con questo bruto mondo nela ora giusta e che sempre el tenderà de noantri. — Aba. 2:3.
12. Cossa che ndarà salvar la nostra vita nela granda tribolassion?
12 Nel passà, i fradei ebrei i ga ricevesto orientassion che ga salvà la so vita quando i romani i ga acampà intorno la cità de Gerusalen. Anca noantri riceveremo orientassion che le salvarà la nostra vita nela granda tribolassion. Par quela ne ocore far cada volta pi forte la nostra fede che Geovà l’è drio doperar el “schiavo fedele e prudente” par tenderne ancoi. (Mat. 24:45) Ghemo de imparar a fidarse e a obedir el schiavo fedele e prudente adesso. Se noantri no semo boni de obedir ale orientassion de questi fradei ancoi, no saremo boni de obedirghe nela granda tribolassion.
13. Parché che i fradei ebrei i gavea de meter in pràtica el consìlio che ghen’è in Ebrei 13:5?
13 Intanto che i fradei ebrei i spetea la ora giusta par scampar via par le montagne, lori i gavea de doperar la so vita par servir a Geovà e i gavea de star atenti de mai ‘amar i soldi’. (Ledi Ebrei 13:5. d) Un tempo prima, arquanti de lori i ga fin patio la fame par causa dele bone notìssie. (Ebr. 10:32-34) Ma un tempo dopo, pol esser che arquanti i ga scominsià a ndar drio i soldi par gaver protession e par mai pi patir la fame. Ma i soldi no i ndaria mia salvar la so vita quando Gerusalen la fusse finida fora. (Tia. 5:3) Sicuro che i fradei ebrei che i amesse i soldi i faria pròpio fadiga assar tuto el so capital indrio e scampar via par le montagne.
14. Come che gaver una forte fede ndarà giutarne a far bone dessision ancoi?
14 Se noantri ghemo una forte fede che Geovà el ndarà finir fora con questo mondo, mai ndaremo pensar che i soldi e el capital i ze le robe pi importante dela nostra vita. Ne ocore ricordarse che i soldi no i gavarà gnanca un valor nela granda tribolassion. La Bìblia fin la dise che le persone le ndarà ‘butar par la strada el so argento’, parché ‘el so argento e el so oro no i sarà boni de salvarli nel giorno de Geovà’. (Eze. 7:19) Alora, invesse de imuciar su soldi e capital, ghemo de far dessision che le ndarà giutar noantri e la nostra fameia a gaver de pi tempo par servir a Geovà. Par esémpio, no ndaremo mia far un dèbito par comprar una roba che no ne ocore gnanca doperar massa del nostro tempo par tender dele robe che ghemo. Anca ne ocore star atenti de mai pensar che i soldi e el capital che ghemo i ze le robe pi importante dela nostra vita. (Mat. 6:19, 24) Una ora o l’altra, gavaremo de scòlier se se fidemo de pi in Geovà o nel nostro capital.
“GAVÉ DE PERSEVERAR”
15. Parché che i fradei ebrei i gavea bisogno de perseverar?
15 I fradei ebrei i gavaria bisogno de perseveransa par dàrghene fora cole dificoltà che vegnaria pi avanti. (Ebr. 10:36) L’è vera che arquanti de quei fradei i gavea belche infrontà perseghission nel passà, ma altri nò. Par quela, Paolo el ghe ga dito che i gavea de esser pareciadi par infrontar tanta perseghission e che i gavaria de esser fedeli fin la morte, cossita come Gesù. (Ebr. 12:4) Le persone de quela època le era drio restar tanto cative parché ghen’era cada volta de pi dissìpoli de Gesù. Par esémpio, pochi ani prima, una mùcia de gente la ga volesto copar Paolo intanto che l’era drio predicar in Gerusalen. Quela volta, de pi de 40 giudei ‘i era fin disposti a sofrir una maledission, e dir che no i magnaria gnanca i beveria gnente fin che no i gavesse copà Paolo’. (Ati 22:22; 23:12-14) Anca se quei fradei ebrei i era drio infrontar tanta perseghission e òdio dele persone, lori i gavea de seitar a riunirse par adorar a Geovà, a predicar le bone notìssie e a gaver una forte fede.
16. Come che la carta ai ebrei ne giuta a infrontar perseghission? (Ebrei 12:7)
16 Cossa che giutaria i fradei giudei a perseverar? Veder le robe bone che vegnea fora quando infrontea perseghission. Par quela, Paolo el ghe ga spiegà che Geovà el podea doperar le dificoltà par insegnarghe tante robe e par giutarli a gaver qualità che no i gavea mia. (Ledi Ebrei 12:7. e) Se lori i vedesse le robe bone che le vien fora quando infrontesse dificoltà, saria pi fàcile par lori perseverar. — Ebr. 12:11.
17. Cossa che Paolo el savea sora infrontar perseghission?
17 Paolo el ga incoraià i fradei ebrei a gaver coraio e a no desister, anca se i infrontesse perseghission. Sicuro che Paolo el savea quel che i era drio infrontar e el saria bon de darghe boni consili. Parché? Parché nel passà, lu el gavea belche perseghio arquanti fradei e parché, dopo che l’è deventà dissìpolo de Gesù, lu el ga infrontà tanta perseghission. (2 Cor. 11:23-25) Paolo el savea pròpio ben quel che ghe ocore par perseverar. Lu el ga dito a quei fradei che lori i gavaria de fidarse in Geovà e nò in lori stessi. E anca ghe ga ricordà: “Geovà l’è quel che me giuta, no gavarò mia paura.” — Ebr. 13:6.
18. Cossa che pol giutarne a infrontar la perseghission?
18 Tanti dei nostri cari fradei i infronta bruta perseghission ancoi. Come che podemo giutarli? Podemo pregar a Geovà e domandarghe che el ghe dae forsa e che li giute in quel che i ga de bisogno. (Ebr. 10:33) Ma ghemo de ricordarse che la Bìblia la dise che “tuti quei che i vol viver una vita de devossion a Dio come dissìpoli de Cristo Gesù anca i sarà perseghidi”. (2 Tim. 3:12) Alora, tuti noantri ghemo de esser pareciadi par infrontar la perseghission. Ghemo de fidarse in Geovà, esser sicuri che lu el ndarà giutarne e ricordarse che nela ora giusta lu el ndarà finir fora con tuti i problemi de quei che i ze leai a lu. — 2 Tes. 1:7, 8.
19. Cossa che pol giutarne a pareciarse par la granda tribolassion? (Varda anca la ilustrassion.)
19 Sicuro che la carta che Paolo el ga scrito ai ebrei li ga giutadi tanto a dàrghene fora cole dificoltà che le vegnaria pi avanti. In quela carta, Paolo li ga incoraiadi a studiar la Parola de Dio e a pensarghe sora. Cossita, lori i saria boni de capir quel che no l’era mia vero e mai creder in busie. Paolo anca el ghe ga dito che i gavea de far pi forte la so fede par esser boni de far presto in obedir ale orientassion de Gesù e de quei che lu el gavea scoliesto par tender dele congregassion. Paolo anca el ga giutà i fradei ebrei a far pi forte la so perseveransa e a capir che Geovà el podaria doperar le dificoltà che i infrontesse par insegnarghe tante robe. Sicuro che anca noantri ghemo de meter in pràtica tuti questi consili dela Parola de Dio. Se femo cossita, saremo boni de seitar fedeli fin el fin. — Ebr. 3:14.
I dissìpoli de Gesù i ze stati benedidi par causa dela so perseveransa. Dopo che i ga scampà via dela Giudea, lori i ga seità insieme. Cossa che imparemo del so esémpio? (Varda el paràgrafo 19.)
CÀNTICO 126 Sempre forti, firmi e atenti
a (Ebrei 5:14–6:1) Ma el alimento sòlido l’è par le persone maure, par quei che i ga le so capassità de dissernimento trenade par meso dela pràtica par saver la difarensa tanto del giusto come del sbalià. 6 Alora, adesso che ghemo assà indrio i primi insegnamenti sora el Cristo, seitemo avanti fin esser mauri. E no ghemo de meter un fondamento nantra volta, o sia, ciamarse gramo dele òpere morte, la fede in Dio,
b Sol nel primo capìtolo, Paolo el parla sete volte dele Scriture Ebraiche par mostrar che la maniera che i dissìpoli de Gesù i adora a Geovà la ze meio che la maniera che i giudei i lo adorea. — Ebr. 1:5-13.
c (Ebrei 13:17) Valtri gavé de obedir a quei che i lidera intrà de valtri e gavé de rispetar la autorità de lori, parché lori i ze drio tender de valtri e i sa che i ndarà risponder par quel che i fà. Cossita, lori i ndarà far el so laoro con alegria e nò con disgusto, parché questo no saria mia bon par valtri.
d (Ebrei 13:5) La vostra maniera de viver la ga de mostrar che no amé mia i soldi. Sté contenti cole robe che valtri gavé. Parché lu el ga dito: “Mi mai vao assarte e mai vao abandonarte.”
e (Ebrei 12:7) Valtri gavé de perseverar parché questo fà parte dela vostra dissiplina. Dio el ve trata come fioi. No l’è mia vera che i pari i dissiplina i so fioi?
