Tante persone le beve de pi bebide alcòliche quando le se sente stressade, sole o stufe. Te sì drio bever de pi de quel che te bevei una volta? Se ze cossita, cossa te ghè de far par seitar a gaver el controle o par no deventar vissià col alcol? Ndemo veder arquanti consili che i pol giutarte.

•  Cossa vol dir controlar quanto te bevi?

•  Come posso saver se no go pi el controle?

•  Sinque consili che i te giutarà a controlar la quantità che te bevi

 Cossa che la Bìblia la dise: “No stà restar intrà quei che i beve massa vin.” — Proverbi 23:20.

 Pensa in questo: La Bìblia no la dise mia che l’è sbalià bever bebide alcòliche de maniera controlada. (Eclesiasti 9:7) Ma la assa ciaro che ghen’è una difarensa intrà bever de maniera controlada, bever tanto o esser vissiado nela bebida. (Luca 21:34; Efesi 5:18; Tito 2:3) Anca quando la persona no la ze vissiada, bever massa pol farghe far brute dessision, far mal ala so salute e anca rovinar la amicìssia coi altri. — Proverbi 23:29, 30.

 Tanti peschisadori e autorità nela salute i dise che ghen’è difarensa intrà bever de maniera controlada e bever massa. Lori i fà la conta de questa difarensa de acordo col nùmero de mesure che una persona beve al giorno e par el nùmero de giorni nela stimana che questa persona la beve. a Ma cada persona la ze difarente, e dele volte la meio dessision la ze no bever gnente. De acordo cola Organisassion Mondial dela Salute:

 ‘Anca una o due mesure de alcol pol esser massa — par esémpio:

•   Quando se ga de doperar màchine.

•   Quando una dona la ze gràvida o la ze drio dar el so late al picinin.

•   Quando se beve serti tipi de remedi.

•   Quando se ga problemi de salute.

•   Quando no se ze boni de controlar la quantità che se beve.’

 Cossa che la Bìblia la dise: ‘Vardemo con atension quel che gavemo fato.’ — Lamentassion 3:40, Bíblia na Linguagem de Hoje in portoghese.

 Pensa in questo: Se te vardi quanto che te bevi e te fè i cambiamenti che ghe vol, te podarè evitar le brute consequense de bever alcol. Varda arquanti segnai che i pol mostrar che te sì drio perder el controle dela situassion.

•   Te ghè bisogno del alcol par esser contento. Te senti che te ocore bever par restar tranquilo, par divertirte e par gaver amighi. Te bevi par esser bon de dàrghene fora coi problemi.

•   Adesso te bevi de pi che vanti. Te sì drio bever de pi. Te sì drio bever bebide pi forti e te ghè bisogno de bever de pi par sentir quel che te sentii vanti.

•   Par causa dela bebida te ghè problemi nel laoro o in casa. Par esémpio, te sì drio guastar cole bebide alcòliche de pi soldi de quel che te guadagni.

•   Dopo de bever te fè cose che no te gavarissi de far, come nadar, guidar el auto o doperar màchine.

•   Altre persone le dise che le ze preocupade cola quantità che te sì drio bever. Quando che i parla de questo, te resti inrabià e te cati fora scuse. Ti te proi sconder dei altri che te sì drio bever o te disi una busia sora la quantità che te bevi.

•   No te sì bon de fermarte. Te ghè belche provà bever manco o anca fermarte, ma no te sì stà bon.

 1. Gàpia un progeto.

 Cossa che la Bìblia la dise: “L’è sicuro che i progeti de quei che pensa ben vanti i gavarà boni resultadi.” — Proverbi 21:5.

 Pensa in questo: Scoli che giorni dela stimana te ndarè bever e meti un limite dela quantità che te ndarè bever in questi giorni. Fà la dessision de no bever al manco due giorni nela stimana.

 Una organisassion inglesa che no la ze del governo, che la insegna come bever alcol con responsabilità la dise: “La meio maniera par no restar vissià l’è restar con regolarità, sensa bever bebide alcòliche.”

 2. Meti in pràtica el to progeto.

 Cossa la Bìblia la dise: “Gavé de finir quel che gavé scominsià.” — 2 Corinti 8:11.

 Pensa in questo: Impara quala che l’è la mesura giusta par controlar quanto che te bevi. Compra bebide sensa alcol e che le fassa ben, che te piase e assale darente de ti.

 El Instituto Nassional de Combate al Abuso del Alcol e al Alcolismo dei Stati Unidi el dise: “Anca pìcoli cambiamenti i pol giutarte a no gaver un problema col alcol.”

 3. Fà quel che te ghè dessidio.

 Cossa che la Bìblia la dise: “Che el vostro ‘si’ el sìpia si e el vostro ‘nò,’ el sìpia nò.” — Tiago 5:12.

 Pensa in questo: Con creansa, ma de maniera sicura, sìpia dessidio a dir “nò” se qualchedun te convida a bever de pi de quel che te gavarissi de bever o in un giorno che te gavei belche dessidio de no bever.

 El Instituto Nassional de Combate al Abuso del Alcol e al Alcolismo dei Stati Unidi el dise: “Quanto pi presto te impari a dir de nò a questi conviti, pi fàcile sarà resister ala tentassion.”

 4. Conséntrate nei boni resultadi dele to dessision.

 Cossa che la Bìblia la dise: “La maniera che una roba la se finisse la ze meio che la maniera che la ga scominsià.” — Eclesiasti 7:8.

 Pensa in questo: Scrivi i motivi che te ghè par controlar quanto che te bevi. Te pol scriver anca come che te pol sparagnar soldi, dormir meio, gaver de pi salute e darse ben coi altri. Quando te parli coi altri dele to dessision conséntrate nei boni resultadi che te ghè e nò nele dificoltà.

 5. Va in serca del aiuto de Dio.

 Cossa che la Bìblia la dise: “Par tute le robe go forsa gràssie a quel che el me dà poder.” — Filipensi 4:13.

 Pensa in questo: Se te sì preocupà parché te pensi che te ghè un problema col alcol, prega a Dio e domandaghe el so aiuto. b Domandaghe la forsa e el autocontrolo e cata el tempo par imparar coi boni consili che la Bìblia la dà. Col aiuto de Dio te sarè bon de controlar quanto che te bevi.