Me pare l’era de star nela Alemagna ma l’è ndato de star nela Austràlia nel ano 1949 par laorar nele mine e nele indùstrie de energia. Lu l’è ndato de star in colònia nel stato de Victoria, ndove el se ga maridà cola me mama. E mi son nassesto nel ano 1953.

Tempo dopo, me mama la ga scominsià a studiar la Bìblia cole Testimònie de Geovà. Mi me ricordo de scoltar le stòrie dela Bìblia che la me contea quando ero cieo. Me pare no’l ghe piasea de nissuna religion. Lu l’è deventà una persona massa violenta e me mama la gavea tanta paura de lu. Ma la ga seità a studiar la Bìblia sconta e la ghe piasea tanto de quel che la imparea. Quando me pare no l’era casa, ela la insegnea la Bìblia a mi e a me sorela. Ela la parlea che la Tera la deventaria un Paradiso e che tuti noantri sarìssino felici se féssino quel che la Bìblia la dise. — Salmo 37:10, 29; Isaia 48:17.

Quando mi gavea 18 ani, go bio de ndar via de casa parché me pare l’era massa violento. Mi sempre credea nele robe che me mama me insegnea sora la Bìblia, ma no ghe dea valor a lore. Par quela, no son stà bon de far le robe giuste. Go scominsià a laorar come eletressista nele mine de carbon. Con 20 ani, me go maridà e 3 ani dopo me prima fiola la ze nassesta. Par quela, go scominsià a pensar in quel che l’era pi importante nela me vita. Mi savea che la Bìblia la podea giutar la me fameia. Alora, go scominsià a studiar cole Testimònie de Geovà. Me dona no la ga piasesto tanto. Nela prima volta che son ndà nte una riunion, me dona me ga dito che mi gavaria de scòlier intrà la me fameia e el stùdio, e me go fermà de studiar cole Testimònie de Geovà. Ma pi tardi, me go ciamà gramo parché mi savea che l’era la roba giusta de far.

Un giorno nel laoro, i me coleghi i me ga mostrà pornografia. Mi volea veder quele robe ma al medèsimo tempo le me fea schifo e mi me sentia tanto mal. Mi me ricordea de quel che la Bìblia la insegna e ero sicuro che Dio el ndaria castigarme. Ma quanto de pi vardea quele robe brute, de pi voia me vegnea de vardarle e manco mal me sentia. Col tempo, me go vissià nela pornografia.

Nei ani avanti, me go slontanà tanto de quel che me mama me gavea insegnà. Par causa dele robe che mi vedea e pensea sora, go scominsià a parlar de robe imorai, a far piade sporche e a veder el sesso de maniera sbaliada. Mi ero ancora maridà, ma tradia la me dona con altre done. Un giorno, me go vardà nel spécio e go pensà: “Mi te òdio!”. Go fin perso el rispeto che mi gavea par mi stesso.

Me matrimònio el se ga finio e la me vita la era pròpio destruta. Alora, mi go verto el me cuor a Geovà e go fato una orassion a lu. Dopo de 20 ani che me gavea fermà de studiar la Bìblia, go scominsià a studiarla nantra volta. Me pare l’era belche morto e me mama la era una Testimònia de Geovà batesada.

Quel che mi fea l’era tanto difarente de quel che la Bìblia la insegna. Ma adesso mi volea far difarente, mi volea gaver la pace che la Bìblia la parla. Alora go scominsià a sforsarme par no doperar brute parole e no tratar le persone cole brute. Mi anca go dessidio de no far pi imoralità, de fermarme de giugar, de far la ciuca e de ciavar del me paron.

I me coleghi no i capia parché mi volea far questi cambiamenti nela me vita. Par tre ani lori i seitea dirme par tornar a far quele brute robe. Dele volte, quando mi restea massa cativo o parlea brute parole, lori i me disea: “Ah, quel lì l’è el Joe che noantri cognossemo”. Mi me sentia pròpio mal, come se tuto quel che mi gavea fato no’l giovesse gnente.

Nel me laoro, ghen’era pornografia da par tuto, par meso dei eletrònichi e reviste. I me coleghi i me mandea robe imorai par meso del computador, come mi fea prima. Mi ero drio sforsarme par assar de veder queste robe, ma lori i fea de tuto par intrigarme. Alora, go domandà aiuto al me istrutor dela Bìblia e lu sempre el me scoltea con atension. Doperando la Bìblia, lu el me ga mostrà come darghene fora con questo vìssio. Anca el me ga insentivà a ndar in serca del aiuto de Geovà e a pregar sempre. — Salmo 119:37.

Un giorno, go fato una riunion coi me coleghi de laoro. Quando èrino tuti insieme, mi ghe go dito che i ghe desse bira a due coleghi che i gavea problema con àlcol e che i fea sforso par assar de bever. Suito i me coleghi i ga dito: “Sito mato? Lori i ze drio proar vinser questo vìssio!” Alora, ghe go dito: “Anca mi.” Dopo, i ga capio i me sforsi de no veder pi pornografia e mai pi i me ga dito par tornar a esser come prima.

Col tempo, e con tanto aiuto de Geovà, son stà bon de darghene fora col me vìssio de veder pornografia. Me go batesà nel ano 1999 e son restà grato a Geovà parché el me ga giutà a gaver una vita felice e de far polito.

Adesso go capio parché che Geovà el òdia quele robe che me piasea tanto. Lu l’è un Pare amoroso e el vol protegerne dei problemi che la pornografia la ne porta. Ghemo de fidarse in quel che dise Proverbi 3:5, 6: “Fìdate in Geovà de tuto el to cuor, no stà fidarte nel to pròpio saver. Ricòrdate de Dio in tuto quel che te fè e lu el ndarà mostrarte quala che la ze la strada giusta.” Viver come la Bìblia la dise che l’è giusto me protege e me giuta a gaver una vita felice. — Salmo 1:1-3.

Nel passà, quel che ero me fea schifo. Ma adesso sento che go pace e rispeto par mi stesso. Vivo de maniera polita e sò che Geovà el me ga perdonà e el me giuta. Nel ano 2000, me go maridà con una sorela che la ama tanto a Geovà. La ga nome Karolin. Noantri se sentimo sicuri e in pace. Par noantri, l’è un privilègio far parte de una fameia mondial con persone amorose e che le se sforsa de gaver una vita neta.