La to identità la vol dir de pi che el to nome e quel che te sì par fora. Vol dir anca i to valori, le robe che ti te credi e la to personalità. La to identità l’è chi che te sì par rento e par fora.

Quando te sì sicuro de chi che te sì, no te vè assar de banda quel che te credi, gnanca te assi che i to coleghi i te controle.

“Tante persone le ze come manichini nele vetrine. Lore no le scòlie mia le robe che le mete su. Altre persone le fà questo par lore.” — Adrian.

“Mi go imparà a difender quel che l’è giusto anca in situassion difìcile. Mi sò chi che i ze i me amighi par meso de quel che lori i fà e par meso de quel che mi fao quando mi son con lori.” — Courtney.

COSSA LA BÌBLIA LA DISE: “No sté pi assarve influensar par questo mondo, ma sìpie trasformadi, rinovando la vostra mente.” — Romani 12:2.

Saver ben quale che le ze le to qualità, i to difeti, e quel che ti te credi, va giutarte a saver chi che te sì adesso e quel che te vol esser nel futuro. Se ti no te sè chi che te sì, queste domande te giutarà a saverlo.

Qualità: Che robe bone mi fao? Quale zele le me capacità e abilità? Par esémpio, par saver quale che le ze le to qualità, te pol domandarte: ‘Son bon de controlarme? Son un bon laorador? Son generoso? Quando che te ghè marcà qualcossa, te rivi nela ora giusta?’

PROA FAR QUESTO: L’è stà fadiga capir quale che le ze le to qualità? Alora, domanda ai to genitori o a un amigo che te te fidi de dirte quel che lori i vede de bon in ti e parché.

COSSA LA BÌBLIA LA DISE: “Ma, stà atento a quel che ti te sì bon de far. Alora, ti te restarè contento con ti stesso e nò in comparassion con nantra persona.” — Gàlati 6:4.

Difeti: Cossa che mi go de cambiar dela me personalità? In che situassion mi cato difìcile resister a una tentassion? In che situassion mi podaria gaver de pi autocontrolo?

COSSA LA BÌBLIA LA DISE: “Se noantri disemo che no ghemo gnanca un pecato, semo drio imbroiar a noantri stessi e la verità no la ze in noantri.” — 1 Gioani 1:8.

Quel che mi credo: Par mi, cossa che l’è giusto e sbalià? Parché che mi penso cossita? Mi credo in Dio? Parché son sicuro che lu el esiste? Cossa che mi cato ingiusto, e parché? Cossa che mi credo che ndarà suceder nel futuro?

COSSA LA BÌBLIA LA DISE: “El rassiossìnio el te tenderà e el dissernimento el te protegerà.” — Proverbi 2:11.