STÙDIO 39
CÀNTICO 125 Mostremo misericòrdia
Te gavarè de pi alegria se te fè robe bone par i altri
“Ghen’è de pi felicità in dar che in ricever.” — ATI 20:35.
COSSA CHE NDAREMO IMPARAR?
In questo stùdio, vederemo come far robe bone par i altri pol assarne ancora pi felici.
1-2. Parché che la maniera che Geovà el ne ga creà la ze tanto bona par noantri?
GEOVÀ el ne ga creà de una maniera che ghemo de pi alegria quando femo robe bone par i altri che quando ricevemo qualcossa de una persona. (Ati 20:35) Sicuro che restemo contenti quando qualchedun ne fà una roba bona o ne dà qualcossa. Ma ghemo ancora de pi alegria quando semo noantri che ghe femo qualcossa. Parché che l’è bel saver che Geovà el ne ga creà cossita?
2 Noantri podemo gaver tanta alegria quando femo robe bone par i altri parché Geovà el ne ga creà cossita. Alora, quanto pi robe bone femo par i altri, pi contenti restemo. L’è tanto bel saver che Geovà el ne ga creà cossita, mia vera? — Sal. 139:14.
3. Parché che Geovà l’è el “Dio felice”?
3 Anca el esémpio de Geovà el mostra che quando una persona la fà robe bone par i altri ela la ze pi felice. Parché? La Bìblia la dise che Geovà l’è el “Dio felice” e la mostra che lu l’è la persona che fà de pi robe bone par i altri che ghen’è. (1 Tim. 1:11) Par esémpio, par meso de Geovà, ‘ghemo vita, semo boni de moverse e esistimo’. (Ati 17:28) La Bìblia anca la dise che “tuti i presenti boni e perfeti” i vien de lu. — Tia. 1:17.
4. Cossa pol giutarne a esser ancora pi contenti?
4 Sicuro che tuti noantri volemo far ancora de pi robe bone par i altri e esser cada volta pi contenti. Cossa pol giutarne? Far compagno el bel esémpio de Geovà. (Efe. 5:1) In questo stùdio, ndaremo imparar sora el bel esémpio che el nostro caro Pare el ne dà e cossa che podemo far quando ne par che qualchedun no ghe dà valor a quel che ghemo fato. Cossita, gavaremo ancora de pi alegria de seitar far robe bone par i altri.
COMPAGNO A GEOVÀ, DOPERA QUEL CHE TE GHÈ PAR GIUTAR I ALTRI
5. Cossa che Geovà el ne dà?
5 Che bele robe Geovà el ne dà? Lu el ne dà tuto quel che ne ocore par viver. Par esémpio, Geovà el ne giuta a gaver de magnar, robe de meter su e una casa de star. (Sal. 4:8; Mat. 6:31-33; 1 Tim. 6:6-8) L’è vera che dele volte ghemo poco, ma Geovà sempre el ne dà quel che ne ocore par viver. Sicuro che Geovà no’l ne dà mia tute queste robe parché ghe toca. Alora, parché che el ne giuta cossita?
6. Cossa che imparemo de Mateo 6:25, 26?
6 Geovà el ne dà tuto quel che ne ocore par viver parché el ne ama. Vedemo quel che podemo imparar dele parole de Gesù in Mateo 6:25, 26. (Ledi. a) Gesù el ga dito che i osei ‘no i semena gnanca i tol su, e gnanca no i mete via nel paiol parché el nostro Pare che l’è nel cielo el ghe dà de magnar’. Dopo lu el ga dito: “Sarà che valtri no valé de pi che lori?” Cossa che imparemo de quel che Gesù el ga dito? Geovà el dà tanto de pi valor ale persone che ale bèstie. E se lu el dà tuto quel che ghe ocore ale bèstie, podemo esser sicuri che el ne darà tuto quel che ne ocore anca a noantri. Compagno a un bon pare, Geovà el ne dà tuto quel che ghemo de bisogno par causa del so grando amor. — Sal. 145:16; Mat. 6:32.
7. Come che podemo doperar quel che ghemo par giutar i altri? (Varda anca la ilustrassion.)
7 Compagno a Geovà, anca noantri podemo mostrar amor ai altri quando doperemo quel che ghemo par giutarli. Par esémpio, podemo doperar quel che ghemo par giutar un fradel che el ga bisogno de magnar o de robe de meter su. Pol esser che Geovà l’è drio doperarne par giutar questo fradel. E quando sucede una desgràssia, i servi de Geovà sempre i se move fora par giutarse. Par esémpio, nela pandemia del COVID-19, i fradei i ga giutà un al altro in quel che i gavea de bisogno, come con robe de vestir e de magnar. Arquanti fin i ga dato soldi ala organisassion par giutar i fradei in quel che ghe ocorea. Cossita, i servi de Geovà de tuto el mondo i ga ricevesto quel che i gavea de bisogno. Questi cari fradei i ga metesto in pràtica quel che dise Ebrei 13:16: “No sté desmentegarve de far el ben e de spartir coi altri quel che gavé, parché questi sacrifissi ghe piase a Dio.”
Tuti noantri podemo far robe bone ai altri compagno a Geovà (Varda el paràgrafo 7.)
8. Come che el poder de Geovà el pol giutarne? (Filipensi 2:13)
8 Geovà el ne dà el so poder. Geovà el ga caro de doperar la so granda forsa par giutar i so servi fedeli. (Ledi Filipensi 2:13. b) Pol esser che te ghè belche pregà a Geovà par domandarghe forsa par dàrghene fora con una voia sbaliada, con una dificoltà o par seitar a ndar avanti. E quando te ghè visto che Geovà el te ga rispondesto, fursi te ghè pensà nele parole del apòstolo Paolo, che el ga dito: “Par tute le robe go forsa gràssie a quel che el me dà poder.” — Fil. 4:13.
9. Come che podemo doperar la nostra forsa compagno a Geovà? (Varda anca el ritrato.)
9 Anca se no ghemo forsa come Geovà e gnanca no semo boni de dàrghela ai altri, podemo sforsarse de far compagno a lu. Come? Podemo doperar la forsa che ghemo par giutar i altri. Par esémpio, podemo giutar quei che i ze pi veci o maladi nela congregassion a far i so laoreti casa o a ndar al mercà comprar un per de robe che ghe ocore. Podemo anca giutar a netar o a rangiar su el Salon del Regno. Se femo robe cossita, saremo drio giutar tanto i nostri cari fradei.
Noantri podemo doperar la nostra forsa par giutar i altri (Varda el paràgrafo 9.)
10. Come che podemo giutar i altri par meso de quel che parlemo?
10 Te pol anca giutar i to fradei par meso dele robe che te parli. Par esémpio, te pol lodarli par quel che i fà de bon o consolar quei che i ga de bisogno. Se te ndarè parlarghe qualcossa par incoraiar a qualchedun, mostra che te ghe vol ben. Te pol ndar visitarlo, ciamarlo par telèfono o scriverghe qualcossa. E no stà preocuparte con quel che te ndarè dir. Pol esser che sol un per de parole le ze pròpio quel che el fradel o la sorela ga de bisogno par seitar fedele o par gaver forsa de ndar avanti. — Pro. 12:25; Efe. 4:29.
11. Come che Geovà el dopera la so sabedoria?
11 Geovà el dà so sabedoria. Tiago el ga scrito: “Se ghe manca sabedoria a qualchedun de valtri, el ga de seitar a domandarla a Dio, parché lu ghe la dà a tuti de maniera generosa e con bontà.” (Tia. 1:5) Questo testo el mostra che Geovà no’l tien mia la so sabedoria sol par lu, ma che la dà ai altri de maniera generosa. Queste parole anca le mostra che quando Geovà el ne dà la so sabedoria, lu no’l proa farne de manco. Lu no’l vol farne sentirse sensa valor parché ghe domandemo el so aiuto. Invesse, Geovà el ga pròpio caro che ghe domandemo la so sabedoria. — Pro. 2:1-6.
12. Come che podemo doperar quel che savemo par giutar i altri?
12 Sarà che podemo far compagno a Geovà e doperar quel che savemo par giutar i altri? (Sal. 32:8) Si! Tuti noantri podemo insegnar ai altri quel che savemo. Par esémpio, podemo giutar quei che ga scominsià a ndar ala predicassion fà poco tempo. I ansiani i pol insegnar con passiensa i servi ministeriai e i fradei pena batesadi a far i so laori nela congregassion. E quei che i giuta a tender e a far su Saloni del Regno i pol insegnarghe ai altri fradei quel che i sa.
13. Come che podemo far compagno a Geovà quando ghe insegnemo ai altri?
13 Se ghemo de insegnarghe a quelchedun, ghemo de sforsarse de farlo compagno a Geovà. Come cossita? Geovà el ga caro de dar la so sabedoria ai altri e mai la tien sol par lu. Alora, noantri volemo insegnar ai nostri fradei tuto quel che savemo. No ghemo mai de tegner quel che savemo par noantri parché ghemo paura che dopo no gavaremo pi gnente de far e che la persona la ne ciaparà el posto. Mai ghemo de pensar: ‘Nissun me ga insegnà gnente. Alora assa che el impare lu lu sol.’ Geovà no’l vol che nissun pense cossita nela so organisassion. Invesse, volemo restar contenti de insegnar ai nostri fradei “tuto” quel che savemo. (1 Tes. 2:8) Noantri volemo che anca i fradei che semo drio giutar i sìpia ‘pareciadi par insegnar i altri’. (2 Tim. 2:1, 2) Se insegnemo ai nostri fradei quel che savemo, tuti i gavarà de pi sabedoria e alegria.
QUANDO I ALTRI NO I DÀ VALOR A QUEL CHE FEMO
14. Cossa che tanti i fà quando femo robe bone par lori?
14 Quando femo robe bone ai nostri fradei o li giutemo, tanti i resta contenti e i ne ringràssia. Fursi lori i ne scrive qualcossa par dirne gràssie o i mostra de nantra maniera che i dà valor a quel che ghemo fato par lori. (Col. 3:15) Sicuro che veder che i nostri fradei i dà valor a quel che femo ne assa tanto contenti.
15. Cossa ghemo de ricordarse quando ne par che qualchedun no ga dato valor a quel che ghemo fato par lu?
15 Ma pol esser che dele volte, qualchedun no ndarà mia ringrassiarne par quel che ghemo fato. Fursi ghemo doperà del nostro tempo, forsa e soldi, ma ne par che la persona gnanca no la ne ga mia badà. Se ne sucede una roba cossita, cossa podemo far par no restar disgustadi? Ghemo de ricordarse de Ati 20:35, che l’è el testo de questo stùdio. Noantri sentimo alegria quando giutemo i altri, no vol mia dir se lori i dà valor a quel che ghemo fato o nò. Ma cossa che podemo far quando i altri no i ne dà valor? Vedemo un per de esempi.
16. Cossa che pol giutarne a seitar contenti de far robe bone ai altri?
16 Ricòrdate che quando te fè robe bone ai altri, te sì drio far compagno a Geovà. Lu el seita a dar robe bone ai altri, anca se no i ghe dà valor. (Mat. 5:43-48) E lu el promete che se femo robe bone ai altri ‘sensa spetar gnente indrio’, lu el ndarà ‘ricompensarne tanto’. (Luc. 6:35) Pol esser che quando el testo el parla de no ‘spetar gnente indrio’, vol dir no spetar gnanca che la persona la ne ringràssie. Ma ghemo de ricordarse che Geovà sempre el ndarà ricompensarne se giutemo e femo robe bone ai altri. — Pro. 19:17; 2 Cor. 9:7.
17. Come che podemo far compagno a Geovà quando giutemo i altri? (Luca 12:12-14)
17 Podemo far compagno a Geovà quando metemo in pràtica quel che dise in Luca 14:12-14. (Ledi. c) L’è vera che no l’è mia sbalià far robe bone o convidar par vegner ala nostra casa quei che i pol darne qualcossa indrio. Ma cossa che podemo far se se nicordemo che femo robe bone ai altri par causa de quel che i pol darne? Ne ocore far quel Gesù el ga dito e far robe bone a quei che no i pol darne gnente indrio. Sicuro che restemo contenti de far compagno a Geovà. E se no spetemo gnente de quei che giutemo, gavaremo alegria anca quando no i ghe dà valor a quel che ghemo fato.
18. Cossa che no ghemo de far quando giutemo i altri, e parché?
18 No stà proar pensar parché che una persona no la te ga ringrassià. (1 Cor. 13:7) Pol esser che quando qualchedun no mostra che dà valor a quel che ghemo fato, noantri se domandemo: ‘Sarà che no ghe bada mia quel che go fato o sol el se ga desmentegà de ringrassiarme?’ Ma pol esser che la persona no la ne ga mia ringrassià par causa de altre robe. Par esémpio, fursi qualchedun l’è restà tanto contento con quel che ghemo fato par lu, ma no l’è bon de mostrarne. O pol esser che el ga vergogna de ricever aiuto, parché una volta l’era lu che giutea i altri, ma adesso no l’è pi bon. Se amemo i nostri fradei, no ndaremo mai pensar robe rugne sora lori e seitaremo a giutarli con alegria. — Efe. 4:2.
19-20. Parché che l’è importante portar passiensa quando giutemo i altri? (Varda anca la ilustrassion.)
19 Porta passiensa. Varda quel che el rè Salomon el ga dito sora quel che sucede quando femo robe bone ai altri: ‘Buta el to pan sora le àque, parché dopo tanti giorni, te sarè bon de catarlo nantra volta.’ (Ecl. 11:1) Le parole de Salomon le ne insegna che fursi una persona sol la mostrarà che la dà valor a quel che ghemo fato par ela dopo tanto tempo. Varda quel che ga sucedesto con una sorela.
20 Tanti ani indrio, la dona de un superintendente de sircuito la ga scrito una carta par incoraiar una sorela che la era pena batesada. Nela carta, ela la ga dito che l’era tanto importante seitar fedele a Geovà. Sol dopo oto ani quela sorela che la era pena batesada la ga scrito una carta par ringrassiarghe. Ela la ga scrito: “Me ocorea scriverte par contarte che quela carta la ze stata tanto bona par mi. El testo che te ghè scrito me ga giutà tanto.” d Dopo la sorela la ga spiegà le dificoltà che la gavea infrontà, e la ga dito: “Dele volte, me vegnea voia de desister de servir a Geovà, ma el testo che te me gavei scrito me ga giutà a gaver la forsa de ndar avanti. In tuti questi ani, gnente me ga giutà tanto come la carta che te me ghè scrito.” Sicuro che la dona del superintendente de sircuito la ze restada tanto contenta de saver che quela sorela la gavea dato valor a quel che la gavea fato. Pol esser che anca noantri sol saveremo che una persona la dà tanto valor a quel che ghemo fato par ela dopo tanto tempo.
Pol esser che una persona che ghemo giutà sol la ndarà mostrar che la dà valor a quel che ghemo fato dopo de tanto tempo (Varda el paràgrafo 20.) e
21. Parché che te vol seitar a far compagno a Geovà?
21 Come ghemo visto, Geovà el ne ga creà de una maniera che semo felici quando giutemo i altri. Sicuro che restemo contenti quando i fradei i mostra che i dà valor a quel che ghemo fato par lori. Ma, anca se lori no i ne ringràssia, restemo contenti de saver che ghemo fato la roba giusta. No ghemo mai de desmentegarse che ‘Geovà el pol darne tanto de pi de questo’. (2 Cró. 25:9) Alora, Geovà el ndarà sempre ricompensarne con tanto de pi de quel che ghemo fato. E la roba che ne dà de pi alegria l’è esser ricompensadi par Geovà. Alora, volemo sforsarse par seitar a far robe bone ai altri compagno a Geovà.
CÀNTICO 17 Mi vui farlo!
a (Mateo 6:25, 26) “Par quela, mi ve digo: Fermeve de star ansiosi par la vostra vita, con quel che gavé de magnar o con quel che gavé de bever, o par i vostri corpi, con quel che gavé de vestir. No ghe vol dir la vita de pi che el alimento e el corpo de pi che la roba? 26 Vardé con atension i osei del cielo. Lori no i semena gnanca i tol su, e gnanca i mete via nel paiol, ma el vostro Pare, che l’è nel cielo, el ghe dà de magnar. Sarà che valtri no valé de pi che lori?
b (Filipensi 2:13) Parché Dio l’è drio darve la forsa par far quel che lu el vol. Cossita, lu el ve dà la voia e anca el poder de farlo.
c (Luca 14:12-14) Dopo, lu el ga dito al omo che lo gavea convidà: “Quando te vè convidar qualchedun par vegner magnar de mesdì o ala sera, no stà convidar i to amighi, to fradei, quei dela to fameia o i to visigni siori. Parché lori i podaria convidarte e come che pagarte indrio quel che te gavei fato. 13 Invesse, quando te vè convidar qualchedun par vegner magnar, convida quei che i ze poareti, desgrassiadi, soti e orbi. 14 Cossita, te sarè felice parché no i ga gnente par pagarte indrio. Ma Dio el ndarà ricompensarte nela ressuression dei giusti.”
d El testo che ghen’era nela carta l’era 2 Gioani 8, che dise: “Sté atenti a valtri stessi par no perder le robe che ghemo laorà par far; invesse, che valtri podé ricever una ricompensa completa.”
e ILUSTRASSION: Questa ilustrassion la mostra quel che una dona de un superintendente la ga fato. Ela la ga scrito una carta par incoraiar una sorela. Dopo de ani, ela la ga ricevesto una carta dela sorela par ringrassiarghe.
