Domande dei letori

Le Testimònie de Geovà le aceta pìcole parte de sangue?

La risposta la vien de un artìcolo dela Sentinela de 15 de giugno de 2000.

La risposta la ze nò. Noantri Testimònie de Geovà no acetemo sangue. Credemo pròpio che la lege de Dio sora el sangue no la càmbia col tempo che passa. Ma ancoi se ga catà che el sangue pol spartirse in quatro parte e de queste quatro, in parte ancora pi pìcole. Alora vien fora nove domande, par esémpio, i cristiani aceta o nò queste parte picolete? Par dessider, el cristian no’l ga sol de pensar in quel che pol giutar o quel che pol esser pericoloso, ma el ga de ndar in serca de quel che dise la Bìblia e anca cossa pol suceder cola so amicìssia con Geovà.

Par capir meio vardemo arquanti fati bìblichi dela stòria e dela medissina.

Geovà Dio el gavea dito a Moisè che el sangue l’era una roba tanto spessial. (Génesi 9:3, 4) Tempo dopo, la Lege che Dio el gavea dato a Israel assea ciaro che el sangue l’era santo: “Se qualchedun dela casa de Israel o qualche straniero . . . el magna del sangue de una bèstia o de una persona, sicuro che mi sarò contra quel che el magna el sangue.” I israeliti che no obedia ala Lege de Dio i podea contaminar i altri, par quela Lu el ga dito: “Vao finirlo fora de in meso del so pòpolo.” (Levìtico 17:10) Tempo dopo in Gerusalen i apòstoli e i ansiani i se ga riunio e i ga dessidio de ‘no acetar sangue’. Far cossita l’è importante compagno de no far imoralità e idolatria. — Ati 15:28, 29.

Cossa volea dir ‘no acetar sangue’ in quel tempo? I cristiani no i magnea sangue fresco e gnanca inconaià. No i magnea carne de una bèstia che no la era svenà. No i gavaria gnanca de magnar robe con sangue come la morsilia. Magnar sangue in arquante de queste maniere ndaria contra la Lege de Dio. — 1 Samuel 14:32, 33.

Nel passà, par le persone l’era tanto comun magnar sangue, come ga scrito Tertuliano (secondo e terso sècolo dopo de Cristo). Par risponder ale acusassion false che i cristiani bevea sangue, Tertuliano el ga dito che arquanti pòpoli i fea acordi drio bever sangue. El ga anca dito che “ghen’era quei che par finir cola malatia dele convulsion (epilepsia) ndea bever el sangue fresco de quei pena copadi nela arena.”

Quei laori là i era sbaliadi par i cristiani, anca se arquanti romani lo fea par tender dela salute. Tertuliano el ga anca scrito sora i cristiani: “No magnemo gnanca el sangue dele bèstie.” I romani ghe dea ai cristiani magnar con sangue par provar la so integrità. Tertuliano el gavea scrito ai romani: “Come podé pensar che [i cristiani] ndaria bever sangue dei òmini quando i refuda fin el sangue dele bèstie?”

Ancoi, se un mèdico el dise che ocore un tratamento col sangue, poche persone pensarà che bisogna tegner conto de cossa dise le Lege de Dio. Sicuro che noantri Testimònie de Geovà ghe tegnemo ala vita ma volemo anca obedir ala lege de Geovà sora el sangue. Cossa vol dir questo par i tratamenti mèdichi de ancoi?

Dopo dela Seconda Guera Mondial, quando le trasfusion de sangue le ze deventade una roba normal, noantri Testimònie de Geovà ghemo capio che l’era contra la Lege de Dio e credemo ancora cossita. Invesse, la medissina la ga cambià col tempo. Al di de ancoi la pi granda parte dele trasfusion no ze sol de sangue ma de una dele so quatro parte: (1) glòbuli rossi; (2) glòbuli bianchi; (3) plachete; (4) plasma (parte lìquida). De acordo cola situassion del malà i mèdichi podaria dirghe che ghe ocore glòbuli rossi, bianchi, plachete o plasma. El sangue de una persona quando l’è spartio in queste quatro parte pol esser doperà par far trasfusion a pi persone. Le Testimònie le crede che acetar sangue o una dele so quatro parte va contra la Lege de Dio. Una roba importante l’è che far come dise la Bìblia ne ga protegesto e seita protegerne de tanti risci, anca de tante brute malatie come epatite e Aids, che se pol ciapar col sangue.

Alora, el sangue se pol spartir in quatro parte, e de queste in parte ancora pi pìcole (frações). Come ze doperade e cossa ocore saver par dessider se acetar o nò queste pìcole parte?

El sangue no l’è cossita sémplisse. Fin el plasma, che l’è formà par 90% de àqua, el mena una mùcia de ormoni, sali inorganichi, enzimi, sostanse che fà ben, minerali e sucro. El plasma mena anca proteine come la albumina, sostanse che fà far la crosta (fatores de coagulação) e anticorpi par combater malatie. I dotori spartisse e i dopera tante de queste proteine del plasma. Par esémpio, i ghe le dà a quei che i ga emofilia, che perde sangue anca sol se i se fà un taieto. E ale persone che ga ciapà arquante malatie pol esser che i mèdichi i ghe dise de far ingession de gamaglobulina che vien cavà via del plasma de persone che le ga belche la protession, i anticorpi par quela malatia. Questo ne giuta capir che el plasma, come anca altre parte del sangue, se pol spartir in tante pìcole parte che pol esser doperade come tratamenti mèdichi. a

Compagno se pol spartir pìcole parte del plasma par cavar via anca le parte pi picolete, se pol farlo anca cole altre parte del sangue (glòbuli rossi, glòbuli bianchi e plachete). Par esémpio, dei glòbuli bianchi podemo cavar via interferons e interleucinas, doperadi anca in tratamenti par arquante infession de vìrus e par arquanti tipi de càncaro. E dele plachete se pol cavar via pìcole parte come un fator de sicatrizassion (par serar su una ferida). Ghen’è anca studi sora altri remedi che riva sempre de parte del sangue. Questi tratamenti no ze una trasfusion de una dele quatro parte del sangue, ma se dopera le so pìcole parte. I cristiani i pol acetar o nò questi tratamenti? No podemo dirlo, la Bìblia no la dise cada pìcola roba, par questo un cristian el ga de far la so pròpia dessision de acordo cola so cossiensa davanti de Dio.

Arquanti i refuda tuti i tipi de tratamenti che vien del sangue, anca le pìcole parte che pol servir par giutar contra le malatie, parché i capisse cossita el comando de Dio de ‘no acetar sangue’. I pensa che la Lege de Dio par la nassion de Israel disea che el sangue che vegnea fora de una creatura se gavea ‘de butarlo in tera’. (Deuteronómio 12:22-24) Parché che disemo cossita? Parché par pareciar la gamaglobulina e i fatori de coagulassion ocore ciapar el sangue, spartirlo nele so quatro parte e dopo laorarlo. L’è par quela che arquanti cristiani refuda tuti questi tratamenti, compagno che i refuda le trasfusion de sangue o le so quatro parte. Se ga de rispetar la dessision che i ga tolto de cuor, de acordo cola so cossiensa.

Invesse, altri cristiani desside de maniera diferente. I refuda le trasfusion de sangue, i glòbuli rossi, glòbuli bianchi, plachete o plasma, ma i aceta i tratamenti mèdichi che dopera le pìcole parte (frações) che se cava via de una o pi dele quatro parte del sangue. Anca cossita, pol esserghe difarense. Fursi un el aceta el tratamento de gamaglobulina che vien del plasma ma no aceta un tratamento che vien dei glòbuli rossi o bianchi. Alora, cossa pol giutar un cristian a dessider se aceta o nò le pìcole parte del sangue?

La session “Perguntas dos Leitores”, dela Sentinela de 1 de giugno de 1990 spiega che la mama che la ze drio spetar un bambin ghe passa le proteine del plasma (frações) che vien fora del so sangue. La mama ghe dà imunoglobuline al bambin par giutarlo a gaver protession e anticorpi. De quel’altra banda, intanto che i glòbuli rossi del bambin i riva nel fin dela vita, se spartisse la sostansa che mena ossigénio, e de questa una parte deventa bilirrubina che el bambin passa ala mama par meso dela placenta, e dopo la vien butada fora. Cossita come la mama e el bambin i se passa pìcole parte del sangue (frações) de maniera natural, arquanti cristiani i ga pensà e i ze rivadi ala conclusion che se pol acetar pìcole parte del sangue.

Ma, come ghen’è difarente idee e se pol far difarente dessision, vol dir che ze una roba poco importante? Nò, l’è una question sèria. Ma una roba ze sicura: tuto quel che ghemo dito fin adesso mostra che noantri Testimònie de Geovà no acetemo trasfusion de sangue e gnanca una dele so quatro parte, parché la Bìblia dise ai cristiani ‘che no i ga de acetar le robe sacrificade ai ìdoli, sangue e la imoralità sessual’. (Ati 15:29) Vanti de dessider se acetar o nò parte anca pìcole del sangue, ghemo de pensarghe sora e far orassion a Geovà par dessider de acordo cola nostra cossiensa.

Tanti i aceta tuti i tratamenti che podaria farli star meio anca se ghen’è risci par la salute, come par esémpio i tratamenti che vien del sangue. El vero cristian se preocupa par la so salute. Ma ghen’è altre robe ancora pi importante e metemo nela balansa nò sol quel che fà ben e quel che fà mal. Se el tratamento el vien del sangue tegnemo ben in mente quel che dise Dio e la nostra amicìssia personal con Lu, che el ne ga dato la vita. — Salmo 36:9.

L’è una granda benedission par i veri cristiani fidarse come el salmista che el ga scrito: “Geovà Dio l’è come el sol e come un scudo, lu el dà favor e glòria. Geovà no’l assarà de dar gnente de bon a quei che vive in integrità. Ò Geovà . . . , quel che el se fida in ti l’è felice!” — Salmo 84:11, 12.

[Nota]

[Quadro]

DOMANDE CHE PODEMO FAR AL DOTOR

Se te ocore far una operassion o un tratamento che dopera el sangue, domàndaghe:

Tuti i dotori e quei che i sarà insieme nela operassion i sà che son una Testimònia de Geovà e che go dà istrussion che no vui trasfusion de sangue (sangue, glòbuli rossi, glòbuli bianchi, plachete e plasma) in tute le situassion?

Se i remedi che i me darà vien fora del plasma, glòbuli rossi, glòbuli bianchi o plachete, domàndaghe:

El rimèdio el vien de una dele quatro parte del sangue? Se si, te pol spiegarme come che l’è stà parecià?

Quanto e de che maniera se ndarà doperar de questo rimèdio che vien del sangue?

Se la me cossiensa me assa acetar questa pìcola parte (fração), che risci ghen’è?

Se la me cossiensa me fà refudar questa pìcola parte (fração), cossa se podaria far de difarente?

Dopo che go studià ben, fin quando posso dirte cossa che go dessidio?