Geovà l’è el Dio che te ghè de cognosser

TE manchelo qualcossa importante nela to vita? Se te sè poco sora Dio, alora la risposta la ze si. Parché? Parché cossita come milioni de persone le ga descobrio, cognosser el Dio dela Bìblia el porta tanti benefissi ala nostra vita. Sicuramente te pol gaver questi benefissi adesso e anca nel futuro.

Geovà Dio, quel che el ga ispirà la scrita dela Bìblia, el ga caro che lo cognossemo. El salmista el ga scrito: “Che le persone le sàpia che ti, che el to nome l’è Geovà, sol ti te sì el Altìssimo sora tuta la tera.” Lu el sà che par noantri l’è tanto bon cognosserlo. “Mi, Geovà, son el to Dio, Quel che el te insegna par el to benefìssio.” Che benefissi noantri ghemo de cognosser Geovà Dio, el Altìssimo? — Salmo 83:18; Isaia 48:17.

Un vero benefìssio l’è che ghemo aiuto par i problemi dela nostra vita, una bela speransa par el futuro e pace mental. Anca, cognosser a Geovà ne fà pensar difarente dele persone de ancoi sora le domande pi importante dela vita. Quale zele queste domande?

La to vita gala ogetivo?

Anca se la umanità la ga fato un grando progresso nela tecnologia, le persone le se fà ancora le medèsime domande de sempre: ‘Parché che son qua? Cossa ndaralo suceder nel futuro? Qual che l’è el ogetivo dela vita?’ Quando le persone no le ze bone catar le risposte, la so vita no la ga un vero ogetivo. Sarà che questo sucede con tanti? Un stùdio fato nela Alemagna, nel fin dei ani 90, el dise che la metà dele persone intervistade, tante volte o dele volte, le catea che la vita no la gavea gnanca un ogetivo. Fursi una situassion compagna de questa la ghen’è ndove che te sì de star.

Se una persona no la sà cossa far, ela no la ga la base par un vero ogetivo nela so vita. Tanti i proa gaver un ogetivo ndando drio un bel laoro o gaver tanti soldi. Ancora cossita, i sente che ghe manca qualcossa. No gaver un ogetivo nela vita intriga tanto una persona che fin la vol coparse. Questo ga sucedesto con una bela dona che, de acordo col giornal International Herald Tribune, la ze stata slevada “nte una fameia che gavea tanti soldi e cossita la podea gaver tuto quel che la volea.” Anca se la gavesse una vita piena de richesse, ela la se sentia sola e la vedea che la so vita no la gavea ogetivo. La ga bevesto rimedi par dormir e i la ga catada morta. Fursi te sè de altre persone che anca lore le se sentia sole e che le ga volesto coparse.

Gheto belche scoltà qualchedun dir che la siensa la ga la risposta a tute le domande sora la vita? El giornal aleman Die Woche ga dito: “Anca se la siensa la ga base in tante prove, no la ga la risposta sora Dio. La evolussion la par rùstica, e anca altri studi dela siensa i pol darne tuto, manco consolo e sicuressa.” Quel che i sientisti i ga descobrio ne ga giutà tanto a cognosser la nostra vita, la vita dele bèstie e dele piante. E anca quel che sucede parché tuto el funsione de maniera giusta. Ma la siensia no la ze bona de dirne parché che semo qua e gnanca cossa che va suceder ntel futuro. Se noantri ndemo in serca dele risposte ale nostre domande sol nela siensa, no le gavaremo. El risultado l’è che “ghemo tanto de bisogno de orientassion”, dise el giornal Süddeutsche Zeitung.

Sol el nostro Creador l’è bon de darne orientassion. L’è stà lu che el ga metesto le persone nela Tera, par quela che lu el sà parché che lore le ze qua. La Bìblia la spiega che Geovà el ga creà le persone par impienir e tender dela Tera. Le persone le gavaria de mostrar le qualità de Geovà, come la giustìssia, el saver e el amor. Quando capimo parché Geovà el ne ga creà, alora capimo parché semo qua. — Génesi 1:26-28.

Cossa che ti te pol far?

E se gnancora no te ghè catà le risposte a queste domande: ‘Parché che son qua? Cossa che ndarà suceder nel futuro? Qual che l’è el ogetivo dela vita?’ La Bìblia la dise che te ghè de cognosser ben a Geovà. Gesù el ga dito: “Par gaver la vita eterna, le ga de cognosser a ti, el ùnico vero Dio, e a quel che te ghè mandà, Gesù Cristo.” Anca, ti te sì insentivà a sgrandar bele qualità, come el amor, e gaver el ogetivo de viver soto el Regno de Dio, che Gesù el governa. Cossita te gavarè un ogetivo nela vita e una maraveiosa speransa par el futuro. Le domande che sempre te ghè bio fin adesso le gavarà la risposta. — Gioani 17:3; Eclesiasti 12:13.

Come che saver questo el càmbia la to vita? Hans el sà la risposta a questa domanda. * Ani in drio, lu el credea poco in Dio, ma la so fede no la gavea influensa nela so vita. Hans el ghe piasea le droghe, moto, done imorai, e anca el ghe piasea robar. “Ma la me vita la era voda, e no ero felice”, spiega Hans. Quando el gavea 25 ani, Hans el ga volesto cognosser meio a Dio e el ga ledesto la Bìblia con atension. Dopo de cognosser ben a Geovà e saver el ogetivo dela vita, Hans el ga cambià la so vita e el se ga batesà come Testimònia de Geovà. Nei ùltimi diese ani lu el dopera la pi granda parte del so tempo par giutar le persone a capir la Bìblia. Lu el dise: “Servir a Geovà l’è la meio maniera de viver. No ghen’è gnente compagno de questo. Cognosser a Geovà me ga dato ogetivo nela vita.”

Ma savemo che el ogetivo dela vita no l’è la ùnica roba che preocupa le persone. Intanto che el mondo el deventa cada volta pedo, ghen’è nantra domanda che intriga cada volta de pi persone.

Parché galo sucedesto questo?

Quando sucede una desgràssia con qualche persona, la prima domanda che ela la se fà la ze: Parché galo sucedesto questo? Saver la risposta giusta de questa domanda giutarà la persona a saver come infrontar de maniera emossional quel che ga sucedesto. Se ela no la cata una bona risposta, el sofrimento el continua e la persona la pol restar con ràbia. Par esémpio, varda quel che ga sucedesto con Bruni.

“La me fiola la ze morta fà arquanti ani”, la spiega Bruni, che adesso la ze un poco pi vècia. “Mi credea in Dio, par quela son data in serca de consolo col frate dela me cità. Lu el me ga dito che Dio el ga menà Susanne par el cielo e che adesso la era un àngelo. La so morte la ga pròpio finio cola me vita. E mi gavea òdio de Dio parché la gavea portada via.” Bruni la ga sentio el dolor e el sofrimento par tanti ani. “Alora, una Testimònia de Geovà la me ga mostrà nela Bìblia che mi no gavea gnanca un motivo par gaver òdio de Dio. Geovà no’l ga portà Susanne al cielo e ela no la ze un àngelo. L’era par causa dela imperfession umana che ela la gavea la malatia. Susanne la ze drio dormir nela morte, spetando che Geovà la ressussite. Anca go imparà che lu el ga fato le persone par viver par sempre nte un paradiso qua ntela Tera e che questo presto ndarà suceder. Quando go scominsià a capir che tipo de persona l’è Geovà, son rivada pi darente de lu e el me dolor no l’era pi come vanti.” — Salmo 37:29; Ati 24:15; Romani 5:12.

Milioni de persone le passa par diversi problemi, come desgràssie nela so vita, guere, fame o desgràssie dela naturesa. Bruni la ga sentio un alìvio quando la ga visto nela Bìblia che Geovà no’l ga la colpa par le desgràssie che sucede, lu no’l ga mai bio el ogetivo de far le persone tribolar, e presto lu el ndarà finir con tute le robe rugne. Quando vedemo suceder cada volta de pi robe rugne, vedemo un dei segnai che semo drio viver nei ùltimi di de questo mondo. L’è darente el cambiamento che tuti noantri semo premosi de veder. — 2 Timòteo 3:1-5; Mateo 24:7, 8.

Cognosser a Dio

Hans e Bruni i credea in Dio ma no i savea tante robe sora lu. Quando i ga doperà el so tempo par cognosser meio a Geovà, i sforsi che i ga fato i ga valesto la pena. Lori i ga catà le risposte ale domande pi importante che ancoi tanti i fà. Questo ga dato par lori pace e una speransa par el futuro. Questo anca ga sucedesto con milioni de servi de Geovà.

La prima roba par cognosser a Geovà l’è far un bel stùdio dela Bìblia par imparar sora lu e sora quel che lu el vol de noantri. Arquante persone le ga fato questo nel primo sècolo. Luca, che l’era un dotor e anca el studiea la stòria, el dise che arquanti nela congregassion giudaica nela cità de Bereia, nela Grècia, “i ga acetà la parola [de Paolo e de Sila] con tanto entusiasmo. Lori i esaminea le Scriture cada di con atension, par capir se queste robe le era pròpio cossita.” — Ati 17:10, 11.

Quei che i seghia a Cristo nel primo sècolo i fea anca parte de una congregassion. (Ati 2:41, 42, 46; 1 Corinti 1:1, 2; Gàlati 1:1, 2; 2 Tessalonissensi 1:1) Questo anca el sucede ancoi. Le congregassion dele Testimònie de Geovà le fà riunion par giutar cada persona a rivarse pi darente de Geovà e gaver alegria in servirlo. Star insieme cole Testimònie de Geovà ne dà nantro benefìssio. Cossita come le persone le imita el Dio che lore le adora, anca le Testimònie de Geovà le imita le qualità che el pròpio Geovà el ga, ma nò de maniera perfeta. Cossita, esser insieme con lore ne giuta cognosser ancora meio a Geovà. — Ebrei 10:24, 25.

Càtito che ghe vol massa sforso par cognosser una Persona? Sicuramente l’è un grando sforso. Ma te fè tanto sforso anca par quel che te vol nela to vita. Pensa nel sforso che un atleta famoso el fà par el so trenamento. Par esémpio, Jean-Claude Killy, nela Frància, che el ga guadagnà la medalia olìmpica de oro nel sport de schiar, el dise cossa che ghe vol par ndar ben nela competission: “Ghe vol pareciarse diese ani vanti, l’è un progeto de arquanti ani e toca pensar in questo tuti i giorni. L’è un laoro de 365 giorni al ano, de maniera fìsica e mental.” Se fà tuto questo sforso par competir nte una carera che fursi la dura diese minuti! Sicuro che tute le ricompense che ghemo par cognosser a Geovà le ze tanto pi grande e le dura par de pi tempo.

Una amicìssia cada volta pi bela

Ti, cognóssito qualchedun che ghe piase perder qualcossa de importante nela vita? Nissuni. Alora, se te senti che la to vita no la ga un vero ogetivo, o se te vol saver parché ghen’è tanto sofrimento, sìpia dessidio a cognosser a Geovà, el Dio dela Bìblia. Imparar sora lu va cambiar la to vita par meio e par sempre.

Sarà che un giorno no gavaremo pi gnente de imparar sora Geovà? Quei che i ze drio servirlo fà tanti ani i resta ancora maraveiadi con quel che i ga imparà de lu e cole altre robe nove che i seita imparar sora lu. Imparar queste robe ne fà pi felici e restemo pi amighi de lu. Fando cossita, semo de acordo coi pensamenti del apòstolo Paolo, che el ga scrito: “Come che le ze profonde le richesse, el saver e la cognossensa de Dio! No se pol mia spiegar i so giulgamenti gnanca capir del tuto le so strade! Parché l’è scrito: “Chi che l’è stà bon de cognosser la mente de Geovà, o chi che pol dirghe la maniera giusta de far qualcossa?” — Romani 11:33, 34.

[Nota]

[Comentàrio nela pàgina]

Le persone ancora le fà le stesse domande: ‘Parché son qua? Qual che sarà el me futuro? Qual che le el ogetivo dela vita?’

[Comentàrio nela pàgina]

“Quando go scominsià a capir che tipo de persona l’è Geovà, son rivada pi darente de lu”

[Comentàrio nela pàgina]

“Servir a Geovà l’è la meio maniera de viver. Gnente se compara con questo. Cognosser a Geovà me ga dato ogetivo nela vita”