Ancoi ghen’è pornografia a in tuti i posti e par che ze una roba normal. Se pol catar pornografia nela publissità, nele reviste de moda, nei filmi, nela mùsica e nele reviste. Anca nela television, nei giughi eletrònichi, nei selulari, tablet e nela internet. Ancoi ghen’è cada volta pi persone che varda pornografia e se pol catarla in tanti posti pi che mai. — Vedi el quadro “ Informassion sora la pornografia”.

La pornografia la ze cambiada in questi ani. Gail Dines, professora de una università, la ga scrito: “La pornografia, che na volta la era schifosa, adesso la ze normal.”

E ti, cossa pénsito? Sarà che la pornografia la ze come un velen, o no fà mal a nissuni? Gesù el ga dito: “Tuta la pianta bona produse fruto bon, ma tuta la pianta marsa produse fruto marso.” (Mateo 7: 17) Cossa che la pornografia la fà vegner fora? Par saver la risposta, ndemo veder arquante domande sora la pornografia.

I SPESSIALISTI I DISE: La pornografia la ze un bruto vìssio. Arquanti studiosi i dise che ze come una droga.

Brian, b che el gavea vìssio de vardar pornografia nela internet, el dise: “Mi no era bon de fermarme de vardar. Era come che fusse drogà. El sentimento de colpa me fea tremar e gaver mal de testa. Me son sforsà tanto par molarghela, ma ani dopo gavea ancora el vìssio de vardar pornografia.”

Quei che ga el vìssio dela pornografia i ga la tendensa a imbroiar in quel che i dise par proar sconderlo. I tien le distanse dei altri, no i dise gnente e no i conta gnente de lori. E par quela i sente vergogna, ansietà, depression, ràbia, tante volte i se sente soli e arquanti fin i riva pensar de coparse. Sèrgio, che el sbassea pornografia quasi tuti i di nel so telèfono, el dise: “Me interessea sol che de mi e era disperà. Me sentia che no valea gnente, sol, in colpa e desanimà. Gavea massa vergogna e paura par ndar in serca de aiuto.”

Anca darghe sol na ociada ala pornografia, aposta o par sbàlio, pol esser pericoloso. Judith Reisman, una dona che fà peschise sora la pornografia, ga dito davanti dela Comission del Senato dei Stati Unidi: “Le imàgini pornografiche resta gravade nel servel, e l’è difìcile o no se pol pròpio desmentegarle o cavarle via.” Susan, una tosa de 19 ani che ga visto sensa voler pornografia nela internet, la conta: “Le imàgine le resta gravade. Le vien in mente de colpo e me par che mai podarò cavarmele via.”

CONCLUSION: La pornografia fà deventar schiavi e rovina la vita dele persone. — 2 Piero 2:19.

I SPESSIALISTI I DISE: “La pornografia desfa fameie e matrimoni.” — The Porn Trap (La tràpola dela pornografia), de Wendy e Larry Maltz.

Come che la pornografia desfa fameie e matrimoni?

• Fà pi fiaca la confiansa, el amor e la amicìssia intrà omo e dona. — Proverbi 2:12-17.

• Omo o dona no i se preocupa coi sentimenti del altro, i deventa egoisti e no i ze mai contenti. — Efesi 5:28, 29.

• Fà seitar pensar idee sbaliade sora el sesso. — 2 Piero 2:14.

• Fà far al altro sesso schifoso a forsa. — Efesi 5:3, 4.

• Fà che el omo o la dona no i sìpia fedeli in quel che i pensa e i fà. — Mateo 5:28.

La Bìblia dise che sposo e sposa no i ga de tradirse. (Malachia 2: 16) El no esser fedeli l’è una maniera de tradirse, che rovina i matrimoni e porta ala separassion e al divòrsio, e fà gaver grandi problemi anca ai fioi.

La pornografia fà anca tanto mal ai picinini. Brian, che ghemo parlà vanti, el conta: “Quando gavea 10 ani, intanto che era drio giugar a sconderme, go catà le reviste pornografiche de me pare. Go scominsià vardarle de scondon, anca se no capia parché me piasea quele imàgine. Cossita, go scominsià un bruto costume che me ga rovinà e che go bio fin de grando.” Tanti studi i ga mostrà che la pornografia pol far che i tosi i gàpia relassion sessuai sempre pi presto, che i fae sesso con tante persone difarente e de maniera violenta. No i ga pi echilìbrio nei so sentimenti e nela maniera de pensar.

CONCLUSION: La pornografia ze come un velen che desfa el amor e porta dolor e sofrimento. — Proverbi 6:27.

LA PAROLA DE DIO LA DISE: “Alora, gavé de far morir le parte del vostro corpo, sora la imoralità sessual, la impuressa, la passion sensa controlo, le voie che fà dano e el voler sempre de pi, che vol dir idolatria.” — Colossensi 3: 5.

In pràtica, Geovà c Dio el òdia la pornografia. E questo nò parché l’è contra el sesso, parché l’è stà pròpio lu che lo ga creà. El ga fato che i maridadi i podesse gaver fioi, esser pi darente e amarse par meso dele relassion sessuai. — Tiago 1:17.

Alora, parché disemo che Geovà el ga tanto òdio par la pornografia? Vedemo arquanti motivi.

• Lu el sa che la pornografia pol rovinar la vita. — Efesi 4:17-19.

• Lu el ne ama e el vol protegerne de quel che ne fà mal. — Isaia 48: 17, 18.

• El vol tender dei maridadi e dele fameie. — Mateo 19:4-6.

• El vol che semo puri e che rispetemo i altri. — 1 Tessalonissensi 4:3-6.

• El vol che rispetemo la capassità de far fioi e che la doperemo ben. — Ebrei 13: 4.

• Geovà el sa che la pornografia la fà veder el sesso de maniera sbaliada, schifosa, egoista, come una roba del demònio. — Génesi 6: 2; Giuda 6, 7.

CONCLUSION: La pornografia la rovina la nostra amicìssia con Dio. — Romani 1:24.

Ma Geovà el ga compassion par quei che i vol liberarse dela pornografia. La Bìblia la dise: “Geovà l’è misericordioso e el ga compassion, lu el ga passiensa e tanto amor leal. Parché lu el cognosse ben come semo stati fati, el se ricorda che semo polver.” (Salmo 103:8, 14) Geovà el convida i ùmili che i va in serca del so aiuto, ‘par ricever misericòrdia e bontà imèrita par giutarli nel tempo giusto’. — Ebrei 4: 16; varda el quadro “ Come liberarse dela pornografia.”

Vardemo quel che la Bìblia la dise de arquanti che ga vinsesto bruti costumi col aiuto de Dio: “Valtri sì stati lavadi, sì stati santificadi, sì stati ciamadi giusti nel nome del Signor Gesù Cristo e col spìrito del nostro Dio.” (1 Corinti 6:11) Queste persone le ga visto che le parole del apòstolo Paolo le ze pròpio vere: “Par tute le robe go forsa gràssie a quel che el me dà poder.” — Filipensi 4:13.

Susan, che la ze stata bona de cavarse via el vìssio dela pornografia, la dise: “Geovà l’è el ùnico che pol giutarte a assar questo bruto vìssio. Se ghe domandemo el so aiuto e la so orientassion, gavaremo una vita pura e una bona amicìssia con lu. Lu mai el ne assarà.”