STÙDIO 38
CÀNTICO 25 I servi untadi de Geovà
Sito parecià par quel che ndarà suceder?
“Un el sarà menà via e quel altro el sarà assà indrio.” — MAT. 24:40.
COSSA CHE NDAREMO IMPARAR?
Ndaremo veder tre stòrie che Gesù el ga contà e ndaremo imparar come queste stòrie le ne giuta a capir come sarà el giulgamento che lu el ndarà far nel fin de questo mondo.
1. Che giulgamento presto ndarà suceder?
PI AVANTI, ndaremo veder tante bele robe suceder. Gesù el ga dito che nei nostri giorni sarìssino boni de capir che lu l’è drio governar e che el fin de questo bruto mondo l’è darente. (Mat. 24:3) Presto, Gesù el ndarà giulgar tute le persone. Noantri podemo leder questa professia in Mateo capìtolo 24 e 25, Marco capìtolo 13 e Luca capìtolo 21.
2. Cossa che ndaremo imparar in questo stùdio, e come quel che ndaremo imparar pol giutarne?
2 Gesù el ga contà tre stòrie che le ne giuta a esser pareciadi par quel che ndarà suceder pi avanti. La prima stòria la ze dele piégore e dele cavre, la seconda dele vèrgine stùpide e de quele che le gavea sabedoria e la tersa la ze la stòria dei talenti. Cada una de queste stòrie le ne giuta a capir come che le persone le sarà giulgade. Adesso, ndaremo veder cossa che imparemo de queste stòrie e come che le ne giuta. La prima stòria che ndaremo veder la ze dele piégore e dele cavre.
LE PIÉGORE E LE CAVRE
3. Quando che Gesù el ndarà giulgar le persone?
3 Nela stòria dele piégore e dele cavre, Gesù el ga parlà sora el giulgamento dele persone che le ga scoltà le bone notìssie e le ga podesto dessider giutar i so fradei untadi. (Mat. 25:31-46) Alora, Gesù el ndarà giulgar queste persone nela “granda tribolassion” e vanti del Armagedon. (Mat. 24:21) Compagno a un pastor che el spartisse le piégore dele cavre, Gesù el ndarà spartir quei che i ga giutà i so fradei untadi e quei che no li ga giutadi.
4. De acordo con Isaia 11:3, 4, parché che podemo desser sicuri che Gesù el ndarà giulgar con giustìssia? (Varda anca la ilustrassion.)
4 La Bìblia la mostra che Gesù l’è el giuis che Geovà el ga scoliesto e che lu sempre el ndarà far quel che l’è giusto. (Ledi Isaia 11:3, 4. a) Gesù sempre el sarà atento a quel che cada persona la fà, la dise e la pensa e come la ga tratà i so fradei untadi. (Mat. 12:36, 37; 25:40) Par quela, lu el saverà pròpio ben quei che i ga giutà i so fradei untadi nel grando laoro che Geovà el ghe ga dato. b Una roba tanto importante che le persone le pol far par giutar i untadi l’è el laoro de predicassion. Queste persone le sarà giulgade come ‘giuste’ e le poderà gaver “la vita eterna”. (Mat. 25:46; Apo. 7:16, 17) Che maraveiosa benedission che lore le riceverà de esser fedele. E se queste persone le seita fedele dopo dela granda tribolassion, el so nome el sarà scrito nel “libro dela vita” par sempre. — Apo. 20:15.
Nel futuro, Gesù el ndarà giulgar se le persone le sarà come piégore o come cavre, de acordo con quel che le ga fato. (Varda el paràgrafo 4.)
5. (a) Cossa che imparemo dela stòria dele piégore e dele cavre? (b) Questa stòria la ze importante par chi?
5 Ghemo de esser fedeli e leai. La stòria che Gesù el ga contà sora le piégore e le cavre la parla dele persone che le ga la speransa de viver par sempre nela Tera. Lore le mostra che le ga fede quando le giuta i fradei de Cristo nela predicassion e anca quando le obedisse al pìcolo grupo che Gesù el ga scoliesto come “schiavo fedele e prudente”. (Mat. 24:45) Ma questa stòria la ze importante par quei che i ga la speransa de viver par sempre nela Tera e anca par quei che i ga la speransa de viver par sempre nel cielo. Parché? Parché Gesù el ndarà giulgar anca lori de acordo con quel che i fà, i dise e i pensa. Alora, anca i untadi i ga de mostrar che i ze fedeli. Par quela che Gesù el ga contà altre due stòrie che le parla dei untadi. Podemo leder queste stòrie in Mateo capìtolo 25. Adesso, ndaremo veder la stòria dele vèrgine stùpide e de quele che le gavea sabedoria.
LE VÈRGINE STÙPIDE E QUELE CHE LE GAVEA SABEDORIA
6. Come che le sinque vèrgine le ga mostrà che le gavea sabedoria? (Mateo 25:6-10)
6 Nela stòria dele vèrgine, Gesù el ga parlà de diese vèrgine che le ndaria catarse con un noivo. (Mat. 25:1-4) Tute lore le volea ndar insieme a lu nela so festa de matrimònio. Ma Gesù el ga dito che sinque vèrgine le gavea sabedoria e sinque le era stùpide. Quele che le gavea sabedoria le era pareciade par spetar el noivo, anca se lu ghe metesse tanto tempo par rivar. Lore le era pareciade con ciareti e le ga portà de pi òio se ghe ocoresse. Par quela, i so ciareti no i se ga smorsà. (Ledi Mateo 25:6-10. c) Alora, quando el noivo l’è rivà, le vèrgine che le gavea sabedoria le ze ndate insieme a lu nela festa de matrimònio. Dela stessa maniera, anca i nostri fradei untadi i ga de esser pareciadi e seitar fedeli. Cossita, quando riva el noivo, Gesù, lori i ndarà insieme a lu nel Regno del cielo. d (Apo. 7:1-3) Ma cossa che ga sucedesto cole sinque vèrgine stùpide?
7. Cossa che ga sucedesto cole sinque vèrgine stùpide, e parché?
7 Difarente dele vèrgine che le gavea sabedoria, le sinque vèrgine stùpide no le era mia pareciade par spetar el noivo. I so ciareti i era quasi drio smorsarse e lore no le gavea portà de pi òio insieme. Alora, queste vèrgine le ze ndate comprar de pi òio, e quando el noivo l’è rivà, lore no le era gnancora tornade. Par quela, ‘le vèrgine che le era pareciade le ze ndate rento la festa de matrimònio, e la porta la ze stata serada’. (Mat. 25:10) Pi tardi, quando le vèrgine stùpide le ga proà ndar rento la festa, el noivo ghe ga dito: ‘Mi no ve cognosso.’ (Mat. 25:11, 12) Quele vèrgine no le era mia pareciade par spetar el noivo. Cossa che i untadi i pol imparar de questa stòria?
8-9. Cossa che i untadi i pol imparar cola stòria dele vèrgine? (Varda anca la ilustrassion.)
8 Ghemo de esser pareciadi e atenti. Con questa stòria, Gesù no l’era drio dir che arquanti untadi i seitaria fedeli fin el fin e arquanti nò. Invesse, lu l’era drio spiegar cossa che ndaria suceder se un dei so fradei untà no’l seitesse fedele. Alora, se un fradel untà no’l seita parecià e atento, lu no’l ndarà mia rento el Regno del cielo. (Gio. 14:3, 4) Par quela questa stòria la ze tanto importante. No vol mia dir se la nostra speransa la ze de viver nel cielo o nela Tera, tuti noantri ghemo de seitar atenti, pareciadi e pronti par perseverar fin el fin. — Mat. 24:13.
9 Dopo de contar la stòria dele vèrgine par mostrar che l’è importante esser pareciadi e atenti, Gesù el ga contà la stòria dei talenti. Questa stòria la mostra che ghemo de sforsarse de esser bravi laoradori.
Cada un de noantri ga de meter in pràtica quel che ghemo imparà nela stòria dele vèrgine e seitar pareciadi e atenti. Cossita, saremo boni de perseverar fin el fin. (Varda i paràgrafi 8 e 9.)
I TALENTI
10. Come quei due schiavi i ga mostrà che i era fedeli? (Mateo 25:19-23)
10 Nela stòria dei talenti, Gesù el ga parlà de due schiavi che i ze stati fedeli al so paron e un schiavo che no l’è stà mia fedele. (Mat. 25:14-18) Vanti de far un viaio, el paron el ga dato ai so schiavi arquanti talenti, o sia, una mùcia de soldi. I due schiavi i ze stati fedeli parché i se ga sforsà tanto par far pi grando el capital del so paron. Lori i ga doperà ben quei soldi, e i ze stati boni de ciapar de pi de quel che i gavea. Cossa che ga sucedesto? Quando el paron l’è tornà, questi schiavi i gavea el dópio de quel che el paron ghe gavea dato. Par quela, el paron li ga lodadi e ghe ga dito de ‘esser felici insieme’ a lu. (Ledi Mateo 25:19-23. e) Ma cossa che ga sucedesto con quelaltro schiavo? Cossa che lu el gavea fato coi soldi che el so paron ghe gavea dato?
11. Cossa che el schiavo ‘miserion’ el ga fato, e cossa che ga sucedesto con lu?
11 El terso schiavo el gavea ricevesto un talento, ma l’è stà un ‘miserion’. El so paron el volea che el doperesse quel talento par ciapar de pi soldi. Invesse, el schiavo el ga fato un buso e el ga metesto el talento rento. Alora, quando el paron l’è tornà, el schiavo el gavea sol un talento par darghe indrio. Quel che el schiavo el ga fato l’è stà pròpio bruto. Invesse de domandar scusa al so paron, lu el ga dito che el so paron no l’era mai contento. El paron l’è restà pròpio disgustà. Par quela, el schiavo el ga perso el so talento e l’è stà parà via dela casa del so paron. — Mat. 25:24, 26-30.
12. Chi che i ze i due schiavi fedeli?
12 I due schiavi fedeli i ze i fradei untadi che i seita leai. El paron, Gesù, li ga convidadi par ‘esser felici insieme’ a lu. Questo sucede quando lori i ze ressussitadi par viver in cielo. (Mat. 25:21, 23; Apo. 20:5b) Ma i untadi i pol imparar tanto con quel che ga sucedesto col schiavo miserion. Come cossita?
13-14. Cossa che i fradei untadi i pol imparar cola stòria dei talenti? (Varda anca la ilustrassion.)
13 Ghemo de sforsarse de esser bravi laoradori. Compagno la stòria dele vèrgine, quando Gesù el ga contà la stòria dei talenti, lu no l’era drio dir che arquanti untadi i saria miserioni. Invesse, lu el ga spiegà quel che ndaria suceder se i untadi no i se sforsesse de esser bravi laoradori. Lori no i ndaria mia ricever quel che Geovà el ndaria darghe, o sia, ndar rento el Regno del cielo. — 2 Pie. 1:10.
14 Le stòrie che Gesù el ga contà sora le vèrgine e sora i talenti ne giuta a capir quel che i fradei untadi i ga de far. Lori i ga de sforsarse de seitar atenti e esser bravi laoradori. Ma sarà che Gesù el ga parlà ancora altre robe par giutar i untadi? Si. In Mateo 24:40, 41, lu el ga spiegà come che sarà el giulgamento dei untadi.
Gesù el vol veder se i untadi i ze bravi laoradori (Varda i paràgrafi 13 e 14.) h
CHI CHE “SARÀ MENÀ VIA”?
15-16. Come che Mateo 24:40, 41 mostra che l’è importante che i untadi seite atenti?
15 Dopo de contar queste tre stòrie, Gesù el ga parlà come che saria el giulgamento dei untadi. Lu el ga parlà de due òmini che i era drio laorar in colònia e de due done che le era drio laorar nte un molin. Ne par che i òmini e le done i era drio far el medèsimo laoro. Ma Gesù el ga dito che un de quei òmini e una de quele done i ‘saria menà via e quei altri i saria assadi indrio’. (Ledi Mateo 24:40, 41. f) Dopo, Gesù el ga dito ai so dissìpoli: “Alora, resté atenti, parché no savé in che giorno vegnarà el vostro Signor.” (Mat. 24:42) Gesù el ga dito una roba compagna dopo contar la stòria dele vèrgine. (Mat. 25:13) Alora, capimo che queste due stòrie le ne insegna la medèsima roba. Cossa? Sol i untadi fedeli i sarà ‘menadi via’, o sia, i ndarà rento el Regno del cielo insieme a Gesù. — Gio. 14:3.
16 Sfòrsate par seitar atento. Tuti i untadi che i vol esser ‘intrà i scoliesti’ i ga de seitar atenti, o sia, sforsarse par gaver una forte amicìssia con Geovà e una forte fede. (Mat. 24:31) Ma no l’è mia sol i untadi che i ga de seitar atenti. Invesse, tuti quei che i serve a Geovà i ga de far el so meio par seitar atenti e leai.
17. Parché che no ghemo de restar preocupadi con quando Geovà el scòlie un dei so servi par ndar al cielo?
17 Noantri se fidemo che Geovà sempre fà quel che l’è giusto parché lo cognossemo tanto ben. Alora, par noantri, no importa se lu el ga dessidio scòlier arquanti dei so servi par ndar al cielo nei nostri giorni. g Podemo ricordarse dela ilustrassion che Gesù el ga contà sora i òmini che i era drio laorar nte un vignal nela dèssima prima ora. (Mat. 20:1-16) Quei che i ga scominsià a laorar bonora nel giorno i ga ricevesto el stesso salàrio che quei che i ga scominsià a laorar pi tardi. Dela stessa maniera, no importa se Geovà el ga scoliesto un dei nostri fradei par esser untà tanti ani indrio o fà poco tempo, lu el podarà viver par sempre nel cielo se el seita fedele.
STÉ ATENTI
18-19. Cossa che ghemo imparà?
18 Cossa che ghemo imparà? La stòria dele piégore e dele cavre le ne mostra che quei che i ga la speransa de viver par sempre nela Tera i ga de seitar fedeli e leai a Geovà. Lori i ga de seitar cossita adesso e anca nela granda tribolassion. Alora, nel futuro Gesù el ndarà giulgarli e darghe la “vita eterna”. — Mat. 25:46.
19 Noantri anca ghemo visto due stòrie che le giuta tanto i untadi. Nela stòria dele vèrgine, Gesù el ga parlà che sinque de lore le gavea sabedoria. Queste vèrgine le era pareciade e le ga seità atente fin che el noivo el rivesse. Ma, le vèrgine stùpide no le era mia pareciade. Par quela, el noivo no le ga assade ndar rento la so festa de matrimònio. Cossa che imparemo? Anca noantri ghemo de esser pareciadi e seitar a spetar fin che Gesù el vegna e el finissa fora col bruto mondo de Sàtana. Nela stòria dei talenti, ghemo visto che due schiavi i ze stati bravi laoradori. Lori i se ga sforsà del tuto par far pi grando el capital del so paron. Par quela, el paron l’è restà tanto contento coi so schiavi. Invesse, quelaltro schiavo l’è stà miserion e el ga disgustà tanto el so paron. Cossa che imparemo? Anca noantri ghemo de seitar a sforsarse e far el nostro meio nel laoro a Geovà fin el fin. Dopo, ghemo visto che i untadi i ga de seitar atenti par ndar al cielo insieme de Gesù. Sicuro che tuti i untadi i ze premosi de esser in cielo insieme de Gesù. Alora, dopo dela guera del Armagedon, tuti i untadi i farà parte dela noiva de Gesù nel matrimònio del Piegoreto. — 2 Tes. 2:1; Apo. 19:9.
20. Cossa che Geovà el ne darà se metemo in pràtica quel che ghemo imparà nele stòrie de Gesù?
20 Presto, Gesù el ndarà giulgar tute le persone, ma noantri no ghemo mia paura. Se seitemo fedeli, el nostro caro Pare el ndarà darne el “poder pi grando del normal” e ‘saremo boni star in pié davanti del Fiol del omo’. (2 Cor. 4:7; Luc. 21:36) Alora, no importa se la nostra speransa la ze viver nel cielo o nela Tera, saremo boni de contentar a Geovà se metemo in pràtica quel che ghemo imparà nele stòrie che Gesù el ga contà. Cossita, Geovà el ndarà mostrarne la so granda bontà e scriver el nostro nome nel libro dela vita. — Dan. 12:1; Apo. 3:5.
CÀNTICO 27 I fioi de Dio i vinserà
a (Isaia 11:3, 4) E lu el sentirà piaser nel temor de Geovà. Lu no’l giulgarà d’acordo con quel che se vede, gnanca el darà reprension sol secondo quel che el scolta. 4 Lu el giulgarà i poareti con giustìssia. Lu el castigarà de maniera giusta par giutar i boni che ghen’è nela tera. Lu el ndarà bater nela tera col baston dela so boca e el ndarà copar i rugni col sufiar dei so lavri.
b Varda el stùdio “Come che Geovà el ndarà giulgar le persone nel futuro?” nela Sentinela de maio de 2024.
c (Mateo 25:6-10) In meso la note, qualchedun ga osà: ‘Qua l’è el noivo! Ndé catarlo.’ 7 Alora, tute le vèrgine le se ga levà su e le ga parecià i so ciareti. 8 Le vèrgine stùpide le ga dito a quele che le gavea sabedoria: ‘I nostri ciareti i ze quasi drio smorarse. Alora, dene un poco del vostro òio.’ 9 Le vèrgine che le gavea sabedoria le ga dito: ‘Fursi no ghen sarà òio che basta par noantre e par valtre. Alora, ndé de quei che i lo vende e vé comprar un poco de òio par valtre.’ 10 Intanto che lore le ze ndate comprar òio, el noivo l’è rivà. Cossita, le vèrgine che le era pronte le ze ndate ala festa de matrimònio con lu, e la porta la ze stata sarada.
d Par imparar de pi, varda el stùdio “Você vai ‘se manter vigilante’?” nela Sentinela de 15 de marso de 2015.
e (Mateo 25:19-23) “Tanto tempo dopo, el paron l’è tornà e l’è ndato far le conte coi so schiavi. 20 Alora, l’è rivà quel che gavea ricevesto sinque talenti, e el ga dito: ‘Signor, te me ghè dato sinque talenti e, varda, go guadagnà altri sinque.’ 21 El so paron el ghe ga dito: ‘Brao, schiavo bon e fedele! Te sì stato fedele al tender de poche robe. Vao darte la responsabilità de tante robe. Sìpia felice insieme col to paron.’ 22 Dopo, l’è rivà quel che el gavea ricevesto due talenti e el ga dito: ‘Signor, te me ghè dato due talenti e, varda, go guadagnà nantri due.’ 23 El so paron el ghe ga dito: ‘Brao, schiavo bon e fedele! Te sì stato fedele al tender de poche robe. Vao darte la responsabilità de tante robe. Sìpia felice insieme col to paron.’
f (Mateo 24:40, 41) Alora, due òmini i sarà nel campo. Un el sarà menà via e quel altro el sarà assà indrio. 41 Due done le sarà drio masnar col molin a man. Una la sarà menada via e quel’altra la sarà assada indrio.
h ILUSTRASSION: Una sorela che la ze untada la ghe insegna la Bìblia a una tosa che la ga catà nela predicassion.
